Romans 13

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 12 Jump to: Chapter 14 →

1ସ୍‌ବୁ ଲକ୍‌ ସ୍‌ର୍‌କାର୍ ଶାସନ୍‌କ୍‌ର୍‌ତା ଲକ୍‌ମ୍‌ନ୍‌କାର୍‌ ତ୍‌ଳେ ରେତା ଦ୍‌ର୍‌କାର୍। କାଇତାକ୍ ସେମ୍‍ନ୍‍କାର୍ ଇ ଶ୍‌କ୍‌ତି ଇଶ୍ଵରାର୍ ଦ୍ୱାରା ଦିଆଅଇଲିଆଚେ, ଆରେକ୍‌ ଜୁଇଲକ୍ ଅବେ ଅଦିକାରି, ଇଶ୍ୱର୍‌ ସେମ୍‌ନ୍‌କେ ଇ କାମ୍ ଦିଲାଆଚେ।

2ତ୍‍ବେ ଅଦିକାର୍‌କେ ବିରଦ୍ କ୍‌ର୍‌ତା ଲକ୍‍ମ୍‍ନ୍ ପର୍‌କୁତରେ ଇଶ୍ଵରାର୍ ଆଦେସାର୍ ବିରଦି। ଅନ୍‌କ୍‌ରି ବିରଦ୍ କ୍‌ର୍‌ତା ଲକ୍ ନିଜାର୍ ହାଇଁ ଡ୍‌ଣ୍ଡ୍ ହାଉତାର୍‌ ଜ୍‌ଗାଡ୍ କ୍‍ରି ର୍‌ଇଦ୍।

3ଜୁଇ ଲକ୍‌ମ୍‌ନ୍‌ ବ୍‌ଲ୍‌ କାମ୍‌କ୍‌ର୍‌ତି, ଶାସନ୍‌କ୍‌ର୍‌ତା ଲକ୍‌ମ୍‍ନ୍‌କେ ଡିର୍‌ତା ଦ୍‌ର୍‌କାର୍ ନାଇ। ମ୍‍ତର୍ ଜୁଇ ଲକ୍‌ମ୍‌ନ୍‌ କ୍‍ରାପ୍ କାମ୍ କ୍‌ର୍‌ତି ସେମ୍‍ନ୍ ଡିର୍‌ତା ଦ୍‌ର୍‌କାର୍। ଶାସନ୍‌କ୍‌ର୍‌ତା ଲକ୍‌ମ୍‌ନ୍‌କାର୍‌ ଡିର୍ ତ୍ଇହ୍‍ଣି ମୁକ୍‌ତି ହାମ୍‌କେ ଗଟେକ୍ ମ୍‍ତର୍ ଉପାଇ ଅମ୍‌ଲି ବ୍‌ଲ୍‌କାମ୍ କ୍‍ରୁମା। ବ୍‌ଲ୍‌କାମ୍ କ୍‌ଲେକ୍ ଶାସନ୍‌କ୍‌ର୍‌ତା ଲକ୍ ତୁମୁକ୍ ବ୍‍ଲ୍ ବ୍‌ଲି କ୍‌ଉତି।

4ତୁମୁକ୍ ସାଇଜ କ୍‌ର୍‌ତା ହାଇଁ ଶାସନ୍‌କ୍‌ର୍‌ତା ଲକ୍ ଅମ୍‌ଲାଇ ଇଶ୍ଵରାର୍ ଆରାଦନା କ୍‌ର୍‌ତା ଲକ୍। ମ୍‍ତର୍ ତୁମି ବୁଲ୍ କ୍‌ଲେକ୍ ଡିରା। ଶାସନ୍‌କ୍‌ର୍‌ତା ଲକାର୍‌ ଡ୍‌ଣ୍ଡ୍ ଦେତା ଅଦିକାର୍ ଆଚେ, ସେ ଅଦିକାର୍‌କେ ବ୍ଯବହାର୍ କ୍‍ରି କ୍‍ରାପ୍ କାମ୍ କ୍‌ର୍‌ତା ଲକ୍ କେ ଡ୍‌ଣ୍ଡ୍ ଦ୍‌ଇଦ୍।

