Revelation 22

Chin (Mara Bible RV (BSI))

← Chapter 21 Jump to:

1Chatawhcha vâlyuhchâpa ta hrona ti chavah, lôsôhpa pasohpa hawhta a patliepa, Khazohpa nata Mietakutaw beidyuchhai tawhta a vaw lohpa na pahmô ta.

2Khihpi lâlai liah liata loh ta. Chavah ngiahkâ chavei chachâh ta, thei chi hrawh hleino a hneipa, thla chareih ta a patheipa hrona tho pyuh ta. Thohnazy cha phopizy tlâh nawpa a châ.

3Cha khihpi liana cha chhiesana rai y khao leipa aw ta, Khazohpa nata Mietakutaw beidyuchhai tlao y aw ta, a chakaotuhpazy ta ano cha amâ chhy aw.

4A hmia hmô aw ei ta, ama khi liata a moh â choh aw.

5Zâ y khao leipa aw ta, meiôh khaihpa nata noh khaihpa a ngiah khao aw veih ei. Abeipa Khazohpa cha ama khaihpa châ aw ta, chhâzaw nata tlyzaw ta ryu ama reih aw.

6Chatawhcha vâlyuhchâpa ta, “He biezy he ngâchhih ta â do. Abeipa, hrohsopazy thlahpa Khazohpa ta hmo thlai a vaw tlô awpazy cha a chakaotuhpazy pahmô awpa ta a vâlyuhchâpa a vaw tuah,” tahpa ta na chho ta.

7Abeipa Zisu ta, “Nathlie teh, ei vy patoh aw. He châbu chhôh liata hrohsona biezy a pyhpa cha a nohlao na,” tah ta.

8Kei, Zawhâna he, cha hmozy a theituhpa nata a hmôtuhpa ei châ. Cha hmozy cha theipa ta ei hmô nahta, nâ pahmôtuhpa vâlyuhchâpa cha a chhy awpa ta, a phei thaby liata kei pao na ta.

9Châhrasala ano ta ei hnohta, “Khata tao khah y! Kei cha nâ nata na unawhpa hrohsopazy nata he châbu biezy a pyhtuhpazy chakaolâhpa mah ei châ tâh. Khazohpa tlao a chhy teh,” na tah ta.

10Chatawhcha vâlyuhchâpa ta, “He châbu liata hrohsona biezy he phih khah y, a daihti â hnia haw.

11Moleipa cha moleina hmo tao lymâ sala, chyhsa puapa cha a puapa ta y lymâ sala, mosiapa cha a siapa ta y lymâ sala, mopathaihpa cha pathaihpa ta y lymâ mawh sy,” tahpa ta na chho ta.

12Abeipa Zisu ta, “Nathlie teh, ei vy patoh aw. Chyhsa to ama hmotaopa lymâ hawhta pie awpa lymâ ei hnohta a y.

13Kei he Alphâ nata Ômekâ, hmiatuapa nata hnôhchaipa, âthaona nata achhâna ei châ.

14“Ama chysiazy a pasupa cha ama nohlao na. Hrona tho chô liata biehnei thei aw ei ta, chhikaozy lâ tawhta khihpi chhôh lâ amâ ngia thei aw.

15Izy, dyuthaipazy, sihryhpazy, lianycheihpazy, nothlahpa a chhypazy nata haipa bie rei a pahâhpazy deikua cha, khihpi khôtho liata ama y aw.

16“Kei, Zisu ta, he biezy he Awnanopazy pahnosa awpa ta ei vâlyuhchâpa nâmo lâ ei vaw tuah. Dâvi thari nata a pathla, deiva awhsi khaih ngaitapa ei châ,” tah ta.

17Thlahpa nata Myuhthieh ta, “A vy mah y,” tah ei ta. A theipa maihta, “A vy mah y,” tah mawh ei sy. Dâhphipa maih a vy sala, a khohpa maihta hrona ti he a saipa ta doh mawh sy.

18He châbu liata hrohsona biezy a theipa maih zikyu ei râ ei. Ahy rai ta he biezy he a baichha khiahta cha, he châbu liata potlana palâsapazy he Khazohpa ta a chô liata a baichha aw.

19Ahy rai ta he hrohsona châbu liata biezy he a thy bâ khiahta cha, he châbu liata palâsapa hrona tho nata khihpi pathaihpa liata a tovyuh cha Khazohpa ta a lapa aw.

20He biezy a reihtuhpa ta, “Ei vy patoh tlai aw,” a tah. Amen. A vy mah y, Beipa Zisu!

21Abeipa Zisu ngiachhiena cha mopathaihpa zydua hnohta y mawh sy. Amen.

← Chapter 21 Jump to: