Numbers 9

Dagbani Bible (Naawuni Kundi Kasi)

← Chapter 8 Jump to: Chapter 10 →

1Ka Yawɛ daa tɔɣisi Musa yɛtɔɣa Sinai mɔɣu ni bɛ ni daa yi Ijipti tiŋgbɔŋ ni na la nyaaŋa yuma ayi puuni gol’ so ŋun daŋ tooni la ni n-yɛli,

2“Chɛ ka Izraɛlnim’ puhi Yaɣigari chuɣu di puhibu saha.

3Gol’ ŋɔ biɛɣ’ pinaanahi dali zaawuni doliya di kaya ni di zaligunim’ zaa soli m-puhi li di puhibu saha.”

4Di saha ka Musa daa yɛli Izraɛlnim’ ni bɛ puhim’ Yaɣigari chuɣu maa.

5Ka bɛ daa puhi Yaɣigari chuɣu maa gol’ so ŋun daŋ tooni biɛɣ’ pinaanahi dali zaawuni Sinai mɔɣu maa ni. Yawɛ ni daa kul zali Musa shɛlikam zaa, lala ka Izraɛlnim’ daa shiri niŋ.

6Amaa bɛ ni shɛb’ daa shihila kpima, ka leei bɛn bi be kasi, ka di zuɣu chɛ ka bɛ ku tooi puhi Yaɣigari chuɣu maa dindali maa. Bɛna n-daa ka Musa mini Aduna sanna dindali maa

7nti yɛli Musa, “Ti shihila kpima ka leei bɛn bi be kasi, ka bɔzuɣu ka tinim’ ku tooi pahi Izraɛlnim’ zuɣu n-zaŋ Yawɛ pini na ti ti o di tibu saha?”

8Ka Musa daa yɛli ba, “Guhimiya ka m-bɔhi Yawɛ wum o ni yɛn yɛli shɛm zaŋ chaŋ yi polo.”

9Ka Yawɛ lan yɛli Musa,

10“Yɛlim’ Izraɛlnima ni bɛ ni so bee bɛ dɔɣiriba yi shihi kpima ka leei bɛn bi be kasi bee bɛ yi gomi chaŋ katiŋa, bɛ ni tooi puhi Yawɛ Yaɣigari chuɣu maa.

11Bɛ puhim’ chuɣu maa ka di di bindirigu mini bɔrɔbɔro din ka dabindi ni vari din to gol’ so ŋun pah’ ayi biɛɣ’ pinaanahi dali.

12Bɛ di chɛ ka di shɛli kpalim ka biɛɣu neei paai li bee ŋ-ŋma di kɔbili. Bɛ doli Yaɣigari chuɣu maa zaligu puhi li.

13Amaa ninvuɣ’ so ŋun be kasi, ka bi go ka mi bi puhi Yaɣigari chuɣu maa, bɛn’ yihim’ dilan’ n niriba ni, o ni bi mali Yawɛ sara maa di saha la zuɣu, ka o daalahichi kpalim’ o zuɣu.

14Ka sana yi be yi ni, ka bɔri ni o puhi Yawɛ Yaɣigari chuɣu maa, ŋun’ doli Yaɣigari chuɣu maa kaya mini di zaligu soli puhi li. Yinim’ tiŋbihi mini saamba bɛn be yi ni zaa doliya zaligu yini.”

15Bɛ ni daa sa Yawɛ jɛmbu shee suɣili maa dahin’ shɛli, ka sagbani daa sirigina ti pili Yawɛ biɛhigu shee suɣili din nyɛ alikauli suɣili maa. Sagbani maa daa bela Yawɛ jɛmbu shee maa zuɣusaa m-be kaman buɣim la yuŋ zaŋ hal ni asiba.

16Lala ka di daa kul be, sagbani maa daa kul pil’ li mi wuntaŋ’ ni, ka be kaman buɣim la yuŋ.

17Sagbani maa daa yi ti vuui suɣili maa zuɣusaa, di nyaaŋa Izraɛlnim’ yiɣisirimi gbaai chandi; ka sagbani maa daa yi ti kpalim zani luɣ’ shɛli, nimaani ka Izraɛlnim’ maa tiri bɛ suɣa doona.

18Yawɛ zaligu ka Izraɛlnim’ maa daa doli yiɣisira, ka lan doli Yawɛ zaligu n-tiri bɛ suɣa doona. Sagbani maa daa yi kul kpalim ʒe Yawɛ biɛhigu shee suɣili maa zuɣusaa, bɛ mi kpalindimi doya.

19Hal sagbani maa daa yi kpalim ʒe Yawɛ biɛhigu shee suɣili maa zuɣusaa dabisi’ gbaliŋ gba, Izraɛlnim’ maa kul dolila Yawɛ zaligu maa ka ku yiɣisi chaŋ.

20Shɛlini, sagbani maa daa yi zaani Yawɛ jɛmbu shee maa zuɣusaa la dabisa biɛla, ka bɛ daa doli Yawɛ zaligu ni wuhi shɛm kpalim doya, di nyaaŋa ka bɛ ti lan doli Yawɛ zaligu maa ni wuhi shɛm yiɣisi chaŋ.

21Shɛlini, sagbani maa daa mi n-kpalim zani zaawuni hal ni asiba, ka sagbani maa daa yi ti vuui asiba saha shɛli, bɛ gba yiɣisirimi gbaai chandi bee di daa yi kpalim ʒiɛya wuntan’ yini bee yuŋ yini, di yi ti kul vuui, bɛ gba yiɣisirimi gbaai chandi.

22Sagbani maa daa yi kpalim ʒiɛya daba ayi bee goli bee di daa yi kpalim ʒe Naawuni biɛhigu shee maa zuɣusaa yuui, Izraɛlnim’ maa kul kpalindimi doya ka bi chana; amaa di daa yi ti vuui saha shɛli, bɛ gba yiɣisirimi gbaai chandi.

23Yawɛ zaligu ka bɛ daa doli ka tiri bɛ suɣa doona, ka lan doli Yawɛ zaligu yiɣisiri chana. Bɛ daa dolila Yawɛ ni chɛ ka Musa zali ba zaligu shɛli n-tumdi Yawɛ ni wuhi ba shɛm.

← Chapter 8 Jump to: Chapter 10 →