Daniel 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Naa Darius daa pii kpambaliba kɔbiga ni pisi zal’ o tiŋgbɔŋ ni tuma zaashɛhi ni.

2Ka o daa lan pii Daniɛl mini niriba ayi shɛba m-pahi ni bɛ lihiri kpambaliba maa ka bɛ tumdi ŋun’ naa maa tuma ka di mali nyɔri.

3Di daa bi yuui ka Daniɛl tuma wuhi ni o tumdi tuma maa gar’ o zuɣulaan’ taba niriba ayi la mini kpambaliba la zaa; shi’ suŋ ŋun daa be o ni la zuɣu. Ka Daniɛl biɛhigu ni daa yi di ko maa zuɣu daa chɛ ka naa maa lola nia ni o zaŋ o nam sulinsi tiŋgbɔŋ maa zaa fukumsi niŋ o nuu ni.

4Di saha ka zuɣulaannima ayi la mini kpambaliba la daa lo nia m-bɔri ni bɛ nya Daniɛl taali o ni tumdi tiŋgbɔŋ maa tuma shɛm puuni, amaa ka bi tooi. Dama Daniɛl daa nyɛla ŋun ʒe yim o suhu ni, ka bi tumdi din nyɛ chirimbu bee bilikɔnsi tuma.

5Ka bɛ daa lan yɛl’ taba, “Ti ku nya ti ni yɛn zaŋ yɛl’ shɛli fiɣisi Daniɛl, naɣila zaŋ chaŋ o Naawuni jɛma la polo.”

6Ka zuɣulaannima ayi maa mini kpambaliba la daa naai noli chaŋ naa sani nti yɛl’ o, “Naa Darius, Naawuni dolim’ a nyɛvili.

7Tinim’ zuɣulaannim’ mini kpambaliba ni sapashinnim’ ni jintɔriba zaa bɛn tumdi tuma a nam sulinsi ŋɔ ni n-naai noli yɛli ni a zalimi zaligu din kpɛma, ka chɛ ka di tum tuma. Zaligu maa n-nyɛ ni zaŋ chaŋ biɛɣ’ pihita puuni, so miri ka o suhi shɛli wun’ so sani bee ninsal’ so sani, faashee nyin’ naa kɔŋko sani. Ka so yi tum birigi zaligu maa, bɛn zaŋm’ o ti niŋ gbuɣima bɔɣili ni.

8Naa, dinzuɣu zalim’ zaligu maa, ka dih’ a nuu di gbɔŋ zuɣu; ka chɛ ka di tum tuma. Di mi nyɛla Miidianim’ mini Pɛriʒianim’ zaligu, di bi taɣira.”

9Ka Naa Darius daa dih’ o nuu zaligu gbɔŋ maa zuɣu.

10Daniɛl ni daa baŋ ni naa dih’ o nuu zaligu gbɔŋ maa zuɣu maa, ka o daa kul’ o yiŋa. O yiŋ’ zuɣusaa duu takɔro daa yoori bahila Jɛrusalɛm polo. Ka o daa gbaani suhir’ o Naawuni, ka paɣir’ o siɣimsiɣim buta dahin yini puuni kaman o ni daa yi pun niŋdi shɛm.

11Ka Daniɛl dimnim’ la daa naai noli kana ti nya o ka o suhiri la o Naawuni.

12Ka bɛ zaa daa laɣim chaŋ naa sani ti fiɣisi Daniɛl. Bɛ daa bɔh’ o mi, “Naa, a bi dih’ a nuu zaligu gbɔŋ zuɣu ni zaŋ chaŋ biɛɣ’ pihita puuni, so yi suhi shɛli wuni bee ninsal’ sani ka pa ni a sani, bɛn’ zaŋm’ dilan’ ti bahi gbuɣima bɔɣili ni?” Ka naa maa garigi yɛli, “Iin, hal di nyɛla zaligu kpeeni gba. Di nyɛla Miidianim’ mini Pɛriʒianim’ zaligu, di bi taɣira.”

13Di saha ka bɛ garigi yɛli naa maa, “Daniɛl ŋun nyɛ Juda daba la ni yino la bi lihi nya a bee n-dol’ a ni zali zaligu shɛli maa. O kul suhirila o Naawuni siɣimsiɣim butata dahin yini puuni.”

