1 Chronicles 14

Chin (Mara Bible RV (BSI))

← Chapter 13 Jump to: Chapter 15 →

1Tyre bei Hirâ ta Dâvi lâ chyhsa tuah ta, a o sa nawpa ta sidy thozy paphao ta. Lô zôthaipa nata tho zôthaipazy chhao tuah ta.

2Dâvi ta Abeipa ta Izarei chô liata bei ta ano cha padua ta, a phopi Izarei vâta a khinarâh chhao thata cheihchalopa ta a y tahpa pahno ta.

3Dâvi cha Zerusale liata lapinôzy hnei viapa ta, sawchapawzy nata sawchanôzy hnei via ta.

4Zerusale liata a pihpa a sawzy cha Sâmua, Sôbâ, Nâthâ, Sawlawmaw,

5Ibâ, Elisua, Elpele,

6Nôkâh, Nephe, Zaphia,

7Elisâmâ, Beliadâ nata Eliphele zy ama châ.

8Philistinâ mo ta Dâvi cha Izarei râh zydua chô liata bei châta sathawthupa a châ tahpa ama thei nahta, Philistinâ mo zydua Dâvi tlua awpa ta khy ei ta. Cha thâtih cha Dâvi ta a thei nahta, âmo a dyuh awpa ta pua ta.

9Philistinâ mo cha a vy ei ta, Rephai Saikao vaw chho ei ta.

10Dâvi cha Khazohpa a saohiah ta, “Philistinâ mo a dyuh awpa ta ei khy aw ma? Âmo cha ei ku liata eina pie aw chi ma?” tah ta. Abeipa ta a hnohta, “Khy mah y, âmo cha na ku liata ei cha pie aw,” tah ta.

11Chatanachata Dâvi cha Bâlâperâzi lâ khy ta, cha liata Philistinâ mo cha pahnie ta. Dâvi ta, “Khazohpa ta ei ku hmâpa ta ei chariahzy cha tisaih hawhta a ly ha ei,” tah ta.

12Philistinâ mo cha ama khazohzy a râsai ei ta. Dâvi ta biepie ta, khazohzy cha mei ta ama rao khai haw.

13Philistinâ mo ta saikao vaw chho heih ei ta.

14Dâvi ta Khazohpa a saohiah heih ta, Khazohpa ta a hnohta, “Na khyhnao awpa ei châ vei. Âmo cha sie chahlô la, malburi thih dady liata na vaw pua thlu aw ei.

15Malburi kôzy kithlao liata hrâsiepa pyu na thei nahta, a dyuh awpa ta na pua aw. Philistinâ pheisaihzy a dyuh awpa ta Khazohpa na hmia lâta a sie haw,” tah ta.

16Khazohpa ta bie a piepa hawhta Dâvi ta tao ta, Philistinâ pheisaihzy cha Kibiô tawhta Keze taihta thie lymâ ei ta.

17Chatanachata Dâvi moh cha râh to liata pathâh ta, Dâvi china cha Abeipa ta phopi zydua chô liata payasa ta.

← Chapter 13 Jump to: Chapter 15 →