2 Corinthians 3

Chin TBR17 (Tedim Bible Revision 2017)

← Chapter 2 Jump to: Chapter 4 →

1Hih bangin thu ka gen uh ciangin koleko a kiphattawm ka bang zel uh hiam? Midang pawl khatte bangin note kiangah lah ding mihoih hihna lai ka kisam kei uh a, note in zong kote nong lah ding uh mihoih hihna lai a kisam na hi kei uh hi.

2Note mahmah pen mihoih ka hihna uh lah nadingin koteʼ lai na hi uh a, mi khempeuh in simin a theih nadingun koteʼ lungtang tungah a kigelh lai na hi uh hi.

3Hih lai pen Khris mahmah in gelhin kote a hong puasak ahihna thu kitel mahmah hi. Laidal le suangpek tungah laitui le laikung tawh a kigelh hi lo a, mihing lungtang tungah a nungta Pasian Kha Siangtho tawh a kigelh ahi hi.

4Khris hangin Pasian muang ka hih manun hih bangin a hong gen ka hi uh hi.

5Hih bang sep zawh nadingin kote in siamna nei ung a ci hi loin, sep zawh nading siamna pen Pasian hong piak ahi hi.

6Thuciamna thak nasem thei dingin kote tungah siamna a hong pia hi. Tua hong piakna pen lai-a kigelh thukham tawh hi loin Kha Siangtho tawh ahi hi. Bang hang hiam cih leh lai-a kigelh thukham in sihna piangsak a, ahi zongin Kha Siangtho in nuntakna hong pia hi.

7Thukham pen suangpek tungah a kigelh laimal hi a, a kipiak hunin Pasianʼ minthanna tawh hong tonkhawm hi. Mosesʼ maitang a taang mahmah pen mual khin tei napi-in, nak taan lua mahmah ahih manin Israel mite in Mosesʼ maitang en zo lo lai uh hi. Sihna a piangsak thei bek Thukham hong kipiak ciangin tua zah minthanna vang taang tawh hong kizui ahihleh,

8nuntakna a pia Kha Siangtho nasepna bangzahin minthanna lian tawh hong kizui zaw kan ding ahi hiam?

9Mite mawhsakin thukhen nasepna ah tua zahin minthanna vang taang om ahihleh mite dik hi, ci-in genkhiat nasepna ah a minthanna vang taang lian zaw kan lai ding hi.

10Tuhunin a taang pha zaw minthanna vang hong om ta ahih manin nidangin minthangin a vang taang mahmah i cih pen a bei hong suak mai hi.

11Tawl khat sung bek a kimang na in minthanna nei ahihleh a kip tawntung na in minthanna lian zaw nei kan ding hi.

12Hih bang lametna nei ka hih manun hang takin a om ka hi uh hi.

13A maitang panin a vang taang a bei lam Israel mite in a muh khak ding uh a deih lohna-in Moses in a maitang puan tawh a liah bangin a gamtate ka hi kei uh hi.

14Amauteʼ lungsim khauh ahih manin tu dongin bangmah thei tuan loin om uh a, thuciamna lui laibu a sim uh ciangin puan tawh liah bangmahin bangmah mu thei lo, theithei lo uh hi. Bang hang hiam cih leh mi khatpeuh Khris tawh a kipawl ciang bekin a muh theih nadingin a kiliahna puan a kila khia pan ahi hi.

15Tu hun dongin amaute in Moses Thukham laibu a sim uh ciangin liahna puan in a lungsim uh a liah lai hi.

16Ahi zongin Lai Siangtho in, “Topaʼ mai ah Moses a pai ciangin a kiliahna puan a la khia hi,” a cih mah bangin Topa lamah mi khatpeuh a kihei ciangin a liah puan kila khia hi.

17Hih lai munah Topa a cih pen Kha Siangtho hi a, Topaʼ Kha Siangtho a omna mun peuhpeuh ah suahtakna om hi.

18Tua ahih manin eite khempeuh i maitang hong kiliah nawn loin Topaʼ minthanna vang taang i kilangsak hi. Topa kiang panin a hong pai Kha Siangtho ahi tua minthanna vang in amah tawh a kibang dingin eite hong bawl pha a, minthanna khat panin minthanna sang zaw ah hong omsak hi.

← Chapter 2 Jump to: Chapter 4 →