Daniel 8

Dagbani Bible (Naawuni Kundi Kasi)

← Chapter 7 Jump to: Chapter 9 →

1Naa Bɛlishaaza ni daa di nam zaŋ chaŋ yuma ata saha ka man’ Daniɛl daa nya ʒii din pah’ ayi.

2Ʒii maa nyabu puuni, n daa nya ka m bela Susa nayili tin’ shɛli din be vinvamli ni Ɛlam tiŋgbɔŋ ni la, ka daa lan nya ka n ʒɛla Ulai Mɔɣili noli.

3Ka n daa nya ka piɛlaa ŋun mali yil’ wɔɣila ayi ʒe mɔɣili maa noli. O yila maa zaɣ’ yini daa wɔɣimi gari yin’ la, ka nyɛ din bahindi nyaaŋa yina.

4Ka n daa nya ka Piɛlaa maa kul mal’ o yila maa n-ʒiɛri kpari wulinluhili polo mini nuzaa polo ni nudirigu polo. Ka biŋkɔb’ so daa kani n-ni tooi taɣ’ o zali bee n-zo n-yi o nuu ni tiligi. Piɛlaa maa daa kul tumdila o suhuyubu, ka duhir’ omaŋa.

5N ni daa na kul tɛhiri di yɛla saha shɛli maa, ka bula’ so daa yi wulinluhili polo na n-kul kpaŋ zɔri yomyom hal ka o naba bi shihiri tiŋ’ gba. Ka o daa mali yil’ gahindili ka di sa o nina ayi sunsuuni.

6Ka bulaa maa daa zaŋ kpa piɛla’ so n ni daa nya ka o ʒe mɔɣili nol’ la polo n-daa kab’ chaŋ o sani ni o kpiɔŋ zaa ti bibig’ o.

7Ka n daa nya bulaa maa ni vu m-miri piɛlaa maa shɛm. Bulaa maa suhu daa yiɣisiya pam, ka o ʒe piɛlaa maa hal ti ʒe n-kab’ o yil’ ayi la, ka piɛlaa maa daa lan ka ya’ buriginli din ni tooi niŋ shɛli. Ka bulaa maa daa ʒi o luhi tiŋa n-du n-tam o zuɣu nɔr’ o, ka so kani n-ni tooi fa o o nuu ni bahi.

8Ka bulaa maa daa kul duhir’ omaŋ’ pahira, amaa o ni daa mali kpiɔŋ pam maa ka o yilli la kabi. Ka yila anahi daa bili yina n-zani di zaashee, ka nir’ ni tooi nya li viɛnyɛliŋga, di mi zaa noya daa kpala dunia ŋɔ yaɣa anahi ŋɔ zaa yiniyini polo.

9Ka yilibila daa bili yina tam yila anahi maa zaɣ’ yini zuɣu. Ka di yiko daa yɛligi kpa nudirigu polo mini wulimpuhili polo ni Alikauli Tiŋgbɔŋ la polo.

10Ka di daa niŋ kpiɔŋ hal ti liri la zuɣusaa tɔbbihi, bɛna n-nyɛ saŋmarisi n-daa vooi bɛ shɛb’ bahi tiŋ’ na n-du tam bɛ zuɣu nɔra.

11Hal o daa tɔɣisi yɛtɔɣa m mo alizanda Nabia ŋun lan nyɛ nimaani tɔbbihi zuɣulan’ la gba, ka daa kari dabisili kam sara maligu shɛŋa bɛ ni daa yi zaŋdi na ti maan’ o; ka daag’ o jɛmbu duu luhi.

12Ka niriba daa tumdi alahichi nimaani, ka chɛ dabisili kam sara maligu maŋli malibu, ka bɛ daa daai yɛlimaŋli luhi. Ka yilli maa daa kul diri nasara di ni tumdi shɛlikam ni.

13Di saha maa ka n daa wum ka malaika yino bɔh’ o kpee, “Ti ni lee nya binshɛŋa ʒii ŋɔ puuni ŋɔ yuusim yɛn nyɛla wula? Saha yuusim wula puuni ka dabisili kam sara maligu din nyɛ alahichi ŋɔ kul yɛn maana? Saha yuusim wula puuni ka bɛ lee yɛn du n-tam alizanda ni tɔbbihi mini Naawuni jɛmbu duu zuɣu nɔra?”

14Ka n daa wum ka malaika ŋuni maa garigi yɛli: “Di ni niŋ biɛɣ’ tusaayi ni kɔbisita. Di nyaaŋa ka Naawuni jɛmbu duu maa ni lan lab’ mali zani di zaashee.”

15Man’ Daniɛl ni daa nya ʒii shɛli maa, n daa kul bɔri ni m baŋ di gbinni. N nini nyabu yim ka n daa nya ka so ʒe n tooni ka o kɔtomsi be kaman ninsal kɔtomsi la.

16Ka n daa wum ninvuɣ’ so kukoli ka di yi Ulai Mɔɣili la ni na m-booni yɛra, “Gabirɛl, wuhim’ o o ni nya shɛli maa gbinni.”

17Ka Gabirɛl daa kana ti zani baɣili ma. Ka dabiɛm daa gbaai ma pam, ka n lu n-dɔni tiŋa. Ka o yɛli ma, “Daadam bia, n ni chɛ ka a baŋ di gbinni. Ʒii maa wuhirila dunia ŋɔ bahigu yɛla.”

18O ni daa yɛri ma yɛla maa, ka n daa lu n-dɔni tiŋ tarigi. Amaa ka o daa gbaai ma n-yiɣisi ma zali n naba zuɣu,

19ka yɛli ma, “N ni wuh’ a Naawuni suhuyiɣisili maa tuma ni yɛn nyɛ shɛm. Ʒii maa wuhirila di ni ti yɛn nyɛ shɛm yɛla maa naabu saha.

20“Piɛla’ so a ni daa nya ka o mali yil’ ayi la wuhirila Miidianim’ mini Pɛriʒianim’ nanim’ yɛla.

21Ka bulaa la mi wuhiri Giriis naa yɛla. Ka o yil’ gahindili din daa sa o nina ayi sunsuuni la nyɛla di tuuli naa.

22Yil’ anahi din daa bili yina n-zani tuuli yilli din daa kab’ la zaashee la wuhiri ni nama anahi ni ti yiɣisi n-zani nam zaɣ’ yini maa zaashee, ka di mi ti ku mali kpiɔŋ kaman tuuli nam maa.

23“Nama ŋɔ tariga paabu yi ti miri, ka bɛ leei ninvuɣ’ biɛri n-simdi tibidarigibo, na’ so ni ti yiɣisi n-nyɛ hal’ kpiɔŋlana ni baŋda ni ninvuɣ’ yɔhinda.

24O ni ti mali kpiɔŋ, amaa pa omaŋmaŋ’ yiko ni ka di ti yɛn yina. O ni ti saɣim binyara saɣindi biɛɣu, ka ni ti di nasara o ni niŋdi shɛlikam ni. O ni ti bahi ninvuɣ’ shɛb’ bɛn mali yiko mini wuntizɔriba zaa yoli.

25O ni ti di nasara o yɛŋkiŋkabina min’ o ninvuɣ’ yɔhimbo soya puuni. O ni ti duh’ omaŋa, ka ni ti bahi niriba pam yoli n-libigi ba. Hal o ni ti mo nanim’ zaa Naa, amaa o ni ti bahi yoli ka ninsal’ nuu ka di ni.

26Ʒii shɛli gbinni bɛ ni daa kahigi wuh’ a zaŋ chaŋ zaawuni min’ asiba sara maligu shɛŋa yɛla polo la nyɛla din ni niŋ yɛlimaŋli. Amaa lee gbib’ li ashilɔni, dama di ni yɛn niŋ pali saha shɛli maa na wɔɣ’ pam.”

27Ka yɛla maa daa muɣisi man’ Daniɛl pam, ka dɔro gbaai ma ka n dɔni paai dabisa shɛm. Ka n daa ti yiɣisi n lan labi nti tumdi tuun’ shɛŋa naa ni daa zali ma ni n tumdi la, amaa ka ʒii maa yɛla daa gari ma ka m bi tooi baŋ li.

← Chapter 7 Jump to: Chapter 9 →