Acts 15

Dagbani Bible (Naawuni Kundi Kasi)

← Chapter 14 Jump to: Chapter 16 →

1Ka ninvuɣ’ shɛb’ daa yi Judia n-ka Antiɔk na n-daa ti gbaai Yisa nyaandoliba wuhibu yɛri ni shee bɛ guniya kaman Anabi Musa ni daa zali shɛm la ni di yi pa lala bɛ ku tiligi.

2Ka Pool mini Baanabas daa ŋme ba naŋgbankpeeni pam di zuɣu. Ka Yisa nyaandoliba maa daa bo niriba pahi Pool mini Baanabas zuɣu n-tim ba ni bɛ chaŋ Yisa tuumba la mini cheechi kpamba bɛn daa be Jɛrusalɛm la sani nti nya ba yɛlli maa zuɣu.

3Antiɔk yɛdaniŋdiba maa ni daa tim ba maa, bɛ daa zaŋ doli yila Fɔnisia mini Samaria polo n-yɛri nimaani yɛdaniŋdiba zuliya shɛb’ bɛn pa Yɛhudianim’ gba ni niŋ tuuba shɛm yɛla chana, ka di daa niŋ ba suhupiɛlli pam.

4Bɛ ni daa ti paai Jɛrusalɛm ka yɛdaniŋdiba mini Yisa tuumba maa ni cheechi kpamba maa daa zaŋ ba ti kpɛhi bɛ yinsi. Ka Pool mini Baanabas daa yɛli ba Naawuni ni daa chɛ ka bɛ tum shɛlikam yɛla.

5Ka Yisa yɛdaniŋdib’ shɛb’ bɛn daa nyɛ Farisiinim’ la yiɣisi zani yɛli, “Di niŋ kamaata ni bɛn pa Yɛhudianim’ ka niŋ Yisa yɛda maa guni, ka lan niŋ kamaata ni ti yɛli ba ni bɛ doli Anabi Musa zaligu.”

6Ka tuumba maa mini cheechi kpamba maa daa laɣim ni bɛ to yɛlli maa jina.

7Ka bɛ daa ŋme naŋgbankpeeni di zuɣu yuui, ka Pita ti yiɣisi zani yɛli ba, “M mabihi, yi mi ni mani ka Naawuni daa daŋ pii ni n chɛ ka bɛn pa Yɛhudianim’ wum lahibal’ suŋ maa n nol’ ni ka niŋ yɛda.

8Ka Naawuni ŋun mi din be salinim’ suhuri ni daa di ba shɛhira n-ti ba Shia Kasi kaman o ni daa ti ti gba shɛm la.

9Naawuni bi lihi ti ka ti be ti ko ka chɛ ba; dama bɛ gba yɛda niŋbu zuɣu ka o kpihim bɛ daalahichi.

10Ka bɔ n-niŋ ka yi ŋmɛri Naawuni naŋgbankpeeni, ka zaŋdi ʒi’ tibisi’ shɛŋa ti mini ti yaannim’ ni bi tooi ʒi ni yi ʒili ba?

11Ti ni niŋ yɛda ni ti Duuma Yisa daalibarika zuɣu ka ti tiligi shɛm, lala n-nyɛ bɛ gba.”

12Ka bɛn zaa daa laɣim maa fo baalim wumdi Baanabas mini Pool ni daa kahigiri shihir’ shɛŋa bɛ ni wuhi mini alahiziba tumtumsa shɛŋa Naawuni ni daa chɛ ka bɛ tum bɛn pa Yɛhudianim’ maa sani yɛla wuhiri ba.

13Bɛ ni daa ti tɔɣisi naai ka Jeemsi mi yɛli, “M mabihi, wummiya n gba ni yɛn yɛli shɛm ŋɔ!

14Saimɔn Pita pun wuhi ti Naawuni ni daa tuui pii bɛn pa Yɛhudianima ni bɛ leeg’ o niriba shɛm yɛla.

15Ka o ni yɛli shɛm maa min’ anabinim’ yɛligu doli taba kaman di ni sab’ yɛli shɛm la:

16‘Dimbɔŋɔ nyaaŋa n ni labi n-neei Naa Dauda yili din daa lu la. N ni lan me o dabɔɣu maa zali.

17Ka di chɛ ka bɛnkam kpalim bo ti Duuma, ka bɛn pa Yɛhudianima ka nyɛ bɛn zaa kpe n yuli gba bo ma.’

18Ti Duuma ŋun daa kahigi dimbɔŋɔnim’ zaa ha piligu ni wuhi la n-yɛl’ lala.”

19Jeemsi daa lan yɛli, “Dinzuɣu n tɛha nyɛla ŋ-ŋɔ: Di bi simdi ni ti nahim bɛn pa Yɛhudianim’ bɛn niŋ tuuba maa;

20amaa di simdi ni ti naɣ’ sabimi yɛli ba ni bɛ di diri buɣa maligu nimdi mini jifa ni binʒim, ka mi di niŋdi zina.

21Dama ʒiɛmana pam din gari la ha zaŋ kana ni pumpɔŋɔ, bɛ kul karindila Anabi Musa zaligu Yɛhudianim’ tiŋ’ kam jɛmbu duu ni Vuhim Dabisili dali kam ka karimbanima naanyi yihir’ o yɛligu waazu.”

22Di saha ka tuumba maa mini cheechi kpamba ni Jɛrusalɛm yɛdaniŋdib’ zaa daa naai noli yɛli ni di simdi ka bɛ pii bɛ ni shɛba n-tim ba ka bɛ pahi Pool mini Baanabas zuɣu chaŋ Antiɔk. Ka bɛ daa pii Judas ŋun yuli daa lan booni Barisabas la mini Silas bɛn daa nyɛ bɛ ni ninvuɣ’ zuɣuri la tim ba;

23ka sab’ bɛ puhigu gbaŋ ti ba. Bɛ ni daa sab’ yɛli shɛm m-bɔŋɔ: “Yi mabihi bɛn nyɛ Yisa tuumba mini cheechi kpamba puhiri yinim’ bɛn nyɛ bɛ mabihi bɛn pa Yɛhudianima m-be Antiɔk mini Siria ni Kilikia zaa ha.

24Ti wumya ni ti ni shɛb’ daa ka yi sanna nti mali yɛl’ shɛŋa doli ya ni yi niŋ, ka di zuɣu chɛ ka yi suhuri bi doya, amaa pa tinima n-wuhi ba lala maa.

25Dinzuɣu ka ti laɣim kpe n-tɔɣisi, ka tɛhi ni di luhiya ni ti pii ti ni shɛba n-chɛ ka bɛ doli ti mabiyurisi Baanabas mini Pool

26bɛn nyɛ ninvuɣ’ shɛb’ bɛn zaŋ bɛ nyɛviya zali barina zaashee ti Duuma Yisa Masia tuma zuɣu la n-ka yi sanna.

27Lala zuɣu ka ti tim Judas mini Silas ni bɛ ti yɛli ya ti ni sab’ yɛli ya shɛm ŋɔ bɛmaŋmaŋ’ nol’ ni pahi.

28Dama di luhiya ti mini Naawuni Shia Kasi sani ni ti di ʒili ya ʒi’ tibisa n-naɣ’ pahila yɛl’ shɛŋa din simdi niŋbu ŋɔ.

29Di dinya buɣa maligu nimdi mini binʒim ni jifa; yi mi di niŋya zina. Yi yi gbaai yimaŋ’ ni dimbɔŋɔnim’ niŋbu, yi niŋ viɛnyɛliŋga. Naawuni sɔŋmi ya!”

30Ka bɛ daa chɛbisi ba, ka bɛ mali ti paai Antiɔk n-laɣim yɛdaniŋdiba n-zaŋ gbaŋ maa ti ba.

31Bɛ ni daa karim gbaŋ maa, di yɛligu maa daa paligi bɛ suhuri pam.

32Ka Judas mini Silas bɛn daa nyɛ bɛn mal’ anabitali yɛtɔɣa tɔɣisibu pini la daa lan tɔɣisi ba yɛtɔɣa pam kpaŋsi bɛ suhuri pahi.

33Ka bɛ daa niŋ daba ayi nimaani, ka yɛdaniŋdiba maa daa ti chɛbisi ba ni suhupiɛlli ka bɛ lab’ bɛn daa tim ba na maa sani. [

34Amaa ka Silas ŋun’ daa lo nia ni o ni kpalim nimaani niŋ daba ayi pahi.]

35Ka Pool mini Baanabas daa kpalim Antiɔk, ka niriba pam daa pahi bɛ zuɣu ka bɛ yihiri waazu ka wuhiri niriba ti Duuma yɛligu.

36Ka di daa ti niŋ daba ayi ka Pool yɛli Baanabas, “Chɛ ka ti lab’ tin’ shɛŋa ni ti ni daa moli ti Duuma yɛligu molo la nti kaai ti mabihi bɛn be nimaani maa n-nya bɛ ni be shɛm.”

37Ka Baanabas daa bɔri ni bɛ ʒi Jɔn ŋun yuli daa lan booni Maak la pahi,

38amaa ka Pool ŋun’ daa bi tɛhi ni di luhiya ni bɛ lan ʒi ninvuɣ’ so ŋun daa zani Pamfilia ŋ-ŋmaligi lab’ ka chɛ ba ka bi doli ba paai bɛ tuma tariga la.

39Ka naŋgbankpeeni daa kpe bɛ sunsuuni ka bɛ woligi taba di zuɣu; ka Baanabas daa zaŋ Maak pah’ omaŋ’ zuɣu ka bɛ kpe ŋariŋ chaŋ Saipurus.

40Ka Pool mi daa pii Silas pah’ omaŋ’ zuɣu ka yɛdaniŋdiba daa zaŋ ba niŋ ti Duuma ŋun nyɛ Alibarikalan’ ŋɔ nuu ni, ka bɛ mi naanyi chaŋ bɛ chandi shee.

41Ka bɛ daa chaŋ Siria mini Kilikia tiŋgbana ni ka Pool ti kpaŋsiri yɛdaniŋdiba suhuri.

← Chapter 14 Jump to: Chapter 16 →

Recommended Reading

Commentary Acts Commentaries → Devotional Acts Devotional Guide → Get This Bible Dagbani Bible (Naawuni Kundi Kasi) Study Bible →