2 Corinthians 9

Chin TBR17 (Tedim Bible Revision 2017)

← Chapter 8 Jump to: Chapter 10 →

1Judea gam a om Pasian mite huh nading tawh kisai-in lai kong gelh ding kisam nawn lo hi.

2Noteʼ huhnopna thu ka theih khit sa hi a, Masedonia gam a pawlpite kiangah zong note ka hong kisialh pih khit sa ahi hi. “Akhaia gam a pawlpite in ni kum a kipanin huh dingin a kithawi sa uh ahi hi,” ci-in ka na gen hi. Tua banga noteʼ lawpna in amaute tampi tak tha nuamsak hi.

3Ahi zongin note ka hong kisialhpihna uh a mawkna a suahkhak loh nadingin na huh nading uh na kiging khol un, ka hong cih mah bangin na kigin kholh theih nadingun ka sanggamte uh ka hong ma paisak hi.

4Tua bang hikeileh kei ka hong pai ciangin Masedonia gam a ka lawmte in hong zui kha zenzen henla, note a kiging lopi-in a om hong tuak kha leh, note ka hong muan gen mahmah sa ahih manin noteʼ maizum ding gen loh, kote bangzah takin maizum ding ka hi uh hiam?

5Tua ahih manin piak dingin na kamciam sa uh huhna sumte a baih sa-in a om theih nadingin hih ka sanggamte a hong mapai ding kisam ka sa hi. Tua hileh kei ka hong tun ciangin a baih sa-in na om dinga, note in piak loh phamawh cihna lungsim tawh hi loin utna lungsim tawh a pia na hihna uh hong kilang ding hi.

6Note in na phawk ding uh thu panin: Khaici tawm a vawhte in tawm mah la dinga, tampi a vawhte in tampi mah la ding uh hi.

7Pasian in piak nopna lungsim tawh a pia mite bek deih ahih manin, a kuamah peuh in na lungsim sung uh ah na ngaihsut sa zah ciat uh na pia unla, pia nuam lo pipi le sawl zawh thu bek tawh na pia kei un.

8Note in na kisap khempeuh uh na neih theih nading uh le midangte huh nading zong na neih thuah theih nadingun Pasian in hong pia thei hi.

9Bang hang hiam cih leh Lai Siangtho in, “Amah in citna tawh mizawngte pia zuahzuah a, ama migitna kip tawntung hi,” na ci hi.

10Tua ahih manin vawh ding khaici le nek ding an hong pia Pasian in noteʼ cit piakna hangin nopsakna lian tampi na ngah theih nadingun note tungah a kisam khaici hong guanin a pungsak ding hi.

11Kote tungtawnin noteʼ huhna sumte a ngahna uh hangin mi tampi in Pasian a phat theih nadingin note na cit gamtat zawh tawntung nadingun Pasian in hong hausak tawntung ding hi.

12Bang hang hiam cih leh noteʼ huhna sumte in Pasianʼ mi a cimawhteʼ dong a hu bek hi loin, Pasianʼ tungah lungdamkoh nading zong a piangsak ahi hi.

13Note in na up uh Jesu hangin lungdamna thu ah na cihtakna uh le amaute le midang khempeuh tungah na cit piakna hangun mi tampite in Pasianʼ min phat ding uh hi.

14Note tungah Pasian in hehpihna thupha a val a kanin hong piakna hangin amaute in note hong mu nuam mahmah in thu zong hong ngetsak ding uh hi.

15A manphatna a kigen zo lo Pasianʼ hong piak hih thupha hangin Pasian tungah i lungdamna ko ciat ni.

← Chapter 8 Jump to: Chapter 10 →