Romans 2

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 1 Jump to: Chapter 3 →

1ଯଦି ତୁମି ବାବୁଲାସ୍ ଯେ ତୁମିମ୍‍ନ୍ ବିନ୍‌ଲକାର୍ ନିୟାଇ ବିଚାର୍‌ କ୍‌ରୁହାରାସ୍ ତ୍‌ନ୍‌ଅଇଲେ ତୁମି ବୁଲ୍ କ୍‍ରୁଲାସ୍। ତୁମିମ୍‍ନ୍ ନିଜେ ହେଁ ପାପାର୍ ଦସି। ତୁମି ବିନ୍ ଲକ୍‌ମ୍‌ନ୍‌‍କାର୍ ନିୟାଇ ବିଚାର୍‌ କ୍‍ରୁଲାସ୍, ତ୍‌ନ୍‌ଅଇଲେକ୍ ତୁମି ହେଁ ସେମ୍‍ନ୍‍କାର୍ ହ୍‌ର୍ କ୍‍ରାପ୍ କ୍‍ରୁଲାସ୍। ତ୍‍ବେ ଜ୍‌ଡେବ୍‌ଳ୍ ତୁମି ସେମ୍‍ନ୍‍କାର୍ ନିୟାଇ ବିଚାର୍‌ କ୍‍ରୁଲାସ୍, ସେଡେବ୍‍ଳ୍ ସ୍‌ତ୍‌କ୍‌ରି ନିଜ୍‍କେ ଦସି ବ୍‌ଲି ନିୟାଇ ବିଚାର୍‌ କ୍‍ରୁଲାସ୍।

2ଇଶ୍ୱର୍‌ ଯେମ୍‍ନ୍‌ ଅନ୍‌କା କ୍‍ରାପ୍ କାମ୍ କ୍‌ର୍‌ତି ତାକାର୍ ନିୟାଇ ବିଚାର୍‌ କ୍‌ର୍‌ତି। ଇରି ଅମିମ୍‌ନ୍ ଜାଣୁ ଯେ ଇଶ୍ଵରାର୍ ନିୟାଇ ବିଚାର୍‌ ଟିକ୍ ଆଚେ।

3ତୁମି ବୁଲ୍ କାମ୍‌କ୍‌ର୍‌ତା ଲକ୍‌ମ୍‌ନ୍‌‍କାର୍ ନିୟାଇ ବିଚାର୍‌ କ୍‍ରୁଲାସ୍, ମ୍‍ତର୍ ତୁମି ନିଜେ ହେଁ ସେନ୍‍କ୍‌ରି ବୁଲ୍‌କାମ୍ କ୍‍ରୁଲାସ୍। ସେତାର୍‌ଲାଗି ତୁମି ଜାଣା ଯେ ଇଶ୍ୱର୍‌ ଜ୍‌ନ୍‌କ୍‌ଲେକ୍‌ ହେଁ ତୁମାର୍ ନିୟାଇ ବିଚାର୍‌ କ୍‍ରେଦ୍। ତୁମି ବିଚାରାର୍ ଉଦାର୍‌ ହାମ୍ ନ୍‌ହାରାସ୍।

4ଇଶ୍ୱର୍‌ ତୁମାର୍ ଲାଗି ବେସି ଦୟାଳୁ। ସେ ତୁମାର୍ ଲାଗି ଦର୍‌ଯ୍ୟବାନ୍। ଇଶ୍ୱର୍‌ ଜାଗିଆଚେ ଯେ, ତୁଇ ବଦ୍‌ଳିଜା, ମ୍‍ତର୍ ତୁମି ତାକାର୍ ଦୟା ବିଷୟରେ କିଚି ବାବି ନ୍‌କେରାସ୍। ଇରି ଅମ୍‌ହାରେ ଯେ, ତୁମି ବୁଜୁ ନ୍‌ହାରାସ୍ ଯେ ତୁମୁକେ ନିଜାର୍ ହୁର୍‌ଦୟରେ ଆର୍ ଜୀବନ୍ ବାଦ୍‍ଲାମ୍‍କେ ସୁଜଗ୍ ଦେତା ଉଦେସ୍‌ରେ ଇଶ୍ୱର୍‌ ତୁମାର୍ ଲାଗି ଦୟା ଅଇଆଚେ।

