2 Corinthians 1

Chin TBR17 (Tedim Bible Revision 2017)

Jump to: Chapter 2 →

1Jesu Khrisʼ sawltak ahi dingin Pasian in a hong seh keimah Paul le thu upna sungah i sanggam Timoti in, Korin khua ah a om Pasianʼ pawlpi mite le Akhaia gam sungah a om Pasianʼ mite khempeuh tungah lai ka hong khak uh hi.

2I Pa Pasian le Topa Jesu Khris in note khempeuh tungah dikna le nopsakna thupha hong tungsak tahen.

3Eiteʼ Topa Jesu Khrisʼ Pa ahi, hehpihna a nei Pa, i kisapna khempeuh ah a hong huh Pasian in thupha ngah tahen.

4Amah in koteʼ haksatna khempeuh ah hong huh ahih manin, kote in zong Pasianʼ tung panin ka ngah uh tua huhna mah zangin haksatna a nam tuamtuam a thuakte ka huh sawn thei leuleu uh hi.

5Khris hangin gimna tampi ka thuak uh mah bangin amah in zong kote tungah huhna tampi mah a hong pia hi.

6Kote in gimna ka thuak uh leh noteʼ phattuam nading le hotkhiatna na ngah nading uh ahi hi. Kote in huhna ka ngah uh leh zong, note zong a hong kihuh hi a, koteʼ thuak bang gimnate na thuak uh ciangin lungduai takin na thuak zawh nading uh thahatna a hong kipia ahi hi.

7Note ka hong muanna uh kiam tuan lo hi. Koteʼ thuak bangin na thuak uh leh Pasian in kote hong huh mah bangin note zong hong huh ding hi.

8Sanggamte aw, Asia gam sunga ka thuaknate uh na hong phawkpih ding uh ka deih uh hi. Ka thuakna uh lian lua mahmah ahih manin nuntak zawh nading lametna om lo hi.

9A si ding taktak hi ta hang, ci-in ka kingaihsun uh hi. Ahi zongin tua zahin ka thuakna uh pen koteʼ thatang kimuang loin sihna panin misite a hingkiksak Pasian ka muan theih nadingun a piang ahi hi.

10Tua zahin a lauhuai sih nading panin hong hon khia khinzo a, zong hong hon khia lai ding hi. Mailam hunah zong hong hon khia kikkik ding hi, ci-in amah ka muang uh hi.

11Kote adingin thu hong ngetsak un. Tua hileh mi tampi in kote adingin thu a hong ngetsaknate uh Pasian in a hong piakna hangin mi tampi mah in koteʼ tang dingin Pasian tungah lungdamna ko thei ding uh hi.

12Koteʼ kisialh pih thu in: hih leitung a ka gamtatnate uh le a diakdiakin note tungah kong gamtatnate uh ah, mihingteʼ pilna a zang hi loin Pasian hehpihna vang tawh, Pasianʼ deihna bangin lungsim takpi tawh a gamta hi ung, ci-in ka kitheihna lungsim uh ahi hi.

13Bang hang hiam cih leh note in sim thei-in a thu na theihtheih dingte bek uh a hong gelh ka hi uh hi. Tuhunin a cingin na theih lohte uh zong,

14Topa Jesu hong paikik Ni ciangin a cing takin thei ding na hih manun note hangin ka kisialh uh mah bangin note zong kote hangin na kisial ding uh hi.

15Tu-a bangin piang taktak ding ci-in tel theih ka hih manin note in hamphatna nih vei na ngah nadingun ka geel a,

16Masedonia gam ka pai ciangin hong nawk masa-in, Masedonia gam panin ka kilehkik ciangin zong Judea gam a ka paina dingah nong huh theih nadingun hong nawk leuleu dingin ka ngaihsun masa phot hi.

17Hih bangin ka ngaihsutna pen a mawk kheel themthum hong sa na hi uh hiam? Leitung mihingte bangin angsung phattuam nading a om kei leh a gen sa thu a kheel themthumte bang hong sa na hi uh hiam?

18Pasian a thuman a citak ahih mah bangin note tungah ka hong gente uh zong a kheel themthum ka hi kei uh hi.

19Bang hang hiam cih leh Silvanas, Timoti le keimah in note lakah a thu ka hong hilhhilh uh Pasianʼ Tapa Jesu Khris pen hih ding a cihte hih lo ding ci-in a thu a kheel themthum pa hi lo a, hih ding a cihte hih ding mah hi pah hi.

20Pasianʼ thuciamte khempeuh a hih pa pen amah ahi hi. Tua ahih manin Jesu Khris hangin Pasian phatin, “Amen,” i cihna zong hih thu hang mah ahi hi.

21Khris sungah kote le note a hong kipsak pa le nasem dingin kote a hong sawl pa pen Pasian ahi hi.

22Amah in eite pen ama aʼ ihihna ciaptehna eite tungah hong bawl a, ama aʼ ihihna le eite tungah a hong piak ding na khempeuh a hong pia takpi ding ahihna a kitel nadingin eiteʼ lungsim sungah Kha Siangtho a hong ma piak hi.

23Note kiangah kong pai lohna pen note ka hong dopna hizaw hi. Hih thu hong theih pih ka teci pen Pasian ahi hi.

24Hih bangin um un, ci-in thatang hat thu tawh a hong gen ding ka hi kei uh hi. Note na upna uh ah kip khin na hih manun noteʼ lungdam nadingin note tawh na a sem khawm ka hi uh hi.

Jump to: Chapter 2 →