1 Chronicles 13

Chin (Mara Bible RV (BSI))

← Chapter 12 Jump to: Chapter 14 →

1Dâvi ta hyutuhpa zydua, sâh kha hyutuhpazy nata za kha hyutuhpazy a saohiah ta.

2Dâvi ta Izarei zawpi ahmaohpakhypa zydua hnohta, “Nâmo ta a pha tah u la, Abeipa eima Khazohpa ta pha a tah khiahta cha, Izarei râh zydua liata eima unawh a ypazy nata khihpizy nata si panyuna su a hneipa khichapeihzy liata a ypa theihthaipazy nata Livai mozy lâ chyhsa tuah sih la, keimo lâ a vaw hmaoh awpa ta kei pahruasa ei suh u.

3Sawla daihti nona khata eima Khazohpa Byh pado leipa pi ta, tahmâ kei la heih ei suh u,” tah ta.

4Pahruana cha zawpizy ta a pha tah ei ta, Khazohpa Byh la awpa cha paryhsa ei ta.

5Dâvi ta Izi chavah Sihô tawhta Lebôhamâ taihta a ypa Izarei saw zydua cha, Kiriaziari khihpi liata a ypa Khazohpa Byh cha kei la awpa ta awpakhy ta.

6Chatanachata Dâvi nata Izarei saw zydua cha, cherubizy luh chô beidyuchhai liata a tyuhpa Abeipa moh ta awpa Khazohpa Byh cha la awpa ta, Kiriaziari ama tahpa Zudâh râh liata Bâlâh khihpi lâ khy ei ta.

7Khazohpa Byh cha Abinadâ o tawhta talailih thiehpa ta siekhei ei ta, Uza nata Ahiô ta talailih cha haoh ei ta.

8Dâvi nata Izarei saw zydua cha hlasapa ta, totâzy, tlaipihzy, khoh chyhpazy, paotlâzy, chiahmiezy tôpa ta Khazohpa hmiakô liata ama theina zydua papuapa ta palyupalihna tao ei ta.

9Kidaw sawhri ama tlô nahta, viahchao tôhpazy amâ chapiapa vâta, Uza ta Byh cha patu a chhuahpa ta a ku kei paza ta,

10Abeipa cha Uza chô liata a hiehâh ta, Byh a patupa vâta tusao ta, cha liata Khazohpa hmiakô liata thi ha ta.

11Abeipa ta Uza chô liata ku a pathlapa vâta, Dâvi cha a hiehâh kaw ta. Chavâta cha su cha tanoh taihta Perezuza tahpa a châ.

12Cha noh ta Dâvi ta Khazohpa cha chi ngaita ta, “Kheihta ma Khazohpa Byh he ei o ei tlôkhei thei aw?” tah ta.

13Chavâta Dâvi ta Byh cha Dâvi khihpi lâ tlôkhei khao leipa ta, Kiti chyhsa Ôbededô o lâ tlao a tleikhei haw.

14Khazohpa Byh cha Ôbededô o liata a chhôhkha hnohta thla thôh y ta. Abeipa ta Ôbededô chhôhkha nata a hneipa zydua cha byhnâ pie ta.

← Chapter 12 Jump to: Chapter 14 →