Acts 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Dimbɔŋɔ nyaaŋa ka Pool daa yi Atɛnsi n-chaŋ Kɔrinti.

2Nimaani ka o daa ti chirigi Pɔntus tiŋbi’ so ŋun yuli booni Akuila min’ o paɣ’ Prisila bɛn daa yoli yi Itali na la, dama Rom Naa Klɔdius n-daa zali zaligu ni Yɛhudianim’ zaa yim’ Rom, ka bɛ mi daa nyɛ Yɛhudianima.

3Bɛ mini Pool zaa tuma daa nyɛla tanti wuɣibu tuma, dinzuɣu ka Pool daa chaŋ ti be bɛ sani ni o mini ba laɣim wolindi dira.

4Ka Pool daa yi chani Yɛhudianim’ jɛmbu duu Vuhim Dabisili dali kam ka o mini ba ti tɔɣisiri Naawuni yɛla, ka o daa lɛbigiri Yɛhudianim’ mini bɛn pa Yɛhudianim’ tɛha.

5Silas mini Timoti ni daa yi Masidɔnia paai Pool sani, o nini daa kul moola waazu yihibu zuɣu, ka o yɛri Yɛhudianim’ ni Yisa n-shiri nyɛ Masia.

6Ka bɛ ni daa ŋmɛr’ o naŋgbankpeeni ka tur’ o zuɣu chɛ ka o daa pihipihi o binyɛrigu taŋkpaɣu bahi ka yɛli ba, “Yimaŋmaŋ’ nyɛviya bahi yoli taali kpalim ʒi yi zuɣu! Man’ nuu yiya. Pumpɔŋɔ zaŋ chana, n ni chaŋla bɛn pa Yɛhudianim’ sani.”

7Ka o daa chɛ ba ka chaŋ ti kpe do’ so ŋun yuli daa booni Taitius Justus la yiŋa. O daa nyɛla ŋun jɛmdi Naawuni, ka o yiŋ’ daa baɣi Yɛhudianim’ jɛmbu duu.

8Ka Krispus ŋun daa nyɛ Yɛhudianim’ jɛmbu duu zuɣulan’ la min’ o yiŋnim’ zaa daa niŋ ti Duuma yɛda ka Kɔrintinim’ pam bɛn daa wum Pool yɛligu maa gba daa niŋ yɛda ka deei kom baptaizibu.

9Ka Pool daa ti nya ʒii yuŋ ka ti Duuma yɛl’ o di ni, “Di zɔri dabiɛm; kul yihim’ waazu maa ka di shini!

10M be a sani, ka so ku tooi niŋ a shɛli, dama m mali niriba pam tiŋ’ ŋɔ ni.”

11Ka o daa niŋ yuuni ni pirigili nimaani n-wuhiri niriba Naawuni yɛligu.

12Saha shɛli Rom naa ni daa zaŋ Gallio leei Akaianim’ gomna la, ka Yɛhudianim’ daa niŋ naŋgban’ yini n-chaŋ ti gbaai Pool n-vo o tahi saria karibu shee

13ti yɛra, “Doo ŋɔ wuhirila niriba ni bɛ doli Naawuni zaligu ni bi wuhi shɛm n-jɛmdi Naawuni.”

14Pool ni daa kul yɛn yaag’ o noli saha shɛli ka Gallio dii yɛli ba, “Yinim’ Yɛhudianim’ ŋɔ, di yi di nyɛla tuun’ gala bee tuumbiɛ’ shɛli ka o tum ka yi tah’ o ŋɔ na, n naan wum yi yɛtɔɣa maa.

15Amaa di ni kul nyɛla yɛtɔɣa mini yuya ni yimaŋmaŋ’ zaligu yɛla ŋɔ zuɣu, n ku di di saria. Yimaŋmaŋ’ malimiya li!”

16Ka daa kari ba yihi.

17Di saha ka bɛ zaa daa gbaai Sɔstɛniiz ŋun daa nyɛ Yɛhudianim’ jɛmbu duu zuɣulan’ la m-bu o saria karibu duu maa dunol’ ni. Ka Gallio bi gbiligi lihi ba gba.

18Dimbɔŋɔ nyaaŋa ka Pool daa be o mabihi bɛn be Kɔrinti maa sani n-yuui pam, ka daa naanyi ti chɛbisi ba ka kpe ŋariŋ chaŋ Siria; ka Akuila mini Prisila gba daa dol’ o chaŋ. Ka Pool daa ti pin’ o zuɣu Sɛnkiria, dama o daa pola pɔri.

19Ka bɛ daa ti paai Ɛfɛsus, ka Pool chɛ Akuila mini Prisila ka chaŋ Yɛhudianim’ jɛmbu duu ni o mini ba ti tɔɣisi Naawuni yɛla.

20Ka bɛ daa bɔri ni o kpalim n-niŋ daba ayi bɛ sani, ka o daa bi saɣi

21amaa ka chɛbisi ba ka yɛli, “Naawuni yi saɣi, n ni lan lab’ yi sanna yaha;” ka daa yiɣisi kpe ŋariŋ chaŋ.

22O ni daa ti paai Siizaria o daa chaŋla Jɛrusalɛm nti puhi Yisa nyaandoliba bɛn be nimaani ka naanyi gari chaŋ Antiɔk.

23Ka o daa niŋ nimaani daba ayi, ka daa ti yiɣisi n-chani gindi Galɛshia mini Firijia tiŋgbana ni n-kpaŋsiri Yisa nyaandoliba zaa suhuri.

24Yɛhudia ninvuɣ’ so ŋun daa nyɛ Alikizandria tiŋbia ka o yuli booni Apolɔs daa ti ka Ɛfɛsus na. O daa nyɛla zilinvaliŋgalana, ka lan nyɛ ŋun mi Naawuni Kundi viɛnyɛliŋga.

25Doo ŋɔ daa bɔhim ti Duuma soli yɛla pam. O ni daa jɛmdi Naawuni ni o suhu zaa zuɣu ka o daa tɔɣisiri ka wuhiri Yisa yɛla viɛnyɛliŋga, amaa kulla Jɔn Baptaizira kom baptaizibu la yɛla kɔŋko ka o daa mi.

26Ka o daa chaŋ Yɛhudianim’ jɛmbu duu nti gbaai Naawuni yɛla tɔɣisibu ni suhukpeeni; ka Akuila mini Prisila daa wum o wuhibu maa, ka zaŋ o ti maan wuh’ o Naawuni yɛla viɛnyɛliŋga pahi.

27Ka Apolɔs daa ti bɔri ni o chaŋ Akaia, ka Ɛfɛsus yɛdaniŋdib’ daa kpaŋs’ o suhu ka sab’ gbaŋ ti Yisa nyaandoliba bɛn be Akaia maa n-yɛli ba ni o yi kana bɛn’ deem’ o. O ni daa paai nimaani o daa sɔŋ ninvuɣ shɛb’ bɛn pun niŋ yɛda Naawuni daalibarika zuɣu la pam.

28Naawuni yiko ni o daa tɔɣisi luhi Yɛhudianima niriba ni, ka daa zaŋ Naawuni Kundi n-kahigiri wuhiri niriba ni Yisa shiri nyɛla Masia.

← Chapter 17 Jump to: Chapter 19 →