bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Bodo
/
Bodo BDVNT (ବ୍ଡ଼୍ ହ୍ର୍ଜା ବାଇବଲ)
/
Mark 8
Mark 8
Bodo BDVNT (ବ୍ଡ଼୍ ହ୍ର୍ଜା ବାଇବଲ)
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 9 →
1
ସେଡେବ୍ଳ୍ ବେସି ଲକ୍ମ୍ନ୍ ଯୀଶୁର୍ ଲ୍ଗେ ଆସି ଗଟେତ୍ଇ ରୁଣ୍ଡ୍ଲାଇ, ଆରେକ୍ ସେମ୍ନ୍କାର୍ ଲ୍ଗେ କାଦି କ୍ଣ୍ତା କାଇରି ନ୍ରିଲି ଲାଗି, ଯୀଶୁ ଚେଲାମ୍ନ୍କେ ଲ୍ଗେ କୁଦି ସେମ୍ନ୍କେ କଇଲା,
2
ଲକ୍ମନ୍କାର୍ ଗିନେ ମର୍ ମ୍ନେ ଦୟା ଅମ୍ଲି, କାଇତାକ୍ ଇ ଲକ୍ମ୍ନ୍ ତିନିଦିନ୍ ଅଇଦେ ମର୍ଲ୍ଗେ ଆତ୍ତି ଆର୍ ଇ ସ୍ବ୍କାର୍ ଲ୍ଗେ କାମ୍କେ କାଇରି ହେଁ ନାଇ।
3
“ମୁଇ ଯଦି ସେମ୍ନ୍କେ ନ୍କାଳାଇ କ୍ରି ବୁକେ ଗ୍ରେ ହ୍ଟାଇନ୍, ସେନ୍ଅଇଲେକ୍ କ୍ତେକ୍ ଲକ୍ ତ ଦୁରିହ୍ଣି ଆଇଲାଇ ଆତ୍ତି, ଜାତାବ୍ଳ୍ ସେମ୍ନ୍କେ ବାଟେ ଚେତା ଆଜି ଜାଇଦେ।”
4
ଚେଲାମ୍ନ୍ ଯୀଶୁକେ କଇଲାଇ, “ଇତି ଇ ଚିମ୍ରା ଜାଗାଇ ଶୁନ୍ସାନ୍ ଟାଣେ କୁଇତିହ୍ଣି ଅତେକ୍ ରୁଟି ଆଣି ଏମ୍ନ୍କେ ହେଟ୍ ହୁରାମ୍ ହାରୁ?”
5
ଯୀଶୁ ଚେଲାମ୍ନ୍କେ ହ୍ଚାର୍ଲା, “ତୁମାର୍ ଲ୍ଗେ କ୍ତିଗଟ୍ ରୁଟି ଆଚେ?” ସେମ୍ନ୍ କଇଲାଇ, “ଅମାର୍ ଲ୍ଗେ ସାତ୍ଗଟ୍ ରୁଟି ଆଚେ।”
6
ସେଡେବ୍ଳ୍ ଯୀଶୁ ସ୍ବୁ ଲକ୍ମ୍ନ୍କେ ବୁଏଁ ବ୍ସୁକେ ଆଦେଶ୍ ଦିଲା। ତାର୍ ହ୍ଚେ ସେ ସାତ୍ଗଟ୍ ରୁଟି ଆଣି ଇଶ୍ଵର୍କେ ଦନ୍ୟବାଦ୍ ଦ୍ଇ ସେ ସ୍ବୁ ରୁଟି ଚିଡାଇ କ୍ରି ବାଟା କ୍ରୁକେ ନିଜାର୍ ଚେଲାମ୍ନ୍କେ ଦିଲା ଆର୍ ସେମ୍ନ୍ ସ୍ବୁ ଲକ୍ମ୍ନ୍କେ ବାଟାକ୍ରି ଦିଲାଇ।
7
ଆରେକ୍, ସେମନ୍କାର୍ ଲଗେ କ୍ତିଗଟ୍ ସାନ୍ ମାଚ୍ ରିଲି। ସେ ମାଚ୍ ମ୍ନ୍କେ ହେଁ ସେ ଇଶ୍ଵର୍କେ ଦନ୍ୟବାଦ୍ ଦ୍ଇକ୍ରି ବାଟାକ୍ରିଦେମ୍କେ କଇଲା।
8
