bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Dagbani
/
Dagbani Bible (Naawuni Kundi Kasi)
/
Daniel 5
Daniel 5
Dagbani Bible (Naawuni Kundi Kasi)
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
1
Dahin shɛli ka Naa Bɛlishaaza daa ti laɣim o kpambaliba tuhili na ni bɛ ti puhi chu’ titali ka nyu wain.
2
Naa Bɛlishaaza ni daa ti kul lam wain maa saha shɛli ka o yɛli ni bɛ cham’ ti zaŋ salima min’ anzinfa pipihi ni la’ shɛŋa o ba Nɛbukadnɛza ni daa kpuɣi Jɛrusalɛm Naawuni jɛmbu duu la na; ka ŋun’ naa min’ o kpambaliba ni o paɣiba ni o mamanim’ ti zaŋ li nyu wain.
3
Ka bɛ daa dii chaŋ ti zaŋ salima min’ anzinfa pipihi ni la’ shɛŋa bɛ ni daa kpuɣi Jɛrusalɛm Naawuni jɛmbu duu na maa, ka naa min’ o kpambaliba ni o paɣiba ni o mamanim’ ti mal’ li nyuri wain maa;
4
ka paɣiri bɛ wuna din nyɛ bɛ ni zaŋ salima min’ anzinfa ni daanya ni kuriti ni dari ni kuɣa mali shɛŋa.
5
Bɛ nini nyabu yim ka ninsal’ nuchee daa ti puhi yina n-sabiri sabbu shɛli pari nayili maa dukpini zuɣu m-miri firila ni ʒe luɣ’ shɛli polo ne viɛnyɛliŋga. Ka naa maa daa nya nuchee maa ni sabiri sabbu maa,
6
ka o ninni biɛhigu daa taɣi, ka di muɣis’ o pam hal ka o kɔba ni ti dii chɔɣisichɔɣisi, ka o duna ŋmɛri taba.
7
Ka naa maa daa kuhi pam yɛli ni bɛ cham’ ti zaŋ saŋmaribaŋdiba mini Kalidianim’ ni laasabuniŋdiba na. Ka bɛ daa kana, ka naa maa ti yɛli ba, “Ŋun ni tooi karim sabbu ŋɔ ka wuhi ma di gbinni, n ni yɛl’ o ago kparibu, ka bo salima dolibi din mali jilima n-yɛl’ o pahi, ka o leei naa ŋun pah’ ata n nam sulinsi ŋɔ ni.”
8
Ka naa maa baŋdiba daa kana ti zani, amaa ka so daa ka bɛ ni ŋun ni tooi karim sabbu maa bee n-wuhi di gbinni.
9
Ka suhusaɣiŋgu zuɣu daa chɛ ka Naa Bɛlishaaza ninni biɛhigu maan taɣi pahi, ka o kpambaliba bi lan mi bɛ ni yɛn gbaai shɛm.
10
Ka napaɣ’ kuro daa wum naa min’ o kpambaliba ni tɔɣisiri yɛlli maa yɛla ka kpe bɛ chuɣu puhibu duu maa ni na ti yɛli, “ Naa, Naawuni dolim’ a nyɛvili! Di chɛ ka yɛla maa muɣis’ a ti yaɣi, ka a chɛ ka a ninni biɛhigu taɣi.
11
Do’ so be a tiŋgbɔŋ ŋɔ ni ka wun’ shɛb’ bɛn be kasi shia be o ni. A ba ni daa nyɛ naa saha shɛl’ la, doo maa daa wuhi neesim mini baŋsim ni yɛm din ŋmani wuna yɛm. Ka a ba Naa Nɛbukadnɛza daa zaŋ o leei timanim’ mini saŋmaribaŋdiba ni Kalidianim’ ni laasabuniŋdiba zuɣulana.
12
Yɛm mini baŋsim din chɛ ka o tooi kahigiri zahima mini yɛliŋaha ni yɛlimuɣisira wuhiri niriba shia be o ni. Dinzuɣu timmi ti boli Daniɛl ŋun nyɛ naa ni daa boli so Bɛlitishaaza la na, ka o ti wuh’ a yɛla ŋɔ zaa gbinni.”
13
Ka bɛ daa chaŋ ti zaŋ Daniɛl ka naa sanna ka naa maa ti bɔh’ o, “Nyini n-nyɛ m ba Naa Nɛbukadnɛza ni daa ʒi dab’ shɛba yi Juda tiŋgbɔŋ ni la na yino, ka a yuli booni Daniɛl la?
14
N wumiya ni wun’ shɛb’ bɛn be kasi shia be a ni, ka a mali ninneesim mini baŋsim ni yɛm.
15
Bɛ pun zaŋ baŋdiba mini saŋmaribaŋdiba n-ka n sanna ni bɛ ti karim sabbu ŋɔ, ka wuhi ma di gbinni, amaa ka bɛ bi tooi baŋ di gbinni.
16
To, n wumiya ni nyin’ tooi baŋdi yɛl’ shɛŋa din gbinni be ashilɔni, ka tooi lan kahigiri ashiya gbinni ni nyɛ shɛm wuhiri niriba. Ka a yi ni tooi karim sabbu ŋɔ ka wuhi ma di gbinni, n ni yɛl’ a ago kparibu, ka bo salima dolibi din mali jilima yɛl’ a pahi, ka a leei naa ŋun pah’ ata n nam sulinsi ŋɔ ni.”
17
Ka Daniɛl daa yɛli naa maa, “Mal’ a pina maa bee zaŋmi li ti so. Amaa n ni karim sabbu maa, ka wuhi nyin’ naa di gbinni.
18
“Naawuni ŋun nyɛ Zallakudura Naa ŋɔ n-daa zaŋ a ba Nɛbukadnɛza leei na’ titali, ka ti o di viɛlim mini di tibiginsim ni di jilima.
19
O daa nyɛla na’ titali hal ka zuliya kam mini niriba balibu kam ni tinzun’ yɛtɔɣa balibu kam nim’ zɔr’ o ka bɛ ni sɔhira. O daa yi bɔri ni o ku so, o kur’ o mi; ka o mi daa yi bɔri ni o chɛ so, o chɛr’ o mi. O daa yi bɔri ni o ti so jilima, o tir’ o mi, ka o mi daa yi bɔri ni o dihi so vi, o dihir’ o mi.
20
Amaa o ni daa duh’ omaŋa ka niŋ karimbaani, ka mali hali yoli ni ninkuunsi la zuɣu ka Naawuni daa vuug’ o o nam ʒiishee, ka o kɔŋ o jilima zaashee maa.
21
Ka bɛ daa kar’ o yihi ninsalinim’ sani, ka o tɛha daa leei biŋkɔbigu tɛha; ka o mini mɔɣu ni bunsi daa laɣim be, ka o ŋubiri mɔri kaman nahu la, ka maligim lur’ o zuɣu. Di nyaaŋa ka o daa ti baŋ ni Naawuni ŋun nyɛ Zallakudura Naa ŋɔ n-su ninsalinim’ nama, ka zaŋdi li tir’ o ni bɔri so.
22
“Ka nyin’ Bɛlishaaza ŋun nyɛ o bia ŋɔ mi dimbɔŋɔnim’ zaa yɛla, amaa ka bi siɣis’ amaŋa.
23
A tum din chihiri alizanda Duuma sani, dama a zaŋ pipihi mini la’ shɛŋa bɛ ni daa kpuɣ’ o jɛmbu duu la na ka a min’ a kpambaliba ni a paɣiba ni a mamanim’ ti mal’ li nyuri wain ka paɣiri wuna din nyɛ bɛ ni zaŋ salima min’ anzinfa ni daanya ni kuriti ni dari ni kuɣa mali, ka di nyɛ din ku tooi nya bee n-wum, ka mi ʒi shɛl’ ŋɔ. Amaa ka a lee bi ti Naawuni ŋun ni tooi yuri ka chɛ ka a be bee n-kpi, ka lan nyɛ ŋun su a ni niŋdi shɛlikam yiko ŋɔ jilima.
24
Dinzuɣu ka Naawuni chɛ ka nuchee ŋɔ puhi yina ti sab’ sabbu ŋɔ.
25
“Sabbu maa ni nyɛ shɛm m-bɔŋɔ: MENE, MENE, TƐKƐL UFARISIN
26
Di gbinni ni nyɛ shɛm m-bɔŋɔ: MENE gbinni nyɛla Naawuni pun kali a nam dabisa m-paai di tariga.
27
TƐKƐL gbinni nyɛla, Naawuni zaŋ a pa sania zuɣu n-zahim’ a ka a tibisim pɔra.
28
UFARISIN gbinni nyɛla, Naawuni pirigi a nam maa n-ti Miidianim’ mini Pɛriʒianima.”
29
Di saha ka Bɛlishaaza daa chɛ ka bɛ zaŋ’ ago kparibu na ti yɛli Daniɛl, ka bo salima dolibi din mali jilima na ti yɛl’ o pahi, ka chɛ ka o leei naa ŋun pah’ ata o nam sulinsi maa ni.
30
Kulla dindali maa yuŋ ka bɛ daa ku Bɛlishaaza ŋun daa nyɛ Babilɔnnim’ naa maa.
31
Ka Darius ŋun daa nyɛ Miidia nira, ka nyɛ yuun’ pihiyɔbunaayi nir’ la daa deei nam maa di.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 6 →
All chapters:
1
2
3
4
5
6
7
8
9
10
11
12