1 Chronicles 15

Chin (Mara Bible RV (BSI))

← Chapter 14 Jump to: Chapter 16 →

1Dâvi ta Dâvi khihpi liata ano châta ozy sa ta. Khazohpa Byh y nawpa su a chhuanoh ta, poh o raipa ta.

2Dâvi ta, “Khazohpa Byh he Livai pathla dei leipa ta cha, ahy ta hmah amâ sy awpa châ vei. Âmo cha Khazohpa Byh chhâzaw ta a sytuhpa nata ano chakaotuhpa châta Abeipa ta a rao ei,” tah ta.

3Dâvi ta Abeipa Byh cha kei la ta, a so nawpa su â chhuanohpa liata so awpa ta, Zerusale liata Izarei saw zydua cha awpakhy ta.

4Dâvi ta Arawna pathlazy nata Livai pathlazy tawhta a awpakhypazy cha,

5Kôhâ pathla tawhta pawhrâh chaipa Urie nata a unawhzy 120;

6Merâri pathla tawhta pawhrâh chaipa Asiah nata a unawhzy 220;

7Kesao pathla tawhta pawhrâh chaipa Zôela nata a unawhzy 130;

8Elizaphâ pathla tawhta pawhrâh chaipa Semiah nata a unawhzy 200;

9Hebraw pathla tawhta pawhrâh chaipa Elie nata a unawhzy 80;

10Uzie pathla tawhta pawhrâh chaipa Aminadâ nata a unawhzy 112 ama châ.

11Chatawhcha Dâvi ta theihthaipa Zadô nata theihthaipa Abiathâ nata Livai pathla Urie, Asiah, Zôela, Semiah, Elie nata Aminadâ zy aw ta,

12ama hnohta, “Nâmo cha Livai chi pawhrâh chaipazy nama châ. Abeipa, Izarei Khazohpa Byh cha a su ei chhuanohpa lâ namâ vaw sy thei nawpa ta, nâmo nata nama unawhzy a pathai teh u.

13A hmiatuapa liana khata, bieraopa hawhta ano pado leipa pi ta, nâmo ta Byh namâ sy leipa vâna khata, Abeipa eima Khazohpa cha eima chô liata a hie a hâhpa a châ,” tah ta.

14Chatanachata Abeipa, Izarei Khazohpa Byh a sy awpa ta theihthaipazy nata Livai pathlazy cha a pathai ei ta.

15Abeipa ta Mawsi hnohta bie a piepa hawhta, Livai pathlazy ta Khazohpa Byh cha a lâ ta ama ngiatlâh ta a sy ei ta.

16Dâvi ta Livai pathla pawhrâhpazy cha ama unawhzy hry tawhta hlasathaipazy a tlyh ta, pyungiapa chhaichhi tlaipihzy, totâzy nata paotlâzy a paro ngaitapa ta patôsa ta, thaphana hla a paro ngaitapa ta pasasa awpa ta biepie ta.

17Chatanachata Livai pathlazy ta Zôela sawchapawpa Hemâ, a unawhzy hry tawhta Berekiah sawchapawpa Asâpha, ama unawhpa Merâri pathla tawhta Kusai sawchapawpa Ethâ,

18chhâ nona liata ama unawhzy tawhta Zekariah, Zazie, Semiramô, Zehie, Uni, Eliabâ, Benai, Mâsei, Mâtithiah, Eliphelehu, Mikaniah nata chhikao vaituhpa Ôbededô nata Zeili zy a tlyh ei ta.

19Hlasathaipa Hemâ, Asâpha nata Ethâ zy cha dawh paotlâ tô awpa ta raopa ama châ.

20Zekariah, Azie, Semiramô, Zehie, Uni, Eliabâ, Mâsei nata Benai zy cha Alamô siezie hawhta tlaipih tô awpa ta raopa ama châ.

21Mâtithiah, Eliphelehu, Mikaniah, Ôbededô, Zeili nata Azaziah zy cha, Semini siezie hawhta totâ tô awpa ta raopazy ama châ.

22Khenaniah cha pyungiapa a thaipa châ ta, pyungiapa kyh liata Livai pathla chhituhpa a châ. Ano ta pyungiapa chakaona rai a chhihtha lymâ.

23Berekiah nata Elkânâ zy cha Byh châta chhikao vaituhpazy ama châ.

24Theihthaipa sahlao, Sebaniah, Zehôsaphâ, Nethane, Amasai, Zekariah, Benai nata Elieze zy cha Khazohpa Byh hmiakô liata chiahmie tôtuhpazy ama châ. Obededô nata Zehiah cha Byh châta chhikao vaituhpazy ama châ.

25Chatanachata Dâvi nata Izarei machâzy nata pheisaih sâh kha hyutuhpazy ta Ôbededô o liata a ypa Abeipa Biehrai Byh cha la awpa ta, thapha ngaitapa ta zu ei ta.

26Khazohpa ta a baopa vâ ei ta, Abeipa Biehrai Byh a sytuhpa Livai pathlazy ta viahchao tôhpa pô sari nata mietaku tôhpa pô sari ta atheihna hlâ ei ta.

27Dâvi cha lini poh rih dipa ta a tobi ta. Byh a sytuhpa Livai pathlazy nata hlasathaipazy nata pyungiapa chhituhpa Khenaniah zy chhao lini poh rih dipa ta a tobi ei ta. Dâvi cha lini ephaw â ky pâ.

28Izarei saw zydua ta mietaku tôhpa ki, chiahmie nata paotlâ pyuzy chhaota thata rahaona chôta nata tlaipihzy nata totâzy a paro ngaitapa ta tôpa ta, Abeipa Biehrai Byh cha ama khykhei haw.

29Abeipa Biehrai Byh cha Dâvi khihpi a kaw ngia ta. Sawla sawchanô Mikâli cha opy tawhta vaw sai ta, Bei Dâvi cha thapha ngaitapa ta a lâpa kei hmô ta, a palôh ta zakhei kaw ta.

← Chapter 14 Jump to: Chapter 16 →