ସେଡେବ୍ଳ୍ ଲକ୍ମ୍ନ୍ ହେଟ୍ ହୁର୍ନେ କାଇଲାଇ ଆର୍ ସାତ୍ ଡ୍ଲା ଉବୁର୍ଲା ଚିଡାଇଲା ରୁଟି ବେଟ୍ଲାଇ।
9
ସେମ୍ନ୍ ପାକାପାକି ଚାରିହ୍ଜାର୍ ଲକ୍ ରିଲାଇ।
10
ତାର୍ ହ୍ଚେ ଯୀଶୁ ଲକ୍ମ୍ନ୍କେ ହ୍ଟାଇ ଦିଲା ଆର୍ ସେମାଡେ ନିଜାର୍ ଚେଲାମ୍ନ୍କାର୍ ସ୍ଙ୍ଗ୍ ଡଙ୍ଗାଇ ଚ୍ଗି ଦଲମନୂଥା ନାଉଆର୍ ଗଟେକ୍ ଜିଲାଇ ଆଇଲାଇ।
11
ହ୍ଚେ ଫାରୂଶୀମ୍ନ୍ ବାରିଆସି ଯୀଶୁର୍ ସ୍ଙ୍ଗ୍ ଯୁକ୍ତି ତର୍କ କ୍ରୁକେ ଲାଗ୍ଲାଇ ଆର୍ ତାକେ ହାନ୍ଦାଇ ହ୍କାମ୍କେ ପରିକ୍ୟା କ୍ରି ସ୍ର୍ଗେ ହ୍ଣି ଗଟେକ୍ ଚିନ୍ ଦ୍କାମ୍କେ କଇଲାଇ।
12
ସେଡେବ୍ଳ୍ ଯୀଶୁ ନିଜାର୍ ଜୀବନ୍ ଦୁକ୍ଲାର୍ ଗିନେ ହୁଣ୍ଡତାର୍ ଚାଡି କଇଲା, ଅବାର୍ ଲକ୍ କାଇତାକ୍ ଚମ୍ତ୍କାର୍ ଚିନ୍ ସେମ୍ନ୍ କଜୁଲାଇ? “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଅବାର୍ ଲକ୍କେ କାଇ ଚମ୍ତ୍କାର୍ ଚିନ୍ ଦିଆ ନଇ।”
13
ଆରେକ୍, ଯୀଶୁ ଫାରୂଶୀମ୍ନ୍କେ ଚାଡି ଆର୍ ଗଟେତର୍ ଡଙ୍ଗାଇ ଚ୍ଗ୍ଲା ଆର୍ ସେମ୍ନ୍ ଗାଲିଲୀ ଜିଲାର୍ ସ୍ମ୍ଦୁର୍ ଦ୍ଇ ସେହାଟିକେ ବାରିଗ୍ଲାଇ।
14
ସେଡେବ୍ଳ୍ ଯୀଶୁର୍ ଚେଲାମ୍ନ୍ ରୁଟି ନେମ୍କେ ହାସୁର୍ଲାଇ। ମ୍ତର୍ ଡଙ୍ଗାଇ ସେମ୍ନ୍କାର୍ ଲ୍ଗେ ଗଟେକ୍ ରୁଟି ରିଲି।
15
ହ୍ଚେ ଯୀଶୁ ଚେଲାମ୍ନ୍କେ ଅଟୁଆ ଆଦେଶ୍ ଦିଲା, “ଜାଗ୍ରତ୍ ଅଉଆ, ଫାରୂଶୀମ୍ନ୍କାର୍ ଆର୍ ହେରୋଦ୍ ର୍ଜାର୍ ସଡା ତ୍ଇ ସାବ୍ଦାନ୍ ଅଇରିଆ।”
16
ସେଡେବ୍ଳ୍ ସେମ୍ନ୍ ନିଜାର୍ ନିଜାର୍ ବିତ୍ରେ ଚିଡ୍ହଡ୍ ଅଇ କ୍ମ୍କେ ଲାଗ୍ଲାଇ, ଅମାର୍ ଲ୍ଗେ ରୁଟି ନାଇବ୍ଲି ସେ ଇରି କ୍ମ୍ଲା।
17
ଯୀଶୁ ସେରି ଜାଣି ଚେଲାମ୍ନ୍କେ କଇଲା, “ତୁମାର୍ ଲ୍ଗେ ରୁଟି ନାଇବ୍ଲି କାଇତାକ୍ ନିଜାର୍ ନିଜାର୍ ବିତ୍ରେ ଚିଡ୍ହଡ୍ ଅମ୍ଲାସ୍? କାଇରି ତୁମିମ୍ନ୍ ଅବେହ୍ତେକ୍ ମକେ ନ୍ଜାଣାସ୍ କି ମର୍କ୍ତା ନ୍ବୁଜାଶ୍?
18
ତୁମାର୍ ମ୍ନ୍ କାଇରି ଅଟୁଆ ଅଇଲିଆଚେ? ଆକି ରେମ୍ ରେମ୍ କାଇରି ଦ୍କୁ ନ୍ହାରୁଲାସ୍? ଆର୍ କାନ୍ ରେମ୍ ରେମ୍ କାଇରି ଶୁଣୁ ନ୍ହାରୁଲାସ୍?
19
ସେ ହାଁଚ୍ ହ୍ଜାର୍ ଲକ୍କେ ହାଁଚ୍ଗଟ୍ ରୁଟି ଚିଡାଇ ରିଲା, ସ୍ଡେବ୍ଳ୍ ତୁମିମ୍ନ୍ କ୍ତି ଡ୍ଲାଇ ବାଙ୍ଗି ରିଲା ରୁଟି କ୍ଣ୍ତ୍ ବେଟି ନ୍ଇରିଲାସ୍, ସେରି କି ତୁମୁକେ ମ୍ନେ ନାଇ?” ସେମ୍ନ୍ ତାକେ କଇଲାଇ, “ବାର ଡ୍ଲା।”
20
“ଆରେକ୍ ସେ ଚାରିହ୍ଜାର୍ ଲକ୍ମ୍ନ୍କେ ସାତ୍ଗଟ୍ ରୁଟି ଚିଡାଇ ରିଲେ, ସେଡେବ୍ଳ୍ ତୁମିମ୍ନ୍ କ୍ତିଗଟ୍ ଡ୍ଲାଇ ବ୍ର୍ତି ବାଙ୍ଗି ରିଲା ରୁଟି କ୍ଣ୍ତ୍ ବେଟି ନ୍ଇରିଲାସ୍?” ଚେଲାମ୍ନ୍ କଇଲାଇ, “ସାତ୍ ଡ୍ଲା।”
21
ସେଡେବ୍ଳ୍ ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ଅବେହ୍ତେକ୍ ବୁଜି ନକେରାସ୍ ମୁଇ କେ?”
22
ହ୍ଚେ ଯୀଶୁ ଆର୍ ଚେଲାମ୍ନ୍ ବେଥ୍ସାଇଦା ସ୍ହର୍କେ ଆଇଲାଇ। ଆରେକ୍, ଗଟେକ୍ କାଣା ଲକ୍କେ ଯୀଶୁର୍ ଲଗେ ଆଣି ସେ ବ୍ଲ୍ ଅଉତାର୍ ଗିନେ ତାକେ ଚୁଉତା ହାଇଁ ଗ୍ୱାର୍ଲାଇ।
23
ସେତାକ୍ ଯୀଶୁ କାଣାର୍ ଆତ୍ ଦ୍ରି ତାକେ ଗାମ୍ ବାହାରେ ନିଲା, ଆରେକ୍ ତାର୍ ଆକିଏ ନିଜାର୍ ଲାଳ୍ ଲାଗାଇ ଆର୍ ତାର୍ ଉହ୍ରେ ଆତ୍ ସ୍ଙ୍ଗାଇ ତାକେ ହ୍ଚାର୍ଲା, “ତୁଇ କାଇରି ଦ୍କୁଲିସ୍?”
