1 Chronicles 27

Chin (Mara Bible RV (BSI))

← Chapter 26 Jump to: Chapter 28 →

1Hezy he Izarei pho pawhrâhpazy, pheisaih sâh kha hyutuhpazy, pheisaih za kha hyutuhpazy nata ama ry liata hyutuhpazy ama châ. Âmo cha kyh to liata bei chakao ta, kô chhôh zydua ta thla chareih ta a thla lymâ awpazy châ ei ta, py kha liata maluh 24,000 lymâ ama y.

2Zabadie sawchapawpa Zasôbia cha thla khana liata a chakao awpa py khana pheisaih hyutuhpa châ ta, a py liata pheisaih 24,000 ama y.

3Ano cha Pereza pathla châ ta, pheisaih hyutuhpa zydua hyutuhpa a châ. Thla khana liata a chakao tyh.

4Ahôh chyhsa Dôdai cha thla nona liata a chakaopazy pheisaih hyutuhpa châ ta, a py liata pheisaih 24,000 ama y.

5Thla thôhna châta pheisaih hyutuhpa pathôhna cha, Zehôdâ sawchapawpa Benai châ ta, a py liata pheisaih 24,000 ama y.

6Benai he pasaipha sythôh hry liata a hlaopa kha châ ta, pasaipha sythôhzy hyutuhpa a châ. A sawchapawpa Amizabâ cha ano py liata pheisaih hyutuhpa a châ.

7Thla palihna châta pheisaih hyutuhpa papalihna cha, Zôabâ unawhpa Asahe châ ta, a sawchapawpa Zebadiah cha ano a pazipa châ ta, a py liata pheisaih 24,000 ama y.

8Thla pangawhna châta pheisaih hyutuhpa papangawhna cha, Izrâ chyhsa Sâmahu châ ta, a py liata pheisaih 24,000 ama y.

9Thla charuna châta pheisaih hyutuhpa pacharuna cha, Tekô chyhsa Ike sawchapawpa Irâ châ ta, a py liata pheisaih 24,000 ama y.

10Thla sarina châta pheisaih hyutuhpa pasarina cha, Epharai pathla Pelôni chyhsa Helezi châ ta, a py liata pheisaih 24,000 ama y.

11Thla chariena châta pheisaih hyutuhpa pachariena cha, Zerâ pathla Husâ chyhsa Sibekai châ ta, a py liata pheisaih 24,000 ama y.

12Thla chakina châta pheisaih hyutuhpa pachakina cha, Benzami pathla Anathô chyhsa Abieze châ ta, a py liata pheisaih 24,000 ama y.

13Thla hrawhna châta pheisaih hyutuhpa pahrawhna cha, Zerâ pathla Netôpha chyhsa Mâharai châ ta, a py liata pheisaih 24,000 ama y.

14Thla hrawh hleikhana châta pheisaih hyutuhpa pahrawh hleikhana cha, Epharai pathla Pirathô chyhsa Benai châ ta, a py liata pheisaih 24,000 ama y.

15Thla hrawh hleinona châta pheisaih hyutuhpa pahrawh hleinona cha, Ôthane pathla Netôpha chyhsa Hedai châ ta, a py liata pheisaih 24,000 ama y.

16Hezy he Izarei chizy hyutuhpazy ama châ: Rubena chi hyutuhpa cha Zikari sawchapawpa Elieze châ ta, Simeôna chi hyutuhpa cha Mâkâ sawchapawpa Sephatiah a châ.

17Livai chi hyutuhpa cha Kemua sawchapawpa Hâsabiah châ ta, Arawna pathlazy hyutuhpa cha Zadô a châ.

18Zudâh chi hyutuhpa cha Dâvi unawhpa Elihu châ ta, Iskâra chi hyutuhpa cha Mikaila sawchapawpa Ômri a châ.

19Zebulawna chi hyutuhpa cha Ôbadia sawchapawpa Ismiah châ ta, Nâthalai chi hyutuhpa cha Azarie sawchapawpa Zeremô a châ.

20Epharai chi hyutuhpa cha Azaziah sawchapawpa Zôela châ ta,

21Kilia râh liata Manase chi khophiezy hyutuhpa cha Zekaria sawchapawpa Idô a châ. Benzami chi hyutuhpa cha Abane sawchapawpa Zasie châ ta,

22Dânâ chi hyutuhpa cha Zerôhâ sawchapawpa Azare a châ. Âmo cha Izarei chizy liata hyutuhpazy ama châ.

23Abeipa ta Izarei sawzy cha avâ awhsi zie ta pôh awpa ta bie â vaw taih hapa vâta, kô kih ry lâ cha Dâvi ta ama maluh reih vei.

24Zeru sawchapawpa Zôabâ ta maluhpi reih ta, châhrasala patlô vei. Maluhpi reipa vâta Khazohpa pathiiana Izarei chô liata a vaw tlôpa vâna khata, maluh ziepa cha Bei Dâvi thâtih rona châbu liata ropa châ vei.

25Abei sôh mohôhtuhpa cha Adie sawchapawpa Azamâve châ ta, lyuzy, khihpizy, khitawzy nata o sâhpazy liata abei sôh mohôhtuhpa cha Uzia sawchapawpa Zawnathâ a châ.

26Lyu liata leipalie raihriatuhpazy mohôhtuhpa cha Kheluh sawchapawpa Ezri châ ta,

27kre sadô mohôhtuhpa cha Râmâ chyhsa Simei châ ta, kre sadô liata kre saohpa sopakhyna môhôhtuhpa cha Siphami chyhsa Zabidi a châ.

28Bypi kao liata ôli tho nata theiku kô zy mohôhtuhpa cha Kede chyhsa Bâlâhanâ châ ta, sathaw sopakhyna mohôhtuhpa cha Zôasâ a châ.

29Saraw si panyupa su liata sahroh zaw mohôhtuhpa cha Saraw chyhsa Sitai châ ta, saikao liata sahroh zaw mohôhtuhpa cha Adalai sawchapawpa Saphâta a châ.

30Râraoseihpazy mohôhtuhpa cha Ismela chyhsa Ôbi châ ta, alâzy mohôhtuhpa cha Merônô chyhsa Zediah a châ.

31Mietaku zaw mohôhtuhpa cha Hâkari chyhsa Zazi a châ. Cha zydua cha Bei Dâvi hmohneipa mohôhtuhpazy ama châ.

32Dâvi puhpa Zawnathâ cha chyhsa sopa nata châthaipa a châpa vâta, ryhraokheituhpa a châ. Ano nata Hâkamôni sawchapawpa Zehie cha abei sawchapawzy pachutuhpa ama châ.

33Ahitôphe cha abei ryhraokheituhpa châ ta, Arakhi chyhsa Husai cha abei viasa a châ.

34Ahitôphe cha Benai sawchapawpa Zehôdâ ta a thla ta, Zehôdâ cha Abiathâ ta â thla. Zôabâ cha abei pheisaihzy hyutuh chaipa a châ.

← Chapter 26 Jump to: Chapter 28 →