Exodus 3

Dagbani Bible (Naawuni Kundi Kasi)

← Chapter 2 Jump to: Chapter 4 →

1Musa daa gulila o deemba Jɛtro ŋun daa nyɛ Midian maligumaana la biŋkɔbbaligu maa. Ka o daa ti zaŋ ba ti kpe tiŋgban’ nɛli ni n-gari chaŋ Naawuni zoli din yuli booni Sinai la gbini.

2Ka Yawɛ malaika daa ti puhi yi o zuɣu buɣim niɛm puuni tutuɣu ni, ka Musa daa lihi nya ka buɣim diri tutuɣu ni, amaa ka lee bi diri tutuɣu maa.

3Di saha ka Musa daa yɛli, “N ni birigi chaŋ ti nya lahizibu din chɛ ka buɣim maa bi diri tutuɣu maa.”

4Yawɛ ni daa nya ka Musa birigi kanna ni o ti nya li maa, ka Naawuni daa bol’ o tutuɣu maa ni, “Musa! Musa!” Ka o garigi yɛli, “N-nyɛ ma.”

5Di saha ka Naawuni daa yɛl’ o, “Di miri kpe na, pirigim a namda maa, dama a ni ʒe luɣ’ shɛli ŋɔ nyɛla luɣ’ kasi shee.”

6O daa lan yɛl’ o, “Mani n-nyɛ a yaannim’ Naawuni. Mani n-nyɛ Ibrahimma Naawuni; mani n-nyɛ Yisahaku Naawuni; mani n-nyɛ Yaakubu Naawuni.” Di saha ka Musa daa pɔb’ o nina, dama o daa zɔrila dabiɛm ni o yuuni Naawuni.

7Di saha ka Yawɛ daa yɛli Musa, “N nya n niriba bɛn be Ijipti la muɣisigu, ka wum bɛ fabila zaŋ chaŋ bɛ tuma zuɣulaannim’ ni niŋdi ba fitiina shɛŋa la polo. M mi bɛ wahalanim’ maa zaa.

8Dinzuɣu ka n kana ni n ti yihi ba Ijiptinim’ maa nuu ni, ka yihi ba tiŋgbɔŋ maa ni n-zaŋ ba tahi tiŋgban’ viɛlli din galisi ni; tiŋgban’ shɛli din mali bihim mini shiri pam, ka nyɛ Keenannim’ mini Hitinim’ ni Amɔrinim’ ni Pɛrizinim’ ni Hivinim’ ni Jɛbusinim’ ni su tiŋgbɔn shɛli.

9Pumpɔŋɔ, nyama, n niriba Izraɛlnim’ maa fabila maa paai ma, ka n nya Ijiptinim’ maa ni tiri ba wahala shɛŋa maa zaa.

10Dinzuɣu kamina ka n ti tim a Firawuna sani ka a chaŋ ti yihi n niriba Izraɛlnim’ maa Ijipti tiŋgbɔŋ maa ni.”

11Amaa ka Musa yɛli Naawuni, “M mi lee nyɛ ŋuni n-chani Firawuna sani nti yihiri Izraɛlnim’ Ijipti tiŋgbɔŋ ni?”

12Ka o daa yɛli, “N ni be a sani. Dimbɔŋɔ mi n-yɛn nyɛ shihirili din wuhiri ni mani n-tim a, a yi ti yihi niriba maa Ijipti tiŋgbɔŋ maa ni na, yi ni ti jɛmdi man’ Naawuni zoli ŋɔ zuɣu.”

13Di saha ka Musa yɛli Naawuni, “Ka n yi chaŋ ti yɛli Izraɛlnim’ maa, ‘Yi yaannim’ Naawuni n-tim ma yi sanna.’ Ka bɛ bɔhi ma, ‘O yuli lee booni bɔ?’ Man’ yɛlim’ ba wula?”

14Ka Naawuni yɛli Musa, “Mani n-nyɛ Mani.” Ka lan yɛli yaha, “Yɛlim’ Izraɛlnim’ maa, ‘Mani n-tim ma yi sanna.’ ”

15Ka Naawuni daa lan yɛli Musa, “Yɛlim’ Izraɛlnim’ maa ŋ-ŋɔ, ‘Yawɛ ŋun nyɛ yi yaannim’ Naawuni, Ibrahimma Naawuni ni Yisahaku Naawuni ni Yaakubu Naawuni la n-tim ma yi sanna. N yuli m-bala sahakam. Ʒiɛmani kam nim’ ni yɛn booni ma shɛm m-bala.

16Cham’ ti laɣim Izraɛl kpamba n-yɛli ba, ‘Yawɛ ŋun nyɛ yi yaannim’ Naawuni, Ibrahimma Naawuni ni Yisahaku Naawuni ni Yaakubu Naawuni n-yi n zuɣu ka yɛli ma, N nini nyan ya, ka nya yi ni diri wahala shɛŋa zaa Ijipti tiŋgbɔŋ ni.

17Ka n lo alikauli ni n ni yihi ya Ijipti tiŋgbɔŋ maa ni wahala maa ni n-zaŋ ya tahi Keenannim’ mini Hitinim’ ni Amɔrinim’ ni Pɛrizinim’ ni Hivinim’ ni Jɛbusinim’ tiŋgbɔŋ ni. Di nyɛla tiŋgban’ shɛli din mali bihim mini shiri pam.’

18“Di saha bɛ ni wum a yɛligu maa, ka a mini Izraɛl kpamba maa chaŋ Ijipti naa maa sani ti yɛl’ o, ‘Yawɛ ŋun nyɛ Hiburunim’ Naawuni la n-ka ti sanna, ti suhir’ a mi, pumpɔŋɔ chɛ ka ti chaŋ tiŋgban’ nɛli ni daba ata chandi nti mali sara ti Yawɛ ŋun nyɛ ti Naawuni maa.’

19M mi ni Ijipti naa maa ku chɛ ka yi chaŋ, naɣila n zaŋla kiŋkansi niŋ o.

20N ni teegi n nuu n-tum alahiziba tuma n-darigi Ijiptinim’ maa tibili, di nyaaŋa ka o ni chɛ ka yi chaŋ.

21“N ni chɛ ka Ijiptinim’ niŋ ya nirilim din ni chɛ ka yi ku yi nimaani chaŋ ni nu’ zaŋa.

22Izraɛl paɣ’ kam ni ti chaŋ o ʒiʒiinikpee sani bee o mini saan’ so ŋun laɣim be sani nti suh’ o anzinfa mini salima nɛma ni situra, ka yi zaŋ li niŋ yi bidibisi mini yi bipuɣinsi zaa din ni chɛ ka yi zaŋ Ijiptinim’ maa daazichi pam chaŋ.”

← Chapter 2 Jump to: Chapter 4 →