Romans 5

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

← Chapter 4 Jump to: Chapter 6 →

1ଅମାର୍ ବିଶ୍‍ବାସ୍ ଦ୍ୱାରା ଅମୁକ୍ ଇଶ୍ଵରାର୍ ତ୍‌ଇ ଦ୍‌ର୍‌ମି କ୍‌ରାଯାଇ ଆଚେ, ସେତିର୍ ଲାଗି ମାପ୍‌ରୁ ଯୀଶୁ ଖ୍ରୀଷ୍ଟର୍ ଦ୍‌ଇ ଇଶ୍ଵରାର୍ ସ୍‌ଙ୍ଗ୍ ଅମି ଶାନ୍‌ତିରେ ଆଚୁ। ବିଶ୍‍ବାସ୍ ଦ୍ୱାରା ଖ୍ରୀଷ୍ଟ ଅମୁକେ ଇଶ୍ଵରାର୍ ଦୟାଇ ବାଗିଦାର୍ କ୍‍ଲା।

2ଅବେ ଅମି ବିଶ୍‍ବାସ୍ ଦ୍ୱାରା ଇ ଦୟାରେ ଆଚୁ ଆର୍ ଅମି ଇଶ୍ଵରାର୍ ଇ ମଇମାରେ ବାଗିଦାର୍ ଅଇରେତା ଆଶାରେ ସ୍‌ର୍‌ଦା ଅମ୍‍ଲୁ।

3ଅମିମ୍‌ନ୍ ଅମାର୍ ଦୁକ୍ ସ୍‌ବୁ ର୍‌ଇକ୍‌ରି ହେଁ ସ୍‌ର୍‌ଦା, ଅମି ଇ କ୍‌ଷ୍ଟ ମ୍‌ନ୍ ହାଇଁ କାଇତାକ୍ ସ୍‌ର୍‌ଦା ଅମ୍‍ଲୁ? କାଇତାକ୍ ଅମି ଜାଣୁନ୍ଦ୍ ଯେ ଇ କ୍‌ଷ୍ଟ ମ୍‌ନ୍ ଅମୁକ୍ ଅଦିକ୍ ସାସ୍ କ୍‌ରାଇଦ୍।

4ଆର୍ ସାସ୍ ଚରିତ୍ରରାର୍ ଶ୍‌କ୍‌ତିକେ ଉନତି କ୍‍ରେଦ୍, ମ୍‌ତର୍ ଚରିତ୍ର ଉଦାରାର୍ ଅମାର୍ ନିଜାର୍ ବ୍‌ର୍‌ସାକେ ଡାଟ୍ କ୍‍ରେଦ୍।

5ଇ ବ୍‌ର୍‌ସା ଅମୁକେ କ୍‌ବେ ହେଁ ନିରାସ୍ କ୍‍ରି ନ୍‌କେରେ, କାଇତାକ୍ ଇଶ୍ୱର୍‌ ଅମାର୍ ହ୍ରୁଦୟ୍‌ ମ୍‌ନ୍‌କେ ଇଶ୍ୱର୍‌ ପବିତର୍ ଆତ୍ମା ଦ୍ୱାରା ତାର୍ ଲାଡ୍ ବ୍‌ର୍‌ତି କ୍‌ରିଦେଇଆଚେ।

6ଜ୍‌ଡେବ୍‌ଳ୍ ଅମି ନିଜ୍‍କେ ସାଇଜ କ୍‍ରି ନ୍‌କେର୍‌ତା ବ୍‌ଳ୍ ଦ୍‌ର୍‌ମି ନ୍‌ରିଲାବ୍‌ଳ୍ ଖ୍ରୀଷ୍ଟ ଅମାର୍ ହାଇଁ ମ୍‍ରିରିଲା। ଅମି ଇଶ୍ଵରାର୍ ବିରୁଦ୍‌ରେ ଜୀବନ୍ କାଟ୍‌ତେ ରିଲୁ ଅଇଲେକ୍ ହେଁ ଟିକ୍ ସ୍‌ମୟରେ ଖ୍ରୀଷ୍ଟ ଅମାର୍ ହାଇଁ ମ୍‍ରିରିଲା।

7ବିନ୍‌ଲକ୍ ଜ୍‌ତେକ୍ ବ୍‍ଲ୍ ଅଇଲେ ହେଁ, ବେସି କମ୍ ଲକ୍ ବିନ୍ ଲକ୍‌କେ ବାଚାଉତା ହାଇଁ ମ୍‌ର୍‌ତି, ଯଦି ଲକ୍ ଦ୍‌ର୍‌ମି ଅଇର୍‌ଇଦ୍, ତ୍‍ବେ ତାର୍ ଲାଗି କେ ଏକ୍‍ଲା ମ୍‌ର୍‌ତା ହାଇଁ ସାହାସ୍ କ୍‍ରେଦ୍।

8ମ୍‌ତ‍ର୍ ଅମିସ୍‌ବୁ ପାପି ରିଲା ସ୍‌ମୟରେ ଖ୍ରୀଷ୍ଟ ଅମାର୍ ହାଇଁ ମ୍‌ଲା। ଇତାର୍ ଲାଗି ଇଶ୍ୱର୍‌ ହ୍‍ର୍‍ମାଣ୍ କ୍‍ଲା ଯେ, ସେ ଅମୁକେ ବେସି ଲାଡ୍ କ୍‍ରିଆଚେ।

9ଅମି ଖ୍ରୀଷ୍ଟର୍ ବ୍‌ନି ଦ୍ୱାରା ଇଶ୍ଵରାର୍ ସାମ୍‌ନାଇ ଦ୍‌ର୍‌ମି ବ୍‌ଲି ଗ୍‌ଣ୍‌ତି ଅଇଲୁଆଚୁ। ସେତାର୍‌ଲାଗି ଖ୍ରୀଷ୍ଟର୍ ଦ୍ୱାରା ଅମି ଇଶ୍ଵରାର୍ ରିସାକେ ଜ୍‌ନ୍‌କ୍‌ଲେ ହେଁ ଉଦାର୍‌ ହାମ୍‌ଦେ।

10ମୁଇ କ୍‌ଉତାର୍ ଅର୍‌ତ ଇରି ଯେ ଅମି ଇଶ୍ଵରାର୍ ଶ୍‍ତ୍‍ରୁର୍‌ ଅଇରିଲେକ୍ ହେଁ ସେ ନିଜାର୍ ହଇସିକେ ମ୍‌ରାଇ ଅମାର୍ ସ୍‌ଙ୍ଗ୍ ବନ୍ଦୁ ବାନ୍ଦି ଆର୍ ଗଟେତର୍ ମିସାଇ ଆଚେ। ସେତାର୍‌ଲାଗି ଅବେ ଅମି ଇଶ୍ଵରାର୍ ବନ୍ଦୁ, ଇଶ୍ୱର୍‌ ତାର୍ ହଇସିର୍‌ ଜୀବନ୍ ଦ୍‌ଇ ଅମୁକେ ଜ୍‌ନ୍‌କ୍‌ଲେ ହେଁ ଉଦାର୍‌ କ୍‍ରେଦ୍।

11ଅମି ଯେ ଉଦାର୍‌ ହାମ୍‌ନ୍ଦ୍‌ ସେରି ନ୍‌ଇ ମ୍‍ତର୍ ଅବେ ଅମି ମାପ୍‌ରୁ ଯୀଶୁ ଖ୍ରୀଷ୍ଟର୍ ଦ୍‌ଇ ଇଶ୍ଵରାର୍ ତ୍‌ଇ ହେଁ ବେସି ସ୍‌ର୍‌ଦା ଲାଗି ଯୀଶୁର୍ ହାଇଁ ହ୍‌କା ଅମି ଆଜି ଇଶ୍ଵରାର୍ ବନ୍ଦୁ ଅଇ ଆର୍ ଗଟେତର୍ ମିସିଆଚୁ।

12ଏକ୍‍ଲା ଆଦ‍ମ୍ ହାଇଁ ଜ୍‍ଗତେ ପାପ୍ ଆଇଲି। ପାପ୍ ଲାଗି ମ୍‌ର୍‌ନ୍ ଆଇଲି। ସେତାର୍‌ଲାଗି ସ୍‌ବୁ ଲକ୍ ଜ୍‌ନ୍‌କ୍‌ଲେକ୍ ହେଁ ମ୍‌ର୍‌ତି, କାଇତାକ୍ ସ୍‌ବୁ ଲକ୍ ପାପ୍ କ୍‌ରିଆଚ୍‌ତି।

13ମୋଶା ନିୟମ୍ ଦେତା ଆଗେ ପାପ୍ ଜ୍‍ଗତେ ରିଲି। ମ୍‍ତର୍ ଇଶ୍ୱର୍‌ ନିୟମ୍ ନ୍‌ରିଲାବ୍‌ଳ୍ ଲକ୍‌ମ୍‌ନ୍‌‍କେ ପାପେହ୍‌ଣି ପାପି ମାନି ନ୍‌ରିଲି।

14ମ୍‍ତର୍ ଆଦ‍ମାର୍ ସ୍‌ମ୍‌ୟ ହ୍‍ଣି ମୋଶାର୍ ବିଦିବିଦାନ୍ ହ୍‌ତେକ୍ ସ୍‌ବୁ ଲକ୍‌କେ ମ୍‌ରୁକ୍ ହ୍‌ଡ୍‌ଲି। ଇଶ୍ଵରାର୍ ଆଦେଶ୍‌କେ ମାନି ନ୍‌କେରି ପାପ୍ କ୍‌ରିରିଲାକ୍ ଆଦ‍ମ୍ ମ୍‌ଲା। ମ୍‍ତର୍ ଜୁଇଲ୍‌କ୍ ମ୍‌ନ୍ ଆଦ‍ମ୍ ହ୍‌ର୍ ପାପ୍ କ୍‍ରି ନ୍‌ରିଲାଇ, ସେମ୍‌ନ୍‌କେ ହେଁ ମ୍‌ରୁକ୍ ଅଇଲି। ଜ୍‌ନ୍‌କାର୍ କି ଯୀଶୁ ଦ୍‌ର୍‌ମ୍ କାମ୍ କ୍‌ଲାକେ ସ୍‌ବୁ ଲକ୍ ଦ୍‌ର୍‌ମି ଅଇଲାଇ

15ମ୍‌ତର୍ ଇଶ୍ଵରାର୍ ଦୟାର୍ ଦାନ୍ ଆଦ‍ମ୍‍ମାର୍ ପାପ୍ ହ୍‌ର୍ ନ୍‌ଇ ଏକ୍‍ଲାର୍ ପାପ୍ ଲାଗି ବେସିଲକ୍ ମ୍‌ଲାଇ। ମ୍‍ତର୍ ଇଶ୍ଵରାର୍ ତ୍ଇହ୍‍ଣି ଜୁଇଲ୍‌କ୍ ଦୟା ହାଇଲାଇ, ସେରି ବେସି ରିଲି। ବେସିଲକ୍ ଗଟେକ୍ ଲକାର୍ ବ୍‌ଲେକ୍ ଯୀଶୁ ଖ୍ରୀଷ୍ଟର୍ ଦୟା ଲାଗି ଜୀବନ୍ ହର୍ ଦୟାର୍ ଦାନ୍ ହାଇଲାଇ।

16ଆଦ‍ମ୍ ତରେକ୍ ପାପ୍ କ୍‌ଲାହ୍‌ଚେ ସେ ଦସି ବ୍‌ଲି ଗ୍‌ଣା ଅଇଲା। ମ୍‍ତର୍ ଇଶ୍ଵରାର୍ ଦୟାର୍ ଦାନ୍ ଇତାର୍ ତ୍ଇହ୍‍ଣି ବିନ୍। ବେସି ପାପ୍ ହ୍‌ଚେ ଇଶ୍ଵରାର୍ ଦୟାର୍ ଦାନ୍ ଆଇଲି ଆର୍ ଇ ଦୟାର୍ ଦାନ୍ ଲକ୍ କେ ଇଶ୍ଵରାର୍ ସାମ୍‌ନାଇ ଦ୍‌ର୍‌ମି କ୍‌ରାଇଲା।