5ସେତାର୍‌ ଗିନେ ଶାସନ୍‌କ୍‌ର୍‌ତା ଲକାର୍‌ ନିୟମ୍ ତୁମି ମାନ୍‌ତା ଦ୍‌ର୍‌କାର୍। ଇଶ୍ଵରାର୍ ନିୟମ୍ ନ୍‌ମାନ୍‌ଲେକ୍ ଡ୍‌ଣ୍ଡ୍ ହାଇଦ୍, ସେତାର୍‍ଗିନେ ନିୟମ୍ ମାନି ନ୍‌କେରା। ଅଦିକ୍ ଶାସନ୍ ମାନ୍‌ତାର୍‌ ଟିକ୍ କାମ୍ ବ୍‌ଲି ଜାଣିରିଲାକ୍ ତୁମି ଅନ୍‌କ୍‌ରି କ୍‌ର୍‌ତା ଦ୍‌ର୍‌କାର୍।

6ସେତାକ୍ ଇ କାମାର୍ ଲାଗି ତୁମିମ୍‍ନ୍ ସ୍‌ର୍‌କାର୍‌କେ ସିସ୍‌ତୁ ଦେମ୍‌ଲାସ୍। ସେମ୍‍ନ୍ ଇଶ୍ଵରାର୍ ଆରାଦନା କ୍‌ରୁକେ ଆଚ୍‌ତି, ମ୍‍ତର୍ ସେ କାମ୍ କ୍‌ର୍‌ତା ହାଇଁ ନିଜାର୍ ସ୍‌ମୟ୍ ଦେମ୍‍ଲା।

7ସମାଜେ ଜାର୍ ଜାଇରି ଦ୍‌ର୍‌କାର୍ ତାକେ ସେରି ଦିଆସ୍। ଜାକେ ସିସ୍‌ତୁ ଦେତା କ୍‌ତା, ତାକେ ସିସ୍‌ତୁ ଦିଆସ୍, ଜାକେ ଡିର୍‌ତା କ୍‌ତା ଡିରା, ଜାକେ ସନ୍‌ମାନ୍ କ୍‌ର୍‌ତା କ୍‌ତା, ତାକ୍ ସନ୍‌ମାନ୍ କ୍‍ରା।

8କାର୍ ରୁଣ୍ ଅଉଆନାଇ। ମ୍‍ତର୍ ନିଜାର୍ ନିଜାର୍ ଲାଗି ଲାଡେ ରୁଣି ଅଉଆ। ଜୁଇଲକ୍ ଲାଗି ବେସି ଲାଡ୍ କ୍‍ରେଦ୍ ସେ ହୁରା ନିୟମ୍ ମାନି ଆଚେ।

9ମୁଇ ଅନ୍‌କ୍‌ରି କ୍‌ମ୍‌ଲେ, କାଇତାକ୍ ନିୟମ୍ କ୍‌ମ୍‌ଲି, ଦାରିକାମ୍ କ୍‍ରାନାଇ, ମାନାଇ ମାରାନାଇ, କାଇ ଜିନିଷ୍ ଚରି କ୍‍ରାନାଇ, ବିନ୍‌ଲକାର୍ ଜିନିଷ୍‌କେ ଲ୍‌ବ୍ କ୍‍ରାନାଇ, ଇ ସ୍‌ବୁ ଆଦେସ୍‌ମ୍‌ନ୍ ଆର୍ ବିନ୍‌ସ୍‌ବୁ ଆଦେସ୍‌ମ୍‌ନ୍ ସଂସାର୍ ବାବେ ଇ ନିୟମାର୍ ଲଗେ ଆଚେ, ଜାର୍ ନିଜ୍‍ର୍‌ ହ୍‍ଳ୍‌ସା ଗ୍‍ରାର୍ ଲକ୍‌ମ୍‍ନ୍‌କେ ତୁମି ନିଜ୍‍କେ ଲାଡ୍‌କ୍‌ଲା ହର୍ ଲାଡ୍‌କ୍‌ରା।।

