1 Samuel 31

Chin TBR17 (Tedim Bible Revision 2017)

← Chapter 30 Jump to:

1Filistia-te in Israel-te sim uh hi. Filistia-teʼ mai ah Israel-te tai uh a, Gilboa Mual tungah thahin tuk uh hi.

2Filistia-te in Saul le a tapate pha uh hi. Filistia-te in Saulʼ tapate Jonathan, Abinadab le Malkhishua a that uh hi.

3Gal in nakpi takin Saul neh a, gal thaltawite in nakpi takin amah liamsak hi.

4Tua ciangin Saul in a galhiam pua pa kiangah, “Hih dawibia mite hong pai-in kei hong dawt letin hong mawlpih kha ding uh ahih manin na namsau dok inla, tua tawh hong dawt let in,” a ci hi. Ahih hangin a galhiam pua pa in hih ngam lo hi; bang hang hiam cih leh amah lau mahmah hi. Tua ahih ciangin Saul in ama namsau la-in tua tungah puk hi.

5A galhiam pua pa in Saul a sihna a muh ciangin amah zong a namsau tungah kipuk suksakin amah tawh a si khawm hi.

6Tua bangin Saul, a tapa thumte, a galhiam pua pa le a mi khempeuh, a ni kikhatin a si khawm uh hi.

7Tua ciangin Jezreel kuam gal khat le Jordan gal khat a om Israel mite in Israel mite tai-in Saul le a tapate a sih khitna thu a zak uh ciangin amaute in a khuapite uh nusia-in tai uh ahih ciangin Filistia-te hong pai-in tuate sungah a teeng uh hi.

8A zing ciangin a kithat miteʼ na a la dingin Filistia-te hong pai ciangin Saul le a tapa thumte Gilboa Mual tungah a si mu uh hi.

9Amaute in Saulʼ lu tan khia-in a galhiam hawk khia uh a, a milimte uh le mite kiangah hih thuhoih a puak dingin Filistia gam sung khempeuh ah kamtaite a sawl uh hi.

10Amaute in Ashtaroth biakinn sungah ama galhiam koih uh a, Bethshan khuakulh ah ama luang a suang uh hi.

11Ahih hangin Jabesh-gilead ah a teeng mite in Saulʼ tungah Filistia-teʼ hihna a zak uh ciangin,

12a hang mi khempeuh dingin zan tawntung pai uh a, Bethshan kulh tung panin Saulʼ luang le a tapateʼ luangte va la uh hi. Amaute in Jabesh ah tunpihin tua lai ah a hal uh hi.

13Amaute in a guhte la-in Jabesh khua sung makeng kung nuai ah vui uh a, ni sagih sung an a tang uh hi.

← Chapter 30 Jump to: