Exodus 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Ka Yawɛ daa yɛli Musa, “A mini Aduna ni Nadab ni Abihu ni Izraɛl kpamba pisopɔin dumiya zoli ŋɔ n-ka n sanna nti zani kpaŋ’ jɛm ma.

2Nyin’ Musa kɔŋko n-ni miri man’ Yawɛ; bɛ ni so di ti mirina; niriba maa di pah’ a zuɣu du na.”

3Ka Musa daa kana ti yɛli niriba maa Yawɛ ni yɛli shɛm min’ o ni zali shɛm zaa, ka niriba maa zaa daa laɣim garigi yɛli, “Yawɛ ni yɛli ni ti niŋmi shɛlikam zaa, ti ni niŋ li.”

4Ka Musa daa sabi Yawɛ yɛligu maa zaa sɔŋ, ka daa ti daŋ yiɣisibu asiba me sara maligu bimbini zali zoli maa gbini, ka sa bin’ wɔɣila pinaayi ka di zani Izraɛl zuliya pinaayi la zaani.

5Ka o daa tim Izraɛl nachimba ka bɛ chaŋ ti mali bɛ ni zaŋdi sara shɛli nyɔri buɣim la, ka daa kɔri naɣilahi mali suhudoo sara maligu ti Yawɛ.

6Ka Musa daa taɣi ʒim maa pirigili niŋ taha ni zali, ka zaŋ di pirigili din kpalim maa kpaai vie sara maligu bimbini maa.

7Di nyaaŋa ka o daa zaŋ alikauli zaligu kundi la na ti karim li ka niriba maa wum ka yɛli, “Yawɛ ni yɛli ni ti niŋmi shɛlikam zaa, ti ni niŋ li, ka deeg’ o noli.”

8Ka Musa daa zaŋ ʒim maa mihi niriba maa ka yɛli, “Nyamiya, Yawɛ ni lɔn ya alikauli shɛl’ la ʒim, di nyɛla din doli o ni yɛli ya yɛtɔɣ’ shɛŋa maa zaa.”

9Di nyaaŋa ka Musa mini Aduna ni Nadab ni Abihu ni Izraɛl kpamba pisopɔin maa daa du zoli maa zuɣu

10nti nya Izraɛlnim’ Naawuni maa, ka o naba tiŋli daa ŋmanila bɛ zaŋla bɛ ni booni kuɣ’ shɛŋa safaya la mal’ li. Di daa kul nɛmi kaman sagbana ni yi kani ka zuɣusaa ne shɛm la.

11Naawuni daa bi ku Izraɛl ninvuɣ’ zuɣuri maa, ka bɛ daa nya o, ka di ka nyu.

12Ka Yawɛ daa yɛli Musa, “Dum’ zoli maa ka n sanna nti guhiri nimaani, ka n zaŋ n ni sabi n zaligunim’ niŋ kuɣ’ parilan’ shɛŋa ni niriba maa wuhibu zuɣu la ti a.”

13Di saha ka Musa min’ o sɔŋda Jɔshua daa lu soli, ka Musa daa du Naawuni zoli maa zuɣu.

14Ka Musa daa yɛli kpamba maa, “Yinim’ kpalimmiya be kpe n-guhi ti hal ka ti ti lab’ yi sanna. Aduna mini Hur be yi sani, ka ŋunkam mali yɛl’ shɛli, ŋun’ cham’ bɛ sani.”

15Di saha ka Musa daa du Zoli maa zuɣu, ka sagbani limsi li.

16Ka Yawɛ jilima daa siɣi Sinai Zoli maa zuɣu na, ka sagbani maa daa limsi li hal ni daba ayɔbu; dabisi’ shɛli din pahir’ ayopɔin dali, ka o daa boli Musa sagbani maa ni.

17Yawɛ jilima maa daa ŋmanila buɣim diri zoli maa zuɣu Izraɛlnim’ sani.

18Ka Musa daa kpe sagbani maa ni n-du zoli maa zuɣu. Musa daa be zoli maa zuɣu la wuntaŋ’ ni mini yuŋ biɛɣu pihinahi.

← Chapter 23 Jump to: Chapter 25 →