Revelation 2

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 1 Jump to: Chapter 3 →

1ସେ ଆର୍ ହେଁ ମକେ କ୍‌ଇଲା “ଏଫିସ ମ୍‌ଣ୍ତଳି ତ୍‌ଇ ର୍‌ଇ ଉଦାର୍‌‌କ୍‌ର୍‌ତା ଦୂତ୍ ଲ୍‌ଗେ ଇରି ଲେକ୍। ଯେ ନିଜାର୍ କାତା ଆତେ ସାତ୍‍ଗଟ୍ ତାରା ଦ୍‌ର୍‌ତି ଆର୍ ସାତ୍‍ଗଟ୍ ସନାର୍ ଦିପ୍‌ରୁକା ମ୍‌ଜାଇ ଚାଲାବୁଲା କ୍‌ର୍‌ତି ସେ ଇରି କମ୍‌ଲା।”

2ମୁଇ ତୁମାର୍ କାମ୍ ଜାଣି, ତୁମି ବେସି କ୍‌ଷ୍ଟ କାମ୍ କ୍‍ରାସ୍ ଆର୍ ବେସି ସାସ୍‌ଦ୍‌ରି ରିଆସ୍। ତୁମି କ୍‍ରାପ୍ ଲକ୍‌କେ ନିଜାର୍ ନ୍‌କେରାସ୍, ଇରିହେଁ ମୁଇ ଜାଣି। ଜୁଇ ଲକ୍‍ମ୍‍ନ୍ ପର୍‌କୁତ୍‌ରେ ହ୍‌ଟାଇ ନ୍‌ଅଇଲେକ୍ ହେଁ ନିଜ୍‍କେ ହ୍‌ଟାଇଲା ଚେଲାବ୍‍ଲି କ୍ଉତି। ସେମ୍‌ନ୍‌କେ ତୁମି ପରିକ୍ୟା କ୍‍ରିଆଚାସ୍ ଆର୍ ସେମ୍‌ନ୍ ଯେ ମିଚ୍‌ଲକ୍‌ ବ୍‌ଲି ତୁମି ଚିନି ଆଚାସ୍।

3ମୁଇ ଜାଣି ତୁମାର୍ ବେସି ସାସ୍ ଆଚେ କାଇତାକ୍ ତୁମି ମର୍ ନାଉର୍ ଲାଗି ବେସି କ୍‌ଷ୍ଟ ହାଇଆଚାସ୍, ଆର୍ ଇରିସ୍‌ବୁ କ୍‌ରୁକେ ତୁମି ତାକି ଜାଇ ନ୍‌କେରାସ୍।

4ମ୍‌ତର୍ ତୁମାର୍ ବିରୁଦେ ମର୍‍କ୍‍ତା ଇରି କି, ତୁମି ହ୍‌ର୍‌ତୁ ବିଶ୍‍ବାସ୍ କ୍‌ଲାବ୍‌ଳ୍ ଜୁଇ ଲାଡ୍ ମକେ କ୍‌ର୍‌ତି ରିଲାସ୍ ସେରି ଅବେ ତୁମାର୍ ଲ୍‌ଗେ ନାଇ

5ସେତାର୍‌ଲାଗି କ୍‍ତେକ୍ ତ୍‌ଳେ ତୁମି ଅଦୁର୍‌ଲାସ୍ ଆଚାସ୍ ସେରି ମ୍‌ନେ ହ୍‌କାଉଆ। ପାପେହ୍‌ଣି ମ୍‌ନ୍ ବାଦ୍‍ଲାଇ କ୍‍ରି ଦୁକ୍ କ୍‍ରା ଆର୍ ଆଗେ କ୍‌ରିରିଲା କାମ୍ ସ୍‍ବୁ କ୍‍ରା। ତୁମି ଯଦି ବଦ୍‌ଲି ନ୍‌କେରାସ୍ ତ୍‌ବେ ମୁଇ ଆସିନ୍ଦ୍ ଆର୍ ତୁମାର୍ ଦିପ୍ ରୁକାକେ ତାର୍ ଜାଗାଇ ହ୍‌ଣି ଅଲ୍‌ଗା କ୍‍ରି ଦ୍‌ଇନ୍ଦ୍।