5ମ୍‍ତର୍ ତୁମିମ୍‍ନ୍ ଅଟୁଆ ଆର୍ ପାପେହ୍‌ଣି ମ୍‌ନ୍ ବାଦ୍‌ଲାଇ ନ୍‌କେର୍‌ତା ଜୀବନ୍। ତୁମି ବାଦ୍‌ଲାମ୍‌କେ ନାରାଜ୍। ସେତାର୍‌ଲାଗି ତୁମି ନିଜାର୍ ଡ୍‌ଣ୍ଡ୍ କେ ଅଦିକ୍ ଅଦିକ୍ ବାଡାମ୍ ଲାସ୍। ଜୁଇଦିନ୍ ଇଶ୍ଵରାର୍ ନିଜାର୍ ରିସା ଦ୍‍କାଇଦ୍, ସେଦିନ୍ ତୁମି ସେ ଡ୍‌ଣ୍ଡ୍ ହାଉଆସ୍। ସେ ଦିନ୍ ଲକ୍‍ମ୍‍ନ୍ ଇଶ୍ଵରାର୍ ଟିକ୍ ନିୟାଇ ବିଚାର୍‌ ଦ୍‍କ୍‌ତି।

6ଇଶ୍ୱର୍‌ ସ୍‌ବୁଲକ୍‌କେ ନିଜାର୍ ନିଜାର୍ କାମ୍ ଅନୁସାରେ ପୁରୁସ୍‌କାର୍ ଆର୍ ଡ୍‌ଣ୍ଡ୍ ଦ୍‌ଇଦ୍।

7ଜୁଇ ଲକ୍‍ମ୍‍ନ୍ ଇଶ୍ଵରାର୍ ମଇମା, ସନ୍‌ମାନ୍ ଆର୍ ଇଶ୍ୱର୍‌ ଦେତା ନ୍‌ସେର୍‌ତା ଜୀବନ୍ ହାଇଁ ବାଚ୍‌ତି, ଜୁଇମ୍‌ନ୍ ସ୍‌ବୁବ୍‌ଳ୍ ବ୍‍ଲ୍‌କାମ୍‍କ୍‍ରି ସାସ୍‌ଦ୍‌ରି ଇ ସ୍‌ବୁ ହାଇଁ ଜୀବନ୍ ଜାପନ୍ କ୍‌ର୍‌ତି, ସେ ଲକ୍‌ମ୍‍ନ୍‌କେ ଇଶ୍ୱର୍‌ ନ୍‌ସେର୍‌ତା ଜୀବନ୍ ଦାନ୍ କ୍‍ରେଦ୍।

8ମ୍‌ତ‍ର୍ ଜୁଇ ଲକ୍‍ମ୍‍ନ୍ ନିଜାର୍ ଗିନେ ବାଚ୍‌ତି ମ୍‍ତର୍ ସ୍‌ତ୍ ବାଟ୍‌କେ ଜ୍‌ମ୍‌କେ ମ୍‌ନା କ୍‌ର୍‌ତି ଆର୍ କ୍‍ରାପ୍ ବାଟ୍ ଜାତି। ଇଶ୍ୱର୍‌ ସେମ୍‌ନ୍‌କେ ଡ୍‌ଣ୍ଡ୍ ଦ୍‌ଇଦ୍।

9କ୍‍ରାପ୍ କାମ୍‌କ୍‌ର୍‌ତା ସ୍‌ବୁ ଲକ୍‌କେ ଇଶ୍ୱର୍‌ ଦୁକ୍ ଆର୍ କ୍‌ଷ୍ଟେ ହ୍‌କାଇଦ୍, ଯିହୁଦିମ୍‌ନ୍‌କେ ହ୍‌ର୍‍ତୁ ତାର୍ ହ୍‌ଚେ ଯିହୁଦି ଚାଡି ବିନ୍‌ଜାତି ଲକ୍‌କେ ହେଁ।

10ମ୍‌ତ‍ର୍ ଇଶ୍ୱର୍‌, ବ୍‍ଲ୍ କାମ୍‌କ୍‌ର୍‌ତା ସ୍‌ବୁ ଲକ୍‌କେ ସ୍‌ର୍‌ଦା, ସ୍‌ନ୍‌ମାନ୍ ଆର୍ ଶାନ୍‌ତି ଦ୍‌ଇଦ୍। ଯିହୁଦିମ୍‌ନ୍‌କେ ହ୍‌ର୍‍ତୁ ତାର୍ ହ୍‌ଚେ ଯିହୁଦି ଚାଡି ବିନ୍‌ଜାତିର୍ ଲକ୍‌କେ ହେଁ।

11ଇଶ୍ୱର୍‌ ସ୍‌ବୁ ଲକ୍‌କେ ସ୍‌ମାନ୍ ବାବ୍‌ରେ ନିୟାଇ ବିଚାର୍‌ କ୍‍ରେଦ୍।

12ଜୁଇଲ୍‌କ୍ ମ୍‌ନ୍ ନିୟମ୍ ଜାଣ୍‌ତି, ଜୁଇ ଲକ୍‍ମ୍‍ନ୍ ନିୟମ୍ ଶୁଣିନ୍‌କେର୍‌ତି, ପାପ୍‌କାମ୍ କ୍‌ଲାବ୍‌ଳ୍ ସ୍‌ବୁ ସ୍‌ମାନ୍। ଲକ୍‌ମ୍‌ନ୍‌ ଜୁଇସ୍‌ବୁ ନିୟମ୍ ଜାଣିନ୍‌କେର୍‌ତି ଆର୍ ପାପ୍ କ୍‌ରୁଲାଇ, ସେମନ୍ ନ୍‌ଷ୍ଟ ଅଇଜାତି ଆର୍ ସେନ୍‌କାର୍, ଜୁଇ ଲକ୍‍ମ୍‍ନ୍ ନିୟମ୍ ଜାଣି ଶୁଣି ପାପ୍ କ୍‌ରୁଲାଇ, ନିୟମ୍ ଅନୁସାରେ ସେମ୍‍ନ୍‍କାର୍ ନିୟାଇ ବିଚାର୍‌ ଅଇଦ୍।

13ନିୟମ୍‌କେ ହ୍‌କା ଶୁଣ୍‌ଲେକ୍‌ କେ ଇଶ୍ଵରାର୍ ଦୁଷ୍ଟିରେ ଦ୍‌ର୍‌ମି ଅମ୍‌ନ୍‌ହାରେ। ମ୍‌ତର୍ ନିୟମ୍‌କେ ହୁରା ମାନ୍‌ଲେକ୍‌ ହ୍‌କା, ଲକ୍‌ମ୍‍ନ୍‌କେ ଇଶ୍ଵରାର୍ ଦୁଷ୍ଟିରେ ଦ୍‌ର୍‌ମି ବ୍‌ଲି ହ୍‍ର୍‍ମାଣ୍ କ୍‍ରେଦ୍।

14ଯିହୁଦି ନଇଲା ଲକ୍‌ମ୍‌ନ୍‌‍କାର୍ କାଇ ନିୟମ୍ ନାଇ ମ୍‍ତର୍ ଜ୍‌ଡେବ୍‌ଳ୍ ସେମ୍‍ନ୍ ଟିକ୍‌ବାବ୍‌ରେ ନିୟମ୍ ଅନୁଯାଇ ନ୍‍ଜାଣିକ୍‍ରି ହେଁ କାମ୍ କ୍‌ର୍‌ତି, ସେଡେବ୍‌ଳ୍ ସେରି ହ୍‌କା ସ୍‌ବୁ ନିୟମ୍ ଅଇ ଜାଇଦ୍। ଯଦି ଅବା ସେମ୍‍ନ୍‍କାର୍ ନିୟମ୍ ନାଇ

15ସେମନ୍ ହ୍ରୁଦୟରେ ଜାଣୁ ହାର୍‌ତି ଯେ କାଇରି ଟିକ୍ ଆର୍ କାଇରି ବୁଲ୍। ଜାଇରି ଟିକ୍ ସେରି ନିୟମ୍ ଦ୍‍କେଦ୍। ସେମ୍‍ନ୍ ଟିକ୍ ଆର୍ ବୁଲ୍ ବିଷୟରେ ଜାଇରି ବାବୁ ହାର୍‌ତି, ସେରି ଦ୍‍କାଇ ହେଁ ଦେତି। କ୍‌ଡେ କ୍‌ଡେବ୍‌ଳ୍ ସେମ୍‌ନ୍‌କାର୍‌ ବିଚାର୍‌ ସେମ୍‍ନ୍ କେ କଇଦ୍ ଯେ, ସେମ୍‍ନ୍ କ୍‍ରାପ୍ କାମ୍ କ୍‌ଲେକ୍, ସେମ୍‍ନ୍ ଦସି ଅଉତି ଆର୍ କ୍‌ଡେ କ୍‌ଡେବ୍‌ଳ୍ ସେମ୍‍ନ୍‍କାର୍ ବିଚାର୍‌ ସେମ୍‌ନ୍‌କେ କଇଦ୍ ଯେ, ସେମ୍‍ନ୍ ବ୍‌ଲ୍‌କାମ୍ କ୍‌ଲେକ୍, ସେମ୍‍ନ୍ ନିଜ୍‍କେ ଦସି ବ୍‌ଲି ବାବି ନ୍‌କେର୍‌ତି।

16ମର୍ ସୁବ୍‌କ୍‌ବର୍ ଅନୁସାରେ, ସେ ଦିନ୍ ଇକ୍‍ତା ଗ୍‌ଟେଦ୍ ଜୁଇ ଦିନ୍ ଇଶ୍ୱର୍‌ ଲକ୍‌ମ୍‌ନ୍‌କାର୍‌ ବିତ୍‌ରେ ରିଲା ଲୁକ୍‌ଲା କ୍‌ତାକେ ଯୀଶୁ ଖ୍ରୀଷ୍ଟର୍ ଦ୍ୱାରା ନିୟାଇ ବିଚାର୍‌ କ୍‌ର୍‌ତି।

17ତୁମାର୍ ବିଷୟରେ କାଇରି? ତୁଇ କମ୍‌ଲିସ୍ ତୁଇ ଗଟେକ୍ ଯିହୁଦି। ତୁମାର୍ ନିୟମ୍ ଉହ୍‌ରେ ବର୍‌ସା ଆଚେ ଆର୍ ଗ୍‌ର୍‌ବ୍ କ୍‍ରା ଯେ ତୁମି ଇଶ୍ଵରାର୍ ଲ୍‌ଗେ ଆଚାସ୍।

18ତୁମି ଜାଣା ଯେ ତୁମି କାଇରି କ୍‍ରା ବ୍‌ଲି ଇଶ୍ୱର୍‌ ମ୍‌ନ୍‌କ୍‌ରେଦ୍‌। ମ୍‍ତର୍ ତୁମି ଜାଣିଆଚାସ୍ ଯେ କୁଇ ବିଷୟମ୍‌ନ୍ ଦ୍‌ର୍‌କାର୍, କାଇତାକ୍ ତୁମି ନିୟମ୍ ଶିକିଆଚାସ୍।

19ତୁମି ବାବୁଲାସ୍ ଯେ, ଜୁଇଲ୍‌କ୍ ମ୍‌ନ୍ ସ୍‌ତ୍ ବାଟ୍ ଜାଣିନ୍‌କେର୍‌ତି, ତୁମି ସେମ୍‍ନ୍‍କାର୍ ବାଟ୍ ଦ୍‌କାଉତା ଲକ୍। ତୁମି ବାବୁଲାସ୍ ଯେ, ଜୁଇଲ୍‌କ୍ ଅନ୍ଦାରେ ଆଚ୍‌ତି ସେମ୍‌ନ୍‌କାର୍ ଗିନେ ତୁମି ଉଜାଳ୍ ହ୍‌ର୍।

20ତୁମି ବାବୁଲାସ୍ ଯେ, ଜୁଇଲ୍‌କ୍ ମ୍‌ନ୍, ସେଲକ୍‌ମ୍‌ନ୍‌କେ ସ୍‌ତ୍ ଦ୍‌କାମ୍ ହାରାସ୍ ଆର୍ ତୁମି ବାବୁଲାସ୍ ଯେ ଜୁଇଲ୍‌କ୍ ମ୍‌ନ୍‌କାର୍ ଅବେ ହେଁ ସିକ୍‍ତା ଦ୍‌ର୍‌କାର୍, ସେମ୍‍ନ୍‍କାର୍ ତୁମି ଗୁରୁ। ତୁମାର୍ ତ୍‌ଇ ନିୟମ୍ ଆଚେ, ସେତାର୍‌ଲାଗି ତୁମି ବାବୁଲାସ୍ ଯେ ତୁମିସ୍‌ବୁ କିଚି ଜାଣୁଲାସ୍ ଆରେକ୍‌ ତୁମାର୍ ଲ୍‌ଗେ ସ୍‌ତ୍ ଆଚେ।

21ତୁମି ବିନ୍ ଲକ୍‌ମ୍‌ନ୍‌‍କେ ଶିକ୍ୟା ଦେମ୍‌ଲାସ୍, ସେ ଦୁଷ୍ଟିରେ ତୁମି ନିଜ୍‍କେ ଶିକ୍ୟା କାଇତାକ୍ ଦ୍‌ଇନ୍‌କେରାସ୍? ତୁମି ଲକ୍‌ମ୍‍ନ୍‌କେ କ୍‍ମ୍‍ଲାସ୍ “ଚରି କ୍‍ରାନାଇ” ମ୍‍ତର୍ ନିଜେ ଚରି କ୍‍ରୁଲାସ୍।

22ତୁମି ବିନ୍ ଲକ୍‌କେ କ୍‍ମ୍‍ଲାସ୍ “ଦାରିକାମ୍ ପାପ୍ କ୍‌ର୍‌ତାର୍ ବ୍‌ଲ୍‌ନାଇ” ମ୍‍ତର୍ ତୁମି ନିଜେ ସେ ପାପାର୍ ଦସି, ତୁମି ମୁର୍‌ତିକେ ଗୁର୍‌ଣା କ୍‍ରି ରିଆସ୍।

23ମ୍‍ତର୍ ତୁମି ମନ୍ଦିରାର୍ ଚରି କ୍‍ରୁଲାସ୍, ତୁମି ଇଶ୍ଵରାର୍ ନିୟମ୍ ହାଇଁ ଗ୍‌ର୍‌ବ୍ କ୍‍ରୁଲାସ୍। ମ୍‍ତର୍ ତୁମି ସେ ନିୟମ୍ ବାଙ୍ଗିକ୍‌ରି ଇଶ୍ୱର୍‌କେ ଲାଜ୍ କ୍‌ରାମ୍‌ଲାସ୍।

24ପବିତର୍‌ ଶାସ୍‌ତର୍ ତ୍‌ଇ ଲେକାଆଚେ “ଯିହୁଦି ନଇଲା ଲକ୍‌ମ୍‌ନ୍‌ ଇଶ୍ଵରାର୍ ବିଷୟେ ଲିନ୍ଦାକ୍‍ତା ଯିହୁଦିମ୍‌ନ୍‌କାର୍ ହାଇଁ ହ୍‌କା କ୍‌ଉତି।”

25ଯ୍‌ଦି ତୁମି ନିୟମ୍ ମାନୁଲାସ୍, ତ୍‌ନ୍‌ଅଇଲେକ୍ ତୁମାର୍ ସୁନତ୍ ଅଉତାର୍ ମୁଲ୍ୟ ଆଚେ। ମ୍‌ତ‍ର୍ ତୁମି ଯଦି ନିୟମ୍ ବାଙ୍ଗୁଲାସ୍ ତ୍‌ନ୍‌ଅଇଲେକ୍ ତୁମି ସୁନତ୍ ଅଇ ନ୍‌କେର୍‌ତା ସ୍‌ମାନ୍।

26ଯିହୁଦି ନଇଲା ଲକ୍‌ମ୍‌ନ୍‌ ସୁନତ୍ ଅଇନ୍‌କେର୍‌ତି, ମ୍‍ତର୍ ସେମ୍‍ନ୍ ଯ୍‌ଦି ମୋଶାର୍ ନିୟମ୍‌କେ ମାନ୍‌ତି। ତ୍‌ନ୍‌ଅଇଲେକ୍ ସେମ୍‍ନ୍ ସୁନତ୍ ଅଇଲା ହ୍‌ର୍ ଅଉତି।

27ତୁମାର୍ ଯିହୁଦିମ୍‌ନ୍‌କାର୍ ଲେକ୍‍ଲା ନିୟମ୍ ଆଚେ, ଆର୍ ସୁନତ୍ ହେଁ, ମ୍‍ତର୍ ତୁମିମ୍‍ନ୍ ନିୟମ୍ ବାଙ୍ଗୁଲାସ୍, ତ୍‌ନ୍‌ଅଇଲେକ୍ ଗ୍‌ଗାଳ୍ ଉହ୍‌ରେ ସୁନତ୍ ଅଇନ୍‌କେରି ନିୟମ୍ ମାନ୍‌ତା ଲକ୍ ଦ୍‍କାଇ ଦେତି ଯେ ତୁମି ଦସି ଲକ୍।

28ଏକ୍‍ଲା ଉହୁର୍ ମ୍‌ନ୍‌କେ ଯିହୁଦି ସେ ସ୍‌ତ୍ ଯିହୁଦି ନଇ, କି ଉହୁର୍ ଗ୍‌ଗାଳେ ସୁନତ୍ ଅଇଲେକ୍ ସ୍‌ତ୍‌କ୍‌ରି ସୁନତ୍ ନ୍‌ଇ।

29ଗଟ୍ ଲକ୍ ଯ୍‌ଦି ସ୍‌ତ୍‌କ୍‌ରି ଯିହୁଦି ସେ ମ୍‌ନ୍ ବିତ୍‌ରେହ୍‌ଣି ଯିହୁଦି। ସ୍‌ତ୍ ସୁନତ୍ ମ୍‌ନ୍ ବିତ୍‌ରେ ହ୍‌କା ଅଇଦ୍। ଇରି ପବିତର୍ ଆତ୍ମା ଦ୍ୱାରା କ୍‌ରାଯାଇ ର୍‌ଇଦ୍। ଲେକା ବାବ୍‌ରେ ନ୍‌ଇ, ଜୁଇଲ୍‌କ୍ ମ୍‌ନ୍ ଆର୍ ଆତ୍ମା ଦ୍ୱାରା ସୁନତ୍ ଅଇର୍‌ଇଦ୍ ସେ ଇଶ୍ଵରାର୍ ତ୍ଇହ୍‍ଣି ସ୍‌ର୍‌ଦା ଅଇଦ୍, ମାନାଇମ୍‌ନ୍‌କାର୍ ତ୍ଇହ୍‍ଣି ନଇ।

← Chapter 1 Jump to: Chapter 3 →