Revelation 1

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

Jump to: Chapter 2 →

1ଇରି ଯୀଶୁ ଖ୍ରୀଷ୍ଟର୍ ଜାଣାଇ ଅଇଲା ବାକ୍ୟ ଯାଇରି ଯାଇରି ଦାହ୍‍ରେ ଗ୍‌ଟେଦ୍, ସେ ବିଷୟ୍‌ରେ ତାର୍ ସେବାକ୍‌ର୍‌ତା ଲକ୍‌ମ୍‍ନ୍‌କେ ଦ୍‌କାମ୍‌କେ ଇଶ୍ଵର୍ ଯୀଶୁକେ ଇ ସ୍‌ବୁ ଦ୍‌ଇରିଲା। ସେତାର୍‍ଗିନେ ମୁଇ ଯୋହନ୍ ଖ୍ରୀଷ୍ଟର୍ ଚେଲା ମକେ ଜାଣାମ୍‍କେ ତାର୍ ଦୂତ୍‌କେ ମର୍‍ଲ୍‌ଗେ ହ୍‌ଟାଇଲା।

2ଆର୍ ମୁଇ ଯାଇରି ସ୍‌ବୁ ଦ୍‌କ୍‌ଲେ, ସେରି ସ୍‌ବୁ ଲେକ୍‌ଲେ ଆର୍ ଇଶ୍ଵରାର୍ ଇସ୍‌ତ୍ ବାକ୍ୟ ଯୀଶୁ ଖ୍ରୀଷ୍ଟର୍ ଦ୍ୱାରା ମକେ କ୍‌ଉଆ ଅଇଲି।

3ଜୁଇ ଲକ୍‍ମ୍‍ନ୍ ଇଶ୍ଵରାର୍ ଇ ବାକ୍ୟ ହଡ୍‌ତି, ଆର୍ ଜୁଇ ଲକ୍‍ମ୍‍ନ୍ ଇ ବବିସତ୍‌ରେ ଗ୍‌ଟ୍‌ତା କ୍‌ତାକେ ଶୁଣ୍‌ତି ଆର୍ ଇତି ଲେକା ଅଇରିଲା ବିଷୟ୍‌ ସ୍‌ବ୍‌କେ ମାନ୍‌ତି, ସେ ଦନ୍ୟ, କାଇତାକ୍ ଇରି ଦାହ୍‍ରେ ହ୍‌କା ଗ୍‌ଟେଦ୍।

4ଆସିଆ ଜିଲାର୍ ସାତ୍‍ଗଟ୍ ମ୍‌ଣ୍ତଳିକେ ମୁଇ, ଯୋହନ୍, ଇରି ଲେକୁଲେ, ଜୁଇ ଇଶ୍ଵର୍ ହୁର୍‌ବେ ରିଲା, ଅବେ ଆଚେ ଆର୍ ବ୍‌ବିସତ୍‌ରେ ହେଁ ଆସୁଲାଇ ଆର୍ ତାର୍ ରାଜ୍‌ଗାଦି ସାମ୍‌ନାଇ ରେତା ସାତ୍‍ଗଟ୍ ଆତ୍ମା ତ୍‌ଇହ୍‌ଣି ଆର୍ ଯୀଶୁ ଖ୍ରୀଷ୍ଟ ତ୍‌ଇହ୍‌ଣି ଦୟା ଆର୍ ଶାନ୍‌ତି ତୁମାର୍ ଉହ୍‌ରେ ଆସ।

5ଯୀଶୁ ଖ୍ରୀଷ୍ଟ ଅମ୍‌ଲା ବିଶ୍‌ବାସ୍‌ର୍‌ ସାକି। ମ୍‌ର୍‌ନେ ହ୍‌ଣି ଉଟିରିଲା ଲକ୍‌ମ୍‌ନ୍‌କାର୍‌ ତ୍‌ଇ ହ୍‌ର୍‌ତୁ ଆର୍ ସେ ଇ ଜ୍‍ଗତାର୍ ର୍‌ଜାମ୍‌ନ୍‌କାର୍ ର୍‌ଜା। ସେ ଅମୁକେ ଲାଡ୍‌କ୍‌ରି ନିଜାର୍ ବ୍‌ନି ଦ୍‌ଇ ଅମୁକ୍‌ମ୍‌ନ୍‌କେ ଅମାର୍‌ମ୍‌ନ୍‌କାର୍‌ ପାପେହ୍‌ଣି ମୁକ୍‌ଳାଇ ଆଚେ।

6ଯୀଶୁ ଅମୁକ୍‌ମ୍‌ନ୍ ଗଟେକ୍ ରାଇଜ୍ ହର୍ କ୍‌ରିଆଚ୍‌ତି ଆର୍ ସେ ଅମୁକ୍‌ମ୍‌ନ୍ ତାର୍ ଉବା ଇଶ୍ଵରାର୍ ସେବା କ୍‌ର୍‌ତାର୍ ହାଇଁ ଜାଜକ୍ ହର୍ ବାଚି ଆଚ୍‌ତି। ତାର୍ ମଇମା ଆର୍ ଶ୍‌କ୍‌ତି ଜୁଗେ ଜୁଗେ ଅଉଅ। ଆମେନ୍।

7ଦ୍‌କା! ଯୀଶୁ ଆକାଶାର୍ ମେଗ୍ ସ୍‌ଙ୍ଗ୍ ଆସୁଲାଇ। ସ୍‍ବୁଲକାର୍‌ ଆକି ସେରି ଦ୍‍କ୍‌ତି ଅନ୍‌କାର୍ କି ତାକେ ବୁସି ମ୍‌ରାଇଲା ଲକ୍‍ମ୍‍ନ୍ ହେଁ ତାକେ ଦ୍‍କ୍‌ତି। ଇ ହୁର୍‌ତିବିର୍ ସ୍‌ବୁ ଜାତିର୍‌ ଲକ୍‍ମ୍‍ନ୍ ତାର୍ ଆସ୍‌ତାର୍ ଦ୍‍କି ବେଲ୍‌କି ଅଇ କାନ୍ଦ୍‍ତି। ହେଁ ଇରି ଗ୍‌ଟେଦ୍। ଆମେନ୍।

8ମାପ୍‌ରୁ ଇଶ୍ଵର୍ କ୍‌ମ୍‌ଲା “ମୁଇ ଆଲ୍‌ପା ଆର୍ ଓମେଗା” ଇତାର୍ ଅର୍‌ତ ଆରାମ୍ ଆର୍ ଶେସ୍ “ମୁଇ ଅବେ ଆଚି, ହୁର୍‌ବେ ରିଲେ ଆର୍ ବ୍‌ବିସତ୍‌ରେ ହେଁ ର୍‌ଇନ୍ଦ୍। ମୁଇ ସ୍‌ବ୍‌କେ ଶ୍‌କ୍‌ତିଶାଳି।”

9ଯୀଶୁର୍ ଦୁକ୍ ବଗ୍‌ଲା ରାଇଜ୍ ଆର୍ ସାସେ ତୁମାର୍‌ମ୍‌ନ୍‌କାର୍ ବାଇ ମୁଇ ଯୋହନ୍, ଇଶ୍ଵରାର୍ ବାକ୍ୟ ପର୍‌ଚାର୍ ଆର୍ ଯୀଶୁର୍ ସାକି ଅଇଲାର୍ ଲାଗି ଅଲ୍‍ଗା ଅଇ ସ୍‌ମ୍‌ଦୁର୍ ମ୍‌ଜାଇ ପାତ୍ମ ନାଉର୍ ଜାଗାଇ ରିଲି। କାଇତାକ୍ ମୁଇ ଇଶ୍ଵରାର୍ ବାକ୍ୟ ପର୍‌ଚାର୍ କ୍‌ଲେ, ଆର୍ ମୁଇ ଯୀଶୁର୍ ବିଷୟରେ ସାକି ଦିଲେ।

10ରଇବାର୍ ଦିନ୍ ପବିତର୍ ଆତ୍ମା ମକେ ହୁରାବାବେ ତାର୍ ଆଇତେ ର୍‌କି ନିଲା। ମୁଇ ହଟାତ୍ ହ୍‍ଚ୍‍ବାଟ୍ ହ୍‌ଣି ଗଟେକ୍ ବେଲ୍‌କି ଶୁଣ୍‌ଲେ। ସେ ସ୍‌ବଦ୍‌ ମରି ହୁକ୍‌ଲା ହ୍‌ର୍ ରିଲି।

11ସେ ସ୍‌ବଦ୍‌ ମକେ କ୍‌ଇଲା, “ତୁମି ଯାଇରି ଦ୍‌କୁଲାସ୍, ସ୍‌ବୁ ଗଟେକ୍ ଶାସ୍‌ତର୍‌ ତ୍‌ଇ ଲେକା ଆର୍ ସେରି ସାତ୍‍ଗଟ୍ ମ୍‌ଣ୍ତଳି ଏଫିସ, ସ୍ମର୍ଣ୍ଣା, ପର୍ଗମ, ଥୁୟତୀରା, ସାର୍‌ଦି, ଫିଲାଦେଲ୍‌ଫିଆ ଆର୍ ଲାଅଦିକିଆକେ ହ୍‌ଟାଉଆ।”

12କେ ମକେ ଇରି କମ୍‌ଲା ବ୍‌ଲି ଦ୍‌କୁକେ ମୁଇ ମୁଉ ବୁଲାଇଲେ ସେଡେବ୍‌ଳ୍ ସାତ୍‍ଗଟ୍ ସନାର୍ ଦିପ୍‌ରୁକା ମୁଇ ଦ୍‌କ୍‌ଲେ।

13ସେ ସାତ୍‍ଗଟ୍ ସନାର୍ ଦିପ୍‌ରୁକା ମଜାଇ, ମାନାଇ ହିଲା ଯେ କି ଯୀଶୁ ଟିଆ ଅଇଆତ୍‌ତି। ସେ ଗଟେକ୍ ଡେଙ୍ଗ୍ ହ୍‌ଚିଆ ହିନ୍ଦିରିଲା, ସେ ତାର୍ ବୁକ୍‌ ଉହ୍‌ରେ ସନାର୍ ବେଲ୍‌ଟ୍ ହିନ୍ଦିରିଲା।

14ତାର୍ ମୁଣ୍ତାର୍ ବାଳ୍ ଦଇଲା ଚାଉଳ୍‌ ଆର୍ ଦୁଦ୍ ହ୍‌ର୍ ଦ୍‌ବ୍ ରିଲି, ତାର୍ ଆକି ଲାଗ୍‌ତା ଜୟ୍‌ହର୍ ଡିସ୍‌ତେରିଲି।

15ତାର୍ ହାଦ୍ ଜୟ୍‌ଲ୍‌ଗେ ହ୍‍କାଇଲେକ୍ ଉଜାଳ୍ ହିତୁଳ୍ ହ୍‌ର୍ ଚ୍‌ମ୍‌କ୍‌ତି ରିଲି, ଆର୍ ସେ କ୍‌ତା କଇଲେ ଅଦୁର୍‌ତା ବେସି ଜର୍‌ଣାର୍ ହାଣି ହ୍‌ର୍ ସ୍‌ବଦ୍‌ ଅଉତିରିଲି।

16ସେ ତାର୍ କାତା ଆତେ ସାତ୍‍ଗଟ୍ ତାରା ଦ୍‌ରିରିଲା, ତାର୍ ଟଣ୍ଡେ ହ୍‌ଣି ଦୁଇବାଟ୍ ଦାର୍ ରେତା ଲାଗାଣ୍ କ୍‌ଣ୍ତା ବାର୍ ଅଉତିରିଲି। ଆର୍ ତାର୍ ମୁଉ ଟିଆ ମ୍‌ଇଦାନାର୍ ବେଳ୍ ହ୍‌ର୍ ଚ୍‌ମ୍‍କି ଜାତିରିଲି।

17ମୁଇ ତାକେଦ୍‍କି, ତାର୍ ହାଦ୍‌ତ୍‌ଳେ ଗଟେକ୍ ମ୍‌ଲାଲକ୍ ହ୍‌ର୍ ଅଇ ଅଦୁର୍‌ଲେ। ମ୍‌ତର୍‌ ମର୍ ଉହ୍‌ରେ ତାର୍ କାତାଆତ୍ ସଙ୍ଗାଇ ସେ କଇଲା “ଡିର୍‍ନାଇ। ମୁଇ ଆରାମ୍ ଆର୍ ଶେସ୍।

18ମୁଇ ଜୀବନ୍ ଆଚି। ମୁଇ ମ୍‌ରି ଜାଇରିଲେ ମ୍‌ତର୍ ଦ୍‍କ୍ ମୁଇ ସ୍‌ବୁଦିନାର୍ ହାଇଁ ଜୀବନ୍ ଅଇଆଚି। ମର୍ ଆତେ ମ୍‌ର୍‌ନାର୍ ଆର୍ ହାତାଳ୍‌ ଜୁଇତି ମ୍‌ଲାଲକ୍ ରେଉତ୍ ତାର୍‌ଉହ୍‌ରେ ଅଦିକାର୍ ଆଚେ।

19ତ୍‌ବେ ତୁମି ଯାଇରି ଯାଇରି ଦ୍‌କୁଲାସ୍ ଆର୍‌ ଯାଇରି ଯାଇରି ଅବେ ଗ୍‌ଟୁଲି ଆର୍‌ ଯାଇରି ଯାଇରି ହ୍‌ଚ୍‌କେ ଗ୍‌ଟେଦ୍ ସେରି ସ୍‌ବୁ ଲେକିର୍‌କା।

20ମର୍ କାତା ଆତେ ଜୁଇ ସାତ୍‍ଗଟ୍ ତାରା ଦ୍‌କ୍‌ଲିସ୍, ତାର୍ ଆର୍ ସାତ୍‍ଗଟ୍ ସନାର୍ ଦିପ୍‌ରୁକାର୍ ଲୁକ୍‌ଲା ଅର୍‌ତ ଇରି, ସାତ୍‍ଗଟ୍ ଦିପ୍‌ରୁକା ଅମ୍‌ଲି ସାତ୍‍ଗଟ୍ ମ୍‌ଣ୍ତଳି, ସାତ୍‍ଗଟ୍ ତାରା ଅମ୍‌ଲାଇ ସାତ୍‍ଗଟ୍ ମ୍‌ଣ୍ତଳିର୍ ଦୂତ୍।”

Jump to: Chapter 2 →