24
କାଣା ଦ୍କିକ୍ରି କଇଲା, “ମୁଇ ଲକ୍ମ୍ନ୍କେ ଦ୍କୁଲେ ମ୍ତର୍ ବେସି ବ୍ଲ୍କ୍ରି ଦ୍କୁ ନ୍ହାରୁଲେ, କାଇତାକ୍ ସେମ୍ନ୍ ଗ୍ଚ୍ ଇଣ୍ଡ୍ଲା ହର୍ ମକେ ଡିସୁଲାଇ।”
25
ତାର୍ ହ୍ଚେ ଯୀଶୁ ଆରେକ୍ କାଣାର୍ ଆକିଏ ଆତ୍ ସ୍ଙ୍ଗାଇଲା। ହ୍ଚେ ସେ କାଣା ନିକାକ୍ରି ଦ୍କ୍ଲା ଆର୍ ବ୍ଲ୍ ଅଇ ଗଟେତ୍ଇ ସ୍ବୁକ୍ତା ଦ୍କୁକେ ଲାଗ୍ଲା।
26
ହ୍ଚେ ଯୀଶୁ କାଣାକେ ତାର୍ ଗ୍ରେ ଜ୍ମ୍କେ କଇଲା, “ଇଗାମ୍ ବିତୁର୍କେ ହେଁ ଜା ନାଇ।”
27
ଇତାର୍ ହ୍ଚେ ଯୀଶୁ ଆର୍ ତାର୍ ଚେଲାମ୍ନ୍ କାଇସରିୟା ଫିଲିପୀ ବାଟାର୍ ଗାମେ ଗ୍ଲାଇ, ଆରେକ୍ ର୍ସ୍ତା ଲ୍ଗେ ଯୀଶୁ ନିଜାର୍ ଚେଲାମ୍ନ୍କେ ହ୍ଚାରୁକେ ଲାଗ୍ଲା, “ମୁଇ କେ ବ୍ଲି ଲକ୍ମ୍ନ୍ ମର୍ ବିଷୟେ କ୍ମ୍ଲାଇ?”
28
ଇତାର୍ଗିନେ ଚେଲାମ୍ନ୍ ତାକେ କଇଲାଇ, “କେ କେ କ୍ମ୍ଲାଇ ଡୁବେନ୍ ଯୋହନ୍, ଆରେକ୍ କେ କେ ଏଲିୟ, ଆର୍ କେ କେ କ୍ମ୍ଲାଇ, ଆଗାର୍ ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ବିତ୍ରେ ଏ ଗଟେକ୍ ବବିଶତ୍ କ୍ତା କ୍ଉତାଲକ୍।”
29
ଯୀଶୁ ସେମ୍ନ୍କେ ହ୍ଚାର୍ଲା, “ମ୍ତର୍ ମୁଇ କେ ବ୍ଲି ତୁମିମ୍ନ୍ ବାବୁଲାସ୍?” ପିତର୍ ତାକେ ଉତର୍ଦିଲା, “ତୁଇ ଇଶ୍ୱର୍ ଲ୍ଗେ ହ୍ଣି ହ୍ଟାଇଲା ଖ୍ରୀଷ୍ଟ।”
30
ସେଡେବ୍ଳ୍ ଯୀଶୁ ସେମ୍ନ୍କେ ତାର୍ ବିଷୟେ କାକେ କାଇରି ନ୍କମ୍କେ ଡାଟ୍କ୍ରି ଆଦେଶ୍ ଦିଲା।
31
ଆରେକ୍, ଯୀଶୁ ନିଜାର୍ ଚେଲାମ୍ନ୍କେ ଶିକ୍ୟା ଦେମ୍କେ ଲାଗ୍ଲା ଯେ, ମାନାଇ ହିଲାକେ ବେସି ଦୁକ୍କ୍ଷ୍ଟ କ୍ରୁକେ ଅଇଦେ ଆର୍ ପାରାଚିନ୍, ଯିହୁଦିମ୍ନ୍କାର୍ ମୁକିଆ ଜାଜକ୍ ଆର୍ ମୋଶାର୍ ନିଆଇ ଶିକାଉତା ଲକ୍ମ୍ନ୍ ତାକେ ନ୍ମାନ୍ତି, ଆର୍ ସେମ୍ନ୍ ତାକେ ମ୍ର୍ନେ ମାରୁକେ ଅଇଦ୍ ଆରେକ୍, ସେ ତିନ୍ଦିନ୍ ହ୍ଚେ ଆର୍ ଗଟେତର୍ ଜୀବନ୍ ହାମ୍କେ ଅଇଦ୍।
32
ଇକ୍ତା ସେ ବ୍ଲ୍କ୍ରି ବୁଜାଇ କଇଲା। ସେଡେବ୍ଳ୍ ପିତର୍ ଯୀଶୁକେ ଗଟେକ୍ ଜାଗାଇ କୁଦିନ୍ଇ ଯୀଶୁ ନିଜାର୍ ମ୍ର୍ତା କ୍ତା କଇଲାକେ ତାକେ ଉଳୁକେ ଲାଗ୍ଲା।
33
ମ୍ତର୍ ସେ ବୁଲିକ୍ରି ନିଜାର୍ ଚେଲାମ୍ନ୍କେ ଦ୍କି ପିତର୍କେ ଦ୍ମ୍କାଇ କ୍ରି କଇଲା, “ରେ ଶଇତାନ୍!, ମର୍ ମୁଏ ହ୍ଣି ଦୁର୍ ଅଉଅ, କାଇତାକ୍ ତୁଇ ଇଶ୍ୱର୍ ବିଷୟ୍ ନ୍ବାବି ଲକାର୍ ବିଷୟ୍ ବାବୁଲିସ୍।”
34
ସେମାଡେ ଯୀଶୁ ନିଜାର୍ ଚେଲାମନ୍କାର୍ ସ୍ଙ୍ଗ୍ ଲକ୍ମ୍ନ୍କେ ଲ୍ଗେ କୁଦି କଇଲା, “କେ ଯ୍ଦି ମର୍ ଚେଲା ଅମ୍କେ ମ୍ନ୍କ୍ରେଦ୍, ତ୍ବେ ସେ ନିଜାର୍ ସ୍ବୁ ଇଚାକେ ଚାଡିକ୍ରି କୁର୍ଶର୍ ଦୁକ୍ ହର୍ ଦୁକ୍ ବଗୁକେ ତିଆର୍ ଅଇ ମର୍ହ୍ଚେ ଆସ।
35
କାଇତାକ୍ ଯେ ହେଁ ଇ ଜଗ୍ତେ ନିଜାର୍ ଜୀବନ୍କେ ଉଦାର୍ କ୍ରୁକେ ଚେଷ୍ଟା କ୍ରେଦ୍, ସେ ତାର୍ ନିଜାର୍ ଜୀବନ୍କେ ଆରାଇଦ୍। ମ୍ତର୍ ଯେ କେ ମର୍ ଆର୍ ମର୍ ସୁବ୍କ୍ବର୍ ଗିନେ ନିଜାର୍ ଜୀବନ୍କେ ଆରାଇଦ୍, ସେ ତାର୍ ନିଜାର୍ ଜୀବନ୍କେ ଉଦାର୍ କ୍ରେଦ୍।
36
ଆରେକ୍ ମାନାଇ ଯ୍ଦି ସ୍ବୁ ଜ୍ଗତ୍କେ ହାଇ ନିଜାର୍ ଜୀବନ୍କେ ଆରାଇଦ୍, ତ୍ବେ ତାର୍ କାଇଲାବ୍?
37
ଆରେକ୍, ଲକ୍ ନିଜାର୍ ନ୍ସେର୍ତା ଜୀବନ୍ ହାଉତା ବାଦୁଲେ ମାପ୍ରୁକେ କାଇରି ଦେମ୍ହାରେ?
38
ତ୍ବେ ଯେ ହେଁ ଇ ବେଳାର୍ ଦାରିକାମ୍ କ୍ର୍ତା ଲକ୍ ଆର୍ ପାପି ଲକ୍ମନ୍କାର୍ ବିତ୍ରେ ମର୍ ଆର୍ ମର୍ କ୍ତାର୍ ଗିନେ ଲାଜ୍ କ୍ରେଦ୍, ତ୍ବେ ଜ୍ଡେବ୍ଳ୍ ମୁଇ ମାନାଇ ହିଲା ପବିତର୍ ଦୂତ୍ମ୍ନ୍କାର୍ ସ୍ଙ୍ଗ୍ ମର୍ ଉବାର୍ ସ୍ର୍ଦା ସ୍ଙ୍ଗ୍ ଆସିନ୍, ସେଡେବ୍ଳ୍ ମୁଇ ହେଁ ସେମ୍ନାର୍ ଗିନେ ଲାଜ୍ କ୍ରାଇନ୍।”
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 9 →
All chapters:
1
2
3
4
5
6
7
8
9
10
11
12
13
14
15
16
Recommended Reading
Commentary
Mark Commentaries
→
Devotional
Mark Devotional Guide
→
Get This Bible
Bodo BDVNT (ବ୍ଡ଼୍ ହ୍ର୍ଜା ବାଇବଲ) Study Bible
→