Acts 22

Dagbani Bible (Naawuni Kundi Kasi)

← Chapter 21 Jump to: Chapter 23 →

1“M banima mini m mabihi, wummiya n ni yɛn yɛli shɛm zabi mmaŋ’ zuɣu ŋɔ.”

2Bɛ ni daa wum ka o tɔɣisiri ba Hiburuli ni maa ka bɛ maan fo baalim; di saha ka o yɛli,

3N nyɛla Yɛhudia nira. Bɛ dɔɣi ma la Taasus, Kilikia tiŋgbɔŋ ni, amaa n zoola Gamaliɛl sani ya ŋɔ; ka bɔhim n yaannim’ zaligunim’ mini bɛ kaya yɛla o sani, ka n suhu ye Naawuni zuɣu kaman yi zaa ni niŋdi shɛm pumpɔŋɔ ŋɔ.

4N daa niŋ bɛn doli soli ŋɔ alaka, hal ka chɛ ka bɛ ku bɛ shɛba, ka chɛ ka bɛ lo bɛ shɛb’ bɛn nyɛ dɔbba mini paɣiba mihi kpɛhi duu.

5Hal maligumaaniba zuɣulana mini ya ŋɔ jintɔriba zaa ni tooi di ma shɛhira, dama bɛ sani ka n daa deei gbana n-chani ni n ti ti bɛ mabihi bɛn be Damaskus la, ka gbahi bɛn doli soli ŋɔ n-lo ba mihi tahi Jɛrusalɛm ŋɔ na ka bɛ ti darigi bɛ tiba.

6Pool daa lan yɛli, “Amaa n ni daa ti be soli chana nti miriti Damaskus kaman wuntaŋ’ zuɣusaa saha ka neesim titali daa ti dii yi zuɣusaa na ti neei gili ma.

7Ka n lu tiŋa ka wum kukol’ shɛli damli ka di booni ma yɛra, ‘Sool, Sool, bɔ n-niŋ ka a niŋdi ma alaka?’

8Ka n garigi bɔhi, ‘Ŋuni n-lee bala, n Duuma?’ Ka o yɛli ma, ‘Man’ Yisa Nazarɛt nira ŋun nyɛ a ni niŋdi so alaka maa m-bala.’

9Bɛn daa be n sani daa nya neesim maa, amaa ka lee bi wum kukoli maa ni yɛli ma shɛm maa.

10Ka n yɛli, ‘N Duuma, ka wula ka n lee yɛn niŋ?’ Ka n Duuma yɛli ma, ‘Yiɣisim’ bahi paai Damaskus tiŋ’ puuni, nimaani ka bɛ ni ti wuh’ a n ni zal’ a ni a niŋ shɛm.’

11Ka neesim maa nyaɣisibu zuɣu daa chɛ ka m bi lan ne, ka bɛ daa gbaala n nuu ni n-vo ma tahi Damaskus.

12“Do’ so ŋun yuli daa booni Ananias ka o nyɛ wuntizɔra kaman Naawuni zaligu ni wuhi shɛm la daa nyɛla ŋun mali yu’ suŋ nimaani Yɛhudianim’ zaa sani.

13Ŋuna n-daa ka n sanna nti zani baɣili ma ka yɛli, ‘M mabia Sool, a nina maa neema!’ Ka n nina naa daa dii neei di saha maa, ka n nya o.

14Ka o yɛli ma, ‘Ti yaannim’ Naawuni m-piig’ a ni a baŋ o yubu ka nya ŋun nyɛ yɛlimaŋlilana n-wum o nol’ ni yɛligu;

15dama a ni nya ka wum shɛli ŋɔ zuɣu a ni niŋ o shɛhiralana sokam zaa sani.’

16O ni daa yɛl’ lala maa ka ŋmaligi bɔhi ma, ‘Dinzuɣu bɔ ka a lee lan guhira? Yiɣisima n-deei kom baptaizibu ka kuhi boli ti Duuma yuli ka a daalahichi kpihim.’ ”

17Pool daa lan yɛli, “N ni daa ti lab’ Jɛrusalɛm na nti be Naawuni jɛmbu duu suhiri Naawuni saha shɛli

18ka n daa ti nya ʒii ka n Duuma yɛli ma, ‘Zom’ yom yi Jɛrusalɛm, dama bɛ ku deeg’ a shɛhira zaŋ chaŋ m polo.’

19Ka n yɛli, ‘N Duuma, bɛ zaa mi ni n daa kpe Yɛhudianim’ jɛmbu duu kam ni nti gbahi ninvuɣ’ shɛb’ bɛn niŋ a yɛda m-bu ba ka kpɛhi ba duu.

20Bɛ ni daa ti ku a dabili Stiivin la, n gba daa be bɛ ni ka yu o kubu maa, ka daa gbib’ bɛn ku o maa binyɛra.’

21Ka n Duuma yɛli ma, ‘Kul yim’ chaŋ, dama n yɛn tim a la katiŋ’ ha bɛn pa Yɛhudianim’ sani.’ ”

22Salo maa ni daa wum Pool yɛtɔɣa maa viɛnyɛliŋga hal ti paai o ni yoli yɛli shɛm ŋɔ ka bɛ duhi bɛ yee yɛra, “Kumiy’ o! Kumiy’ o! Dama nira ŋ-ŋɔ tatabo bi simdi ni o be.”

23Bɛ ni daa kuhiri yɛri lala maa ka bɛ mali bɛ binyɛra gahiri ka toori taŋkpaɣu yaɣindi zuɣusaa.

24Ka sapashin’ kpɛm’ maa daa yɛli ni bɛ zaŋm’ o kpɛhi tɔbbihi biɛhigu shee ka bɛ ti fiɛb’ o n-vih’ o baŋ din chɛ ka niriba maa tahiri pampam o zuɣu maa.

25Bɛ ni daa zaŋ gbantolima lo Pool naai ka o bɔhi sapashin’ so ŋun daa ʒe nimaani, “Di luhiya ni yi fiɛbi Rom tiŋbia ka na bi kar’ o saria ŋ-ŋmaag’ o yɛtɔɣa?”

26Sapashini maa ni daa wum Pool ni yɛli shɛm maa ka o chaŋ ti bɔhi sapashin’ kpɛm’ la, “Tuun’ bɔ ka a lee yɛn tum ŋɔ? Doo maa nyɛla Rom tiŋbia!”

27Di saha maa ka sapashin’ kpɛm’ maa daa chaŋ ti bɔhi Pool, “Yɛlim’ ma, a shiri nyɛla Rom tiŋbia?” Ka Pool saɣi, “Iin!”

28Ka sapashin’ kpɛm’ maa yɛl’ o, “N daa yihila liɣiri pam da Rom tiŋbitali.” Ka Pool yɛl’ o, “Bɛ kul dɔɣila mani Rom tiŋbia.”

29Di saha ka bɛn daa yɛn vih’ o maa dii yiɣis’ o sani yi; ka dabiɛm daa kpe sapashin’ kpɛm’ maa gba o ni daa baŋ ni Pool nyɛla Rom tiŋbia ka o lo o zoligɔnim’ lala maa zuɣu.

30Ka biɛɣu daa neei ka sapashin’ kpɛm’ maa bɔri ni o baŋ daliri din chɛ ka Yɛhudianim’ zaŋ o taali n-fiɣis’ o maa, ka daa lɔrig’ o ka tim ti boli maligumaaniba kpamba mini jintɔriba zaa ni bɛ laɣimna. Di saha ka o daa zaŋ Pool ti zali bɛ tooni.

← Chapter 21 Jump to: Chapter 23 →