17ଗଟେକ୍ ଲକ୍ ପାପ୍ କ୍‍ଲା ସେତାର୍‌ଲାଗି ସେ ଏକ୍‍ଲାର୍ ଲାଗି, ମ୍‌ର୍‌ନ୍ ସ୍‌ବ୍‌କାର୍ ଉହ୍‌ରେ ରାଜ୍ କ୍‌ଲି। ମ୍‍ତର୍ ଅବେ କ୍‌ତିଲକ୍ ଇଶ୍ଵରାର୍ ସ୍‌ବୁ ଦୟା ଆର୍ ତାର୍ ଦ୍‌ର୍‌ମି ଅଉତା ହର୍ ବ୍‍ଡ୍ ଦୟାର୍ ଦାନ୍‌କେ ହେଁ ନିଜାର୍ କ୍‌ର୍‌ତି। ଇରି ଜ୍‌ନ୍‌କ୍‌ଲେ ହେଁ ସେ ଲକ୍‌ମ୍‌ନ୍‌ ସ୍‌ତ୍‌କ୍‌ରି ଜୀବନ୍ ହାଉତି, ଆର୍ ସେ ଲକ୍‌ମ୍‌ନ୍‌ ଯୀଶୁ ଖ୍ରୀଷ୍ଟର୍ ଲାଗି ସାସ୍‌ନ୍ କ୍‌ର୍‌ତି।

18ତ୍‍ବେ ଜ୍‌ନ୍‌କ୍‌ରି ଆଦ‍ମାର୍ ଗଟେକ୍ ପାପ୍‌ସ୍‌ବୁ ଲକ୍‌ମ୍‌ନ୍‌‍କେ ମ୍‌ର୍‌ନ୍‌ଡ୍‌ଣ୍ଡ୍ କ୍‌ଲି, ସେନ୍‍କ୍‌ରି ଯୀଶୁ ଖ୍ରୀଷ୍ଟ କ୍‌ରିରିଲା ଗଟେକ୍ ଦ୍‌ର୍‌ମି କାମ୍ ସ୍‍ବୁଲକ୍‌କେ ଇଶ୍ଵରାର୍ ଲାଗି ଦ୍‌ର୍‌ମି କ୍‍ରି ର୍‌କୁହାରେ ଆର୍ ସେରି ସେ ଲକ୍‌ମ୍‌ନ୍‌‍କାର୍ ହାଇଁ ସ୍‌ତ୍‌କ୍‌ରି ଜୀବନ୍ ଆଣି ଦ୍‌ଇଦ୍।

19ଗଟେକ୍ ଲକ୍ ଇଶ୍ୱର୍‌କେ ନ୍‌ମାନ୍‌ଲା ଆର୍ ବେସିଲକ୍ ପାପି ଅଇଗ୍‌ଲାଇ। ମ୍‍ତର୍ ସେନ୍‌କାର୍ ଗଟେକ୍ ଲକ୍ ଇଶ୍ୱର୍‌କେ ମାନ୍‌ଲା ଆର୍ ବେସିଲକ୍ ଦ୍‌ର୍‌ମି ଅଇଜାତି।

20ଲକ୍‍ମ୍‍ନ୍ ଅଦିକ୍ ପାପ୍ କ୍‍ଲା ହାଇଁ ନିୟମ୍ ଅଇଲି, ମ୍‍ତର୍ ଜ୍‌ଡେବ୍‌ଳ୍ ଲକ୍ ଅଦିକ୍ ପାପ୍ କ୍‌ଲାଇ, ଇଶ୍ୱର୍‌ ସେମ୍‌ନ୍‌କେ ବେସିକ୍‌ରି ତାର୍ ଦୟାର୍ ଦାନ୍ କ୍‍ଲା।

21ଅମୁକ୍‌ମ୍‌ନ୍ ସାସ୍‌ନ୍ କ୍‌ର୍‌ତା ହାଇଁ ପାପ୍ ତରେକ୍ ମ୍‌ର୍‌ନ୍ କେ ବାଉର୍‌ଲାଇ। ମ୍‍ତର୍ ଇଶ୍ୱର୍‌ ନିଜାର୍ ଅଦିକ୍ ଦୟାକ୍‌ଲା ଯାର୍ ଲାଗି ଦୟାର୍ ଶାସନ୍ କ୍‍ଲା ଆର୍ ଲକ୍ ଇଶ୍ଵରାର୍ ତ୍‌ଇ ଦ୍‌ର୍‌ମି ଅଇ ରିଲାଇ, ଅମାର୍ ମାପ୍‌ରୁ ଯୀଶୁ ଖ୍ରୀଷ୍ଟର୍ ତ୍‌ଇ ଇରି ନ୍‌ସେର୍‌ତା ଜୀବନ୍ ଆଣ୍‌ଲା।

← Chapter 4 Jump to: Chapter 6 →