Revelation 19

Chin (Mara Bible RV (BSI))

← Chapter 18 Jump to: Chapter 20 →

1Cha khai tawhta vârâh liata zawpi hluhpi ao paro ngaitapa a lyupa thei na ta, ao chata, “Haleluia! Pachhana zy, rônahna zy, hmotaotheina zy cha, Eima Khazohpa eih a châ.

2A pachiana a do ta a sia; A sihryhna ta leilô a papuapa âzuahnô rônahpa cha, Khazohpa ta pachia ta; A chakaotuhpazy thisaih phuh cha, Âzuahnô chô liata a la haw,” tah ei ta.

3“Haleluia! Chhâzaw nata tlyzaw ta, A meikhuh a kiah lymâ aw,” tahpa ta awh via heih ei ta.

4Machâ pakih nata papalih nata hmohrohneipa miapalihzy cha a khu ei ta, “Amen! Haleluia!” tahpa ta, beidyuchhai liata a tyuhpa Khazohpa cha a chhy ei ta.

5Chatawhcha beidyuchhai tawhta ao vaw pua ta, “Nâmo, Khazohpa chakaotuhpa zydua, Nâmo, ano a chituhpazy, Molaipa nata mochyhpazy saih u, Eima Khazohpa cha reithai teh u,” vaw tah ta.

6Chatawhcha zawpi hluhpi ao a lyupa thei na ta. Ti hluhpi pyu hawhta nata tôkalôhpa thata a thuapa pyu hawhta châ ta, ao chata, “Haleluia! Abeipa eima Khazohpa, Atotaotheipa ta ryu a reih.

7Alypa nata thaphapa ta y sih la, Ano palyupalih suh u; Mietakutaw myuh hneina vaw tlô ha ta, A myuh chhao â mâ haw.

8Poh rih dipa pathliepa nata pathaihpa A bu awpa pasaipa a châ,” vaw tah ta. Poh rih dipa cha mopathaihpazy siana hmotaopa a palâsa.

9Vâlyuhchâpa chata ei hnohta, “Mietakutaw myuh hneina kyhchhi liata hruapazy cha ama nohlao na, tahpa ta roh teh,” na tah ta. Chatawhcha ei hnohta, “Hezy he Khazohpa biehmeiseihpazy a châ,” tahpa ta na chho ta.

10Ano a chhy awpa ta a phei thaby liata kei pao na ta. Châhrasala ano ta ei hnohta, “Khata tao khah y! Kei cha nâ nata na unawhpa, Zisu bie a pyhtuhpazy chakaolâhpa ei châ. Khazohpa tlao a chhy teh. Zisu bie cha hrohsona thlahpa châ tlôh ta,” tah ta.

11Chatawhcha vârâh a vaw pahy ta, arâ râhpa hmô na ta. A chô liata a kiahpa cha Ngâchhihpa nata Hmeiseihpa moh bipa châ ta, siana ta ryureih ta, chariah a dyuhpa a châ.

12A mokhaohzy cha meipaleih lyu ta, a luh liata lakho hluhpi a kho ta, moh ropa, ano dei leipa ta ahy hmah ama pahno leipa a hnei.

13Thisaih liata nypa poh a bu ta, a moh cha, “Khazohpa Bie,” tahpa ta bipa a châ.

14Vâ pheisaihzy ta poh rih dipa diehpa nata pathaihpa a bupa ta arâ râhpa a kiahpa cha pazi ei ta.

15A pakah tawhta zaozi tiah ngaitapa vaw pua ta, cha chata phopizy chhawh aw ta, thua chôchahrei ta ama chô liata ryureih aw ta, Khazohpa Atotaotheipa hiehâhna ru ngaitapa kre saohna khaoh a tly aw.

16A poh liata nata a byhpi liata, “Beizy Beipa nata hyutuhpazy Hyutuhpa,” tahpa moh ropa a hnei.

17Chatawhcha vâlyuhchâpa pakha, noh liata a duah thlâh hapa hmô na ta. Ano chata avâ liata pavaw a zawpa zydua hnohta ao paro ngaitapa ta, “A vy u la, Khazohpa zâpati rônahpa châta a vaw hmaoh u la,

18beizy, pheisaih hyutuhpazy, pasaiphazy, arâ nata a kiahtuhpazy, chyhsa zydua, sei nata khotalaipazy, mochyhpa nata molaipa sapazy vaw nie teh u,” tahpa ta awh ta.

19Chatawhcha arâ a kiahpa nata a pheisaih a dyuh awpa ta, sahrâhpa nata lei beizy nata ama pheisaihzy amâ hmaohpa hmô na ta.

20Sahrâhpa cha patupa châ ta. Sahrâhpa ngiana a hneipa nata sahrâhpa nothlahpa a chhytuhpazy dôveina hmonoâhpa a mohmô liata a tao tyhpa hrohso pakheipa chhao, a hnohta patu pâpa châ ta, kaih ta a kâ ngâpa mei tipo liata ama pano ta ahrohpa ta thypa ama châ.

21Ahropazy cha arâ a kiahpa pakah tawhta zaozi a vaw puapa ta chhawhsaopa châ ei ta, ama sapa cha pavaw zydua ta nie ei ta, rihbiepa ta ama y.

← Chapter 18 Jump to: Chapter 20 →