Daniel 12

Dagbani Bible (Naawuni Kundi Kasi)

← Chapter 11 Jump to:

1Di saha maa Maikil ŋun nyɛ malaika nabi’ titali ka nyɛ ŋun gul’ a niriba la ni ti yi palo. Muɣisigu shɛli din tatabo na ʒi n-niŋ tum zuliya kam piligu ni ha la nti yɛn niŋ di saha maa. Amaa di saha maa a zuliya niriba bɛn zaa yuya sabi Naawuni litaafi ni la ni ti tiligi.

2Ka niriba pam bɛn pun kpi la ni ti neei kum ni, ka bɛ ni shɛb’ ti nya nyɛvili din ka bahigu, ka shɛb’ mi ti di vi din ka bahigu.

3Ka baŋdiba bɛn be bɛ ni la ni ti nyɛlisira, ka ne kaman sagban’ piɛla la. Ka bɛn mi nyɛ bɛn daa wuhi niriba pam din tuhi la ti ne kaman saŋmarisi la hal ni saha din ka bahigu.

4Ka o daa lan yɛli ma, “Nyin’ Daniɛl, pumpɔŋɔ kpabimi litaafi maa, ka zaŋ bintabinda n-dihi tabili li sɔŋ hal ti paai saha tariga. Amaa niriba pam ni ti zɔri ginda, ka baŋsim ti yɛligiri pahira.”

5Di saha ka n daa nya niriba ayi ka bɛ ʒe m-baɣi mɔɣili, yino daa ʒɛla yaɣ’ yini polo, ka ŋun’ la mi ʒe yaɣ’ din’ la polo.

6Ka bɛ ni yino daa bɔhi malaika so ŋun daa be kozɔrim maa zuɣusaa polo la, “Saha yuusim wula puuni ka alahiziba yɛla ŋɔ tariga yɛn paai?”

7Ka malaika so ŋun daa ye binyɛr’ piɛlli din mal’ shaara m-be kozɔrim maa zuɣusaa polo la daa kpuɣ’ o nuh’ ayi zuɣusaa, ka po Naawuni ŋun nyɛ saha din ka bahigu Naawuni ŋɔ yuli. Ka n daa wum ka o yɛli, “Di yuusim yɛn nyɛla yuma ata ni pirigili. Zaŋ chaŋ wuntizɔriba alaka niŋbu la ti yɛn naai, ka dimbɔŋɔnim’ zaa ha gba pun niŋ.”

8N daa wum o ni yɛli shɛm maa, amaa ka n lee bi baŋ di gbinni. Di zuɣu ka n daa bɔh’ o, “Ndana, ka wula ka di zaa ti yɛn bahindi?”

9Ka o garigi yɛli ma, “Daniɛl, cham’ a chandi shee pumpɔŋɔ, dama yɛla ŋɔ nyɛla din yɛn be ashilɔni n-sɔɣiya hal ti paai saha tariga.

10Niriba pam ni ti mali bɛmaŋa m-be kasi. Ninvuɣ’ shɛb’ bɛn nyɛ ninvuɣ’ biɛri bɛn’ ti ku baŋ di ni nyɛ shɛm, amaa ka kul ni kpalim bela ninvuɣubiɛtali maa tuma ni. Naɣila bɛn mali yɛm kɔŋko n-ni ti baŋ di ni nyɛ shɛm.

11“Zaŋ chaŋ bɛ ti yɛn kari dabisili kam sara maligu la, ka zaŋ din nyɛ chihi’ biɛɣu la zali di zaani la, di dabisa ti yɛn nyɛla biɛɣ’ tuhili ni kɔbisiyi ni pihiwɛi.

12Ka bɛnkam ʒe yim hal ti paai biɛɣ’ tuhili ni kɔbisita ni pihitanaanu la tariga mal’ alibarika!

13“Amaa nyin’ Daniɛl, kul ʒe yim hal ni di bahigu ni. A ni ti vuhi, ka ni ti zani a zaashee zaadali.”

← Chapter 11 Jump to: