Romans 10

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 9 Jump to: Chapter 11 →

1ଏ ମର୍ ଲ୍‌ଡାର୍ ବାଇ ଆର୍ ବେଣିମ୍‌ନ୍, ମୁଇ ଇଶ୍ଵରାର୍ ଲ୍‌ଗେ ପାର୍‌ତେନା କ୍‌ରୁଲେ, ଆର୍ ଗଟେମ୍‌ନେ ଇଚା କ୍‌ରୁଲେ କି ଯିହୁଦି ଲକ୍‍ମ୍‍ନ୍ ଉଦାର୍‌ ଅଉତ୍।

2ମୁଇ ବିଶ୍‍ବାସାର୍ ସ୍‌ଙ୍ଗ୍ ସେମ୍‍ନ୍‍କାର୍ ବିଷୟେ କ୍‌ମ୍‌ହାରି, ଯେ ସେମ୍‍ନ୍ ସ୍‌ତ୍‌କ୍‌ରି ଇଶ୍ଵରାର୍ ହ୍‌ଚେ ଜ୍‌ମ୍‌କେ ମ୍‌ନ୍‌କ୍‌ର୍‌ତି, ମ୍‍ତର୍ ଟିକ୍ ବାଟ୍ ନ୍‍ଜାଣ୍‍ତି।

3ସେମ୍‍ନ୍ ଜାଣିନ୍‌ରିଲାଇ ଯେ, ଇଶ୍ଵର୍ କ୍‍ନ୍‍କ୍‍ରି ତାର୍‌ସ୍‍ଙ୍ଗ୍‍ ଲକ୍‌ମ୍‍ନ୍‌କେ ଦ୍‌ର୍‌ମି କ୍‌ର୍‌ତି। ସେମ୍‍ନ୍ ଦ୍‌ର୍‌ମି ଅମ୍‌କେ ନିଜାର୍ ଉପାଇ ଦ୍ୱାରା ଚେଷ୍ଟା କ୍‌ଲାଇ। ତ୍‍ବେ ସେମ୍‍ନ୍ ଦ୍‌ର୍‌ମି ବ୍‌ଲି ଗ୍‌ଣାଇ ଅଉତା ଇଶ୍ଵରାର୍ ବାଟ୍‌କେ ନ୍‍ଗେଲାଇ।

4ଖ୍ରୀଷ୍ଟ ମୋଶାର୍ ନିୟମ୍‌କେ ଶେସ୍ କ୍‍ଲା, ଜ୍‌ନ୍‌କ୍‌ରି ତାକେ ବିଶ୍‍ବାସ୍ କ୍‌ର୍‌ତିରିଲା ସ୍‌ବୁ ଲକ୍ ଇଶ୍ଵରାର୍ ସାମ୍‌ନାଇ ଦ୍‌ର୍‌ମି ଅମ୍‌ହାରେ।

5କାଇତାକ୍ ନିୟମ୍ ମାନିକ୍‌ରି ଇଶ୍ଵରାର୍ ସାମ୍‌ନାଇ ଦ୍‌ର୍‌ମି ଅଉତା ବିଷୟେ ମୋଶା ଇରି କ୍‌ଇଲା ଆଚେ, “ଜୁଇଲକ୍ ନିୟମ୍ ମାନେଦ୍ ସେ ଲକ୍ ଜୀବନ୍ ହାଇଦ୍।”

6ମ୍‍ତର୍ ବିଶ୍‍ବାସାର୍ ଗିନେ ଦ୍‌ର୍‌ମି ଅଉତା ବିଷୟେ ପବିତର୍‌ ଶାସ୍‌ତର୍ ତ୍‌ଇ ଅନ୍‌କ୍‌ରି କ୍‌ଇଦ୍ “ନିଜେ ନିଜ୍‍କେ ହ୍‍ଚାରା ନାଇ ଯେ ସ୍‌ର୍‌ଗେ ଯାଇଦ୍?” (ଇତାର୍ ଅର୍‍ତକେ ସ୍‌ର୍‌ଗେ ହ୍‍ଣି ଖ୍ରୀଷ୍ଟକେ ହୁର୍‌ତିବି ତ୍‌ଇ ଆଣାସ୍?)

7ଆରେକ୍‌ ଅନ୍‌କ୍‌ରି କ୍ଉଆନାଇ ଯେ, “ହାତାଳ୍‌କେ କେ ଯାଇଦ୍?” (ଇତାର୍ ଅର୍‌ତ ମ୍‌ଲା ଲକ୍‌ମ୍‌ନ୍‌କାର୍‌ ବିତ୍‌ରେହ୍‌ଣି ଖ୍ରୀଷ୍ଟର୍ ଉହୁରେ ଆଣ୍‌ତି?)

8ପବିତର୍‌ ଶାସ୍‌ତର୍ କ୍‌ଇଦ୍, “ଇଶ୍ଵରାର୍ ବାକ୍ୟ ତୁମାର୍ ଲ୍‌ଗେ ଆଚେ, ଇରି ତୁମାର୍ ଟ୍‌ଣ୍ଡେ ଆର୍ ତୁମାର୍ ହୁର୍‌ଦୟେ ଆଚେ।” ଅମି ଲକ୍‌ମ୍‍ନ୍‌କେ ପର୍‌ଚାର୍ କ୍‌ର୍‌ତା ବାକ୍ୟ ବିଶ୍‍ବାସାର୍ ବାକ୍ୟ।

9ଯ୍‌ଦି ତୁମି ନିଜାର୍ ଟ୍‌ଣ୍ଡେ କ୍‌ଉଆସ୍, “ଯୀଶୁ ହ୍‌କା ମାପ୍‌ରୁ,” ଆର୍ ତୁମାର୍ ହୁର୍‌ଦଇ ବିତ୍‌ରେ ବିଶ୍‍ବାସ୍ କ୍‍ରାସ୍ ଯେ ଇଶ୍ଵର୍ ଯୀଶୁକେ ମ୍‌ଲାତ୍ଇହ୍‍ଣି ଉଟାଇ ଆଣିରିଲା ବ୍‌ଲି ତ୍‍ବେ ତୁମି ଉଦାର୍‌ ହାଉଆସ୍।

10ହୁର୍‌ଦ୍‌ୟେ ବିଶ୍‍ବାସାର୍ ଗିନେ ଅମି ଇଶ୍ଵର୍ ହାଇଁ ଦ୍‌ର୍‌ମି ଅଇଆଚୁ, ଟ୍‌ଣ୍ଡ୍ ଦ୍ୱାରା କ୍‌ଇ ବିଶ୍‍ବାସ୍‍କେ ଜାଣାଇଲେକ୍‌ ଅମି ଉଦାର୍‌ ହାମ୍‌ନ୍ଦ୍‌।

11ପବିତର୍‌ ଶାସ୍‌ତର୍ କ୍‌ମ୍‌ଲି “ଯେ ଖ୍ରୀଷ୍ଟକେ ବିଶ୍‍ବାସ୍ କ୍‍ରେଦ୍ ସେ ଲାଜ୍ ହାଇ ନ୍‌କେରେ।”

12କାଇତାକ୍ ଯିହୁଦି ଆର୍ ଯିହୁଦି ଚାଡି ବିନ୍‌ଜାତି ଲକ୍‌ମ୍‌ନ୍‌କାର୍‌ ବିତ୍‌ରେ ଜାତି ବେଦ୍ ନାଇ। ସ୍‌ବୁ ଲକ୍‌ମ୍‌ନ୍‌କାର୍‌ ଗଟେକ୍ ମାପ୍‌ରୁ। ଜୁଇଲକ୍ ତାକେ ବିଶ୍‍ବାସ୍ କ୍‍ରି ପାର୍‌ତେନା କ୍‌ର୍‌ତି, ମାପ୍‌ରୁ ସେମ୍‌ନ୍‌କେ ବେସି ଆଶିର୍‌ବାଦ୍‌ କ୍‍ରେଦ୍।

13ପବିତର୍‌ ଶାସ୍‌ତର୍ କ୍‌ମ୍‌ଲି “ଜୁଇଲକ୍ ମାପ୍‌ରୁର୍‌ ନାଉଁ ଦ୍‍ରି ପାର୍‌ତେନା କ୍‌ର୍‌ତି, ସେ ଉଦାର୍‌ ହାଉତି।”

14ମ୍‍ତର୍ ଲକ୍ ବିଶ୍‍ବାସ୍ କ୍‌ଲାହ୍‌ଚେ ହ୍‌କା, ମାପ୍‌ରୁକେ ସାଇଜ ହାଇଁ କୁଦୁ ହାର୍‌ତି। ତାର୍ ବିଷୟରେ ଶୁଣି ସ୍‌ର୍‌ଲା ହ୍‌ଚେ ହ୍‌କା, ଲକ୍ ତାର୍ ବିଷୟରେ ବିଶ୍‍ବାସ୍ କ୍‌ରୁହାର୍‌ତି। କେ ଗଟେକ୍ ସେମ୍‌ନ୍‌କେ କ୍‌ଇଲା ହ୍‌ଚେ, ହ୍‌କା ଲକ୍ ତାର୍ ବିଷୟରେ ଶୁଣୁ ହାର୍‌ତି।

15ଇ ଶିକ୍ୟା ଦେତା ଲକେ ଗଟେକ୍ ଦ୍ୱାରା ହ୍‌ଟାଇଲେ ହ୍‌କା ସେ ଶିକ୍ୟା ଦେମ୍‌ହାରେ ପବିତର୍‌ ଶାସ୍‌ତର୍ ତ୍‌ଇ ଲେକାଆଚେ, “ସୁବ୍‌କ୍‌ବର୍ କ୍‌ଉତା ହାଇଁ ଆସ୍‌ତା ଲକାର୍‌ ହାଦ୍ କ୍‌ଡେକ୍ ସୁନ୍ଦୁର୍।”

16ମ୍‍ତର୍ ସ୍‌ବୁ ଇସ୍ରାଏଲ୍ ଲକ୍ ସୁବ୍‌କ୍‌ବର୍‌କେ ମାନିନ୍‌କେର୍‌ତି। ବବିସ୍‌ତ୍ କ୍‌ଉତା ଯିଶାଇୟ କ୍‌ମ୍‌ଲା, “ଏ ମାପ୍‌ରୁ ଅମାର୍ ଶିକ୍ଯାମ୍‌ନ୍ କେ କାଇରି ବିଶ୍‍ବାସ୍ କ୍‌ଲାଇ?”

17ସୁବ୍‌କ୍‌ବର୍ ଶୁନ୍‌ଲେକ୍ ବିଶ୍‍ବାସ୍ ଜ୍‍ର୍‍ନ୍‌ ଅଇଦ୍ ଆର୍ ଏକ୍‍ଲାକେ ଖ୍ରୀଷ୍ଟର୍ ବିଷୟେ କଇଲେକ୍ ଲକ୍ ଶୁଣ୍‌ତି।

18ମ୍‍ତର୍ ମୁଇ ହ୍‍ଚାରୁଲେ କାଇରି ଲକ୍ ସୁବ୍‌କ୍‌ବର୍ ଶୁଣିନ୍‌କେର୍‌ତି? ହେଁ ସେମ୍‍ନ୍ ଶୁଣି ଆଚ୍‌ତି। ଶାସ୍‌ତର୍ କଇଦ୍ “ସ୍‌ବୁ ହୁର୍‌ତିବି ସେମ୍‍ନ୍‍କାର୍ ସ୍‌ର୍, ଆର୍ ଜ୍‍ଗତାର୍ ସିମା ହ୍‌ତେକ୍ ସେମ୍‍ନ୍‍କାର୍ କ୍‌ତା ବିଚିଅଇଲି।”

19ଆରେକ୍‌ ମୁଇ ହ୍‍ଚାରୁଲେ “କାଇରି ଇସ୍ରାଏଲାର୍ ଲକ୍ ବୁଜୁ ନ୍‌ହାରି ଆଚ୍‌ତି?” ହେଁ ସେମ୍‍ନ୍ ବୁଜୁ ନାହାର୍‍ଲାଇ। ହ୍‌ର୍‌ତୁ ମୋଶା କଇଦ୍ “ଅମି ଗ୍‌ଣିନ୍‌ଉତା ଜାତିର୍‌ ତ୍‌ଇ ତୁମାର୍‌ମ୍‌ନ୍‌କାର୍ ମ୍‌ନେ ମ୍‌ନେ ଅକାର୍ କ୍‍ରେଦ୍, ଗଟେକ୍ ବୁଜି ନ୍‌କେର୍‌ତା ଜାତିର୍‌ ଦ୍ୱାରା ତୁମୁକ୍‍ମ୍‌ନ୍‍କେ ରିସା କ୍‌ରାମ୍‌ନ୍ଦ୍।”

20ଇତାର୍ ହ୍‌ଚେ ଯିଶାଇୟ ନ୍‌ଡିରିକ୍‌ରି କ୍‌ଇଲା, “ଜୁଇ ଲକ୍‍ମ୍‍ନ୍ ଅମାର୍ ହ୍‌ଚେ ଆସି ନ୍‌କେର୍‌ତିରିଲାଇ, ସେମ୍‍ନ୍ ଅମୁକେ ମିଳାଇଲାଇ, ଜୁଇ ଲକ୍‌ମ୍‌ନ୍‌ ଅମାର୍ ବିଷୟେ ହ୍‍ଚାରି ନ୍‌କେର୍‌ତିରିଲାଇ, ସେମ୍‍ନ୍‍କାର୍ ତ୍‌ଇ ଅମି ଜାଣାଇ ଅଇଲୁ।”

21ମ୍‍ତର୍ ଇସ୍ରାଏଲ୍ ଲକ୍‌ମ୍‌ନ୍‌କାର୍‌ ବିଷୟେ ଇଶ୍ଵର୍ ଅନ୍‌କ୍‌ରି କ୍‌ଇଦ୍, “ଅମି ଇ ଲକ୍‌ମ୍‌ନ୍‌କାର୍‌ ହାଇଁ ଦିନ୍‍ସାରା ଜାଗିରିଲେକ୍‌ ହେଁ, ସେମ୍‍ନ୍ ଅମୁକେ ମାନିନ୍‌କେଲାଇ ଆର୍ ଅମାର୍ ହ୍‌ଚେ ଆସି ନ୍‌କେଲାଇ।”

← Chapter 9 Jump to: Chapter 11 →