1 Chronicles 10

Chin (Mara Bible RV (BSI))

← Chapter 9 Jump to: Chapter 11 →

1Philistinâ mo ta Izarei a dyuh ei ta, Izarei mo cha Philistinâ mo hmiakô liata a râpai ei ta, Kibô Tlâh liata thiepa châ ei ta, ama pao haw.

2Philistinâ mo ta Sawla nata a sawchapawzy cha a chadai ei ta, Sawla sawchapawpa Zawnathâ, Abinadâ nata Mekhisua zy thie ei ta.

3Adyuhna cha ru ngaita ta, Sawla cha thata chadie ei ta, likathaipazy ta Sawla cha hmô ei ta hmah paphao ei ta.

4Sawla ta a chariah chhaichhi a chabatuhpa hnohta, “Na zaozi kha phia la, ei chhitlyuna taihta na vaw dy teh. Chataleipatala chopawtaileipazy a vy aw ei ta, einâ palai thlu pathlei aw ei na,” tah ta. Châhrasala a chariah chhaichhi a chabatuhpa cha a chi ngaitapa vâta tao ngâh leipa ta. Chatanachata Sawla cha a zaozi phia ta, a zaw thlu ta.

5A chariah chhaichhi chabatuhpa ta Sawla cha a thi haw tahpa a hmô nahta, ano chhao a zaozi a zaw thlu ta, thi ha hra ta.

6Cha hawhna chata Sawla nata a sawchapaw pathôhzy cha thi ei ta, ama chhôhkha duata â raohpa ta ama thi khai haw.

7Pheisaihzy a râpai ei ta, Sawla nata a sawchapawzy ama thipa cha, Saikao liata a ypa Izarei chyhsazy ta ama hmô nahta, ama khihpizy puasaipa ta â râpai khai ha ei ta. Philistinâ mo a vy ei ta, Izarei khihpizy liata ama vaw pahrâ haw.

8A mylâ ta, Philistinâ mo cha ama chariah thiepazy chysia pahluh awpa ta vawh ei ta, Kibô Tlâh liata Sawla nata a sawchapawzy ri a zawh thlâh hapa kei hmô ei ta.

9Sawla cha a chysia pahluh ei ta, a luh nata a chariah chhaichhizy la ei ta, thâtih phapa cha ama khazoh nothlahpazy nata chyhsazy hnohta phuah awpa ta, Philistinâ râh zydua lâta chyhsa tuah ei ta.

10Sawla chariah chhaichhizy cha ama khazoh achhyna ozy liata soh ei ta, Dakao achhyna o liata a luh tawh ei ta.

11Zabekilia khihsaw zydua ta Philistinâ mo ta Sawla chô liata ama hmotaopa zydua ama thei nahta,

12pasaipha zydua pua ei ta, Sawla nata a sawchapawzy ri kei la ei ta, Zabe khihpi lâ ama siekhei haw. Ama ruzy cha Zabe khihpi liata ôkâ tho ry liata pabu ei ta, noh sari chhôh kâhvileipa ta y ei ta.

13Sawla cha Abeipa châta ngâ â chhih leipa vâta a thi hapa a châ. Abeipa biepiepa zyh leipa ta, pachaothaipazy tlao a saohiah ta a pachaosa tyh ei.

14Abeipa chhihthana tlua vei. Chavâta Abeipa ta Sawla cha thie ta, a khinarâh cha Zese sawchapawpa Dâvi hnohta a pie haw.

← Chapter 9 Jump to: Chapter 11 →