Revelation 15

Chin (Mara Bible RV (BSI))

← Chapter 14 Jump to: Chapter 16 →

1Chatawhcha avâ liata ngiana hropa, ngiana rônahpa nata noâhchhihpa hmô na ta. Cha cha vâlyuhchâpa pasari nata potlana miasari a châ. Cha potlanazy cha potlana hnôhchaipazy a châ. Cha potlanazy liata Khazohpa hiehâhna cha a chhâ haw.

2Chatawhcha thlalâ tilaipi, mei nata a pahlaopa hmô na ta. Sahrâhpa nata a nothlahpa nata a moh nuby a pahnietuhpazy cha, Khazohpa totâzy chabapa ta thlalâ tilaipi kiah liata a duah ei ta.

3Khazohpa chakaotuhpa Mawsi hla nata Mietakutaw hlazy hetana heta ama sa: “Hy Atotaotheipa Abeipa Khazohpa, Na hmotaopazy rônah ta, Noâh â chhih kaw dia! Hy phopizy Beichaipa, Na lâpizy sia ta, Â do kaw dia!

4Hy Abeipa, ahy ma cha chi leipa ta y aw ta, Na moh palyupalih leipa ta a y aw? Pathaihpa cha nâ dei na châ. Na pachiana siaziezy palâhâhpa a châ hapa vâta, Phopi zydua a vy aw ei ta, Ama châ vaw chhy aw.”

5Cha khai tawhta kaw moh na ta, avâ liata pahnokheituhpa achhyna byureih cha a vaw pahy ta.

6Vâlyuhchâpa pasari cha potlana miasari chhaota achhyna byureih tawhta vaw pua ei ta. Vâlyuhchâpazy cha poh rih dipa pathaihpa nata diehpazy a bu ei ta, ama chachôhna liata ngôh chairi a zei ei ta.

7Hmohrohneipa miapalihzy hry liata miakha ta vâlyuhchâpa pasarizy hnohta, chhâzaw nata tlyzaw ta hroh thlâhpa Khazohpa hiehâhna ta a biepa ngôh biebuh miasari vaw pie ta.

8Achhyna byureih cha Khazohpa rônahna nata hmotaotheina khuh ta bie ha ta. Vâlyuhchâpa pasarizy tawhta potlana miasarizy a chhâ hlâlei cha, achhyna byureih liata ahy hmah a ngia thei veih ei.

← Chapter 14 Jump to: Chapter 16 →