1 Samuel 19

Chin TBR17 (Tedim Bible Revision 2017)

← Chapter 18 Jump to: Chapter 20 →

1Tua ciangin Saul in David thah ding a ngaihsutna thu a tapa Jonathan le a nuai-a ulian khempeuh kiangah a gen hi. Ahih hangin Saulʼ tapa Jonathan in David diksa mahmah hi.

2Jonathan in David kiangah, “Ka pa Saul in nang thah hong sawm hi. Tua ahih ciangin zingsang ciangin kidawm inla, mun simtham khat ah omin bu in.

3Kei pai khia-in nangma bukna phual nai ah ka pa kiangah ka ding dinga, nangma thu ka pa kiangah ka gen ding hi. Ama tung panin phawk ka neih leh nang kiangah kong gen ding hi,” a ci hi.

4Jonathan in a pa Saul kiangah Davidʼ thu a hoihin genin ama kiangah, “Kumpipa, a nasem pa David tungah khial kei in; bang hang hiam cih leh nang tungah amah hong khial lo a, ama nasepnate nang adingin nasep hoih ahi hi.

5Amah in a nuntakna pia ngamin Filistia-pa that a, Topa in Israel-te khempeuh adingin gualzawhna lianpi piangsak hi. Nangmah in hih thu na mu a, na lung a dam hi. Tua ahih ciangin bang hangin thu om lopi-in David thahna tawh a mawhbaang lo mipa tungah khial ding na hi hiam?” a ci hi.

6Saul in Jonathanʼ thu mang hi. Saul kiciam a, “ Topa a nungta ahih mah bangin amah kithat lo ding hi,” a ci hi.

7Tua ciangin Jonathan in David samin, Jonathan in hih thute khempeuh ama tungah lak hi. Jonathan in Saul kiangah David paipih a, a nidang a mah bangin ama sepna ngei ah a sem hi.

8Tua ciangin gal hong omkik hi. David kuan khia-in Filistia-te tawh kido a, amaute tampi tak that a, ama mai ah amaute a tai uh hi.

9Tua ciangin a khut sungah a teipi tawi-in a inn sungah a tut laitakin Topaʼ sawl kha gilo Saulʼ tungah hong tung hi. David in a laiza lasakna tum hi.

10Saul in a teipi-in kawm tawh David khawhcip dingin khawh a, ahih hangin amah in na pelh a, kawm tungah a teipi kiphut hi. Tua ciangin David tai-in a suakta hi.

11A zingsang ciangin amah a thah theih nadingin tua zanin Saul in amah a vil dingin Davidʼ inn ah mi sawl hi. Ahih hangin Davidʼ zi Mikhal in ama kiangah, “Tu zanin na nuntakna na suahtak kei leh, zing ciangin nang hong kithat ding hi,” a ci hi.

12Tua ahih ciangin Mikhal in tawlet ah David khia suk hi. Amah tai khia-in suakta hi.

13Mikhal in milim khat la-in lupna tungah koih a, keel mul lukham khat a lu ah koihin puan silhsak hi.

14Saul in David a man dingin mi a paisak ciangin amah in, “Amah a ci na hi,” na ci hi.

15Tua ciangin Saul in David a en dingin mi sawl a, “Amah ka thah theih nadingin a lupna tawh kei kiangah amah hong pua to un,” a ci hi.

16A mi sawlte hong tun ciangin, keel mul lukham a lu sanah omin lupna tungah a milim na om hi.

17Saul in Mikhal kiangah, “Bang hangin tua bangin kei hong khem a, amah a suahtak nadingin ka galpa khah na hi hiam?” a ci hi. Mikhal in Saul dawngin, “Amah in kei kiangah, ‘Hong paisak in; bang hangin nang hong that ding ka hi hiam?’ hong ci hi,” a ci hi.

18Tu-in David tai-in suakta a, Ramah ah Samuel kiangah pai-in, ama tungah Saulʼ hihna teng a gen hi. Tua ciangin amah le Samuel pai-in Naioth ah om uh hi.

19Tua ciangin Saul kiangah, “En in, Ramah khua sung Naioth veeng ah David om hi,” kici hi.

20Tua ciangin David a man dingin Saul in mi sawl hi. Amaute in kamsang honte laamin awngin omin, amaute a makai-in Samuel a ding a muh uh ciangin, Saulʼ sawltakte tungah Pasianʼ kha hong tunga, amaute zong laamin a awng uh hi.

21Hih thu Saul kiangah a kigen ciangin, amah in midang sawl leuleu a, amaute zong laamin awng leuleu uh hi. Tua ciangin Saul in mi a thum veina sawl a, amaute zong tua bangmah hi veve uh hi.

22Tua ciangin a mahmah Ramah ah pai a, Seku-a om tuikhuk lianpi tung hi. Amah in, “Samuel le David koi ah om ahi hiam?” ci-in a dong hi. Mi khat in, “En in, Ramah khua sung Naioth veeng ah om uh hi,” a ci hi.

23Tua lai panin Ramah khua sung Naioth veeng ah amah pai hi. Ama tungah zong Pasianʼ kha hong tunga, Ramah khua sung Naioth veeng a tun mateng a pai kawmin laamin awng hi.

24Amah in zong a puante suah khia-in Samuelʼ mai ah laamin awng a, tua sun tawntung le tua zan tawntung a guaktangin a om hi. Tua hun a kipanin, “Saul zong kamsang suak khin ahi hiam?” kici hi.

← Chapter 18 Jump to: Chapter 20 →