Acts 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Saha shɛli Yisa nyaandoliba kalinli ni daa ti kul zoori pahiri biɛɣukam la, ka bɛ ni Yɛhudianim’ bɛn wumdi Giriikili daa ti ŋumdi bɛ kparima ni niŋdi Yɛhudianim’ bɛn nyɛ Jɛrusalɛm tiŋbihi la. Bɛ pakoya ni daa bi nyari bɛ ni pirigiri bindir’ shɛŋa tiri ba sahakam la zuɣu ka bɛ daa mɔhiri vuri maa.

2Ka Yisa tuumba pinaayi la daa boli Yisa nyaandol’ bɔbili maa na ti yɛli ba, “Di bi simdi ni tinim’ chɛ Naawuni yɛligu tɔɣisibu ka kpalim bindira taribu ni.

3Dinzuɣu ti mabihi, piimiya yi ni niriba ayopɔin shɛb’ Shia Kasi ni pali, ka bɛ mali shɛhira suma ka lan mali yɛm pam, ka ti chɛ ka bɛ su tuma ŋɔ fukumsi;

4amaa tinim’ ni zaŋ ti dahima zaa n-niŋla Naawuni suhibu min’ o yɛligu tɔɣisibu tuma ni.”

5Ka tuumba maa ni daa yɛli shɛm maa tiɣi salo maa zaa nini, ka bɛ daa pii Stiivin ŋun mali yɛda pam ka Shia Kasi pal’ o la mini Filip ni Prokɔrus ni Nikano ni Timɔn ni Parimɛnas ni Nikolaus ŋun daa nyɛ Antiɔk nira ka daa chɛ o chɛfiritali soli ka doli Yɛhudianim’ daadiini sol’ la

6n-zaŋ ba zali tuumba maa tooni, ka bɛ zaŋ bɛ nuhi pa bɛ zuɣu suhi Naawuni ti ba.

7Ka Naawuni yɛligu daa maan chaŋ tooni, ka nyaandoliba maa kalinli daa zooi pahi Jɛrusalɛm puuni hal ka maligumaaniba pam gba daa niŋ Yisa yɛda.

8Ka Naawuni daalibarika min’ o yiko daa pali Stiivin ka o tumd’ alahiziba tumtumsa ka wuhiri shihira pam niriba maa ni.

9Yɛhudianim’ daa mal’ adiini jɛmbu du’ shɛli bɛ ni daa booni Bilichinnim’ jɛmbu duu. Di ni niriba bɛn daa nyɛ Yɛhudianima n-yi Sairiini mini Alikizandria ni bɛn daa yi Kilikia ni Ɛsha na n-daa laɣim ŋmɛri Stiivin naŋgbankpeeni;

10amaa bɛ daa bi tooi tɔɣisi luh’ o, dama o daa tɔɣisirimi ni yɛm mini Naawuni Shia Kasi yiko.

11Dina n-daa chɛ ka bɛ bo niriba ashilɔni n-yɛli ba ni bɛ yɛlim’ ni bɛ wum ka Stiivin turi Anabi Musa ka mɔri Naawuni.

12Lala ka bɛ daa niŋ yiɣisi niriba mini bɛ kpamba ni Naawuni zaligubaŋdiba suhuri, ka bɛ daa kabina nti gbaai Stiivin tahi jintɔriba sani,

13ka zaŋ ʒiri shɛhiranim’ maa na ka bɛ ti yɛli, “Doo ŋɔ kul galindila Naawuni jɛmbu duu luɣ’ shɛli din be kasi shee la mini Anabi Musa zaligu;

14dama ti wum ka o yɛli ni Yisa Nazarɛt nir’ la ni wurim Naawuni jɛmbu duu maa, ka taɣi ka’ shɛŋa Anabi Musa ni daa zali ni ti dol’ la.”

15Ka bɛn daa ʒi nimaani maa zaa mirigi bɛ nina kpa o, ka nya o ninni ka di ŋmanila malaika ninni.

← Chapter 5 Jump to: Chapter 7 →