Revelation 4

Chin (Mara Bible RV (BSI))

← Chapter 3 Jump to: Chapter 5 →

1Cha khai tawhta kaw sai na ta, vârâh ochhi a pahypa hmô na ta. Ao ei thei tuapa, chiahmie pyu hawhta ei hnohta bie a reihpa khata, “He lâ a khy teh, he khai tawhta hmo a vaw tlô awpazy ei cha pahmô aw,” tah ta.

2Sôkha ta Thlahpa ta vaw y na ta. Vârâh liata beidyuchhai a vaw patyuh ta, cha liata chyhsa pakha a vaw tyuh ta.

3Beidyuchhai liata a tyuhpa alânazie cha zaspi nata kânelia lôsôhpa hawhta châ ta, beidyuchhai cha meisaku ta chadô ta, â lânazie cha emerâ lôsôhpa hawhta a châ.

4Beidyuchhai chadôpa ta beidyuchhai hropa miakih nata miapalih y ta, cha liata machâ paki nata papalih poh diehpa a bupa ta a tyuhpa hmô na ta, ama luh liata ngôh lakhozy a kho ei ta.

5Beidyuchhai tawhna chata dôhlazy, aozy nata tôkalôhpa a thuapa pyuzy vaw pua hôlô ta. Beidyuchhai hmiakô liana cha meirei iapa miasari y ta, chazy cha Khazohpa thlahpa pasarizy ama châ.

6Beidyuchhai hmiakô liana cha tilaipi hawhta thlalâ vaw y ta, cha cha dâhaw hawhta a ngyuhpa lôsôhpa a châ. Beidyuchhai chadôpa ta, chavei chachâh, a hmia nata a hnôh ta hmohrohneipa miapalih y ei ta, chazy cha ama hmia nata ama hnôh ta mokhaoh ta a biepazy ama châ.

7Hmohrohneipa miakhana cha chakeibarôhneipa hawhta châ ta, a mianona cha viahchaotaw hawhta châ ta, a miathôhna cha chyhsapa hmia phaoh ta, a miapalihna cha pahmôhpi a zaw ngâpa a lyu.

8Hmohrohneipa miapalihzy cha mathlaw miacharu hnei chyu ei ta, ama pôhpa chô lâ nata chhôh lâ mokhaoh ta a biepa ama châ. Chatanachata, “Atotaotheipa Abeipa Khazohpa, A y hapa, a y haipa nata a vaw y awpa cha, A pathaih na, a pathaih na, a pathaih na,” tahpa ta a chalih beih leipa ta, chhô nah zâ ta ama reithai.

9Hmohrohneipazy ta beidyuchhai liata atyuhpa, chhâzaw nata tlyzaw ta a hroh thlâhpa cha parônahsapa ta palyupalih ei ta, alyna bie ama reina maihta,

10machâ pakih nata papalihzy cha beidyuchhai liata a tyuhpa hmiakô liata a bôh ei ta, chhâzaw nata tlyzaw ta a hroh thlâhpa cha amâ chhy tyh. Beidyuchhai hmiakô liata ama lakhozy soh ei ta,

11“Hy Eima Beipa nata Khazohpa, Nâ cha rônahna zy, palyupalihna zy, hmotaotheina zy A to tlâh na châ na; Hmo to tao chi ta, Na bie hawhta vaw y ei ta, Na bie hawhta paysapa ama châ,” tahpa ta chhâzaw nata tlyzaw ta a hroh thlâhpa cha amâ chhy.

← Chapter 3 Jump to: Chapter 5 →