10ଲାଡ୍ ବିନ୍ ଲକ୍‌କେ ବାଦା ଦ୍‌ଇନ୍‌କେରେ, ତ୍‌ବେ ଲାଡ୍ କ୍‌ର୍‌ତାର୍ ହୁରା ନିୟମ୍ ମାନ୍‌ଲେକ୍ ସପଳ୍‌ ଅଇଦ୍।

11ମୁଇ ଇସ୍‌ବୁ କ୍‌ତା କ୍‌ମ୍‌ଲେ, କାଇତାକ୍ ଅମାର୍ ଇ ସ୍‌ମୟ୍ ବେସି ମୁଲ୍ୟବାନ୍। ନିଦାର୍ ତ୍‌ଇହ୍‌ଣି ଜାଗ୍‌ରତ୍ ଅଉତାର୍ ସ୍‌ମୟ୍ ଅମ୍‌ଲି। ଆଗାର୍ କାଳାର୍ ବିଶ୍‍ବାସ୍ କ୍‌ର୍‌ତା ବାଟା ଅବେ ଅମି ଉଦାର୍‌ ହାଉତା ସ୍‌ମୟ୍ ଲ୍‌ଗେ ଆସିଆଚେ।

12ରାତି ବିତିଗ୍‌ଲିବେ ଆର୍ ସ୍‍କାଳ୍ ହାଇଲିବେ। ତ୍‌ବେ ଅନ୍ଦାରେ କ୍‌ର୍‌ତା ପାପ୍‌କାମ୍ ବ୍‌ନ୍ଦ୍ କ୍‍ରୁମା ଆର୍ ଉଜାଳାର୍ ହ୍‌ର୍ ବ୍‌ଲ୍‌କାମ୍ କ୍‌ରୁକେ ଚେଷ୍ଟା କ୍‌ର୍‌ତା ଦ୍‌ର୍‌କାର୍।

13ଅମି ବ୍‍ଲ୍ ଲକାର୍ ହର୍, ଉଜାଳାର୍ ଲକ୍ ହର୍ ଟିକ୍‌ବାବ୍‌ରେ ରେତା ଉଚିତ୍। ଅମି କ୍‌ର୍‌ଚ କ୍‍ରି ର୍‍ଙ୍ଗ୍ ର୍‌ସ୍‌ରେ ଲାଗିରେତାର୍ ଟିକ୍‌ନାଇ। ମାତିରେତାର୍ ଟିକ୍‌ନାଇ। ଦାରି ପାପ୍‌କାମ୍ ଆର୍ ବିନ୍‌ସ୍‌ବୁ ଲାଡ୍‌ସାରେ ଲାଗିରେତାର୍ ଟିକ୍‌ନାଇ। ଯୁକ୍‌ତି ତର୍‌କ କ୍‌ର୍‌ତାର୍ ଆର୍ ଅକାର୍ ଅଉତା ଉଚିତ୍ ନାଇ।

14ନିଜାର୍ ପାପ୍ ବ୍‌ର୍‌ତି ନିଜାର୍ ଇଚାକେ ଶାନ୍‌ତି କ୍‌ରୁକେ ଲାଗିନ୍‌ରେଇ ଅମି ମାପ୍‌ରୁ ଯୀଶୁ ଖ୍ରୀଷ୍ଟକେ ହିନ୍ଦ୍‌ତା ଦ୍‌ର୍‌କାର୍।

← Chapter 12 Jump to: Chapter 14 →