Romans 5

Bugis

← Chapter 4 Jump to: Chapter 6 →

1Makkekkuwangngé simadécéngenni paimeng sibawa Allataala, nasaba mateppe'ki. Rimakkuwannanaro tuwoki ri laleng adaméngengngé sibawa Allataala naolai Puwatta Yésus Kristus.

2Nasaba mateppe'ki ri Yésus Kristus, namakkulléki péneddingiwi pammaséna Allataala, nanasibawangngi iyaro pammasé natuwoki makkekkuwangngé. Rimakkuwannanaro mariyo-riyo atitta nasaba mappunnaiki paddennuwang makkedaé ripérasai matu asennangengngé iya nabbéréyangngé Allataala!

3Nalebbi naiyaro, marennu tokki ri laleng anrasa-rasangngé, nasaba riissengngi makkedaé anrasa-rasangngé mébbui tauwé mancaji matinulu,

4na atinulurengngé mébbui matu tauwé tahang ri paccobangngé; iyanaé paompo paddennuwang.

5Paddennuwang iya pada-padaéwé dé' napakacéléki matu, nasaba purani riliseki atitta ri Allataala sibawa pammasé. Napogau'i Allataala iyaro naolai Roh Mapaccin-Na, iya puraé nawérékki.

6Wettutta ri laleng keadaang dé'gaga pakkulléng, matéi Kristus untu' idi ri wettu iya pura napattentué Allataala; padahal idi sining tau iya mabélaé polé ri Allataala.

7Muwi untu' séddié tau adélé mawatatto tauwé maélo maté. Naullé untu' séddié tau iya makessingngé, engkato tau iya baranié maté.

8Iyakiya Allataala pannessai pammasé-Na lao ri idi wettunna Kristus maté untu' idi wettutta tau madosa mupa.

9Makkekkuwangngé simadécéngenni paimeng sibawa Allataala naolai amaténna Kristus; rimakkuwannanaro mattentuni ripassalama' tokki matu polé ri caina nasaba Kristus.

10Rékko ri wettutta simusu sibawa Allataala; ripasidaméki sibawa Aléna naolai amaténna Ana'-Na, lebbi-lebbipi makkekkuwangngé simadécéngenna paimeng assisumpungetta sibawa Allataala, tentu ripassalama' tokki matu naolai atuwonna Kristus.

11Nalebbi na iyaro, marennu tokki nasaba akessingenna Allataala naolai Puwatta Yésus Kristus. Saba' naolai Kristus, ripéneddingiwi makkekkuwangngé assisumpungetta iya madécéngngéro sibawa Allataala.

12Muttama'i dosaé ri laleng linoé naolai séddi tau, na polé ri dosaéro momponi amaténgngé. Addimonrinna, iyaro amaténgngé nassanraiwi sininna rupa tauwé, saba' sininna tauwé madosani.

13Riwettu dé'napa nariyabbéréyang hukkunna agama Yahudié, engka mémenni dosaé ri laleng linoé. Iyakiya dé' narituntu' dosaé, nasaba dé'gaga hukkung iya weddingngé riyajjalékkai.

14Namuni polé ri wettunna Adam lettu ri wettunna Musa, sininna rupa tauwé rikuwasaiwi ri amaténgngé. Mala sining tau iya dé'é napogau' pelanggarang sibawa cara iya padaé iya napogau'é Adam, iyaro sining tauwé maccowé towi rikuwasai ri amaténgngé. Adam iyanaritu gambaran-Na polé ri iya maéloé polé matti.

15Iyakiya dé' napada duwa iyaro; nasaba asémpowang atinna Allataala mabélai lebbi battowa rékko ripasibandingngi sibawa palanggarang iya napogau'é Adam. Pelanggaranna séddi tau nassabariwi maéga tau maté. Lebbi battowapasi addimonrinna pammaséna Allataala sibawa hadiya asalamakengngé iya nabbéréyangngé lao ri maéga makkuwaro tau, naolai akessingeng atinna séddié tau iyanaritu Yésus Kristus.

16Hadiya polé ri Allataala lebbi battowa towi naiya dosana tau séddiéro. Saba' puranana séddié tau pogau' pelanggarang, tatteppani apettung “Pasalaé”. Iyakiya maéganana tau pogau' dosa poléni pammaséna Allataala iya pannessaéngngi, “Dé' napasala”.

17Nasaba palanggaranna séddi tau, massanrai amaténgngé lao kégi-kégi naolai tau séddiéro. Lebbi battowa pasi addimonrinna naiya napogau'é séddié tau laing, iyanaritu Yésus Kristus. Naolai Aléna, nabbéréyangngi Allataala pammasé-Na lao ri maéga tau sibawa nallalengiwi mennang simadécéngeng paimeng sibawa Allataala sibawa cuma-cuma; makuwasai matu mennang ri linoéwé naolai Kristus.

18Jaji pékkugi pelanggaranna séddié tau nassabariwi sininna rupa tauwé rihukkung, makkuwatoro pangkaukenna séddié tau iya maccowériyéngngi élona Allataala, nassabariwi sininna tauwé ripaleppe' polé ri asalanna sibawa riwéréng atuwong.

19Na pékkugi namaéga tau mancaji tau madosa nasaba séddi tau dé' namatinulu, makkuwatoniro maéga tau ripakkullé simadécéngeng paimeng sibawa Allataala nasaba séddi tau matinulu ri Allataala.

20Iya mabbéréyangngéngngi hukkunna agama Yahudié iyanaritu Allataala muto. Iyakiya pédé' makkuragai tolinoé turusiwi iyaro hukkung-hukkungngé, pédé' najjalékkaiwi mennang sibawa madosa lao ri Allataala. Iyakiya namuni pédé' pogau' dosa tolinoé, Allataala pédé' mamaséiwi mennang.

21Na, harusu'ki maté nasaba pogau'ki dosa, iyakiya Allataala mamaséiki sibawa mabbéréi laleng lao ri idi untu' simadécéngeng paimeng sibawa Aléna. Nasaba assisumpungetta sibawa Allataala madécéngi paimeng, nabbéréyang towi atuwong mannennungengngé lao ri idi naolai Yésus Kristus, Puwatta.

← Chapter 4 Jump to: Chapter 6 →