Acts 28

Dagbani Bible (Naawuni Kundi Kasi)

← Chapter 27 Jump to:

1Ti ni daa du duli tiligi maa, ka tiŋ’ maa nim’ yɛl’ ti ni bɛ ya maa yuli m-booni Malta.

2Ka bɛ daa puhi ti ni ti paabuna ka niŋ ti nirilim pam, dama bɛ daa malila buɣim ti ti saa ni daa miri ka wari beni zuɣu.

3Ka Pool daa laɣisi dagansi na ti pa buɣim maa ni, ka gariŋga yi dari maa ni na buɣim maa tulim zuɣu n-kaai vil’ o nuu.

4Ka tiŋ’ maa nim’ daa nya gariŋga maa ni kaai vil’ o nuu maa ka yɛli taba, “Biɛhiŋ kani, doo ŋɔ nyɛla ninvuɣ’ kura; hal’ o ni tiligi kom dibu ni teeku ŋɔ ni maa zaa yoli, biɛr’ bɔhibu na kul bi saɣi ni o be.”

5Ka Pool daa mihigi gariŋga maa bahi buɣim maa ni, ka bi wum biɛrim damli.

6Ka tiŋ’ maa nim’ daa lihir’ o ka tɛhiri ni o nuu maa ni mɔri bee ni o ni yiɣi lu n-kpi; amaa bɛ ni daa lih’ o yuui nti nya ka shɛli bi niŋ o maa, ka bɛ daa lan taɣ’ zilinli yɛli ni o nyɛla buɣili.

7Tiŋ’ maa ni yulilaan’ so ŋun yuli daa booni Pubilius ka o puri do m-miri nimaani la n-daa deei ti kpɛhi o yiŋa n-niŋ ti saani dabisi’ muna ata.

8Ka pumahigu mini niŋgbun duɣili daa ti gbaag’ o ba, ka Pool daa kpe nti kaag’ o ka zaŋ o nuhi pa o zuɣu n-suhi Naawuni ti o ka o kpaŋ zaa.

9Lala ni daa niŋ maa ka nimaani ŋunkam mali dɔro ka Pool sanna ti nya bɛ dɔriti maa tib’ kpaŋ.

10Ka bɛ daa tahi pina pam na nti ti ti. Ka ti daa ti yɛn yiɣisi nimaani kpe ŋariŋ chaŋ, ka bɛ zaŋ ti ni bɔri shɛlikam niŋ ti ŋariŋ maa ni.

11Di chira ata nyaaŋa ka ti daa ti kpe Alikizandria ŋariŋ shɛli din dalinli daa nyɛ bɛ buɣijahi ŋmahinli la. Di daa kpalim ʒe nimaani la kikaa saha zaa.

12Ka ti daa ti paai Sirakus n-zani nimaani niŋ daba ata.

13Ti ni daa ti yiɣisi nimaani ti daa dolila so’ gɔŋ ti paai Rijium n-daa yi biɛɣu ka nudirigu polo pɔhim din daa sɔŋ ti pam yiɣisi ʒiɛra. Di daba ayi dali ka ti daa paai Putioli

14Ka ti daa ti nya ti nyaandolitab’ nimaani, ka bɛ yɛli ti ni ti kpalimmi bɛ sani niŋ daba ayopɔin. Ka ti daa ti yi nimaani chani Rom,

15ka ti nyaandolitab’ bɛn be Rom daa wum ti damli ka kana hal ti paai luɣ’ shɛŋa din daa booni Apius Daa mini Yilikpɛra Ata la shee ni bɛ tuhi ti soli. Pool ni daa nya ba, ka o suhu kpaŋ ka o paɣiri Naawuni.

16Ti ni daa paai Rom ka bɛ chɛ ka Pool bo o dahalali duu beni, ka bɛ daa bo tɔbbi’ so nti zali nimaani ka o gul’ o.

17Di daba ata dali ka Pool daa boli Yɛhudianim’ kpamba bɛn be Rom. Bɛ ni daa ti laɣimna ka o yɛli ba, “M mabihi, n daa bi tum so taali bee n-tum birigi ti yaannim’ kaya soli, amaa ka bɛ daa yaɣi dimbɔŋɔnim’ zaa zuɣu gbaai ma Jɛrusalɛm n-zaŋ ma niŋ Romnim’ nuu ni.

