Mark 6 — Edo ((E Baibol Ẹdo) Version 1996)

1Jesu ghi kpao vbe evba rre, rẹn vbe avbe erhuanegbe ẹre keghi gha gha rrie ẹvbo ẹre.

2Ọ ghi sẹ Ẹdẹ Ikẹtin, ọ kegha ma emwa emwi vbe uwu Ọgua ediọn. Emwa nibun wa rre evba, unu keghi yan iran hia vbe iran họn ẹmwẹ ne unu ẹnrẹn. Iran keghi suẹn gha nọ wẹẹ, “De ehe ne ọ na ruẹ ena hia yi. De egbe ẹwaẹn ne ọ na khin ne a rhie nẹ ẹn na. Vbe ọ ya winna iwinna ọyunnuan hẹẹ.

3Ọ na i re owinna ne ovbi Meri, ọtẹn e Jems, Jose, Judas kevbe Saimọn? Etiọnrẹn nikhuo i vbe gu ima rre emwa na?” Rhunmwuda ọnii, iran ma rha obọ miẹn ẹnrẹn.

4Jesu khama iran wẹẹ, “A i miẹn ehe ne a i na ya ọghọ ne akhasẹ sokpan ẹvbo ẹre ọkpa, kevbe uwu ẹgbẹe ọre, kevbe emwa owa ẹre.”

5Ọ ma sẹtin winna iwinna ọyunnuan rhọkpa vbe evba gberra wẹ, ọ viọ obọ yan avbe ọkhọnmwọ eso, ọ keghi mu iran egbe rran.

6Ọ keghi kakabọ yan ẹre unu uan rhunmwuda ighe iran i mwẹ iyayi.

7Rẹn kegha rrie avbe igue ni lẹga evba, ọ kegha ma emwa emwi. Ọ keghi tie avbe erhaunegbe iweva si koko, ọ kegha gie iran eva ladian. Ọ rhie ẹtin ne iran, ne iran ya gha khaemwisẹ vbe egbe avbe orhiọn ni ma huan, ọ yi iyi ne iran wẹẹ,

8“Wa ghẹ rhie emwi rhọkpa mwẹ vbe okhian na gberra ọkpọ, wa ghẹ rhie eka ra okpan ọvbuevbare, wa ghẹ rhie igho ye ẹkpo.

9Wa gba ibata, sokpan, wa ghẹ rhie ẹwu ọvbehe ya gba khua.”

10Ọ khama iran wẹẹ, “Wa gha la ẹvbo, wa ghi di owa ọmwa ne ọ rhirhi miẹn uwa yi ya rhinrin wa te do kpao vbe ẹvbo nii.

11Wa gha sẹ ẹvbo ighe emwa ma rhan obọ miẹn uwa ra iran ma rhie ehọ ne uwa ta yi. Wa bọnmwẹ ebubẹ ne ọ rre uwu owẹ ye evba ne uwa ladian vbe evba. Ọna gha re ama emwi ne ọ de ne iran.”

12Rhunmwuda ọnii, iran ladian ya kpe orhu wẹ ne emwa zobọ vbe emwi dan ne a ru.

13Iran khulo orhiọn esu nibun kua, iran kevbe nọnọ ori yan uhunmwu avbe ọkhọmwọ ni bun, iran keghi sinmwi iran.

14E Hẹrọd ne Ọba họn ẹmwẹ na hia rhunmwuda te otiti Jesu ghi wa gba ehe hia. Emwa eso keghi wẹ, “Jọn ne Ọsamẹ dọlegbe rhiọrre. Ọnii ọ si ẹe ne ọ na mwẹ ẹtin vbe nian.”

15Sokpan emwa ọvbehe keghi vbe kha wẹ, “Elaija nọ.” Eso vbe kha wẹ, “Akhasẹ ne ọ ye vbe egbe ne a miẹn nẹdẹ ọre nọ.”

16Sokpan ugbẹn vbe Hẹrọd họn ẹn, ọ wẹẹ, “Jọn ne Ọsamẹ nọ, I fian ẹre uhunmwu fua sokpan, ọ dọlegbe rhiọrre.”

17Hẹrọd tobọ ẹre ọre ọ wẹ ne a mu Jọn ne a gba ẹe mu fi ẹwẹdọ, Hẹrọd ru emwi na ba ẹmwẹ Hẹrodias, amwẹ ọtiọnrẹn ighe Filip ne ọ rhie rọnmwẹ.

18Jọn keghi tua unu mu ẹn gha tama Hẹrọd wẹẹ, “Ọ ma ke nu ẹn ne u rhie amwẹ ọtuẹn rọnmwẹ.”

