Numbers 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Bɛ ni daa be Hazɛrɔt saha shɛli maa ka Miriam mini Aduna daa galim Musa o ni daa kpuɣi Itiɔpia paɣ’ so la zuɣu, dama o daa kpuɣila Itiɔpia zuliya ni paɣa.

2Bɛ daa yɛlimi, “Pa Musa kɔŋko ka Yawɛ daa zaŋ o yɛtɔɣa tɔɣisi. O daa zaŋ o yɛtɔɣa tɔɣisi tinim’ gba.” Ka Yawɛ daa wum li.

3Musa daa nyɛla tarima n-gari ninvuɣ’ shɛb’ bɛn zaa daa be dunia ŋɔ ni.

4Di daa bi yuui ka Yawɛ yɛli Musa mini Aduna ni Miriam, “Yi niriba ata maa kam’ Yawɛ chirigibu shee suɣili la gbin’ na.” Ka bɛ niriba ata maa daa kana.

5Ka Yawɛ daa be sagban’ ni n-siɣina ti zani suɣili maa dunol’ ni, ka boli Aduna mini Miriam, ka bɛ niriba ayi maa kana ti zani.

6Ka o yɛli ba, “Wummiya n yɛtɔɣa ŋɔ: Anabinim’ yi be yi ni, man’ Yawɛ ni kahigi mmaŋ’ wuhi ba ʒii puuni, ka tɔɣis’ ba yɛtɔɣa zahindi ni.

7Pa lala n-nyɛ li n dabili Musa sani, n zaŋla n niriba zaa fukumsi niŋ o nuu ni.

8M min’ o gbɛri kparila taba, ka n tɔɣisir’ o yɛtɔɣa ka di do palɔni, ka pa ni ŋaha puuni; ka o nyari man’ Yawɛ kɔtomsi. Ka bɔzuɣu ka yi bi zo dabiɛm ni yi galim’ n dabili Musa maa?”

9Ka Yawɛ daa yiɣis’ o suhu bahi bɛ zuɣu pam ka ŋmaligi chaŋ.

10Sagbani maa ni daa kul vuui suɣili maa zuɣusaa saha shɛli, nyama, ka niŋgbuŋ dɔr’ biɛɣu dii gbaai Miriam, ka o niŋgbuŋ paligi zaa kaman gumbɔrigu la. Ka Aduna daa ŋmaligi lihi Miriam polo n-nya ka niŋgbuŋ dɔr’ biɛɣu n-gbaag’ o.

11Di saha ka Aduna daa yɛli Musa, “N dana, di darigi ti tibili, ti ni tum jɛrilim ka tum alahichi shɛli maa zuɣu.

12Di chɛ ka o be kaman bɛ ni yi dɔɣi bikpiin’ so bahina ka o yaɣ’ yini saɣim la.”

13Ka Musa daa suhi Yawɛ yɛli, “Yaa n Naawuni, n suhir’ a, chɛ ka o nya alaafee.”

14Amaa ka Yawɛ daa bɔhi Musa, “O ba yi di tuhi nintɔri vie o ninni, vi naan ku gbaag’ o paai daba ayopɔin? Chɛ ka bɛ yih’ o kpaŋ’ daba ayopɔin, di nyaaŋa ka yi naanyi zaŋ o labina.”

15Dinzuɣu ka bɛ daa zaŋ Miriam yihi kpaŋ’ daba ayopɔin, ka niriba maa daa bi yiɣisi chaŋ hal ka bɛ daa ti lan zaŋ Miriam labina.

16Di nyaaŋa ka niriba maa daa yi Hazɛrɔt n-chaŋ ti dɔni Paran mɔɣu ni.

← Chapter 11 Jump to: Chapter 13 →