18Bɛ ni daa vihi ma bɛ daa loya ni bɛ bahi ma, dama bɛ daa bi nya ka n tum taal’ shɛli din simdi kum.

19Amaa ka Yɛhudianim’ daa bi saɣi lala, dina n-daa chɛ ka di kpama talahi ni n yɛli ni n ni zaŋ yɛtɔɣa maa ka Naa Siiza sanna. Di mi pala n kamina ni n ti fiɣisi mmaŋmaŋ’ zuliya.

20Di zuɣu ka m boli ya na ni n ti nyan ya ka m mini ya tɔɣisi, dama Izraɛlnim’ zaa ni mali tahima shɛl’ la zuɣu ka bɛ lo ma zoligo ŋɔ.”

21Ka bɛ yɛl’ o, “Bɛn be Judia tiŋgbɔŋ ni bi sab’ gbaŋ yɛl’ ti a yɛla, ka ti mabi’ shɛb’ bɛn mi ka ya ŋɔ na bi tɔɣisi a zaɣ’ biɛ’ shɛli yɛla ti sani.

22Amaa ti bɔri ni ti bahi wum din be a sani, dama ti mi ni adiini so’ shɛli a ni doli ŋɔ, niriba kul tɔɣisiri galindi li mi luɣ’ shɛlikam zaa.”

23Ka bɛ daa zali dabisili ni bɛ ti labi o sanna, ka niriba pam daa laɣim o yilikpɛrili maa ni na, ka o gbaai ba wuhibu biɛɣ’ asiba hal ti paai zaawuni. O daa wuhiri ba la Naawuni nam yɛla; ka daa zaŋ Anabi Musa min’ anabinim’ ni daa wuhi Yisa ni nyɛ so yɛla la wuhiri ba, ka kpaŋd’ omaŋa ni o chɛ ka bɛ niŋ li yɛda.

24Ka shɛb’ daa niŋ o ni yɛli shɛm maa yɛda, ka bɛn kpalim mi biɛhim li.

25Ka bɛ noya daa wol’ taba, ka Pool tɔɣisi ba yɛtɔɣa din bahindi nyaaŋa ŋɔ ka bɛ naanyi wurim. Pool daa yɛli ba mi, “Naawuni Shia Kasi ni daa chɛ ka Anabi Aizaia yɛli ti yaannim’ shɛm la shiri nyɛla yɛlimaŋli. Anabi Aizaia daa yɛliya ni Naawuni yɛliya,

26‘Cham’ niriba ŋɔ sani ti yɛli ba: Yi ni wum m-maan lab’ wum, amaa ka ku baŋ yi ni wum shɛli maa gbinni. Yi ni nya m-maan lab’ nya, amaa ka ku baŋ yi ni nya shɛli maa.

27Dama niriba ŋɔ leela suhutunanima. Bɛ ŋari bɛ tiba ni di chɛ ka bɛ ku wum. Bɛ pɔb’ bɛ nina ni di chɛ ka bɛ ku nya. Di yi pa lala, bɛ nina ni nya, ka bɛ tiba wum, ka bɛ baŋ bɛ suhuri ni, ka ŋmaligi labi n sanna, ka n tib’ ba.’

28“Dinzuɣu baŋmiya ni Naawuni pun tahi tiliginsim yɛligu ŋɔ bɛn pa Yɛhudianim’ sani, ka bɛ mi nyɛla bɛn ni wum li.” [

29O ni daa tɔɣisi yɛtɔɣa ŋɔ naai, ka Yɛhudianim’ maa daa yiɣisi yi n-chaŋ ha ti ŋmɛri tab’ naŋgbankpeeni.]

30Ka Pool daa be yil’ shɛl’ ni o ni daa haayi duu la yuun’ muna ayi. Ka o daa kul tiri sokam bɛn kan’ o sanna soli ka bɛ nyar’ o.

31Ka o daa yihiri ba Naawuni nam yɛla waazu, ka wuhiri ba ti Duuma Yisa Masia yɛla palɔni, ka so daa bi kar’ o lala niŋbu ni.

← Chapter 27 Jump to: