Mark 11

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 10 Jump to: Chapter 12 →

1ଜ୍‌ଡେବ୍‌ଳ୍ ଯୀଶୁ ଆର୍ ତାର୍ ଚେଲାମ୍‌ନ୍ ଯିରୁଶାଲମ୍‌ ସ୍‍ହର୍‍ ଲ୍‌ଗେ କେଟ୍‍ଲାଇ, ସେ ଜିତ୍ ଗ୍‌ଚାର୍ ଡଙ୍ଗୁର୍ ତ୍‌ଳାର୍ ବେଥ୍‌ଫାଗୀ ଆର୍ ବେଥନିଆର୍ ଗାମ୍‍କେ ଗ୍‍ଲାଇ। ସେଡେବ୍‍ଳ୍ ଯୀଶୁ ନିଜାର୍ ଚେଲାମ୍‌ନ୍‌କାର୍ ତ୍ଇହ୍‍ଣି ଦୁଇ ଲକ୍‌କେ ଇକ୍‍ତା କ୍ଇ ହ୍‌ଟାଇଲା,

2“ତୁମାର୍‌ମ୍‌ନ୍‌କାର୍ ସାମ୍‌ନା ଲଗାର୍ ଗାମ୍‍କେ ଜାହା। ସେତି ହୁର୍‍ଲା ମାଡେ, ଯାର୍ ଉହ୍‍ରେ ଆଜିହ୍‌ତେକ୍ ବ୍‌ସି ନ୍‍ରେତି ଅନ୍‌କାର୍ ଗଟେକ୍ ଗ୍‌ଦହିଲା ତାକେ ଦାମାଇ ବାନ୍ଦି ରିଲାଇ ଦ୍‌କାସ୍‌।। ତାକେ ଇଟାଇକ୍‌ରି ଆଣା।

3ଆରେକ୍‌, ଜ୍‍ବେ କେ ହେଁ ତୁମୁକ୍‌ମ୍‌ନ୍ ‘କାଇତାକ୍ ଇରି କ୍‍ରୁଲାସ୍ ବ୍‌ଲି କଇଦ୍?’ ତ୍‍ବେ ତାକେ କ୍ଉଆ, ‘ଅମାର୍ ମାପ୍‌ରୁକେ ଇରି ଦ୍‌ର୍‌କାର୍ ଆଚେ। ସେ ବେଗି ଇତାକେ ଲେଉଟାଇ ଦ୍‌ଇଦ୍।’”

4ଚେଲାମ୍‌ନ୍ ସେ ଗାମେ ଗ୍‍ଲାଇ, ସେତି ଗଟେକ୍ ଗ୍‌ଦହିଲା ବାଟ୍ ଲ୍‌ଗାର୍ ଗ୍‍ରାର୍ କାହାଟ୍ ସାମ୍‍ନାଇ ଗଟେକ୍ କୁଟା ଲ୍‌ଗେ ବାନ୍ଦା ଅଇରିଲି ତାକେ ଇଟାଇଲାଇ।

5ସେଡେବ୍‍ଳ୍ ସେତି ଟିଆ ଅଇରିଲା ଲକ୍‍ମ୍‍ନ୍‍କାର୍ ବିତ୍‌ରେ କେ କେ ସେମ୍‍ନ୍‍‍କେ ହ୍‌ଚାର୍‌ଲାଇ, “ଗ୍‌ଦହିଲାକେ ଇଟାଇ କାଇ କ୍‍ରୁଲାସ୍?”

6ଯୀଶୁ ଜ୍‌ନ୍‌କ୍‌ରି କଇରିଲା, ସେମ୍‍ନ୍ ସେନ୍‍କ୍‌ରି ସେମ୍‍ନ୍‍‍କେ ଉତର୍ ଦିଲାଇ। ତାର୍ ହ୍‌ଚେ ଲକ୍‍ମ୍‍ନ୍ ଗ୍‌ଦହିଲାକେ ନିଆବ୍‌ଲି କଇଲାଇ।

7ଜଳେକ୍ ଚେଲା ଗ୍‌ଦହିଲାକେ ଯୀଶୁର୍ ଲ୍‌ଗେ ଆନ୍‍ଲାଇ ଆର୍ ସେମ୍‍ନ୍ ନିଜେ ହିନ୍ଦ୍‌ଲା ହ୍‍ଚିଆ ଗ୍‌ଦର୍ ହିଟି ଉହ୍‍ରେ ଡାହି ଦିଲାଇ, ଆରେକ୍‌ ଯୀଶୁ ତାର୍ ହିଟି ଉହ୍‍ରେ ବ୍‍ସ୍‍ଲା।

8ଆରେକ୍‌ ଯୀଶୁ ଗ୍‌ଦ ଉହ୍‍ରେ ବ୍‌ସି ଯିରୁଶାଲମ୍‌ ସ୍‌ହର୍ ବାଟ୍ ଗ୍‍ଲା, ଆରେକ୍‌ ବେସିଲକ୍ ଯୀଶୁର୍ ଆଗ୍‌ବାଟ୍ ନିଜାର୍ ନିଜାର୍ ହ୍‍ଚିଆକେ ବାଟେ ଅଚାଇଲାଇ, ଆର୍ ବିନ୍ ଲକ୍‍ମ୍‍ନ୍ ତାକେ ମାନ୍‍ତାର୍ ଗିନେ ହ୍‌ଦାଇ ହ୍‍ଣି ଡାଳ୍ କାଟି ଆଣିରିଲାଇ ଆର୍ ଅଚାଇ ଦିଲାଇ।

9ଆରେକ୍‌ କ୍‍ତେକ୍ ଲକ୍ ଯୀଶୁର୍ ଆଗେ ଆର୍ ହ୍‌ଚେ ଯାତିରିଲା କ୍‍ତେକ୍ ଲକ୍‍ମ୍‍ନ୍ ବେଲ୍‌କି ଅଇକ୍‍ରି କମ୍‍କେ ଲାଗ୍‍ଲାଇ, “ହସାନା! ଦାଉଦ୍ ର୍‍ଜାର୍ ବ୍ଉଶାର୍ ହିଲା! ମାପ୍‌ରୁର୍ ନାଉଁଏ ଯେ ଆସୁଲା, ସେ ଦନ୍ୟ!

10ଅମାର୍‌ମ୍‍ନ୍‍କାର୍ ହୁର୍‍ବାର୍ ଦାଉଦ୍ ର୍‍ଜା ହର୍ ଗଟେକ୍ ର୍‍ଜା ଇଶ୍ଵରାର୍ ଆଶିର୍‌ବାଦ୍‌ ସ୍‍ଙ୍ଗ୍‍ ଶାସନ୍ କ୍‌ରୁକେ ଆସୁଲା, ଇଶ୍ୱର୍‌ ଯେ ସ୍‌ର୍‌ଗ୍‌ ଲ୍‌ଗେ ରେମ୍‌ଲା ତାର୍ ହସାନା ଅଉଅ!”

11ହ୍‌ଚେ ଯୀଶୁ ଯିରୁଶାଲମ୍‌ ସ୍‌ହରେ କେ ଆସି ମନ୍ଦିରେ ହୁର୍‌ଲା। ଆରେକ୍‌ ଚାରିହାକ୍ ସ୍‍ବୁ ଜିନିଷ୍‌କେ ବ୍‌ଲ୍‌କ୍‍ରି ଦ୍‍କ୍‍ଲା ଆର୍ ସେ ସ୍‌ହରେ ହ୍‍ଣି ବାରିଗ୍‍ଲା କାଇତାକ୍ ବ୍‌ଲେକ୍ ବେସି ସ୍ଞ୍ ଅଇରିଲି। ହ୍‌ଚେ ସେ ହ୍‌ଟାଇଲା ବାରଗଟ୍ ଚେଲାମ୍‌ନ୍‌କାର୍ ସ୍‍ଙ୍ଗ୍‍ ବେଥନିଆ ଗାମ୍‍କେ ଗ୍‍ଲାଇ।

12ତାର୍ ଆର୍ ଗଟେଦିନ୍ ବେଥନିଆ ବାଟ୍ ଆସ୍‌ତାବ୍‌ଳ୍ ଯୀଶୁ ବୁକ୍ ହାଇଲା।

13ଆର୍ ସେ ଦୁରିହ୍‍ଣି ଗଟେକ୍ ଡୁମ୍ବୁର୍ ଗ୍‌ଚ୍ ଦ୍‍କି, କେଜାଣ୍ ସେ ସେତି ହ୍‍ଳ୍ ମିଳେଦ୍ ବ୍‌ଲି ଆଶାକ୍‌ରି ଗ୍‍ଲା। ମ୍‍ତର୍ ଲ୍‌ଗେ ଆସି ଦ୍‍କ୍‍ଲା ଚୁଚାଇ ହ୍‍ତାର୍ ସେ ସେତିରିଲି, କାଇତାକ୍ ସେଡେବ୍‍ଳ୍ ଡୁମ୍ବୁର୍ ହ୍‌ଳ୍‍ତା ଦିନ୍ ନ୍‌ରିଲି।

14ତ୍‍ବେ ଯୀଶୁ ସେ ଗ୍‌ଚ୍‌କେ କଇଲା, “ଆରେକ୍‌ କ୍‍ବେହେଁ ତୁଇ ହ୍‍ଳ୍ ଦ୍‌ର୍ ନାଇ।” ତାର୍ ଚେଲାମ୍‌ନ୍ ଇକ୍‍ତା ଶୁଣ୍‍ଲାଇ।

15ତାର୍ ହ୍‌ଚେ ଯୀଶୁ ଆର୍ ତାର୍ ଚେଲାମ୍‌ନ୍ ଯିରୁଶାଲମ୍‌ ସ୍‌ହର୍‌କେ ଆଇଲାଇ, ଆରେକ୍‌ ଯୀଶୁ ମନ୍ଦିରେ ହୁରିକ୍‌ରି ସେ ଜାଗାଇ କିଣାବିକା କ୍‌ର୍‌ତା ଲକ୍‌ମ୍‍ନ୍‌କେ ହ୍‌ଦାଇ ବାର୍ କ୍‌ରିଦେମ୍‍କେ ଲାଗ୍‌ଲା। ଆରେକ୍‌, ଡାବୁ ବେପାରି ମ୍‌ନ୍‌କାର୍ ଟେବୁଲ୍ ଆର୍ ହାରୁଆ ବେପାରି ମ୍‌ନ୍‌କାର୍ ଜାଗା ଉଲ୍‌ଟାଇ ହ୍‌କାଇଲା।

16ଆରେକ୍‌ ମନ୍ଦିର୍ ସ୍‍କ୍‍ଳାଇ ବିତ୍‌ରେ କାକ୍ ହେଁ ଜିନିଷ୍ ହତାର୍ ଶାସ୍‌ତର୍‌ ନେମ୍‍କେ ଦ୍‌ଇନ୍‌କେଲା।

17ଆରେକ୍‌, ସେ ସେମ୍‍ନ୍‍‍କେ ଶିକ୍ୟା ଦେମ୍‍ ଦେମ୍‍ କଇଲା, “ଇରିକାଇରି ପବିତର୍‌ ଶାସ୍‌ତର୍ ତ୍‌ଇ ଲେକା ନଇ, ‘ମର୍ ଗ୍‍ର୍ ସ୍‍ବୁ ଜାତିର୍‌ ଗିନେ ପାର୍‌ତେନା ମନ୍ଦିର୍ ବ୍‌ଲି କ୍ଉଆ ଅଇଦ୍’? ମ୍‍ତର୍ ତୁମିମ୍‍ନ୍ ଇ ଗ୍‌ର୍‌କେ ଚର୍ ମ୍‌ନ୍‌କାର୍ ଲୁକ୍‍ତା ଜାଗା କ୍‍ରିଆଚାସ୍।”

18ମୁକିଆ ଜାଜକ୍ ଆର୍ ମୋଶାର୍ ନିଆଇ ଶିକାଉତା ଲକ୍‍ମ୍‍ନ୍ ଇରି ଶୁଣି ତାକେ କ୍‍ନ୍‍କ୍‍ରି ନାସ୍ କ୍‌ରୁହାର୍‌ତି, ସେରି ଚେଷ୍ଟା କ୍‌ରୁକେ ଲାଗ୍‍ଲାଇ। କାଇତାକ୍ ଲକ୍‍ମ୍‍ନ୍ ତାର୍ ଶିକ୍ୟା ଗିନେ କାବା ଅଉତି ରିଲାକେ ସେମ୍‍ନ୍ ତାକେ ଡିର୍‍ତି ରିଲାଇ।

19ସେ ଦିନ୍ ସ୍ଞ୍ ଅଇଲାକେ ଯୀଶୁ ଆର୍ ତାର୍ ଚେଲାମନ୍ ସେ ସ୍‌ହର୍ ଚାଡି ସମ୍‍କେ ବେଥନିୟା ଗାମେ ବାରିଗଲାଇ।

20ତାର୍ ସ୍‌କାଳ୍‌ ସେବାଟ୍ ଦ୍‌ଇ ଜାତାବ୍‍ଳ୍ ସେମ୍‌ନ୍ ଡୁମ୍ବୁର୍ ଗ୍‌ଚ୍‌କେ ବୁନ୍ଦେ ହ୍‌ଣି ଚେର୍ ଶୁକିରିଲାର୍ ଦ୍‍କ୍‍ଲାଇ।

21ସେତାକ୍ ପିତର୍ ହୁର୍‍ବାର୍ କ୍‌ତା ମ୍‌ନେ ହ୍‍କାଇ କ୍‍ରି ଯୀଶୁକେ କଇଲା, “ଏଗୁରୁ, ଦ୍‍କ୍! ତୁଇ ଜୁଇ ଡୁମ୍ବୁର୍ ଗ୍‌ଚ୍‌କେ ଆନ୍‍ହାଳି ରିଲିସ୍, ସେରି ବୁନ୍ଦେ ହ୍‍ଣି ଶୁକି ଗ୍‌ଲିନି।”

22ଯୀଶୁ ସେମ୍‍ନ୍‍‍କେ ଉତର୍‍ଦିଲା, “ଇଶ୍ଵରାର୍ ତ୍‌ଇ ବିଶ୍‌ବାସ୍‌ କ୍‍ରା।

23ମୁଇ ତୁମୁକ୍‌ମ୍‌ନ୍ ସ୍‌ତ୍ କ୍‌ମ୍‌ଲେ, ମ୍‍ତର୍ ଯଦି ଇ ଡଙ୍ଗୁର୍‍କେ ହେଁ ତୁଇ ଉଟିକ୍‍ରି ସ୍‌ମ୍‍ଦୁରେ ଜାଇ ଅଦୁର୍ ବ୍‍ଲି କ୍ଉସି, ସେରି କଇଲେକ୍ ସେରି ଗ୍‌ଟେଦ୍। ଆର୍ ନିଜାର୍ ମ୍‌ନେ ଡାଉଟ୍ କ୍‍ରାନାଇ, ଜାଇରି କ୍‌ମ୍‌ଲେ, ସେରି ଗ୍‌ଟେଦ୍ ବ୍‍ଲି ବିଶ୍‌ବାସ୍‌ କ୍‌ଲେକ୍ ତାର୍ ଗିନେ ସେରି ଗ୍‌ଟେଦ୍।

24ତ୍‍ବେ ମୁଇ ତୁମୁକ୍‌ମ୍‌ନ୍ କ୍‌ମ୍‌ଲେ, ତୁମିମ୍‍ନ୍ ଜୁଇ ଜୁଇ ପାର୍‌ତେନା କ୍‍ରି ମାଗାସ୍, ସେରି ସ୍‍ବୁ ହାଇଆଚୁ ବ୍‌ଲି ବିଶ୍‌ବାସ୍‌ କ୍‍ରା, ସେଡେବ୍‍ଳ୍ ସେ ସ୍‍ବୁ ହାଉଆସ୍।

25ଆରେକ୍‌, ତୁମିମ୍‍ନ୍ ଜ୍‌ଡେବ୍‌ଳ୍ ହେଁ ପାର୍‌ତେନା କ୍‌ରୁକେ ଟିଆ ଅଉଆସ୍, ଯଦି କାଆର୍ ବିରୁଦେ ତୁମାର୍‌ମ୍‌ନ୍‌କାର୍ କାଇକ୍‌ତା ର୍‌ଇଦ୍, ତ୍‍ବେ ସେ ଲକ୍‌କେ କେମା କ୍‍ରା, ଜ୍‌ନ୍‌କ୍‌ରି ତୁମାର୍‌ମ୍‌ନ୍‌କାର୍ ସ୍‌ର୍‌ଗାର୍ ଉବା ତୁମି କ୍‍ଲା ଦସ୍ ସ୍‍ବୁ କେମା କ୍‍ରେଦ୍।

26ମ୍‌ତର୍ ତୁମିମ୍‍ନ୍ ଯଦି କେମା ନ୍‌କେରାସ୍, ତ୍‍ବେ ତୁମାର୍ ସ୍‌ର୍‌ଗ୍‌ ଲ୍‌ଗେରିଲା ଉବା ହେଁ ତୁମାର୍ ସ୍‌ବୁ ପାପ୍‌କେ କେମା ନ୍‌କେରେ।”

27ହ୍‌ଚେ ଯୀଶୁ ଆର୍ ତାର୍ ଚେଲାମ୍‌ନ୍ ଆର୍ ଗଟେତର୍ ଯିରୁଶାଲମ୍‌‍କେ ଆଇଲାଇ। ଆରେକ୍‌ ସେ ମନ୍ଦିର୍ ସ୍‍କ୍‍ଳାଇ ବୁଲ୍‌ତାବ୍‌ଳ୍ ମୁକିଆ ଜାଜକ୍, ମୋଶାର୍ ନିଆଇ ଶିକାଉତା ଲକ୍ ଆର୍ ପାରାଚିନ୍‍ମ୍‍ନ୍ ତାର୍ ଲଗେ ଆସି ହଚାର୍ ଲାଇ,

28“ତୁମି କୁଇ ଅଦିକାରେ ଇସ୍‌ବୁକାମ୍ କ୍‍ରୁଲାସ୍? ଆର୍ ତକେ କେ ଇ ଅଦିକାର୍ ଦିଲା?”

29ମତର୍ ଯୀଶୁ ସେମ୍‍ନ୍‍‍କେ କଇଲା, “ମୁଇ ତୁମୁକ୍‌ମ୍‌ନ୍ ଗଟେକ୍ କ୍‌ତା ହ୍‌ଚାରିନ୍ଦ୍, ଯଦି ତୁମି ମକେ ଉତର୍ ଦିଆସ୍, ତବେସେରୀ ମୁଇ କାଇ ଅଦିକାର୍ ସ୍‌ଙ୍ଗେ ଇସବୁ କାମ୍ କ୍‌ରୁଲେ, ସେରି ତୁମୁକେ ମୁଇ କଇନ୍ଦ୍।

30ଯୋହନାର୍ ଡୁବେନ୍ ଦେତା ଅଦିକାର୍ ସ୍‌ର୍‌ଗେ ହ୍‍ଣି ଇଶ୍ୱର୍‌ ଦ୍‌ଇରିଲା କି ମାନାଇମ୍‌ନ୍‌କାର୍ ତ୍‌ଇହ୍‌ଣି ଅଇରିଲି? ମକେ କୁଆ।”

31ସେଡେବଳ୍ ସେମ୍‍ନ୍ ନିଜାର୍ ନିଜାର୍ ବିତ୍‌ରେ ଚିଡ୍‍ହଡ୍ ଅଇ କ୍‍ମ୍‍କେ ଲାଗ୍‍ଲାଇ, “ଯଦି ଅମି ସ୍‌ର୍‌ଗେ ହ୍‍ଣି ବ୍‌ଲି କ୍‌ମ୍‍ନ୍ଦେ, ସେରି ଅଇଲେକ୍ ସେ କଇଦ୍, ‘ତ୍‍ବେ ତୁମିମ୍‍ନ୍ କାଇତାକ୍ ତାକେ ବିଶ୍‌ବାସ୍‌ ନ୍‌କେଲାସ୍?’

32ନ୍‌ଇଲେକ୍ ‘ମାନାଇ ତ୍ଇହ୍‍ଣି’ ବ୍‌ଲି କାଇରି କ୍‍ମା?” ସେମ୍‍ନ୍ ଅନ୍‌କାର୍ ଉତର୍ ଦେମ୍‌କେ ନାହାର୍‍ଲାଇ। କାଇତାକ୍ ସେମ୍‍ନ୍ ଲକ୍‌ମ୍‍ନ୍‌କେ ଡିର୍‍ତେ ରିଲାଇ। କାଇତାକ୍ ସ୍‍ବୁ ଲକ୍‍ମ୍‍ନ୍ ଯୋହନ୍‍କେ ଗଟେକ୍ ଇଶ୍ଵରାର୍ ସ୍‌ତ୍ ବବିଶତ୍ କ୍‌ତା କ୍‌ଉତାଲକ୍ ବ୍‌ଲି ମାନ୍‍ତି ରିଲାଇ।

33ସେତାର୍‌ଲାଗି ସେମ୍‍ନ୍ ଯୀଶୁକେ ଉତର୍ ଦିଲାଇ, “ଅମିମ୍‍ନ୍ ନ୍‍ଜାଣୁ।” ଯୀଶୁ ସେମ୍‍ନ୍‍‍କେ କଇଲା, “ତ୍‍ବେ ମୁଇ କୁଇ ଅଦିକାରେ ଇ ସ୍‌ବୁ କ୍‌ରୁଲେ, ହାଇରି ମୁଇ ହେଁ ତୁମୁକ୍‍ମ୍‌ନ୍‍କେ କ୍ଇ ନ୍‌କେରି।”

← Chapter 10 Jump to: Chapter 12 →