2 Corinthians 10

Chin TBR17 (Tedim Bible Revision 2017)

← Chapter 9 Jump to: Chapter 11 →

1Keimah Paul in Khris migitna le lungduaina tawh note kiangah kong thum hi. Kei pen note tawh ka hong om khawm laitakin a meidawi, note tawh ka om khawm loh ciangin a tapkual han in hong kigen hi.

2Note kiangah ka hong pai ciangin ka hong hangsan khak loh nadingin na om nadingun kong thum hi. Bang hang hiam cih leh leitung ngaihsutna tawh nasem hi, ci-in kote a hong ngaihsunte tungah hang takin ka gamta ding hi.

3Kote pen leitungah a teeng mi ka hi mah uh hi; ahi zongin leitung lungsim ngimna tawh galdo ka hi kei uh hi.

4Koteʼ zat galdona hiam pen leitung galhiam lelte hi lo a, galteʼ panmun phualpi a susia zo ding Pasianʼ galhiam khauhte ahi hi.

5Miteʼ ngaihsutna a man lote ka thal nial gawp zo uh a, Pasianʼ thu theih nading a khaktan thei nate ka susia gawp uh a, mi khempeuhʼ ngaihsutna zo gawpin Khrisʼ thu a mang dingin ka bawl uh hi.

6Note thumanin na cihtakna uh a kitheihtel khit ciangin a thuman lo a citak lo khempeuh gimpiak ding ka kipan ta ding uh hi.

7Note in na khatpeuh na ngaihsut uh ciangin a tungtham ah a kimu thei teng na siksan kha thei uh hi. Mi khatpeuh in Khris tawh ka kipawl hi, ci-in a kingaihsut leh, amah a kipawl ahih zah mah bangin kote zong Khris tawh a kipawl ka hihna thu uh limtakin ngaihsun tahen.

8Bang hang hiam cih leh noteʼ siat nading hi loin noteʼ hoih nadingin Topa in kote tungah hong piak thuneihna hong nak zat lua-in ka kisialh pih hangin them khat zong ka maizum kei hi.

9Hih bangin lai ka hong gelhna tawh note a hong lau gawpsak nuam ka hi kei hi.

10Mi pawl khat in, “Paulʼ laigelhte khauhin nasia mahmah a, ahi zongin eite kiangah amah a om ciangin bangmah thupi khol lo hi,” hong ci uh hi.

11Tua ahih manin lai ka hong gelhna sung uh ah ka thugente uh le note kiangah ka hong pai uh ciangin ka sepna dingte uh bangmah a kilamdang het lo ding ahihna thu tua mite in teltakin thei ta uh hen.

12Kote ahihleh tua bangin a kiliansak mahmah mite tawh a kikimin ka kingaihsun ngam buang kei ding uh hi. Amaute khatlekhat ki-en kakin thupi kisa mahmah uh ahih manin mihai taktak ahi uh hi.

13Ahi zongin kote ka kisialh nading uh kiciangtan a, note lakah na ka hong sep nadingun Pasian in a hong sehsak sa thu sung ciang bekah ka kisial thei uh hi.

14Note kiangah Khris hangin lungdamna thu a hong hilh masate ka hih manun note kiangah thu ka hong hici gen uh ciangin a ciangtan khengvalin a gamta ka hi kei uh hi.

15Tua ahih manin Pasian in kote adingin a hong sehsak sa khengvalin midangteʼ nasepna ah a kisial ka hi kei uh a, Pasianʼ hong piak koteʼ huam sungah noteʼ upna khangin note lakah ka nasepna uh a tangzai zaw a suah nading a lamen ka hi uh hi.

16Tua hileh noteʼ gam banah gam dangah Lungdamna Thu ka hilh thei ding uh a, midangteʼ nasepna sa sungah zong ka kisialh ding uh kul lo ding hi.

17Lai Siangtho in, “Mi khat peuhpeuh a kisialh nop leh Topaʼ nasepnate bek kisialh pih hen,” na ci hi.

18Bang hang hiam cih leh mi khat peuhpeuh amah a kiphattawm ciangin a kipakta hi lo a, Topa in a phat ciangin a kipakta hi pan hi.

← Chapter 9 Jump to: Chapter 11 →