2 Corinthians 4

Chin TBR17 (Tedim Bible Revision 2017)

← Chapter 3 Jump to: Chapter 5 →

1Pasian in hong hehpihna tawh hih nasep hong pia ahih manin ka thaneem het kei uh hi.

2Ka thuhilhna uh ah mite khembawl loin, Pasian thu zong a man lopi-in ka gen kei uh a, tua bang a zumhuai simtham tatnate ka zang het kei uh hi. Pasian muhna ah a langtangin thuman takin ka gamta uh a, mi khempeuh a lungkim theih nadingin ka hanciam uh hi.

3Lungdamna thu ka hilhte uh kitel lo ahihleh zong siatna a thuak mite ading bekin a kitel lo hi ding hi.

4Tua bang mite pen hih leitung pasian gilote in a lungsim mit uh tawsak ahih manin um lo uh a, Pasian tawh a kibang teekteek Khris minthanna hangin amaute tungah a hong taang lungdamna thu khuavak mu thei lo uh hi.

5Bang hang hiam cih leh koteʼ hilh thu pen komauʼ thu hi lo a, Khris Jesu pen Topa ahi hi, ci-in a hilh ka hi uh a, kote pen Khris hangin nomauʼ na a semte ka hi uh hi.

6“Khuamial sung panin khuavak taang hen,” a ci Pasian mah in Jesuʼ maitang a taangsak Pasianʼ vangliatna thu theih nading khuavak ka ngah theih nadingun kote lungsim sungah khuavak hong taangsak hi.

7Ahi zongin vangliatna taktak Pasian aʼ hi a, kote aʼ hi lo hi, ci-in a kilat nadingin kha tawh kisai na manpha a nei kote pen na kikoihna leibeel tawh a kibang bek ka hi uh hi.

8Gimna ka tuah zelzel uh hangin ka si kei uh a, lunghihmawhna ka tuah zelzel uh hangin ka lungkia kei uh a,

9gal tampi ka neih uh hangin pawl ka kitasam ngei kei uh a, liamna baina ka tuah uh hangin ka si kei uh hi.

10Koteʼ pum tung panin Jesuʼ nuntakna a kilat theih nadingin hih ka leitung pumpi nuntakna mahmah uh ah zong Jesuʼ sihna bangmah ka thuak zelzel uh hi.

11Tua ahih manin koteʼ leitung pumpi ah Jesu Khris nuntakna a kilat nadingin Jesu hangin ka leitung nuntak sungun sih nading lauhuaina ka phu kha tawntung uh hi.

12Tua ahih manin kote adingin sih nading a kisepsep laitakin noteʼ nuntak nading a kisem niloh ahi hi.

13Lai Siangtho in, “Um ka hih manin ka gen hi,” a cih mah bangin kote in zong um ka hih uh manin a gen ka hi uh hi.

14Topa Jesu a hingkiksak pa in Jesu mah tawh kote zong hong hingkiksak khawmin note tawh ama omna ah hong paipih khawm ding hi, ci-in ka thei uh hi.

15Hih thute khempeuh note ading a kikhualna hi a, Pasianʼ hehpihna in mi tam ban semsem leh mi a tam semsem mah in Pasianʼ minthan nadingin lungdam ko-in thu ngen ding uh hi.

16Tua thu hangin ka lungkia tuan kei uh hi. Koteʼ leitung pumpi in damdamin muat lam a manawh ahi zongin ka kha nuntakna uh a nini-in thaksuak semsem hi.

17Tu hun laitakin tomno sung lungkhamna ka thuakte uh in ka thuakna uh sangin nakpi takin a lian zaw tawntung minthanna sung hong tunpih ding hi.

18Bang hang hiam cih leh a kimu thei nate a mitsuan ka hi kei uh a, a kimu thei lo nate a mitsuan ka hi uh hi. A kimu thei nate tomno sung bek kimang a, a kimu thei lo nate a tawntungin a kip ahi hi.

← Chapter 3 Jump to: Chapter 5 →