14Naa maa ni daa wum yɛlli ŋɔ, di daa niŋ o muɣisigu pam, ka o kpaŋ omaŋa m-bɔri soli ni o yihi Daniɛl, ka daa kul be lala nia niŋbu ni hal ka wuntaŋ’ ti lu.

15Ka niriba maa daa lan labina ti yɛl’ o, “Naa, A mi ni Miidianim’ mini Pɛriʒianim’ zaligu shɛŋa naa ni zali ku tooi taɣi.”

16Ka naa maa daa bahi noli ni bɛ cham’ ti gbaai Daniɛl na nti niŋ gbuɣima bɔɣili maa ni. Naa maa daa yɛli Daniɛl, “A ni jɛmd’ a Naawuni so viɛnyɛliŋga maa ni fa a bahi.”

17Ka bɛ daa zaŋ kuɣili na nti yo bɔɣili maa noli, ka naa maa daa zaŋ o min’ o kpambaliba dalinli n-dalim kuɣili maa ni di chɛ ka shɛli ku taɣi zaŋ chaŋ Daniɛl polo.

18Ka naa maa daa ŋmaligi kul’ o yiŋa nti kɔŋ gom dindali maa yuŋ. O daa bi di shɛli bee n-saɣi ka so ŋme biŋkumdi’ shɛli n-niŋ o.

19Ka naa maa daa ti daŋ yibu asibaasi ŋaraŋara saha n-niŋ yomyom chaŋ gbuɣima bɔɣili maa gbini.

20O ni daa paai ni, o daa kuhila fabila kuhigu m-boli Daniɛl bɔh’ o, “Daniɛl, nyin’ ŋun nyɛ Naawuni ŋun be ŋɔ dabili ŋɔ, a Naawuni so a ni jɛmdi viɛnyɛliŋga maa tooi fa a gbuɣima maa nuu ni bahi?”

21Ka Daniɛl daa garigi yɛl’ o, “Naa, Naawuni dolim’ a nyɛvili!

22N Naawuni maa tim o malaika na ka o ti mum gbuɣima maa noya, ka bɛ bi tooi niŋ ma shɛli. Naa, o niŋla lala, dama n ka taali o sani, ka ka taali a gba sani; ka m mi bi tum’ a taal’ shɛli.”

23Ka naa maa suhu daa paligi ti yaɣi, ka o bahi noli ni bɛ yihim’ Daniɛl bɔɣili maa ni na. Ka bɛ daa voog’ o yihi na n-nya ka o bi nya daŋa hal baabiɛla gba, o ni daa niŋ Naawuni yɛda zuɣu.

24Di saha ka naa maa daa bahi noli ni bɛ gbahimi ninvuɣ’ shɛb’ bɛn zaa daa niŋ Daniɛl munaafichi maa na. Ka bɛ daa gbahi bɛ mini bɛ paɣiba ni bɛ bihi na nti zaŋ ba bahi gbuɣima bɔɣili maa ni. Bɛ daa na bi paai bɔɣili maa ni tiŋ’ gba ka gbuɣima maa pun gbahi ba n-kabisikabisi bɛ kɔba zaa.

25Di saha ka Naa Darius daa sab’ gbaŋ ti zuliya kam mini niriba balibu kam ni tinzun’ yɛtɔɣa balibu kam nim’ bɛn be dunia ŋɔ ni yɛli: “Naawuni timi ya suhudoo pam!

26N zali zaligu n nam sulinsi ŋɔ ni zaa ni sokam lum’ Daniɛl Naawuni ŋɔ sizuura. O nyɛla Naawuni ŋun be, ka ni su nam hal ni saha din ka bahigu. O nam maa kul ku saɣim, ka o yiko mi ku mali tariga.

27O tiligiri niriba, ka lan fari niriba bahira; o wuhiri shihira, ka tumd’ alahiziba tumtumsa alizanda ni mini dunia ŋɔ ni. O fa Daniɛl gbuɣima nuu ni bahi.”

28Ka Daniɛl daa kul tɔŋdi pahiri Naa Darius nam ʒiɛman’ ni zaŋ tabili Naa Sairus ŋun daa nyɛ Pɛriʒia nir’ la gba nam ʒiɛman’ ni.

← Chapter 5 Jump to: Chapter 7 →