6ମ୍‌ତର୍ ତୁମାର୍ ଗଟେକ୍ ବିଷୟ୍‌ ମକେ ବ୍‍ଲ୍ ଲାଗେଦ୍, ତୁମି ନୀକଲାତୀୟ ଲକ୍‌ମ୍‌ନ୍‌କାର୍‌ କାମ୍‌କେ ଗୁର୍‌ଣା କ୍‍ରାସ୍, ଆର୍ ମୁଇ ହେଁ ସେମ୍‌ନ୍‌କାର୍ କାମ୍ ଗୁର୍‌ଣା କ୍‌ରିନ୍ଦ୍।

7“ଯାର୍ ଶୁଣ୍‌ତାର୍ ହାଇଁ କାନ୍ ଆଚେ ମ୍‌ଣ୍ତଳିମ୍‌ନ୍‌କେ ଆତ୍ମା କ୍‌ଉତା କ୍‌ତା ଶୁଣ୍‌ତା ଦ୍‌ର୍‌କାର୍।” ଜୁଇଲକ୍ କ୍‍ରାପ୍ କାମ୍‌କେ ଆରାଇକ୍‌ରି ଜିତେଦ୍, ତାକେ ଅମି ଇଶ୍ଵରାର୍ ସ୍‌ର୍‌ଗେ ରିଲା ଜୀବନ୍ ଦେତା ଗ୍‌ଚାର୍ ହ୍‍ଳ୍ କାମ୍‌କେ ଦେମ୍‍ନ୍ଦ୍।

8ସ୍ମର୍ଣ୍ଣା ସ୍‌ହରାର୍‌ ମ୍‌ଣ୍ତଳି ତ୍‌ଇ ର୍‌ଇ ଉଦାର୍‌‌କ୍‌ର୍‌ତା ଦୂତ୍ ଲ୍‌ଗେ ଇରି ଲେକ୍, ଜୁଇ ଆରାମ୍ ଆର୍ ଶେସ୍, ଯେ ମ୍‌ରିକ୍‌ରି ଆର୍ ଗଟେତର୍ ଜିଉଟ୍‌ଲା ସେ ଇରି କ୍‌ମ୍‌ଲା।

9“ମୁଇ ତୁମାର୍ କ୍‌ଷ୍ଟ ଜାଣିନ୍ଦ୍। ମୁଇ ଜାଣି, ତୁମି ବେସି ଗ୍‌ରିବ୍, ମ୍‌ତର୍ ପର୍‌କୁତରେ ତୁମି ଦ୍‌ନି ଲକ୍। ତୁମାର୍ ବିରୁଦେ ଲିନ୍ଦାକ୍‍ତା କ୍‌ଉତାର୍ ମୁଇ ଶୁଣି ଆଚି, ସେ କ୍‍ରାପ୍ କ୍‌ତା କ୍ଉତାଲକ୍ ଯିହୁଦି ଲକ୍‌ମ୍‌ନ୍‌। ମ୍‌ତର୍ ସ୍‌ତ୍ ଯିହୁଦି ନାଇ। ସେମ୍‌ନ୍ ଶଇତାନାର୍ ଦ୍‌ଳାର୍ ଲକ୍।

10ତୁମି ଜୁଇସ୍‌ବୁ ଦୁକ୍ ବଗୁକେ ଜ୍‌ମ୍‌ଲାସ୍, ସେତାର୍‍ଗିନେ ଡିରାନାଇ। ମୁଇ ଜାଣି, ତୁମାର୍‌ମ୍‌ନ୍‌କାର୍ ବିତ୍‌ରେହ୍‌ଣି କ୍‍ତେକ୍ ଲକ୍‌କେ ଶଇତାନ୍‌ ବନ୍ଦିଗ୍‍ରେ ର୍‌କେଦ୍। ସେ ତୁମୁକ୍‌ମ୍‌ନ୍ ପରିକ୍ୟା କ୍‌ରୁକେ ଅନ୍‌କାର୍ କ୍‍ରେଦ୍। ତୁମିମ୍‍ନ୍ ଦ୍‌ଶ୍ ଦିନ୍ ହ୍‌ତେକ୍ ଦୁକ୍‍କ୍‍ଷ୍ଟ ହାଉଆସ୍। ମ୍‌ତର୍ ସ୍‌ତ୍‌ରେ ରିଆ, କାଇତାକ୍ ଅମ୍‌ହାରେ ତୁମୁକେ ମ୍‌ରୁକେ ହେଁ ଅଇଦ୍। ଯ୍‌ଦି ତୁମି ସ୍‌ତ୍ ସ୍‌ଙ୍ଗ୍ ରିଆସ୍, ତ୍‌ବେ ମୁଇ ତୁମୁକେ ନ୍‌ସେର୍‌ତା ଜୀବନ୍ ଟହ୍‌ରିହ୍‌ର୍ ଇନାମ୍ ଦ୍‌ଇନ୍ଦ୍।”

11“ଯାର୍ ଶୁଣ୍‌ତାର୍ ହାଇଁ କାନ୍ ଆଚେ ମ୍‌ଣ୍ତଳିମ୍‌ନ୍‌କେ ଆତ୍ମା କ୍ଉତା କ୍‌ତା ଶୁଣ୍‌ତା ଦ୍‌ର୍‌କାର୍।” ଜୁଇ ଲକ୍‍ମ୍‍ନ୍ କ୍‍ରାପ୍ କାମ୍‌କେ ଆରାଇକ୍‌ରି ଜିତି ଆଚ୍‌ତି ସେମ୍‌ନ୍ ଆର୍‌ଗଟ୍ ମ୍‌ର୍‌ନାର୍ ଡ୍‌ଣ୍ଡେ ହ୍‌ଣି ଉଦାର୍‌ ହାଉତି।

12ପର୍ଗମ ସ୍‌ହରାର୍‌ ମ୍‌ଣ୍ତଳି ତ୍‌ଇ ର୍‌ଇ ଉଦାର୍‌‌କ୍‌ର୍‌ତା ଦୂତ୍ ଲ୍‌ଗେ ଇରି ଲେକ୍, ଜାର୍‍ଲ୍‌ଗେ ଲାଗାଣ୍ ଦୁଇ ଦାରିଆ କ୍‌ଣ୍ତା ଆଚେ ସେ ଇରି କ୍‌ମ୍‌ଲା,

13ମୁଇ ଜାଣିନ୍ଦ୍ ଯେ, ଶଇତାନାର୍ ରାଜ୍‌ଗାଦି ଜୁଇତି ଆଚେ, ସେ ସ୍‌ହରେ ତୁମି ବାସା କ୍‍ରୁଲାସ୍। ତ୍‌ନ୍‌ଅଇଲେକ୍ ହେଁ ତୁମି ମର୍‌ହାଇଁ ସ୍‌ତ୍‌ରେ ଆଚାସ୍ ଅନ୍‌କ୍‌ରି କି, ଶଇତାନ୍ ବାସା କ୍‌ର୍‌ତେରିଲା ସେ ସ୍‌ହରେ ମର୍ ବିଶ୍‌ବାସ୍‌ର୍ ସାକ୍ଷି ଆନ୍ତିପାକେ ମ୍‌ର୍‌ନେ ମାର୍‌ତା ସ୍‌ମୟେ ହେଁ ତୁମି ମର୍‍ଲ୍‌ଗେ ବିଶ୍‌ବାସ୍ କ୍‍ରୁଲାସ୍ ମ୍‌ନାକ୍‌ରି ନ୍‌ରିଲାସ୍।

14ଅଇଲେକ୍ ହେଁ ଅଳକ୍ ବିଷୟେ ତୁମାର୍ ବିରୁଦେ ମର୍‍କ୍‍ତା ଆଚେ, ତୁମାର୍ ଦ୍‌ଳ୍ ବିତ୍‌ରେ କ୍‍ତେକ୍ ଲକ୍ ବିଲିୟମ୍ ବବିଶତ୍ କ୍‌ତା କ୍‌ଉତା ଲକାର୍ ଶିକ୍ଯାର୍ ହ୍‌ଚେ ଜ୍‌ମ୍‌ଲାଇ, ଇ ବିଲୀୟାମ ବାଲାକ୍ ର୍‌ଜାର୍ ମୁର୍‌ତିକେ ହୁଜାଦିଲା ବଗ୍ କାମ୍‌କେ ଆର୍ ଦାରିକାମ୍ ପାପ୍ କ୍‍ରି ଇସ୍ରାଏଲାର୍ ଲକ୍‌ମ୍‍ନ୍‌କେ ପାପ୍ କ୍‌ର୍‌ତାର୍ ଶିକାଇରିଲା।

15ସେନ୍‌କାର୍ ତୁମାର୍ ଦ୍‌ଳାର୍ କ୍‍ତେକ୍ ଲକ୍‍ମ୍‍ନ୍ ନୀକଲାତୀୟ ମ୍‌ନ୍‌କାର୍ ଶିକ୍ଯାର୍ ହ୍‌ଚେ ଜ୍‌ମ୍‌ଲାଇ।

16ସେତାର୍‌ଲାଗି ତୁମି ପାପେହ୍‌ଣି ମ୍‌ନ୍ ବାଦ୍‍ଲାଉଆ। ଯ୍‌ଦି ତୁମି ପାପେହ୍‌ଣି ମ୍‌ନ୍ ବାଦ୍‌ଲାଇ କ୍‍ରି ନ୍‌କେରାସ୍, ତ୍‌ବେ ମୁଇ ତୁମାର୍ ଲ୍‌ଗେ ଦାହ୍‍ରେ ଆସିନ୍ଦ୍ ଆର୍ ମର୍ ଟ୍‌ଣ୍ଡେ ହ୍‌ଣି ବାର୍‌ତା କ୍‍ଣ୍ତାସ୍‍ଙ୍ଗ୍‍ ସେମ୍‌ନ୍‌କାର୍ ବିରୁଦେ ଜୁଜ୍ କ୍‌ରିନ୍ଦ୍।

17“ଯାର୍ ଶୁଣ୍‌ତାର୍ ହାଇଁ କାନ୍ ଆଚେ ମ୍‌ଣ୍ତଳିମ୍‌ନ୍‌କେ ଆତ୍ମା କ୍‌ଉତା କ୍‌ତା ଶୁଣ୍‌ତା ଦ୍‌ର୍‌କାର୍।” ଜୁଇ ଲକ୍ କ୍‍ରାପ୍ କାମ୍ ଆରାଇକ୍‌ରି ଜିତେଦ୍ ତାକେ ଲୁକିରିଲା ସ୍‌ର୍‌ଗାର୍ କାଦି ମାନା ଦ୍‌ଇନ୍ଦ୍, ଆର୍ ଜୁଇ ନ୍‌ଉଆ ନାଉଁ, ହାଉତା ଲକ୍ ଚାଡି କେ ହେଁ ଜାଣିନ୍‌କେର୍‌ତି ଅନ୍‌କାର୍ ଗଟେକ୍ ଦବ୍ ଟେଡା ଲ୍‌ଗେ ଲେକିକ୍‌ରି ଦ୍‌ଇନ୍ଦ୍।

18ଥୁୟତୀରା ସ୍‌ହରାର୍‌ ମ୍‌ଣ୍ତଳି ତ୍‌ଇ ର୍‌ଇ ଉଦାର୍‌‌କ୍‌ର୍‌ତା ଦୂତ୍ ଲ୍‌ଗେ ଇରି ଲେକ୍, ଇଶ୍ଵରାର୍ ହଇସିର୍‌ ଆକି ଲାଗ୍‌ତା ଜୟ୍ ହ୍‌ର୍ ଆର୍ ହାଦ୍ ଉଜାଳ୍ ହିତୁଳ୍ ହ୍‌ର୍, ସେ ଇରି କ୍ଉତି,

19ମୁଇ ତୁମାର୍ କାମ୍ ବିଷୟେ ଜାଣି, ମୁଇ ତୁମାର୍ ଲାଡ୍, ବିଶ୍‌ବାସ୍‌, ସେବା, ଆର୍ ସାସ୍ ବିଷୟେ ହେଁ ଜାଣି। ମୁଇ ଜାଣି ତୁମି ଆରାମେ କ୍‌ରିରିଲା କାମେ ହ୍‌ଣି ଅଦିକ୍ କାମ୍ କ୍‍ରୁଲାସ୍।

20ମ୍‌ତର୍ ତୁମାର୍ ବିରୁଦେ ମର୍ ଇକ୍‍ତା ଆଚେ, ଯିଜେବଲ୍ ନାଉଁର୍‌ ମାଇଜିକେ ତାର୍ ଇଚାରେ କାମ୍ କ୍‌ରୁକେ ଦେମ୍‌ଲାସ୍। ସେ ନିଜ୍‍କେ ବବିଶତ୍ କ୍‌ତା କ୍‌ଉତାଲକ୍ ବ୍‌ଲି କ୍‌ଉତି। ସେ ତାର୍ ଶିକ୍ୟା ଦ୍ୱାରା ମର୍ ଲକ୍‌ମ୍‍ନ୍‌କେ ଗୁହାଉତି। ସେ ମର୍ ଦାସ୍‌ମ୍‌ନ୍‌କେ ଦାରିକାମ୍ କ୍‌ରୁକେ ଆର୍ ଦେବ୍‍ତାକେ ଦିଲା ବଗ୍ କାତାର୍ ହାଇଁ ଶିକ୍ୟା ଦେମ୍‌ଲାଇ।

21ମୁଇ ତାର୍ ମ୍‌ନ୍ ବାଦ୍‍ଲାଉତାର୍ ହାଇଁ ଆର୍ ପାପାର୍ ର୍‌ସ୍ତାଇ ହ୍‌ଣି ଦୁରି ଜ୍‌ମ୍‌କେ ସୁଜଗ୍ ଦିଲେକ୍ ହେଁ ସେ ନିଜାର୍ ମ୍‌ନ୍ ବାଦ୍‍ଲାଉତାର୍ ହାଇଁ ଇଚା କ୍‌ରିନ୍‌କେର୍‌ତି।

22ସେତାର୍‍ଗିନେ ମୁଇ ତାକେ କ୍‍ଟେ ହ୍‌ଣି ଉଟୁନ୍‌ହାର୍‌ଲା ହ୍‌ର୍ ବେସି ବେମାର୍ କ୍‌ରାଇନ୍। ତାର୍‌ସ୍‍ଙ୍ଗ୍‍ ଜୁଇ ଲକ୍‍ମ୍‍ନ୍ ଦାରିକାମାର୍ ପାପ୍‌କ୍‌ର୍‌ତି ସେମ୍‌ନ୍ ହେଁ କ୍‌ଷ୍ଟ ହାଉତି। ସେମ୍‌ନ୍ ଯ୍‌ଦି ତାର୍ କ୍‌ରାପ୍‌କାମେ ହ୍‌ଣି ନିଜ୍‍କେ ବାର୍‌କ୍‌ରି ଆଣି ନ୍‌କେର୍‌ତି, ତ୍‌ବେ ମୁଇ ସେମ୍‌ନ୍‌କେ ଡ୍‌ଣ୍ଡ୍ ଦ୍‌ଇନ୍ଦ୍।

23ମୁଇ ତାର୍ ହ୍‌ଚେ ଇଣ୍ଡ୍‌ତା ଲକ୍‌କେ ହେଁ ମ୍‌ର୍‌ନେ ମାରିନ୍ଦ୍। ସେଡେବ୍‌ଳ୍ ସ୍‌ବୁ ମ୍‌ଣ୍ତଳି ଜାଣ୍‌ତି ଯେ, ମୁଇ, ଲକ୍‌ମ୍‌ନ୍‌କାର୍‌ ବାବ୍‌ନା ଆର୍ ବିଚାର୍‌‌ମ୍‌ନ୍ ଜାଣିନ୍ଦ୍ ଆର୍ ସେରି ପରିକ୍ୟା କ୍‌ରିନ୍ଦ୍। ମୁଇ ତୁମୁକ୍‌ମ୍‌ନ୍ ତୁମାର୍ କାମାର୍ ହିସାବେ ହ୍‌ଳ୍‌ ଦ୍‌ଇନ୍ଦ୍।

24ମ୍‌ତର୍ ଥୁୟତୀରା ତ୍‌ଇ ରେମା ଜୁଇ ବାକିଲକ୍ ତାର୍ ଶିକ୍ୟା ହ୍‌ଚେ ଇଣ୍ଡତ୍ ନାଇ ଆର୍ ସେମ୍‌ନ୍ କ୍‌ଉତା ଶଇତାନାର୍ ଲୁକ୍‌ଲା ଶିକ୍ୟା ମାନିନ୍‌କେର୍‌ତି, “ମୁଇ ସେମ୍‌ନ୍‌କେ ଇରି କ୍‌ମ୍‌ଲେ, ମୁଇ ତୁମାର୍‌ମ୍‌ନ୍‌କାର୍ ଉହ୍‌ରେ ଆର୍‌ କୁଇ ଅଲ୍‌ଗା ବଜ୍‌ଲାଦି ନ୍‌କେରି।

25ମୁଇ ଆସ୍‌ତା ହ୍‌ତେକ୍ ତୁମାର୍‌ମ୍‌ନ୍‌କାର୍ ଲ୍‌ଗେ ଯାଇରି ଆଚେ, ସେରି ଡାଟ୍‍କ୍‍ରି ଦ୍‌ରିରିଆ।

26ଯେ କ୍‍ରାପ୍ କାମ୍‌କେ ଆରାଇ ଜିତେଦ୍ ଆର୍ ସ୍‌ରାସ୍‌ରି ହ୍‌ତେକ୍ ମର୍‌ଇଚା ଅନୁସାରେ କାମେ ଲାଗି ର୍‌ଇଦ୍ ମୁଇ ମର୍ ଉବା ଲ୍‌ଗେହ୍‌ଣି ଜୁଇ ଅଦିକାର୍ ହାଇଆଚି, ମୁଇ ତାକେ ସେ ସ୍‌ମାନ୍ ଅଦିକାର୍ ସ୍‌ଙ୍ଗ୍ ସ୍‌ବୁ ଜାତିର୍‌ ଲକ୍‌ମ୍‍ନ୍‌କେ ଶାସନ୍ କ୍‌ରୁକେ ଦ୍‌ଇନ୍ଦ୍।

27ଆର୍ ସେ ଲ୍‌ଉଆ ଡାଙ୍ଗ୍ ଦ୍‍ରି ସେମ୍‌ନ୍‌କେ ଶାସନ୍ କ୍‍ରେଦ୍। ସେ ସେମ୍‌ନ୍‌କେ ମାଟି ଟାଙ୍ଗା ହ୍‌ର୍ କ୍‌ଣ୍ଡ କ୍‌ଣ୍ଡ କ୍‍ରି ବାଙ୍ଗେଦ୍।

28ଆରେକ୍‌, ମୁଇ ତାକେ ସ୍‌କାଳାର୍ ତାରା ହେଁ ଦ୍‌ଇନ୍ଦ୍।

29ଯାର୍ ଶୁଣ୍‌ତାର୍ ହାଇଁ କାନ୍ ଆଚେ ମ୍‌ଣ୍ତଳିମ୍‌ନ୍‌କେ ଆତ୍ମା କ୍‌ଉତା କ୍‌ତା ଶୁଣ୍‌ତା ଦ୍‌ର୍‌କାର୍।”

← Chapter 1 Jump to: Chapter 3 →