1 Samuel 5

Chin TBR17 (Tedim Bible Revision 2017)

← Chapter 4 Jump to: Chapter 6 →

1Filistia mite in Pasianʼ Thuciamna Singkuang a mat uh ciangin Ebenezer panin Ashdod ah pua uh hi.

2Tua ciangin Filistia-te in Pasianʼ Thuciamna Singkuang la-in Dagon inn sungah paipihin Dagon kiangah koih uh hi.

3Ashdod mite a zing ciang zingsang tungin a thawh uh ciangin, Topaʼ Thuciamna Singkuang mai leilak ah Dagon na maipuk hi. Tua ahih ciangin amaute in Dagon phong to-in ama omna munah koihkik uh hi.

4Ahih hangin a zing ciang zingsang tungin amaute a thawh uh ciangin Topaʼ Thuciamna Singkuang mai leilak ah Dagon na maipuk leuleu a, Dagon lutang le a khut tegel kitan khia-in sangkil gei ah om a, Dagon a pumpi bek om lai hi.

5Tu ni dongin Dagon siampite le Dagon inn ah a tumte khempeuh in hih thu hangin Ashdod a Dagon sangkil tung sik lo uh hi.

6Topa in Ashdod khua mite nakpi takin gawt a, amah in uilut tawh Ashdod khua le a gam sung lausakin gimsak hi.

7Ashdod mite in hih bang thute a muh uh ciangin amaute in, “Israel-teʼ Pasianʼ Thuciamna Singkuang eite kiang panin a paikhiat loh phamawh hi. Bang hang hiam cih leh amah in eite le i pasian Dagon hong gawt hi,” a ci uh hi.

8Tua ahih ciangin amaute in mi sawlin Filistia uliante khempeuh khawm uh a, “Israel-teʼ Pasianʼ Thuciamna Singkuang bang cih ding ihi hiam?” a ci uh hi. Amaute in dawngin, “Israel-teʼ Pasianʼ Thuciamna Singkuang Gath ah koihsak ni,” a ci uh hi. Tua ahih ciangin amaute in Israel-teʼ Pasianʼ Thuciamna Singkuang tua lai ah paipih uh hi.

9Ahih hangin amaute in tua Gath khua ah a tunpih khit uh ciangin Topa in tua khuapi langpanin apkhapna lianpi piangsak a, amah in khuapi mite a moi a hamin gimsakin amaute in uilut vei uh hi.

10Tua ahih ciangin amaute in Pasianʼ Thuciamna Singkuang Ekron ah puak uh hi. Ahih hangin Pasianʼ Thuciamna Singkuang Ekron a tun ciangin Ekron mite kiko uh a, “Kote le ka mite uh a that dingin amaute in Israel-teʼ Pasianʼ Thuciamna Singkuang ko kiangah hong paipih uh hi,” a ci uh hi.

11Tua ahih ciangin amaute in mi sawlin Filistia uliante khempeuh khawmin, “Kote le ka mite uh hong thah loh nadingin Israel-teʼ Pasianʼ Thuciamna Singkuang pua khia unla, ama omna munah ciahkiksak un,” a ci uh hi. Bang hang hiam cih leh a khuapi sung khempeuh ah si dektak a apkhapna om hi. Pasian in tua lai ah amaute nak gawt mahmah hi.

12A si lo sunte in uilut vei uh a, khuapi sunga kahna awging vantung dongah kiza to hi.

← Chapter 4 Jump to: Chapter 6 →