Exodus 40

Dagbani Bible (Naawuni Kundi Kasi)

← Chapter 39 Jump to:

1Yawɛ daa yɛli Musa,

2“Samiya Naawuni biɛhigu shee din nyɛ Naawuni min’ o niriba laɣiŋgu suɣili maa gol’ tuuli dahin’ yini dali.

3Zaŋmiya Alikauli Adaka la zali di puuni, ka zaŋ pateesa yili limsi li.

4Yi ni ti zaŋ teebul’ la na ti mal’ li zali di zaashee di puuni; ka zaŋ firilatamdigu la na nti zaŋ di firilanim’ la tam di zuɣu.

5Ka yi ti zaŋ salima sara maligu bimbin’ shɛli zuɣu yi ni yɛn tuɣindi tulaale zim la zali Alikauli Adaka maa tooni, ka zaŋ pateesa yili Naawuni biɛhigu shee maa dunoli.

6Ka yi ti zaŋ sara maligu bimbin’ shɛli zuɣu bɛ ni nyɔri sara maligu buɣim la zali Naawuni biɛhigu shee din nyɛ Naawuni chirigibu min’ o niriba laɣiŋgu suɣili maa dunol’ la tooni,

7ka zaŋ tahili la zali Naawuni min’ o niriba laɣiŋgu suɣili maa mini sara maligu bimbin’ la sunsuuni n-niŋ kom niŋ di ni.

8Ka yi ti niŋ dundɔŋ gili di zaa, ka zaŋ pateesa yili di dunɔdali.

9“Yi ni ti booi kpa’ shɛli bɛ ni boori bahiri niriba zuɣuri ni la m-bahi Naawuni biɛhigu shee maa mini di puuni nɛma zaa zuɣu, ka malimali di mini di puuni binyɛra zaa, ka di leei din be kasi.

10Di lan simdi ka yi booi kpam maa bahi bɛ ni nyɔri sara maligu buɣim bimbin’ shɛli zuɣu la gba mini di nɛma la zaa zuɣu, ka malimali sara maligu bimbini maa ka di leei din be kasi zaa.

11Di lan simdi ka yi ti booi kpam maa bahi tahili la mini di ni yɛn tamdi binshɛli zuɣu, ka di leei din be kasi.

12“Dimbɔŋɔ nyaaŋa ka a ti zaŋ Aduna min’ o bidibisi maa ka Naawuni min’ o niriba laɣiŋgu suɣili maa dunol’ ni na nti chɛ ka bɛ niŋ kom paɣi bɛ ni,

13ka a zaŋ binyɛra din be kasi yɛli Aduna ka booi kpam bah’ o zuɣu ni m-mal’ o, ka o leei maligumaana n-tumdi n tuma.

14A ni zaŋ o bidibisi maa gba na ti zaŋ zabbanim’ yɛli ba,

15ka booi kpam bahi bɛ zuɣuri ni kaman a ni niŋ bɛ ba shɛm maa, ka bɛ leei maligumaaniba n-tumdi n tuma, ka kpam booi bahi bɛ zuɣuri ni maa ni ti ba soli ka bɛ kul nyɛ maligumaaniba sahakam bɛ ʒiɛman’ ni.”

16Ka Musa daa niŋ binshɛɣukam kaman Yawɛ ni daa wuh’ o ni o niŋ maa.

17Dinzuɣu gol’ so ŋun daa daŋ tooni yuun’ shɛli din pahir’ ayi maa ni dahin yini dali, ka o daa sa Naawuni biɛhigu shee suɣili maa.

18Ka Musa daa sa Naawuni biɛhigu shee maa, ka zaŋ di ni yɛn tamdi binshɛŋa zuɣu zalizali, ka zaŋ di dapaɣa la tamtam di zuɣu, ka zaŋ di dapuhi la niŋ li, ka zaŋ di daantalisi la sa;

19ka zaŋ tani n-yirigi pili Naawuni biɛhigu shee maa, ka kpuɣi binshɛli din yɛn pili suɣili maa pil’ li kaman Yawɛ ni daa wuh’ o shɛm.

20Ka o daa zaŋ alikauli la niŋ adaka maa puuni, ka zaŋ dapuhi la niŋ adaka maa, ka zaŋ adaka maa yɔrigu yo li

21n-zaŋ li ti zali Naawuni biɛhigu shee maa, ka zaŋ pateesa yili liri Alikauli Adaka maa kaman Yawɛ ni daa wuh’ o shɛm.

22Ka o daa zaŋ teebul’ la kpɛhi Naawuni min’ o niriba laɣiŋgu suɣili maa puuni nti zaŋ li zali Naawuni biɛhigu shee maa nuzaa polo pateesa la nyaaŋa,

23ka zaŋ bɔrɔbɔro na ti tam di zuɣu viɛnyɛliŋga Yawɛ tooni kaman Yawɛ ni daa wuh’ o shɛm.

24Ka o daa lan zaŋ firilatamdigu la kpɛhi Naawuni min’ o niriba laɣiŋgu suɣili maa puuni nti zaŋ li zali tuhi teebuli maa Naawuni biɛhigu shee maa nudirigu polo,

25ka zaŋ firilanim’ la tamtam di zuɣu Yawɛ tooni kaman Yawɛ ni daa wuh’ o shɛm.

26Ka o daa zaŋ salima sara maligu bimbini la kpɛhi Naawuni chirigibu shee suɣili maa puuni nti zaŋ li zali pateesa la tooni,

27ka zaŋ tulaale zim din nyom viɛla n-tuɣili di zuɣu kaman Yawɛ ni daa wuh’ o shɛm.

28Ka o daa zaŋ pateesa yili Naawuni biɛhigu shee maa dunoli.

29Ka o daa lan zaŋ bɛ ni nyɔri sara maligu buɣim bimbin’ shɛli zuɣu la ti zali Naawuni biɛhigu shee din nyɛ Naawuni min’ o niriba laɣiŋgu suɣili la dunol’ ni, ka mali bɛ ni zaŋdi sara shɛli nyɔri buɣim la mini kawana ni chi sara di zuɣu kaman Yawɛ ni daa wuh’ o shɛm.

30Ka o daa zaŋ tahili la zali Naawuni min’ o niriba laɣiŋgu suɣili maa mini sara maligu bimbini maa sunsuuni, ka niŋ kɔpaɣirim niŋ di ni.

31Ka Musa mini Aduna ni Aduna bidibisi maa daa mal’ li paɣiri bɛ nuhi mini bɛ naba.

32Bɛ daa yi yɛn kpe Naawuni min’ o niriba laɣiŋgu suɣili maa ni bee n-chaŋ sara maligu bimbin’ la gbini, bɛ paɣirila bɛ nuhi mini bɛ naba kaman Yawɛ ni daa zali Musa shɛm la.

33Ka o daa niŋ dundɔŋ gili Naawuni biɛhigu shee maa mini sara maligu bimbini maa, ka zaŋ pateesa yili di dunoli. Lala ka Musa daa niŋ naai tuma maa.

34Ka sagbani daa sirigina ti pili Naawuni min’ o niriba laɣiŋgu suɣili maa, ka Yawɛ jilima daa pal’ o biɛhigu shee maa.

35Ka Musa daa kɔŋ Naawuni min’ o niriba laɣiŋgu suɣili maa ni kpɛbu sagbani maa ni daa sirigina ti pil’ li maa mini Yawɛ jilima ni daa pal’ o biɛhigu shee maa zuɣu.

36Izraɛlnim’ chandi maa zaa puuni, sagbani maa daa yi ti vuui ka chɛ Naawuni biɛhigu shee maa, bɛ yiɣisirimi chaŋ,

37amaa sagbani maa daa yi bi vuui, bɛ bi chani shɛli naɣila di yi ti vuui chana ka bɛ chana.

38Dama Yawɛ sagbani maa daa kul bela o biɛhigu shee maa zuɣusaa wuntaŋ’ ni, yuŋ mi ka buɣim be sagbani maa puuni Izraɛlnim’ zaa ninni bɛ chandi maa zaa ni.

← Chapter 39 Jump to: