Revelation 22

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 21 Jump to:

1ତାର୍ ହ୍‌ଚେ ଦୂତ୍ ମକେ ଜୀବନ୍ ଦେତା ହାଣିର୍ ଗାଡ୍ ଦ୍‌କାଇଲା। ସେ ଗାଡ୍ ହିରା ହର୍ ଜ୍‌କ୍‌ମ୍‌କି ଜାତିରିଲି। ସେ ଗାଡ୍ ଇଶ୍ଵରାର୍ ଆର୍ ମେଣ୍ଢା ଯେ କି ଯୀଶୁର୍ ରାଜ୍‌ଗାଦି ତ୍‌ଇହ୍‌ଣି ବାରି ଆସୁଲି।

2ଇ ଗାଡ୍ ସ୍‌ହରାର୍ ବ୍‌ଡ୍ ଦୁଆର୍ ଅଇ ତ୍‌ଳେ ଜାତିରିଲି। ଗାଡାର୍ ଦୁଇବାଟ୍ ଜୀବନ୍ ଦେତା ହ୍‌ଳାର୍ ଗ୍‌ଚ୍ ରିଲି। ଇ ଗ୍‌ଚେ ସ୍‌ବୁ ବ୍‌ର୍‌ସ୍ ବାର ମାସ୍ ବାର ପର୍‌କାର୍ ହ୍‍ଳ୍ ହ୍‌ଳେଦ୍। ଇ ଗ୍‌ଚାର୍ ହ୍‌ତାର୍ ଜ୍‍ଗତାର୍ ଲକ୍ ବ୍‌ଲ୍‌କ୍‌ରୁକେ ଲାଗେଦ୍।

3ସେ ସ୍‌ହରେ ଆରେକ୍‌ ଇଶ୍ଵର୍ ଦ୍ୱାରା ଆନ୍‌ହାଡାଇ ଅଇଲା ଲକ୍ ନ୍‍ରେତି। ଇଶ୍ଵରାର୍ ଆର୍ ମେଣ୍ଢା ଯେ କି ଯୀଶୁର୍ ରାଜ୍‌ଗାଦି ସେତି ର୍‌ଇଦ୍। ତାର୍ ସେବାକ୍‌ର୍‌ତା ଲକ୍‍ମ୍‍ନ୍ ତାକାର୍ ଆରାଦନା କ୍‌ର୍‌ତି।

4ସେମ୍‌ନ୍ ଇଶ୍ଵର୍‍କେ ଆକି ସାମ୍‌ନାଇ ଦ୍‍କ୍‌ତି। ସେମ୍‌ନ୍‌କାର୍ କ୍‌ହାଳେ ଇଶ୍ଵରାର୍ ନାଉଁ ଲେକା ଅଇଦ୍।

5ସେତି କ୍‌ବେ ଆରେକ୍‌ ରାତି ଅଇନ୍‌କେରେ। ଲକ୍‍ମ୍‍ନ୍ କୁପି କି ବେଳାର୍ ଉଜାଳ୍ ଆରେକ୍‌ ଦ୍‌ର୍‌କାର୍ ଅଇନ୍‌କେରେ। ମାପ୍‌ରୁ ଇଶ୍ଵର୍ ସେମ୍‌ନ୍‌କେ ଉଜାଳ୍ ଦ୍‌ଇଦ୍। ସେମ୍‌ନ୍ ର୍‌ଜାର୍ ହର୍ ସ୍‌ବୁବ୍‌ଳ୍ ରାଜ୍ କ୍‌ର୍‌ତି।

6ସେ ସ୍‌ର୍‌ଗ୍ ଦୂତ୍ ମକେ କଇଲି, “ଇକ୍‍ତାସ୍‌ବୁ ସ୍‌ତ୍ ଆର୍ ବିଶ୍‌ବାସ୍‌ର୍ ଯଗ୍ଯ। ମାପ୍‌ରୁ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ ଆତ୍ମାର୍ ଇଶ୍ଵର୍। ଜାଇରି ସେ ଦାହ୍‍ରେ ଗ୍‌ଟେଦ୍, ସେରି ତାର୍ ସେବାକ୍‌ର୍‌ତା ଲକ୍‌ମ୍‍ନ୍‌କେ ଦ୍‍କାଉତାର୍ ହାଇଁ ଇଶ୍ଵର୍ ସ୍‌ର୍‌ଗ୍ ଦୂତ୍‌କେ ହ୍‌ଟାଇ ଆଚେ।”

7ଯୀଶୁ କଇଲା, “ଦ୍‌କା! ମୁଇ ବେଗି ଆସୁଲେ! ଇ ଶାସ୍‌ତର୍‌ ତ୍‌ଇ ଲେକା ଅଇରିଲା ବବିସ୍‌ତ୍ କ୍‌ତାସ୍‍ବୁ ଜୁଇ ଲକ୍ ମାନେଦ୍, ସେ ଦନ୍ୟ।”

8ମୁଇ ଯୋହନ୍ ନିଜେ ଇରିସ୍‌ବୁ ଶୁଣି ଆଚି ଆର୍ ଦ୍‌କିଆଚି। ଆରେକ୍‌ ଜ୍‌ଡେବ୍‌ଳ୍ ମୁଇ ଦ୍‍କି ସ୍‌ର୍‌ଲେ ଆର୍ ଶୁଣି ସ୍‌ର୍‌ଲେ, ମକେ ଇସ୍‌ବୁ ଦ୍‌କାଇଲା ଦୂତାର୍ ହାଦ୍‌ତ୍‌ଳେ ଜୁଆର୍ କ୍‌ର୍‌ତାର୍ ହାଇଁ ଡୁଳ୍‌ଲେ।

9ମ୍‌ତର୍ ସେ ମକେ କଇଲା, “ମକେ ଜୁଆର୍ କ୍‍ର୍‍ନାଇ! ମୁଇ ତୁମାର୍ ହର୍ ଆର୍ ତୁମାର୍ ବବିଶତ୍ କ୍‌ତା କ୍‌ଉତା ଲକ୍‌ମ୍‌ନ୍‌‍କାର୍ ହର୍ ଗଟେକ୍ ସେବାକ୍‌ର୍‌ତା ଲକ୍‌। ଆର୍ ଇ ଶାସ୍‌ତରାର୍ ବାକ୍ଯମ୍‌ନ୍ ତୁମାର୍ ତାକାର୍ ହର୍ ମାନ୍‌ତା ଲକ୍। ତ୍‌ବେ ତୁମି ଇଶ୍ଵର୍‍କେ ହ୍‌କା ଜୁଆର୍ କ୍‍ରା।”

10ତାର୍ ହ୍‌ଚେ ସ୍‌ର୍‌ଗ୍ ଦୂତ୍ ମକେ କଇଲି, “ଇ ଶାସ୍‌ତର୍‌ ତ୍‌ଇରିଲା ବବିସ୍‌ତ୍ କ୍‌ତାସ୍‍ବୁ ଲୁକାଇକ୍‌ରି ସ୍‍ଙ୍ଗାଉ ନାଇ। ଇ ସ୍‌ବୁ ଗ୍‌ଟ୍‌ତା ସ୍‌ମୟ୍ ଲ୍‌ଗେ ଆଇଲିବେ।

11ଯେ କ୍‍ରାପ୍ କାମ୍ କ୍‌ରୁଲାଇ ତାକେ ଅଦିକ୍ କ୍‍ରାପ୍ କ୍‌ର୍‌ତାର୍ ହାଇଁ ଦିଆସ୍। ଯେ ଅଶୁଚି କ୍‌ରୁଲାଇ ତାକେ ଅଦିକ୍‌ ଅଶୁଚି କ୍‌ର୍‌ତାର୍ ହାଇଁ ଦିଆସ୍। ଆରେକ୍‌ ଯେ ଦ୍‌ର୍‌ମି ସେ ଅଦିକ୍ ଦ୍‌ର୍‌ମି କାମ୍ କ୍‌ର, ଯେ ପବିତର୍‌ ସେ ଅଦିକ୍ ପବିତର୍‌ ଅଉଅ।”

12ଯୀଶୁ କଇଲା, “ଦ୍‌କା! ମୁଇ ବେଗି ଆସୁଲେ! ମୁଇ ମର୍‌ସ୍‍ଙ୍ଗ୍‌ ଇନାମ୍ ହେଁ ଦ୍‍ରି ଆସୁଲେ। ମୁଇ ସ୍‌ବୁ ଲକ୍‌କେ ତାକାର୍ କାମାର୍ ଅନୁସାରେ ଇନାମ୍ ଦ୍‌ଇନ୍ଦ୍।

13ମୁଇ ଆଲ୍‌ପା ଆର୍ ଓମେଗା, ଆରାମ୍ ଆର୍ ସେସ୍।”

14ଜୁଇ ଲକ୍‍ମ୍‍ନ୍ ନିଜାର୍ ଡେଙ୍ଗ୍ ହ୍‌ଚିଆ ଦଇ ପାପେହ୍‌ଣି ନିର୍‌ମୁଳ୍ ଅଇଆତ୍‌ତି ସେମ୍‌ନ୍ ଦନ୍ୟ। କାଇତାକ୍ ଜୀବନ୍ ଗ୍‌ଚାର୍ ହ୍‌ଳ୍ କାତାର୍ ହାଇଁ ସେମ୍‌ନ୍‌କେ ଅଦିକାର୍ ଆଚେ ଆର୍‌ କ୍‌ହାଟ୍ ବିତ୍‌ରେ ଦ୍‌ଇ ସେ ପବିତର୍‌ ସ୍‌ହର୍ ହୁରୁ ହାର୍‌ତି।

15ମ୍‌ତର୍ ଗୁର୍‌ନାକାମ୍ କ୍‌ର୍‌ତା ଲକ୍, କ୍‍ରାପ୍ କ୍‌ତା କ୍ଉତାଲକ୍, ଦାରିକାମ୍ କ୍‌ର୍‌ତା ଲକ୍, ମାନାଇ ମାର୍‌ତା ଲକ୍, ମୁର୍‌ତି ହୁଜା କ୍‌ର୍‌ତା ଲକ୍, ମିଚ୍ କେ ସ୍‌ର୍‌ଦା ଅଉତା ଲକ୍, ଆର୍ ସ୍‌ବୁବ୍‌ଳ୍ ମିଚ୍ କ୍ଉତାଲକ୍ ସ୍‌ହରାର୍ ହ୍‌ଦାଇ ରେଅତ୍।

16“ମୁଇ ଯୀଶୁ, ମ୍‌ଣ୍ତଳିମ୍‌ନ୍‌କେ ଇ ସ୍‌ବୁ ଜାଣାଉତାର୍ ହାଇଁ ମର୍ ଦୂତ୍‌କେ ତୁମାର୍ ଲ୍‌ଗେ ହ୍‌ଟାଇ ଆଚି। ମୁଇ ଦାଉଦାର୍‌ ପରିବାରାର୍ ମୁଳ୍ ବ୍‌ଉଁଶାର୍। ମୁଇ ସେ ବର୍ ସ୍‌କାଳାର୍ ଉଜାଳ୍ ତାରା।”

17ଇଶ୍ଵରାର୍ ଆତ୍ମା ଆର୍ ତାର୍ ଲକ୍ ଯେ କି ଖ୍ରୀଷ୍ଟର୍ କ୍‌ନ୍ୟା ହର୍‌ କ୍‌ଉତି, “ଆଶା!” ଇ ସ୍‌ବୁ ଶୁଣ୍‌ତା ସ୍‌ବୁ ଲକ୍ ହେଁ କ୍‌ଉଆ, “ଆଶା!” ଜୁଇ ଲକ୍‌ ସସେ ଆଚେ ସେ ଆଶା, ଜୁଇ ଲକ୍‌ମ୍‌ନ୍‌ କ୍‌ର୍‌ତି ସେ ବିନାମୁଲ୍ଯରେ ଜୀବନ୍ ଦେତା ହାଣି କାମ୍ ହାରେ।

18ଇ ଶାସ୍‌ତର୍‌ ତ୍‌ଇ ଲେକା ଅଇରିଲା ବବିସ୍‌ତ୍ କ୍‌ତା ଶୁଣ୍‌ତା ସ୍‌ବୁ ଲକ୍‌କେ ମୁଇ ଜାଗ୍‌ରତ୍ କ୍‌ରାଇ ଦେମ୍‍ଲେ। କୁଇଲକ୍ ଯଦି ଇ ବାକ୍ୟ ତ୍‌ଇ କାଇରି ମିଶାଇ କ୍‍ରି କଇଦ୍, ତ୍‌ବେ ଇଶ୍ଵର୍ ତାକେ ଇ ଶାସ୍‌ତର୍‌ ତ୍‌ଇ ଲେକା ଅଇରିଲା ବ୍‌ଡ୍ ମ୍‌ର୍‌ଡି ତାକେ ଦ୍‌ଇଦ୍।

19ଆରେକ୍‌, କୁଇଲକ୍ ଯଦି ଇ ବାକ୍ୟ ତ୍‌ଇ କାଇରି ଚାଡିକ୍‌ରି କଇଦ୍, ତ୍‌ବେ ଇଶ୍ଵର୍ ତାକେ ଇ ଶାସ୍‌ତର୍‌ ତ୍‌ଇ ଲେକା ଅଇରିଲା ଜୀବନ୍ ଦେତା ହ୍‍ଳ୍ ଗ୍‌ଚାର୍ ଆର୍ ପବିତର୍‌ ସ୍‌ହରେ ବାଗି ଅଇରିଲା ଅଦିକାର୍ ତାର୍ ତ୍‌ଇହ୍‌ଣି ନ୍‌ଇଜାଇଦ୍।

20ଯିଶୁ ହ୍‌କା ଇସ୍‌ବୁ ସ୍‌ତ୍‌ବ୍‌ଲି କ୍‌ମ୍‌ଲା। ଅବେ ସେ କ୍‌ମ୍‌ଲା, “ହେଁ, ମୁଇ ବେଗି ଆସୁଲେ।” ଆମେନ୍। ଏ ମାପ୍‌ରୁ ଯୀଶୁ ବେଗି ଆଉ।

21ମାପ୍‌ରୁ ଯୀଶୁ ଖ୍ରୀଷ୍ଟର୍ ଦୟା ତୁମାର୍ ସ୍‍ବୁଲକାର୍‌ ସ୍‌ଙ୍ଗ୍ ରେଅ। ଆମେନ୍।

← Chapter 21 Jump to: