Revelation 7

Chin (Mara Bible RV (BSI))

← Chapter 6 Jump to: Chapter 8 →

1Cha hnôhlâ ta alei ki palih liata vâlyuhchâpa papalih a duahpa hmô na ta. Alei chô liata tlyma, tilaipi chô liata tlyma, thokô chô liata tlyma, thlih a pathli lei nawpa ta, alei thlih miapalihpazy cha patu ei ta.

2Vâlyuhchâpa hropa pakha, Khazoh hrohpa chahnaona a chabapa nochhi lâ tawhta a vaw puapa hmô na ta. Ano chata vâlyuhchâpa papalih, alei nata tilaipi parao theina biehneina piepazy hnohta ao paro ngaitapa ta,

3“Eima Khazohpa chakaotuhpazy ama khi liata eima chahnao hlâlei cha, alei nata tilaipi nata thokô zy parao mâh khuh vy,” tahpa ta awh ta.

4Chatawhcha chahnaopa zie ama reipa kyh thei na ta, Izarei saw chi to tawhta 144,000 chahnaopa ama châ:

5Zudâh chi 12,000, Rubena chi 12,000, Kâdâ chi 12,000,

6Asera chi 12,000, Nâthalai chi 12,000, Manase chi 12,000,

7Simeôna chi 12,000, Livai chi 12,000, Iskâra chi 12,000,

8Zebulawna chi 12,000, Zawsi chi 12,000 nata Benzami chi 12,000 chahnaopa ama châ.

9Cha hnôhlâ ta kaw moh na ta, râh to, chi to, phopi to nata reih to tawhta zawpi hluh ngaitapa, ahy hmahta rei tiah leipazy cha poh diehpa a bupa nata thiahrâ kuah chabapa ta, beidyuchhai hmiakô liata nata Mietakutaw hmiakô liata amâ duapa hmô na ta.

10Chazy chata ao paro ngaitapa ta, “Pachhana cha Beidyuchhai liata a tyuhpa eima Khazohpa nata Mietakutaw eih a châ!” tahpa ta awh ei ta.

11Vâlyuhchâpa zydua cha beidyuchhai nata machâzy nata hmohrohneipa miapalihzy chadôpa ta a duah ei ta, beidyuchhai hmiakô liata â khu lâta pao ei ta,

12“Amen! Reithaina, rônahna, sona, alyna biereina, palyupalihna, hmotaotheina nata thatlôna zy cha chhâzaw nata tlyzaw ta eima Khazohpa hnohta y mawh sy! Amen,” tahpa ta Khazohpa a chhy ei ta.

13Machâ hry liata pakha ta ei hnohta, “He poh diehpa a bupazy he ahyzy ma ama châ, khataih tawhta a vypa ma ama châ?” tahpa ta na hiahri ta.

14Kei ta a hnohta, “Pâpuh, pahno va na, nâ ta tlao na pahno,” tah na ta. Ano ta ei hnohta, “Hezy he rietheipasana ru ngaitapa tawhta a vaw puapazy ama châ hih. Ama pohzy Mietakutaw thisaih ta pasupa ta ama padiehsa haw.

15“Chavâta âmo cha, Khazohpa beidyuchhai hmiakô liata y ei ta, Chhô nah zâ ta ano Achhyna o liata ama chakao tyh; Beidyuchhai liata a tyuh aw ei ta, A ypâna ta a khu aw ei.

16Ama nodi khao leipa aw ta, Ama dâhphi khao aw vei; Noh ta âmo vawh leipa aw ta, Noh lona ta ama rie pathei khao aw vei.

17Beidyuchhai liah liata a tyuhpa cha, Âmo vaituhpa a châ aw; Hrona tihnawhzy lâ âmo a chhi aw ta, Ama mo liata mothlih zydua Khazohpa ta a hru khai aw,” tah ta.

← Chapter 6 Jump to: Chapter 8 →