Exodus 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Ka Jɛtro ŋun daa nyɛ Midian maligumaana ka lan nyɛ Musa deemba la daa wum Naawuni ni daa tum tuun’ shɛlikam zaa ti Musa mini Izraɛlnima ni Yawɛ ni daa yihi Izraɛlnim’ Ijipti shɛm la yɛla.

2Musa daa zaŋla o paɣa Zipɔra labisi ka o deemba Jɛtro daa deeg’

3o min’ o bidibis’ ayi la ʒili. Bɛ ni yino yuli n-daa booni Gɛrishom, dama o daa yɛlimi, “N nyɛla sana m-be saan tiŋa.”

4Ŋum paya mi yuli n-daa booni Ɛliɛza, dama o daa yɛlimi, “M banim’ Naawuni n-daa nyɛ n sɔŋda ka tiligi ma Firawuna takɔbi ni.”

5Ka Musa deemba Jɛtro daa zaŋ Musa paɣ’ min’ o bidibis’ ayi maa n-ka o sanna tiŋgban’ nɛli maa ni bɛ ni daa ti bɛ suɣa be Naawuni zoli maa gbini luɣ’ shɛli maa.

6Ka bɛ daa yɛli Musa, “A deemba Jɛtro min’ a paɣa ni a bidibis’ ayi la kanna.”

7Ka Musa daa yi n-chaŋ ti tuh’ o deemba maa soli lu o sizuura, ka mɔɣis’ o kpariŋ. Ka bɛ daa puhi tab’ bɔhi tab’ daalaafee yɛla; ka bɛ daa chaŋ ti kpe Musa suɣili ni.

8Ka Musa daa yɛl’ o deemba maa Yawɛ ni daa niŋ Firawuna mini Ijiptinim’ shɛm zaa n-ti bɛn’ Izraɛlnima. Ka lan yɛl’ o muɣisigu shɛŋa zaa din paai ba soli maa ni yɛla ni Yawɛ ni yihi ba muɣisigu maa ni shɛm.

9Ka Jɛtro daa wum Yawɛ ni niŋ zaɣ’ viɛl’ shɛli ti Izraɛlnim’ maa min’ o ni daa yihi ba Ijipti tiŋgbɔŋ ni shɛm maa, ka o suhu daa paligi pam.

10Ka o daa yɛli, “Paɣimiya Yawɛ ŋun daa yihi ya Ijiptinim’ mini Firawuna nuu ni maa.

11Pumpɔŋɔ m baŋya ni Yawɛ galisiya gari wuna zaa, o ni daa tiligi niriba maa Ijiptinim’ nuu ni saha shɛli bɛ ni daa niŋdi ba fitiina la zuɣu.”

12Ka Musa deemba Jɛtro daa mali bɛ ni zaŋdi sara shɛli nyɔri buɣim la ti Naawuni. Ka Aduna mini Izraɛl kpamba zaa daa kana, ka bɛ mini Musa deemba maa ti laɣim di bindirigu Naawuni tooni.

13N-daa yi biɛɣu ka Musa daa ʒini ni o mali niriba yɛla, ka niriba maa daa ʒe n-gili Musa asiba hal ni zaawuni.

14Ka Musa deemba maa daa nya lala ka bɔh’ o, “Bɔ ka a lee niŋdi tiri niriba maa? Bɔ n-niŋ ka a kɔŋko ʒiya ka niriba maa zaa ʒe n-gil’ a asiba hal ni zaawuni?”

15Ka Musa daa garigi yɛl’ o deemba maa, “Niriba maa kanimina ni bɛ ti bɔhi baŋ Naawuni yɛla.

16Ka shɛb’ yi mali naŋgbankpeeni, bɛ kanimina ka n ti woligiri li tiri ba, ka wuhiri ba Naawuni zaligunim’ min’ o wuhibu ni nyɛ shɛm.”

17Ka Musa deemba maa daa yɛl’ o, “A ni niŋdi shɛm maa bi tuhi.

18A mini niriba maa kul yɛn gbarigimi zaa. Tuma maa yaɣ’ a kɔŋko tuma, a kɔŋko ku tooi tumdi li.

19Pumpɔŋɔ wummi n ni yɛn yɛl’ a shɛm ŋɔ. N ni zaŋ n ninkurilim yɛtɔɣa ti a, ka Naawuni ni be a sani! Di simdi ka a zani niriba maa zaani Naawuni sani, ka zaŋdi bɛ naŋgbankpeeni yɛtɔɣa n-sɔŋd’ o tooni.

20Di simdi ka a wuhi ba Naawuni zaligunim’ min’ o wuhibu ni nyɛ shɛm ni bɛ ni yɛn be shɛm mini bɛ ni yɛn niŋdi shɛm zaa.

21Di simdi ni a lan pii asanza niriba bɛn mali alaafee ka zɔri Naawuni, ka nyɛ niriba ni niŋ shɛb’ yɛda, ka bɛ je zalinsi dibu n-chɛ ka bɛ su niriba tuhilituhili, ka shɛb’ su niriba kɔbigakɔbiga, ka shɛb’ su niriba pihinunu, ka shɛb’ mi su niriba piapia fukumsi.

22Chɛ ka bɛ maani niriba maa yɛla saha shɛlikam. Di simdi ni bɛ zaŋ yɛtɔɣ’ kpeeni kam ka a sanna, amaa yɛtɔɣ’ bihi dina, di simdi ka bɛmaŋmaŋ’ baŋ bɛ ni yɛn mal’ li shɛm din’ ni chɛ ka tuma maa niŋ valimbo a sani, ka a mini ba zaa laɣim ʒiri ʒili maa.

23A yi niŋ Naawuni ni zal’ a ni a niŋ shɛli ŋɔ, dindina a wumsim maa ni baligi. Ka niriba ŋɔ zaa ni lab’ bɛ biɛhigu shee ni suhudoo.”

24Ka Musa daa wum o deemba yɛligu maa, ka niŋ o ni daa yɛl’ o shɛm maa zaa.

25Ka Musa daa pii asanza niriba Izraɛlnim’ maa puuni n-zaŋ ba leei niriba maa zuɣulaannima, ka bɛ shɛb’ su niriba tuhilituhili, ka shɛb’ su niriba kɔbigakɔbiga, ka shɛb’ su niriba pihinunu ka shɛb’ mi su niriba piapia fukumsi.

26Ka bɛ daa maani niriba maa yɛla sahakam. Ka bɛ daa zaŋdi yɛtɔɣ’ kpɛma n-kani Musa sanna, amaa yɛtɔɣ’ bihi dina, bɛmaŋmaŋa n-daa maani li.

27Di nyaaŋa ka Musa daa chɛbis’ o deemba maa, ka o lab’ o ya.

← Chapter 17 Jump to: Chapter 19 →