Exodus 37

Dagbani Bible (Naawuni Kundi Kasi)

← Chapter 36 Jump to: Chapter 38 →

1Ka Bɛzalɛl daa zaŋ gɔpiɛliga dari mali Alikauli Adaka la. Di wɔɣilim daa nyɛla sɛntimita kɔbiga ni pia, ka di yɛliŋ nyɛ sɛntimita pihiyɔbunaayɔbu, ka di dubu gba nyɛ sɛntimita pihiyɔbunaayɔbu.

2Ka o daa niŋ salima alali niŋ di puuni mini di nyaaŋa zaa, ka niŋ salima kɔɣili li gili.

3Ka o daa mali salima bans’ anahi n-niŋ di naŋgbaŋkuɣila anahi. Bans’ ayi yaɣ’ yini, bans’ ayi yaɣ’ din’ la gba.

4O daa lan zaŋ gɔpiɛliga dari mali dapuhi, ka niŋ salima niŋ li,

5ka zaŋ dapuhi maa tu bansi din be Alikauli Adaka maa luɣa ni la ni bɛ mal’ li kpuɣiri Alikauli Adaka maa.

6Ka o daa zaŋ salima alali mali Alikauli Adaka maa yɔrigu, ka di wɔɣilim nyɛ sɛntimita kɔbiga ni pia, ka di yɛliŋ nyɛ sɛntimita pihiyɔbunaayɔbu.

7Ka o daa zaŋ matarika n-kuri salima chɛrubinim’ ayi tam di yɔrigu maa tarisi yaɣ’ ayi zuɣu.

8Yino daa bela adaka yɔrigu maa tariga yaɣ’ yini polo, ka yino la mi be yaɣ’ din’ la polo. O daa kuri ba tabili la adaka yɔrigu maa, ka bɛ mini li nyɛ zaɣ’ yini.

9Chɛrubinim’ maa daa yirigila bɛ kpiŋkpama zuɣusaa, ka bɛ kpiŋkpama maa mahim luri adaka yɔrigu maa zuɣu, ka bɛ nina kpa taba. Adaka yɔrigu maa dɛde ka chɛrubinim’ maa nina daa kpa.

10O daa lan zaŋ gɔpiɛliga dari mali teebuli, ka di wɔɣilim nyɛ sɛntimita pihiwɛiayika ka di yɛlim nyɛ sɛntimita pihinahinaanahi, ka di dubu nyɛ sɛntimita pihiyɔbunaayɔbu.

11Ka o daa niŋ salima pa di zuɣu, ka niŋ salima kɔɣili li gili.

12O daa mali naŋgbaŋkuɣila ka di yɛliŋ nyɛ milimita pisopɔinnaanu niŋ li, ka niŋ salima kɔɣili li gili.

13O daa mali salima bans’ anahi n-zaŋ li ga teebuli maa luɣ’ anahi zuɣu naba la.

14Bansi maa daa baɣila di naŋgbaŋkuɣila din daa yɛn gbibi dapu’ shɛŋa bɛ ni yɛn mali kpuɣiri teebuli maa.

15Ka o daa zaŋ gɔpiɛliga dari mali dapuhi, ka niŋ salima pa di zuɣu ni bɛ mal’ li kpuɣiri teebuli maa.

16O daa zaŋ salima alali mali teebuli maa zuɣu duɣuri mini di parantɛnima ni di lahi din ni tuɣindi tulaale zim ni pipi’ shɛŋa bɛ ni yɛn mali boori sara maligu wain.

17O daa lan zaŋ salima alali mali firilatamdigu. O daa zaŋla matarika n-kuri firilatamdigu maa ni yɛn tamdi binshɛli zuɣu mini di mundili. Ka di mini di pipihi ni di bintira kɔtomsi la ni di tipuma kɔtomsi la zaa daa nyɛ zaɣ’ yini.

18Firilatamdigu maa daa malila jaba ayɔbu: jaba ata daa bela yaɣ’ yini polo, ka jaba ata be yaɣ’ din’ la mi polo.

19O daa lan mali pipih’ ata ka di ŋmani alimɔnd pum, ka di zaɣ yini kam mali bintirili kɔtomsi mini tipum kɔtomsi, ka o zaŋ li tam jab’ yini zuɣu, ka lan mali pipih’ ata ka di ŋmani alimɔnd pum, ka di zaɣ’ yini kam mali bintirili kɔtomsi ni tipum kɔtomsi, ka o daa zaŋ li tam jab’ din’ la mi zuɣu, lala ka o daa zaŋ li tamtam firilatamdigu maa jaba ayɔbu maa zaa zuɣu.

20O daa lan mali pipih’ anahi ka di ŋmani alimɔnd pum mini di bintira kɔtomsi ni tipuma kɔtomsi n-zaŋ li tam firilatamdigu maa maŋmaŋ’ zuɣu.

21O daa lan mali bintirili kɔtomsi niŋ tuuli jaba ayi la lɔŋni, ka di min’ li nyɛ zaɣ’ yini, ka lan mali bintirili kɔtomsi niŋ jaba ayi din paya la lɔŋni, ka di min’ li nyɛ zaɣ’ yini, ka lan mali bintirili kɔtomsi niŋ jaba ayi din bahindi nyaŋa la gba lɔŋni, ka di min’ li nyɛ zaɣ’ yini,

22ka di bintira kɔtomsi maa mini di jaba maa ni firilatamdigu maa zaa nyɛ zaɣ’ yini, ka nyɛ salima alali, ka o zaŋ matarika kuri li.

23Ka o daa lan zaŋ salima alali mali di firilanim’ ayopɔin mini di buɣim kpihiri bina ni di buɣim moori bina.

24O daa zaŋla salima alali din tibisim nyɛ kilɔgiram pihitanaanu mali firilatamdigu maa mini di nɛma zaa.

25O daa lan zaŋ gɔpiɛliga dari mali bɛ ni yɛn tuɣindi tulaale zim bimbin’ shɛli zuɣu. Di daa nyɛla zaɣ’ mɔɣu, ka di wɔɣilim nyɛ sɛntimita pihinahinaanu, ka di yɛliŋ nyɛ sɛntimita pihinahinaanu, ka di dubu nyɛ sɛntimita pihiwɛi, ka di mini di binyila la daa nyɛ zaɣ’ mun’ yini.

26Ka o daa niŋ salima alali niŋ di zuɣusaa mini di luɣa ni ni di luɣilikam zaa ni di binyila la, ka niŋ salima kɔɣili li gili.

27Ka o daa zaŋ salima mali bans’ ayi niŋ di yaɣ’ ayi zuɣu salima din kɔɣili li gili la lɔŋni, ka lan mali bans’ ayi niŋ yaɣ’ din’ la gba ni bɛ zaŋdi dapuhi la turi di ni n-kpuɣiri bimbini maa.

28Ka o daa zaŋ gɔpiɛliga dari mali dapuhi, ka niŋ salima niŋ li.

29O daa lan mali kpa’ shɛli din be kasi shɛli bɛ ni yɛn mali boori bahiri niriba zuɣuri ni, ka lan mali tulaale zim alali din nyom viɛla kaman tulaale duɣira ni niŋdi shɛm.

← Chapter 36 Jump to: Chapter 38 →