Revelation 19

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 18 Jump to: Chapter 20 →

1ତାର୍ ହ୍‌ଚେ ମୁଇ ସ୍‌ର୍‌ଗେ ବେସିଲକାର୍ ସ୍‌ବଦ୍‌ ହର୍ ଗଟେକ୍ ସ୍‌ବଦ୍‌ ଶୁଣ୍‌ଲେ। ସେମ୍‌ନ୍ କ୍‌ଉତେ ରିଲାଇ, ହାଲେଲୁୟା, ଉଦାର୍‌, ମଇମା, ଆର୍ ଶ୍‌କ୍‌ତି ଅମାର୍‌ମ୍‌ନ୍‌କାର୍‌ ଇଶ୍ଵରାର୍।

2କାଇତାକ୍ ତାର୍ ବିଚାର୍‌ ସ୍‌ତ୍ ଆର୍ ଦ୍‌ର୍‌ମ୍। ସେ ବ୍‌ଡ୍ ବେଶ୍ଯାକେ ଡ୍‌ଣ୍ଡ୍ ଦ୍‌ଇଆଚେ। ସେ ବେଶ୍ଯା ତାର୍ ଦାରିକାମାର୍ ପାପେ ହୁର୍‌ତିବିକେ ନ୍‌ଷ୍ଟ୍‌ କ୍‍ରି ଦ୍‌ଇଆଚେ। ଇଶ୍ଵର୍ ତାର୍ ସେବାକ୍‌ର୍‌ତା ଲକ୍‌ମ୍‌ନ୍‌କାର୍‌ ବ୍‌ନିର୍ ଲାଗି ତାକେ ଡ୍‌ଣ୍ଡ୍ ଦ୍‌ଇଆଚ୍‌ତି।

3ଆରେକ୍‌ ସେମ୍‌ନ୍ କଇଲାଇ ହାଲେଲୁୟା, “ବାବିଲ ସ୍‌ହରାର୍‌ ଜୟ୍‌ର୍ ଦୁଆଁ ସ୍‌ବୁବ୍‌ଳ୍ ବାର୍‌ତେ ରେଉଅ।”

4ତାର୍ ହ୍‌ଚେ ଚବିଶ୍ ଗଟ୍ ପାରାଚିନ୍ ଆର୍ ଜୀବନ୍ ଜ୍‌ତୁ ରାଜ୍‌ଗାଦି ତ୍‌ଇ ବ୍‍ସିରିଲା ଇଶ୍ଵରାର୍ ସାମ୍‌ନାଇ ମୁଣ୍ଡ୍ ଗାଡି ତାର୍ ଆରାଦନା କ୍‌ଲାଇ ଆର୍ ସେମ୍‌ନ୍ କଇଲାଇ, “ଆମେନ୍ ହାଲ୍ଲେଲୁୟା।”

5ତାର୍ ହ୍‌ଚେ ରାଜ୍‌ଗାଦି ତ୍‌ଇହ୍‌ଣି ଗଟେକ୍ ବ୍‌ଡ୍ ସ୍‌ବଦ୍‌ ଆଇଲି। ସେ କଇଲା, “ଏ ଇଶ୍ଵରାର୍ ଦାସ୍‌ମ୍‌ନ୍, ଏ ତାକେ ଡିର୍‌ତା ସାନ୍ ବ୍‌ଡ୍ ସ୍‌ବୁ ଲକ୍‍ମ୍‍ନ୍, ତାର୍ ମଇମା କ୍‍ରା।”

6ତାର୍ ହ୍‌ଚେ ମୁଇ ବେସି ଲକ୍‌ମ୍‌ନ୍‌କାର୍‌ ହର୍ ସ୍‌ବଦ୍‌ ଶୁଣ୍‌ଲେ। ଇରି ବେସି ହାଣି ଅଦୁର୍‌ତା ସ୍‌ବଦ୍‌ ହର୍ ଆର୍ ବ୍‌ଡ୍ ମେଗ୍ ଗ୍‌ର୍‌ଞ୍ଜ୍‌ଲା ସ୍‌ବଦ୍‌ ହର୍ ରିଲି। ସେମ୍‌ନ୍ କ୍‌ଉତେ ରିଲାଇ “ହାଲ୍ଲେଲୁୟା କାଇତାକ୍ ମାପ୍‌ରୁ ଅମାର୍‌ ମ୍‌ନ୍‌କାର୍ ସ୍‌ବ୍‌କେ ଶ୍‌କ୍‌ତିଶାଳି ଇଶ୍ଵର୍ ସେ ର୍‌ଜା।

7ଆଶା, ଅମିମ୍‌ନ୍ ସ୍‌ର୍‌ଦା କ୍‌ରୁ, ଆର୍ ଇଶ୍ଵର୍‍କେ ମଇମା କ୍‌ରୁ। କାଇତାକ୍ ମେଣ୍ଢା ଯେ କି ଯୀଶୁ ତାର୍ ଲକ୍‌ମ୍‌ନ୍‌କାର୍‌ ସ୍‌ଙ୍ଗ୍ ସ୍‌ବୁଦିନାର୍ ହାଇଁ ଗଟେକ୍ ଅଉତାର୍ ଗିନେ ସ୍‌ମୟ୍ ଅଇଲିବେ, ଇରି ବ୍‌ର ଜ୍‌ନ୍‌କ୍‌ରି କ୍‌ନ୍ୟାକେ ବିବା ଅଇଲା ହର୍ ଅଇଦ୍। ଆର୍ ଜୁଇ ଲକ୍ ତାର୍ ଅଉତି ସେମ୍‌ନ୍‌ ନିଜ୍‍କେ ତିଆର୍ କ୍‌ଲାଇ ଆଚ୍‌ତି।

8ଇଶ୍ଵର୍ ସେମ୍‌ନ୍‌କେ ତିଆର୍ ଅଉତାର୍ ହାଇଁ ହୁରାବାବେ ହ୍‌ର୍‌ଚାଳ୍ ଜ୍‌ନ୍‌କ୍‌ରି କ୍‌ନ୍ୟା ଦବ୍ ଆର୍ ଜ୍‌କ୍‌ମ୍‌କ୍‌ତା ହ୍‌ଚିଆ ହିନ୍ଦ୍‌ତି ସେରି ଦିଲା।” ସେ ଦବ୍ ହ୍‌ଚିଆ ଇଶ୍ଵରାର୍ ପବିତର୍‌ ଲକ୍‌ମ୍‌ନ୍‌କାର୍‌ ଦ୍‌ର୍‌ମ୍ କାମ୍।

9ତାର୍ ହ୍‌ଚେ ଦୂତ୍ ମକେ କଇଲା, “ଇରି ଲେକ୍। ଜୁଇ ଲକ୍‍ମ୍‍ନ୍ ମେଣ୍ଢା ଯେ କି ଯୀଶୁର୍ ବିବା ତ୍‌ଇ କ୍‌ବର୍ ହାଇ କୁଦାଇ ଅଇ ଆଚ୍‌ତି ସେମ୍‌ନ୍ ଦନ୍ୟ।” ଆରେକ୍‌ ସେ ମକେ କଇଲା, “ଇରିସ୍‌ବୁ ଇଶ୍ଵରାର୍ ସ୍‌ତ୍ ବାକ୍ୟ।”

10ତାର୍ ହ୍‌ଚେ ମୁଇ ସେ ଦୂତ୍‌କେ ଜୁଆର୍ କ୍‌ରୁକେ ହାଦ୍‌ତ୍‌ଳେ ଡୁଳ୍‌ଲେ। ମ୍‌ତର୍ ସେ ମକେ କଇଲା, “ମକେ ଜୁଆର୍ କ୍‍ର୍‍ନାଇ। ମୁଇ ତୁମାର୍ ଆର୍ ଖ୍ରୀଷ୍ଟକେ ବିଶ୍‌ବାସ୍ କ୍‌ର୍‌ତା ଲକ୍ ଆର୍ ଯୀଶୁର୍ ସାକି ବାଇମ୍‌ନ୍‌କାର୍ ହର୍ ଗଟେକ୍ ଇଶ୍ଵରାର୍ ସେବାକ୍‌ର୍‌ତା ଦାସ୍। ସେତାକ୍ ଇଶ୍ଵର୍‍କେ ମଇମା କ୍‍ର୍। କାଇତାକ୍ ଇଶ୍ଵରାର୍ ଆତ୍ମା ହ୍‌କା ଲକ୍‌ମ୍‍ନ୍‌କେ ଶ୍‌କ୍‌ତି ଦ୍‌ଇଦ୍ ଯୀଶୁର୍ ବିଷୟରେ ବିନ୍ ଲକ୍‌ମ୍‌ନ୍‌ କ୍‍ମ୍‍କେ।”

11ତାର୍ ହ୍‌ଚେ ମୁଇ ସ୍‌ର୍‌ଗ୍ ଉଗାଡି ଅଉତାର୍ ଦ୍‌କ୍‌ଲେ। ସେତି ଗଟେକ୍ ଦବ୍ ଗଡା ଟିଆ ଅଇରିଲି। ସେ ଗଡା ଚାଲାଉତା ଲକାର୍ ନାଉଁ ବିଶ୍‌ବାସ୍ ଆର୍ ସ୍‌ତ୍, ସେ ଟିକ୍ ନିଆଇରେ ବିଚାର୍‌ କ୍‌ର୍‌ତି ଆର୍ ଜୁଜ୍ କ୍‌ର୍‌ତି।

12ତାର୍ ଆକି ଲାଗ୍‌ତା ଜୟ୍‌ହର୍, ତାର୍ ମୁଣ୍ଡେ ବେସି ଟହ୍‌ରି ଆଚେ। ତାର୍ କ୍‌ହାଳେ ଗଟେକ୍ ନାଉଁ ଲେକା ଅଇରିଲି, ମ୍‌ତର୍ ତାକେ ଚାଡି କେହେଁ ସେ ନାଉଁ ଜାଣିନ୍‌ରିଲାଇ।

13ସେ ବ୍‌ନି ତ୍‌ଇ ହୁରା ବିଜିରିଲି ଡେଙ୍ଗ୍ ହ୍‌ଚିଆ ହିନ୍ଦିରିଲି। ତାର୍ ନାଉଁ “ଇଶ୍ଵରାର୍ ବାକ୍ୟ।”

14ସ୍‌ର୍‌ଗେ ରେତା ସ୍ଇନ୍‌ମ୍‌ନ୍‌ ତାର୍ ହ୍‌ଚେ ଯାତିରିଲାଇ। ସେମ୍‌ନ୍ ହେଁ ଦବ୍ ଗଡା ଉହ୍‌ରେ ବ୍‍ସିରିଲାଇ। ସେମ୍‌ନ୍ ଦବ୍ ସପା ହ୍‌ଚିଆ ହିନ୍ଦିରିଲାଇ।

15ସେ ଗଡା ଚାଲାଉତାର୍ ଟଣ୍ଡେ ହ୍‌ଣି ଦାରୁଆ କ୍‌ଣ୍ତା ବାରିରିଲି। ସେ ଦେଶାର୍ କ୍‍ରାପ୍ ଲକ୍‌କେ ଇତାର୍ ସ୍‌ଙ୍ଗ୍ ମାରେଦ୍। ସେ ଲ୍ଉଆର୍ ଡାଙ୍ଗ୍ ସ୍‌ଙ୍ଗ୍ ସେମ୍‌ନ୍‌କେ ଶାସନ୍ କ୍‍ରେଦ୍। ଆର୍‌ ସେ ସ୍‌ବ୍‌କେ ଶ୍‌କ୍‌ତିଶାଳି ଇଶ୍ଵରାର୍ ରିସା ହ୍‌ର୍ ଅଙ୍ଗୁର୍ ହିଳ୍‌ତା କୁଣ୍ଡେ ହିଚିକ୍‌ରି ହ୍‌କାଇଦ୍।

16ତାର୍ ହ୍‌ଚିଆଇ ଆର୍ ଜ୍‌ଙ୍ଗେ ଇରି ଲେକା ରିଲି, “ର୍‌ଜାମ୍‌ନ୍‌କାର୍ ର୍‌ଜା ଆର୍ ମାପ୍‌ରୁ ମ୍‌ନ୍‌କାର୍ ମାପ୍‌ରୁ।”

