1 Samuel 26

Chin TBR17 (Tedim Bible Revision 2017)

← Chapter 25 Jump to: Chapter 27 →

1Tua ciangin Saul kiang Gibeah ah Zif mite hong pai uh a, “Jeshimon nisuahna lam Hakhilah mual tungah David bu hi lo ahi hiam?” va ci uh hi.

2Tua ahih ciangin Saul kithawi-in David a zong dingin Israel mi a kiteel mihing tul thum tawh Zif gamlak ah a pai suk hi.

3Tua ciangin Saul in Jeshimon nisuahna lam lampi gei ah a om Hakhilah mual tungah giahphual sat hi. Ahih hangin gamlak ah David om lai hi. Amah a delhin gamlak ah Saul a hong paina thu a theih ciangin

4David in thukan simte sawl a, Saul hong pai taktak ahihna thu a thei hi.

5Tua ciangin David dingin Saul in giahphual a satna munah a pai hi. David in Saulʼ galkap mangpa, Nerʼ tapa Abner tawh a lupna mun mu hi. Giahphual laizang ah Saul lum a, ama kimkot ah a galkapte in phual sat uh hi.

6Tua ciangin David in Hit mi Ahimelek le a nu uh Zeruiah ahi Joabʼ sanggampa Abishai kiangah, “Saulʼ giahphual ah kei tawh kua hong pai suk ding na hi uh hiam” a ci hi. Abishai in, “Kei nang tawh kong pai suk ding hi,” a ci hi.

7Tua ahih ciangin David le Abishai zanin galkapte kiangah pai uh hi. Giahphual sungah Saul na ihmu a, a lukhung leilak ah a teipi na kiphut a, Abner le galkapte ama kimkot ah na lum uh hi.

8Tua ciangin Abishai in David kiangah, “Pasian in na galpa tu ni-in na khut sungah hong pia ahih ciangin tu-in teipi-in lei tawh khatvei bek hong khawhcipsak in, nih vei khawh ding kisam lo hi,” a ci hi.

9Ahih hangin David in Abishai kiangah, “Ama tungah siatna bawl kei in; bang hang hiam cih leh Topaʼ sathau nilh pa a su peuhpeuh mawhna pan peng ding sa na hi hiam?” a ci hi.

10David in, “ Topa a nungta ahih mah bangin Topa in amah vat taktak ding hi; tua ahih kei leh zong a sih hun hong tung ding hi; tua ahih kei leh gal kikapna sungah amah pai sukin si ding hi.

11Topaʼ sathau nilh pa tungah ka khut ka ngak ding Topa in kei hong kham hi; ahih hangin tu-in a lukhung ah a om a teipi le a tuithawl la-in paikhia ni,” a ci hi.

12Tua ahih ciangin David in Saulʼ lukhung a a om a teipi le a tuithawl a la hi. Tua ciangin amaute paikhia uh hi. Kuamah in mu lo hi; zong thei lo hi; kuamah khanglo lo hi. Amaute khempeuh ihmu uh hi; bang hang hiam cih leh Topa in amaute ihmut suak mahmah sak hi.

13Tua ciangin David a pang khat ah pai-in, amaute kikal saupi a kihalin mual dawn a gamla ah a ding hi.

14David in galkapte le Nerʼ tapa Abner samin, “Abner aw, hong dawng lo ding na hi hiam?” a ci hi. Tua ciangin Abner in dawngin, “Kumpipa a sam kua na hi hiam?” a ci hi.

15David in Abner kiangah, “Pasal hi lo na hi hiam? Israel-te sungah nang tawh a kibang kua om ahi hiam? Tua ahihleh bang hangin na to kumpipa vil lo na hi hiam? Bang hang hiam cih leh na to kumpipa a that dingin mi khat hong pai hi.

16Hih banga na gamtatna hoih lo hi. Topa a nungta ahih mah bangin a si dingin na kilawm hi; bang hang hiam cih leh Topaʼ sathau nilh pa, na topa na vil kei hi. Tu-in a lukhung a om kumpipaʼ teipi le a tuithawl koi ah om ahi hiam, thei in,” a ci hi.

17Saul in Davidʼ aw khen thei a, “Ka tapa David, tu-a a ging nangmaʼ aw ahi hiam?” a ci hi. David in, “Ka topa, kumpipa aw, keimaʼ aw ahi hi,” a ci hi.

18Tua ciangin amah in, “Bang hangin ka topa in a nasem pa delh ahi hiam? Bang gamta khial ka hi hiam? Ka tungah bang mawhna om ahi hiam?

19Tua ahih ciangin tu-in ka to kumpipa in a nasem paʼ thu za in. Keimah a do dingin nang hong tok suah pa pen Topa ahihleh amah in biakna hong sang tahen; ahih hangin mihing ahihleh amaute in Topaʼ mai ah samsiatna ngah tahen. Bang hang hiam cih leh amaute in, ‘Pai in; pasian dangteʼ na sem in,’ ci-in Topaʼ gamh ka ngah loh nadingin tu ni-in kei hong hawl khia uh hi.

20Tua ahih ciangin tu-in Topaʼ omna panin gamdang leitang ah kei hong sisak kei in; bang hang hiam cih leh mual tungah vak a a beng pa bangin uili bang lel keimah a that dingin Israel kumpipa nong kuan khia hi,” a ci hi.

21Tua ciangin Saul in, “Ka gamta khial hi; hong ciahkik in, ka tapa David aw; bang hang hiam cih leh tu ni-in kei hong suaktasak na hih manin na tungah siatna kong bawl nawn kei ding hi. Ka hai gamtat kha a, nakpi takin ka khial khin hi,” a ci hi.

22Tua ciangin David in dawngin, “Hih lai ah na teipi om hi, kumpipa! Tangvalte khat hong paisak inla hong lasak in.

23Topa in mi khempeuh a thumanna le a thutakna hangin thaman pia hi; bang hang hiam cih leh Topa in tu ni-in ka khut sungah nang hong pia a, keimah in Topaʼ sathau nilh pa a hih dingin ka khutte ka taang khiasak kei hi.

24En in, tu ni-in nangmah kong suahtaksak mah bangin Topa in zong kei hong suaktasak henla, haksatna khempeuh panin kei hong hon khia tahen,” a ci hi.

25Tua ciangin Saul in David kiangah, “Thupha ngah ta in, ka tapa David! Nangmah in na tampi na sem dinga, tuate na zo ding hi,” a ci hi. Tua ahih ciangin David ama lampi ah pai-in, Saul zong ama omna munah a ciah hi.

← Chapter 25 Jump to: Chapter 27 →