19Rhunmwuda ọnii, Hẹrodias kegha kọn e Jọn, ọ te ho ne ọ gbẹe rua sokpan ohan Hẹrọd ma gi ẹe ru ẹe.

20Ohan Jọn kevbe mu e Hẹrọd rhunmwuda ọ rẹnrẹn ighe ọmwa ẹmwata ne ọ huanrẹn ọre Jọn khin, ọ na tan ifuẹn gue ẹre. Ẹghẹ hia ọre ọ ya ho ne ọ gha danmwehọ ẹmwẹ ne ọta, a gha rhe miẹn wẹ ẹghẹ ne ọ rhirhi ya danmwehọ hia, ọre ọ ya zẹ afianma ye ọre egbe.

21Vbe okiekie ehia, obọ Hẹrodias keghi vba emwi. Ẹdẹ ayere ẹdẹ ubiẹmwẹ Hẹrọd nọ. Hẹrọd keghi tie eka ighele kevbe eka okuo kevbe iran ni hin ukhuaẹn ni rre Galili hia sẹ owa.

22Ovbi Hẹrodias ne okhuo ghi la iku, iku ne ọ kuru keghi rhiẹnrhiẹn e Hẹrọd kevbe iran ne ọ tie sẹ owa hia. Rhunmwuda ọnii, ọba khama ọmọ okhuo nii wẹẹ, “De emwi ne I gha rhie nu ẹn? Emwi ne u rhirhi gha ho, I gha rhie nu ẹn.”

23Ọ keghi vẹn ihẹn ya yan ma rẹn, “Emwi ne u rhirhi nọọn, I gha rhie nu ẹn, a gha rhe wẹ ne a wa arriọba mwẹ ye eva nọ.”

24Ọvbokhan ni keghi ladian ya nọ iye ẹe wẹẹ, “De emwi ne I gha nọ?” Ọ wanniẹn tama rẹn wẹ, “Uhunmwu e Jọn ne Ọsamẹ.”

25Ọvbokhan nii keghi wa rhulẹ bu ọba gha khian, ọ nọ rẹn wẹẹ, “I ho ne u mu uhunmwu e Jọn ne Ọsamẹ ye ọkpan mu mẹ vbe ne i wa guan na.”

26Ẹko ọba keghi wa rhia ba ẹmwẹ na, sokpan ọ ma gi ẹe he rhunmwuda ihẹn ne ọ sirra iran ne ọ tie sẹ owa vẹn.

27Ọ keghi gie odiọnmwa ne ọ ya fian Jọn uhunmwu mu rre. Odiọnmwa nii keghi la uwu ẹwẹdọ, ọ keghi ya fian Jọn uhunmwu fua.

28Ọ keghi mu ẹn ye ọkpan mu gie ọvbokhan okhuo ni, rẹn keghi mu gie iye ẹe.

29Ugbẹn vbe avbe erhuanegbe Jọn ghi họn, iran keghi do mu ikun ẹnrẹn iran keghi ya re ẹre.

30Avbe erhuanegbe ghi werriegbe rre, iran bu Jesu gha khian. Iran keghi na iyẹn emwi ne iran ru kevbe ne iran ma emwa re ma rẹn.

31Ekhẹn ni la yo la rre keghi bun sẹrriọ wẹ Jesu kevbe avbe erhuanegbe ẹre ma miẹn otọ na rri evbare. Rhunmwuda ọnii, ọ khama iran wẹẹ, “Wa gie ima gha rrie ehe ne ọ divbiẹ ne uwa miẹn ehe na gbe ẹkun sẹ otọ hẹwẹ kherhe.”

32Rhunmwuda ọnii iran ọkpa keghi la okọ gha rrie ehe ne ọ divbiẹ.

33Sokpan emwa ni bun bẹghe iran vbe iran khian, iran keghi vbe rẹn emwa ne iran khin rhunmwuda ọnii, emwa keghi ke ẹvbo hia ladian, iran la otọ fian ke odaro ne iran, iran keghi ka sẹ ọdọ nii khẹ Jesu kevbe avbe erhuanegbe ẹre.

34Ugbẹn vbe Jesu ghi ke uwu okọ ladian, ọ miẹn emwa ni gbe ẹbu nii, ohan iran keghi to ẹe ẹsẹse rhunmwuda iran ye vbe ohuan ne ẹ i mwẹ ne ọ su ẹe. Ọ kevbe suẹn gha ma iran emwi ni bun ẹsẹse.

35Ugbẹn vbe edẹ ghi ye egbe rrie ota, avbe erhuanegbe Jesu bu ẹre rre do tama rẹn wẹẹ, “Te ẹdẹ ghi ra mu, adesẹ ẹgbo ọre a ye na.

36Zẹ avbe emwa na urrie ne iran miẹn ehe na gha rrie ẹvbo ke agọ ni lẹga ena ya dẹ evbare re.”

37Jesu wanniẹn wẹẹ, “Wa tobọ uwa rhie evbare ne iran re.” Iran nọ rẹn wẹ, “Te u wẹ ne a ya ye enaira uri dẹ ebrẹd hẹ ne iran ra?”

38Rhunmwuda ọnii, Jesu nọ iran wẹẹ, “Inu ebrẹd wa mwẹ vba? Wa ghe ẹre ghe.” Iran ghi ghe ẹre nẹ, iran tama rẹn wẹẹ, “Ebrẹd isẹn kevbe ehẹn eva.”

39Jesu keghi tama avbe erhuanegbe wẹ ne avbe emwa ni ghae egbe ye otu ne iran tota ye uhunmwu irunmwu.

40Emwa ni hia keghi tẹn uviẹn tota, eso iyisẹn eso ekigbe sẹ iyeha.

41Jesu keghi viọ ebrẹd isẹn kevbe ehẹn eva ni, ọ tọn aro mu ghe odukhunmwu, ọ keghi rhie ekpọnmwẹ ne Osanobua. Ọ keghi gia ebrẹd nii, ọ viọ ne avbe erhuanegbe ẹre ne iran gha ẹre ne emwa nii. Ọ kevbe ghae ehẹn eva ni vberriọ gba iran hia obọ.

42Dọmwadẹ oghẹ keghi re ne ẹko vuọn.

43Erhuanegbe ẹre keghi ya ne emwa re dekẹe vbe ebrẹd kevbe ehẹn ni vuọn okhuae iweva.

44Ikpia ni rri ebrẹd ni kegha re arriaisẹn isẹn.

45Vbe ọwarọkpa nii, Jesu keghi we nẹ avbe erhuanegbe la okọ ke odaro ne irẹn gha rrie Bẹtsaida ne ọ rre iyeke odighi nọkpa, ne irẹn zẹ avbe emwa ni urrie.

46Ọ ghi gbe ọ khian vbe a zẹ kpẹe ne avbe erhuanegbe nẹ, rẹn kegha rrie uhunmwu oke ne ọ ya na erhunmwu.

47Ọ ghi sẹ ẹghẹ ota, okọ ke wa gha rre adesẹ odighi sokpan Jesu ọkpa keghi rre otọ vbe ọkpẹn oke.

48Rẹn keghi miẹn wẹ okọ wa ba so avbe erhuanegbe ẹre na gua, rhunmwuda ne ẹhoho na bi iran ghe iyeke, rhunmwuda ọnii, ọ ghi rre ẹkpo ẹgogo eha kevbe ehan vbe owiẹ, ọ keghi gha ya owẹ nana uhunmwu amẹ bu iran de.

49Ugbẹn vbe iran ghi miẹn vbe ọ ye owẹ nana uhunmwu amẹ dee, iran datu wẹ, “Ghe ẹrinmwi!”

50Rhunmwuda te iran hia wa runran vbe iran dẹghe ẹre. Ọwarọkpa nii, Jesu gu iran guan wẹẹ, “Wa ghẹ gie ohan mu uwa ighe mẹ nọ.”

51Rẹn keghi bu iran vbe uwu okọ, ẹhoho na dobọyi, unu keghi yan avbe erhuanegbe ẹre.

52Iran ma he ye rẹn emwi ne a ya avbe ebrẹd ni kha, irẹnmwi iran ma sẹ evba.

53Iran keghi fian odighi rra ghe Gẹnẹsarẹt, iran keghi si okọ dee vbe evba.

54Ugbẹn vbe iran ghi ladian vbe okọ, emwa hia keghi rẹn vbe ọwarọkpa ighe Jesu nọ.

55Iran keghi wa ya owẹ kpe akpata la ẹvbo hia, iran silo avbe ọkhọnmwọ ne a ya ewa dada hia bu ẹre gha dee ehe ne iran a rhirhi họn ighe ọ ye.

56Eheikehe ne Jesu a rhirhi lao, adesẹ ẹvbo, igue, agọ, emwa hia ghi hẹ ọkhọnmwọ iran gha die adesẹ ẹki, iran ghi rinmwian ẹn ne ọ gie avbe ọkhọnmwọ ni ya obọ kan ehọ ukpọn rẹn, ne ọ ghi sẹtin ye obọ kan rẹn nẹ, egbe ghi rran rẹn.