17ତାର୍ ହ୍‌ଚେ ମୁଇ ଗଟେକ୍ ଦୂତ୍‌କେ ବେଳ୍ ମ୍‌ଜାଇ ଟିଆ ଅଉତାର୍ ଦ୍‌କ୍‌ଲେ। ସେ ଆକାଶେ ଉଡ୍‌ତା ଚେଡେ ମ୍‌ନ୍‌କେ ବେଲ୍‌କି ଅଇକ୍‌ରି କଇଲା, “ଆଶା ଇଶ୍ଵରାର୍ ବ୍‌ଡ୍ ବଜି ହାଇଁ ଗଟେତ୍ଇ ରୁଣ୍ଡା।

18ଆଶା ତୁମିମ୍‍ନ୍ ଗଟେତ୍ଇ ଅଇ ର୍‌ଜା, ସ୍ଇନ୍ ମ୍‌ନ୍‌କାର୍ ନେତା ଆର୍ ଡାଟ୍ ସ୍ଇନ୍ ଆର୍ ଗଡା ଆର୍ ଗଡା ଚାଲାଉତା ଲକ୍‌ମ୍‌ନ୍‌କାର୍‌, ବନ୍ଦି ରିଲାଲକ୍ ଆର୍ ମୁକ୍‌ଳିରିଲା ଲକ୍, ସାନ୍ ଆର୍ ବ୍‌ଡ୍ ଇ ସ୍‌ବୁ ଲକ୍‌ମ୍‌ନ୍‌କାର୍‌ ମାସ୍ କ୍‌ହା।”

19ତାର୍ ହ୍‌ଚେ ମୁଇ ସେ ପଶୁ ଆର୍ ହୁର୍‌ତିବିର୍ ର୍‌ଜାମ୍‌ନ୍‌କେ ଦ୍‌କ୍‌ଲେ। ସେମ୍‌ନ୍‌କାର୍ ସ୍ଇନ୍ ଦ୍‍ଳ୍‍ମ୍‍ନ୍, ସେ ଗଡା ଚାଲାଉତା ଲକ୍ ଆର୍ ତାର୍ ସ୍ଇନ୍ ମ୍‌ନ୍‌କାର୍ ବିରୁଦେ ଜୁଜ୍ କ୍‌ର୍‌ତା ହାଇଁ ଗଟେତ୍ଇ ଅଇଲାଇ।

20ମ୍‌ତର୍ ସେ ପଶୁ ବନ୍ଦି ଅଇଲି ଆର୍ ମିଚ୍ ବବିସତ୍ କ୍ଉତାଲକ୍ ହେଁ ତାର୍‌ସ୍‍ଙ୍ଗ୍‍ ବନ୍ଦି ଅଇଲା। ଇ ମିଚ୍‌ ବବିସତ୍ କ୍ଉତାଲକ୍ ସେ ପଶୁର୍ ହାଇଁ ବେସି ଚାନିଆଅଉତା କାମ୍‍କ୍‍ରି ଇତାର୍ ଦ୍ବାରା ପଶୁର୍ ଚିନ୍ ଗଦାଇ ଅଇରିଲା ଲକ୍‌ମ୍‍ନ୍‌କେ ଆର୍ ତାର୍ ମୁର୍‌ତି ହୁଜା କ୍‌ର୍‌ତା ଲକ୍‌ମ୍‍ନ୍‌କେ ବାଟ୍ ବାଣାକ୍‌ରି ରିଲା ସେ ଦୁଇଲକେ ଜୀବନ୍ ଜୀବନ୍ ଲାଗ୍‌ତା ଗ୍‌ନ୍ଦକ୍ ଜୟ୍‌ଲ୍‌ଗେ ହିଙ୍ଗ୍‌ଲାଇ।

21ସେମ୍‌ନ୍‌କାର୍ ସ୍ଇନ୍‍ଦ୍‍ଳ୍ ସେ ଗଡା ଚାଲାଉତା ଲକ୍‌ମ୍‌ନ୍‌କାର୍‌ ଟଣ୍ଡେ ହ୍‌ଣି ବାର୍‌ଲା କ୍‌ଣ୍ତା ଲ୍‌ଗେ ମ୍‌ଲାଇ, ସ୍‌ବୁ ଚେଡେ ମ୍‌ନ୍ ସେମ୍‌ନ୍‌କାର୍ ଗ୍‍ଗାଳାର୍ ମାସ୍ ହେଟ୍ ହୁର୍‍ନେ କାଇଲାଇ।

← Chapter 18 Jump to: Chapter 20 →