Mark 5

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

1ହ୍‌ଚେ ଯୀଶୁ ସ୍‍ମ୍‍ଦୁର୍ ଲିଙ୍ଗି ଚେଲାମ୍‌ନ୍ ଗାଲିଲୀ ଜିଲାର୍ ସେହାଟି ଗରାଶିୟ ମ୍‌ନ୍‌କାର୍ ସ୍‌ହରେ କେଟ୍‍ଲା।

2ଯୀଶୁ ଡଙ୍ଗାଇ ହ୍‍ଣି ଉତୁର୍‍ଲା ମାଡେ ଗଟେକ୍ ବୁତ୍‌ଆତ୍ମା ଡ୍‍ସ୍‍ଲା ଲକ୍ ମ୍‍ସ୍‍ଣେ ହ୍‍ଣି ବାରି ତାକେ ବେଟ୍‍ଲାଇ।

3ସେ ମ୍‌ସୁଣ୍ ହାରେ ରେତିରିଲା, ଆରେକ୍‌, କେ ତାକେ ଲ୍ଉଆର୍ ସିକ୍‍ଳି ଲ୍‌ଗେ ହେଁ ବାନ୍ଦୁ ନାହାର୍‌ତି ରିଲାଇ,

4ମ୍‍ତର୍ ସେ ବେସିତର୍ ଲ୍ଉଆର୍ ସିକ୍‍ଳି ଆର୍ ଲ୍ଉଆର୍ ଜାଞ୍ଜିର୍ ବାନ୍ଦା ଅଇରିଲି, ମ୍‍ତର୍ ସେ ସିକ୍‍ଳି କେ ଚିଡାଇ କ୍‍ରି ଲ୍ଉଆର୍ ଜାଞ୍ଜିର୍ ସ୍‍ବୁ କ୍‍ଣ୍ତ୍ କ୍‍ଣ୍ତ୍ କ୍‍ରି ବାଙ୍ଗି ହ୍‌କାଉତି ରିଲା ଆରେକ୍‌ ତାକେ ତେବାମ୍‌କେ କାର୍ ହେଁ ଶ୍‌କ୍‌ତି ନ୍‌ରିଲି।

5ସେ ସ୍‌ବୁବ୍‍ଳ୍ ଦିନ୍‍ରାତି ମ୍‍ସ୍‍ଣେ ଆର୍ ଡଙ୍ଗ୍‍ରେ ରେଇକ୍‍ରି କିର୍‍କିର୍‍ତେ ରିଲା, ଆରେକ୍‌, ଗଜିଆ ଟେଳା ଲ୍‌ଗେ ନିଜେ କ୍‍ଣ୍ଡିଆ କାବ୍‍ରା କ୍‍ରି ମାରି ଅଉତିରିଲା।

6ସେ ଯୀଶୁକେ ଦୁରିହ୍‍ଣି ଦ୍‍କିକ୍‍ରି ଦ୍‍ବ୍‍ଳି ଆସି ତାର୍ ମୁଏ ଅଦ୍‍ରି ତାକେ ଜୁଆର୍ କ୍‍ଲା,

7ଯୀଶୁ ତାକେ କଇଲା, “ବୁତ୍‌ଆତ୍ମା, ଇ ମାନାଇ ତ୍ଇହ୍‍ଣି ବାରିଯା।” ତାର୍ ହ୍‌ଚେ ସେ ବୁତ୍‌ଆତ୍ମା ବେଲ୍‌କି ଅଇକ୍‍ରି କଇଲା, “ଯୀଶୁ ଇଶ୍ଵରାର୍ ହିଲା, ମର୍‍ଲ୍‌ଗେ ତର୍ କାଇ କାମ୍ ଆଚେ? ଇଶ୍ୱର୍‌ ନାଉଁଏ ହ୍‍ର୍‍ମାଣ୍ କ୍‍ରି କ୍ଉ କି ତୁଇମକେ ଡ୍‌ଣ୍ତ୍ ନ୍‍ଦେସି।”

9ଆରେକ୍‌ ଯୀଶୁ ତାକେ ହ୍‌ଚାର୍‌ଲା, “ତର୍ କାଇ ନାଉଁ?” ସେ ତାକେ କଇଲା, “ମର୍ ନାଉଁ ବାହିନି, କାଇତାକ୍ ବ୍‍ଲେକ୍ ଅମି ଇଲକାର୍ ବିତ୍‌ରେ ବେସିଲକ୍ ଆଚୁ।”

10ଆରେକ୍‌, ଯୀଶୁ ଜ୍‌ନ୍‌କ୍‌ରି ସେମ୍‌ନ୍‍କାର୍ ଜାଗାଇ ହ୍‍ଣି ବାହାର୍‍କେ ହ୍‌ଟାଇ ନ୍‌କେର୍‍ତି, ସେତାର୍‍ଗିନେ ସେ ବୁତ୍‌ଆତ୍ମା ତାକେ ବେସି ଜୁଆର୍ କ୍‍ଲା।

11ସେତି ଡଙ୍ଗୁର୍ ତ୍‌ଳେ ଗଟେକ୍ ଗୁଷ୍‍ରା ମ୍‌ନ୍ଦା ଚ୍‍ର୍‍ତି ରିଲାଇ।

12ଆରେକ୍‌ ବୁତ୍‌ଆତ୍ମାମ୍‌ନ୍ ଯୀଶୁକେ କଇଲାଇ, “ସେ ଗୁଷ୍‍ରାମ୍‌ନ୍‌କାର୍‌ ବିତ୍‌ରେ ହୁର୍‍ତା ହାଁୟ୍ ଅମୁକ୍‍ମ୍‍ନ୍‌କେ ଆଦେଶ୍ ଦେ।”

13ଯୀଶୁ ସେମ୍‍ନ୍‍‍କେ ଆଦେଶ୍ ଦିଲାକେ ବୁତ୍‌ଆତ୍ମାମ୍‌ନ୍ ବାରି ଗୁଷ୍‍ରା ମ୍‌ନ୍‌କାର୍ ବିତ୍‌ରେ ହୁର୍‍ଲାଇ। ସେଡେବ୍‍ଳ୍ ସେ ଗୁଷ୍‍ରା ଦ୍‌ଳ୍ ଡଙ୍ଗୁର୍ ତ୍‌ଳ୍‌କେ ଦ୍‍ବ୍‍ଳି ଜାଇ ଉଚା କ୍‍ଣ୍ତିଲ୍‌ଗେ ହ୍‍ଣି ସ୍‌ମ୍‍ଦୁରେ ଅଦ୍‍ରି ବୁଡି ମ୍‍ଲାଇ। ଗୁଷ୍‍ରା ମ୍‌ନ୍‌କାର୍ ଦ୍‌ଳେ ଦୁଇ ହ୍‌ଜାର୍ ଗୁଷ୍‍ରା ରିଲାଇ।

14ଗୁଷ୍‍ରା ଚ୍‍ରାଉତା ଲକ୍‍ମ୍‍ନ୍ ହ୍‌ଳାଇ ଯାଇ ସ୍‌ହରେ ଆର୍ ଗାମେ ଜୁଇରି ସ୍‍ବୁ ଦ୍‍କି ରିଲାଇ ସେରି ଜାଣାଇଲାଇ। ସେଡେବ୍‍ଳ୍ ଲକ୍ କାଇରି ଗଟ୍‍ଲି ବ୍‍ଲି ଦ୍‌କୁକେ ଆଇଲାଇ।

15ଆରେକ୍‌, ସେମ୍‍ନ୍ ଯୀଶୁର୍ ଲ୍‌ଗେ ଆସି ସେ ବୁତ୍ ଦ୍‌ରିରିଲା ଲକ୍, ବ୍‌ଲେକ୍ ଜାକେ ଆଗେ ବାହିନି ବୁତ୍ ଡ୍‍ସି ରିଲି, ତାକେ ହ୍‍ଚିଆ ହିନ୍ଦି ବ୍‌ଲ୍‌କ୍‍ରି ବ୍‌ସି ରିଲାର୍ ଦ୍‍କି ଡିର୍‍ଲାଇ।

16ଆର୍ ଜୁଇ ଲକ୍‌ମ୍‌ନ୍‌ ତାର୍ ତ୍ଇହ୍‍ଣି ବୁତ୍ ଚାଡି ରିଲାର୍ ଦ୍‍କି ରିଲାଇ, ସେରି ଆର୍ ଗୁଷ୍‍ରା ମ୍‌ନ୍‌କାର୍ ବିଷଇ ସେମ୍‍ନ୍‍କାର୍ ଲ୍‌ଗେ କଇଲାଇ।

17ସେଡେବ୍‍ଳ୍ ଗରାଶିୟ ମ୍‌ନ୍‌କାର୍ ସ୍‍ନ୍ଦିହାକାର୍ ସ୍‍ବୁ ଲକ୍‍ମ୍‍ନ୍ ଯୀଶୁକେ ତାକାର୍ ସ୍‌ନ୍ଦି ଲ୍‌ଗେ ହ୍‍ଣି ବାରି ଜ୍‌ମ୍‌କେ ତାକେ ଗ୍‍ୱାରୁକେ ଲାଗ୍‍ଲାଇ।

18ହ୍‌ଚେ ଯୀଶୁ ଡଙ୍ଗାଇ ଚ୍‌ଗ୍‍ତାବ୍‍ଳ୍, ଜୁଇ ଲକ୍‌କେ ଆଗେ ବୁତ୍‌ଆତ୍ମା ଡ୍‍ସି ରିଲି, ସେ ଲକ୍ ଯୀଶୁର୍ ସ୍‍ଙ୍ଗ୍‍ ରେତାର୍ ଗିନେ ତରେକ୍ କେ ତରେକ୍ ଗ୍‍ୱାର୍‍ଲା।

19ମ୍‍ତର୍ ଯୀଶୁ ରାଜି ଅଇନ୍‌କେରି ତାକେ କଇଲା, “ତୁମାର୍ ଗ୍‍ରେ, ତୁମାର୍ ନିଜାର୍ ଲକ୍‍ମନ୍‍କାର୍ ଲ୍‌ଗେ ଯା, ଆରେକ୍‌, ମାପ୍‌ରୁ ତୁମାର୍ ଗିନେ ଜୁଇ ଜୁଇ କାମ୍ କ୍‌ଲାଆଚେ ଆର୍ ତୁମୁକେ ଜୁଇସ୍‌ବୁ ଦୟା ଦ୍‌କାଇଆଚେ, ସେସ୍‍ବୁ ସେମ୍‌ନ୍‍କେ ଜାଣାଉଆ।”

20ସେତାକ୍ ସେ ଇଣ୍ତି ଜାଇ, ଯୀଶୁ ତାର୍ ଗିନେ ଜୁଇ ଜୁଇ କାମ୍ କ୍‌ରିରିଲା, ସେ ସ୍‍ବୁକ୍‍ତା ଦେକାପ୍‍ଲି ଜିଲାର୍ ଦଶ୍‍ଗଟ୍ ସ୍‌ହରେ କ୍‍ମ୍‍କେ ଲାଗ୍‌ଲା। ସେଡେବ୍‍ଳ୍ ସ୍‌ବୁଲକ୍ ଚ୍‌ମ୍‍କି ଗ୍‍ଲାଇ।

21ଯୀଶୁ ଆର୍ ଗଟେତର୍ ଗାଲିଲୀ ଜିଲାର୍ ସ୍‍ମ୍‍ଦୁର୍‌କେ ଡଙ୍ଗାଇ ଲିଙ୍ଗି କ୍‍ରି ଇ ହାଟିକେ ଲେଉଟି ଆଇଲା। ବେସିଲକ୍ ତାର୍ ଲ୍‌ଗେ ରୁଣ୍ତ୍‍ଲାଇ। ଆରେକ୍‌ ଯୀଶୁ ସ୍‍ମ୍‍ଦୁର୍ କ୍‍ଣ୍ତିଲ୍‌ଗେ ରିଲା।

22ସେଡେବ୍‍ଳ୍ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରାର୍ ମୁକିଆ ମ୍‌ନ୍‌କାର୍ ବିତ୍‌ରେ ଯାଇର୍‍ସ୍ ନାଉଁ ଗଟେକ୍ ଲକ୍ ଆସି ତାକେଦ୍‍କି ତାର୍ ହାଦ୍‌ତ୍‌ଳେ ହ୍‍ଳି ମୁଣ୍ତିଆ ମାର୍‍ଲା,

23ଆରେକ୍‌, ବେସି ଗ୍‍ୱାରି କ୍‍ରି କଇଲା, “ମର୍ ସାନ୍ ଟକି ମ୍‍ଲାହର୍ ଅଇଆଚେ। ସେ ଜ୍‌ନ୍‌କ୍‌ରି ଉଦାର୍‌ ଅଇ ବାଚେଦ୍, ଇତାର୍‍ଗିନେ ତୁଇ ଆସି ତାର୍ ଉହ୍‍ରେ ଆତ୍ ସ୍‍ଙ୍ଗାଉ।”

24ସେଡେବ୍‍ଳ୍ ଯୀଶୁ ତାର୍‌ସ୍‍ଙ୍ଗ୍‍ ଗ୍‍ଲା, ଆରେକ୍‌ ବେସିଲକ୍ ତାର୍ ହ୍‌ଚେ ହ୍‌ଚେ ଜ୍‌ମ୍‌କେ ଲାଗ୍‍ଲାଇ, ଆରେକ୍‌ ସେମ୍‍ନ୍ ତାର୍ ଉହ୍‍ରେ ମାଡା ମାଡି ଅଉତି ରିଲାଇ।

25ସେଡେବ୍‍ଳ୍ ବାର ବର୍ଷ ହ୍‍ତେକ୍ ଗଟେକ୍ ମାଇଜିକେ ବ୍‌ନିଜାତା ରଗ୍ ଅଇରିଲି,

26ଯେ କି ବେସି ଡାକ୍‍ଦର୍ ମ୍‌ନ୍‍କାର୍ ତ୍ଇହ୍‍ଣି କ୍‌ଷ୍ଟ ହାଇକ୍‍ରି, ସ୍‍ବୁ ପର୍‍କାର୍ କ୍‌ର୍‌ଚ କ୍‍ରି ହେଁ କାଇରି ହେଁ ଉପ୍‍କାର୍ ନାହାଇଲି, ଆର୍ ଅଦିକ୍ ବେମାର୍ ଅଇ ଡୁଳି ରିଲି।

27ଯୀଶୁ ଲକ୍‌ମ୍‍ନ୍‌କେ ବ୍‍ଲ୍ କ୍‌ରୁଲା ବ୍‍ଲି ସେ ଶୁଣି, ସେ ଲକ୍‌ମ୍‌ନ୍‌କାର୍‌ ବିଡ୍ ବିତ୍‌ରେହ୍‌ଣି ହ୍‍ଚ୍‍ବାଟ୍ ଆସି ଯୀଶୁର୍ ହ୍‍ଚିଆକେ ଚୁଇଲି।

28କାଇତାକ୍ ସେ ମାଇଜି “ଚୁଚା ହ୍‍ଚିଆ ଚୁଇଲେକ୍ ମୁଇ ଉଦାର୍‌ ଅଇନ୍ଦେ” ବ୍‍ଲି କ୍ଉତିରିଲି।

29ସେମାଡେ ତାର୍ ବ୍‌ନି ଜାତାର୍ ବ୍‍ନ୍ଦ୍ ଅଇଲି, ଆରେକ୍‌ ସେ ଯେ ରଗେ ହ୍‍ଣି ବ୍‍ଲ୍ ଅଇଆଚି, ଇରି ସେ ନିଜାର୍ ଗ୍‍ଗାଳେହ୍‍ଣି ରଗ୍ ଗ୍‍ଲି ବ୍‍ଲି ଜାନ୍‍ଲି।

30ସେମାଡେ ଯୀଶୁ ନିଜାର୍ ତ୍ଇହ୍‍ଣି ବ୍‍ଲ୍ କ୍‌ର୍‌ତା ଶ୍‌କ୍‌ତି ବାର୍‍ଲି ବ୍‍ଲି ମ୍‌ନ୍ ବିତ୍‌ରେ ଜାଣିକ୍‍ରି, ଲକ୍‍ମ୍‍ନ୍‍କାର୍ ବିଡ୍ ମ୍‍ଜାଇ ହ୍‍ଣି ହ୍‌ଚେ ବୁଲି ହ୍‌ଚାର୍‌ଲା, “କେ ମର୍ ହ୍‍ଚିଆ ଚୁଇଲା?”

31ତାର୍ ଚେଲାମ୍‌ନ୍ ଯୀଶୁକେ କଇଲାଇ, “ତୁଇ ଦ୍‌କୁଲିସ୍ ଯେ, ଲକ୍‍ମ୍‍ନ୍ ତର୍‍ଉହ୍‌ରେ ମାଡା ମାଡି ଅମ୍‍ଲାଇ, ଆରେକ୍‌ ତୁଇ ହ୍‍ଚାରୁଲିସ୍, ‘କେ ମର୍ ହ୍‍ଚିଆ ଚୁଇଲାଇ?’”

32ମ୍‍ତର୍ ଜୁଇଲକ୍ ତାର୍ ହ୍‍ଚିଆକେ ଚୁଇ ରିଲି, ତାକେ ଦ୍‌କ୍‍ତାର୍ ଗିନେ ଯୀଶୁ ସ୍‍ବୁହାକ୍ ଦ୍‌କୁକେ ଲାଗ୍‌ଲା।

33ସେଡେବ୍‍ଳ୍ ସେ ମାଇଜି ନିଜାର୍ ଗ୍‌ଗାଳ୍ ବ୍‍ଲ୍ ଅଇଲିଆଚେ ବ୍‍ଲି ଜାଣି, ଚିତି ଅଇକ୍‍ରି ହେଁ ଯୀଶୁକେ ଚୁଇଲି, ସେତାର୍‍ଗିନେ ସେ ଡିରିକ୍‍ରି ତ୍‌ର୍ ତରି ଆସି ଯୀଶୁର୍ ହାଦ୍‌ତ୍‌ଳେ ହ୍‍ଳି ସ୍‍ବୁ ସ୍‌ତ୍‌କ୍‍ତା ତାକେ କଇଲି।

34ସେତାକ୍ ଯୀଶୁ ତାକେ କଇଲା, “ଏ ଟକି, ତର୍ ବିଶ୍‌ବାସ୍‌ ତକେ ବ୍‍ଲ୍ କ୍‍ରିଆଚେ। ସୁସ୍‌ତାରେ ଇଣ୍ତି ଯାଆ ଆର୍ ତର୍ ର୍‍ଗେ ହ୍‍ଣି ତୁଇ ଉଦାର୍‌ ଅଇରେ।”

35ଯୀଶୁ ସେ ମାଇଜିକେ କ୍‌ତା କ୍ଉତାବ୍‍ଳ୍ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରାର୍ ମୁକିଆ ଯାଇରସାର୍ ଗ୍‍ରେହ୍‍ଣି ଲକ୍ ଆସି କଇଲାଇ, “ତର୍ ଟକି ମ୍‍ଲିନି। ଗୁରୁକେ ଆର୍ କାଇତାକ୍ କ୍‌ଷ୍ଟ ଦେମ୍‌ଲାସ୍?”

36ମ୍‍ତର୍ ଯୀଶୁ ସେ କ୍‌ତାଶୁଣି ନ୍‍ଶୁଣ୍‌ଲା ହର୍ ଅଇ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରାର୍ ମୁକିଆ ଯାଇରସ୍‍କେ କଇଲା, “ଡିରାନାଇ, ମ୍‍ତର୍ ମର୍ ଉହ୍‍ରେ ବିଶ୍‌ବାସ୍‌ କ୍‍ରା।”

37ଆରେକ୍‌, ଯୀଶୁ ପିତର୍, ଯାକୁବ ଆର୍ ତାର୍ ବାଇ ଯୋହନ୍‍କେ ଚାଡି ବିଡ୍ ବିତ୍‌ରେହ୍‌ଣି ଆର୍ କାକେ ନିଜାର୍ ସ୍‍ଙ୍ଗ୍‍ ଜ୍‌ମ୍‌କେ ନ୍‌ଦିଲାଇ।

38ସେମ୍‍ନ୍ ଯିହୁଦିମ୍‌ନ୍‌କାର୍ ପାର୍‌ତେନା ଗ୍‍ରାର୍ ମୁକିଆ ଯାଇରସାର୍ ଗ୍‍ରେ ଆସୁ ଆସୁ, ଯୀଶୁ ଲକ୍‌ମ୍‍ନ୍‌କେ କିର୍ ମାର୍ ଅଇ ଆରେକ୍‌ ବ୍‍ତାଇ ବ୍‍ତାଇ କାନ୍ଦ୍‍ତି ରିଲାର୍ ଦ୍‍କ୍‍ଲା,

39ଆରେକ୍‌, ବିତ୍‌ରେ ଯାଇ ସେମ୍‍ନ୍‍‍କେ କଇଲା, “କାଇତାକ୍ କିର୍ ମାର୍ ଅଇ କାନ୍ଦୁଲାସ୍? ଟକି ମ୍‌ରିନ୍‌କେରେ। ମ୍‍ତର୍ ଶଇଲିଆଚେ।” ସେଡେବ୍‍ଳ୍ ସେମ୍‍ନ୍ ଯୀଶୁକେ ଇନସ୍‍ତା କ୍‍ରି କ୍‍ମ୍‍କେ ଲାଗ୍‍ଲାଇ।

40ମ୍‍ତର୍ ଯୀଶୁ ସ୍‌ବ୍‍କେ ଗ୍‍ରେହ୍‍ଣି ହ୍‍ଦାଇ ବାର୍‌କ୍‌ଲା, ଟକିର୍ ଉବାସି ଆଇସି ଆର୍ ତାର୍ ନିଜାର୍ ସାଙ୍ଗ୍‍ମ୍‍ନ୍‍କାର୍ ସ୍‍ଙ୍ଗ୍‍ ଜାଇ, ଟକି ଜୁଇ ଜାଗାଇ ରିଲି, ସେ ଜାଗାଇ ହୁର୍‍ଲାଇ,

41ଆର୍ ଟକିର୍ ଆତେ ଦ୍‍ରି ତାକେ କଇଲା, “ଟଲିଥାକୁମ୍”, ତାର୍ ଅର୍ତ “ଏ ଟକି, ମୁଇ ତ୍‌କେ କ୍‌ମ୍‌ଲେ ଉଟ୍!”

42ସେମାଡେ ଟକି ଉଟିକ୍‍ରି ବୁଲାବୁଲି କ୍‌ରୁକେ ଲାଗ୍‍ଲି। ତାକେ ବାର ବର୍ଷ ଅଇରିଲି। ସେଡେବ୍‍ଳ୍ ସେମ୍‍ନ୍ ଇରି ଦ୍‍କି ବେସି କାବାଅଇଲାଇ।

43ଆରେକ୍‌, କେ ଏବିଷୟେ ଜ୍‌ନ୍‌କ୍‌ରି ନ୍‍ଜାଣ୍‌ତି, ଇତାର୍‍ଗିନେ ଯୀଶୁ ତାର୍ ଆଇସି ଉବାସିକେ ଡାଟ୍‍କ୍‍ରି ଆଦେଶ୍ ଦିଲା, ଆରେକ୍‌ ଟକିକେ କାଇରି ଅଲ୍ କାମ୍‌କେ ଦିଆସ୍ ବ୍‍ଲି ସେମ୍‍ନ୍‍‍କେ କଇଲା।

← Chapter 4 Jump to: Chapter 6 →