Numbers 17

Dagbani Bible (Naawuni Kundi Kasi)

← Chapter 16 Jump to: Chapter 18 →

1Ka Yawɛ daa yɛli Musa, “Yɛlim’ Izraɛlnima

2ni daŋ kam ni kpɛm’ bom’ jaaŋgbe’ yini ka jaaŋgbɛhi maa kalinli yiɣisi pinaayi kaman bɛ dunoya ni nyɛ shɛm ti a. Ka a sabi sokam yuli pa o jaaŋgbee zuɣu.

3Ka sabi Aduna yuli pa Lɛvi jaaŋgbee zuɣu. Di simdi ni dunoli kam kpɛm’ malila jaaŋgbe’ yini.

4Ka a zaŋ li ti sɔŋ Yawɛ min’ o niriba chirigibu shee suɣili maa ni Alikauli Adaka la tooni, n ni kani a sanna luɣ’ shɛl’ la.

5Ka n ni pii ninvuɣ’ so jaaŋgbee ni puhi vari. Lala ka n yɛn niŋ ka Izraɛlnim’ chɛ bɛ kparima ni ŋumbu shɛli bɛ ni ŋumdi niŋdi ya sahakam maa.”

6Ka Musa daa yɛli Izraɛlnima, ka bɛ kpamba zaa daa bo jaaŋgbɛhi na ti ti o. Kpɛm’ kam jaaŋgbe’ yiniyini, ka di kalinli daa yiɣisi jaaŋgbɛhi pinaayi kaman bɛ dunoya ni daa nyɛ shɛm. Ka Aduna jaaŋgbee daa be bɛ jaaŋgbɛhi maa ni.

7Ka Musa daa zaŋ jaaŋgbɛhi maa sɔŋ Yawɛ tooni alikauli suɣili maa ni.

8Ka biɛɣu daa neei, ka Musa kpe suɣili maa ni nti nya ka Aduna jaaŋgbee din daa nyɛ Lɛvinim’ din’ la puhila vari, ka daai pum n-wali alimɔnd wal’ moma.

9Di saha ka Musa daa zaŋ jaaŋgbɛhi maa Yawɛ tooni yi Izraɛlnim’ zaa sani ka bɛ ti nya. Ka sokam daa yih’ o jaaŋgbee.

10Ka Yawɛ daa yɛli Musa, “Zaŋm’ Aduna jaaŋgbee maa labisi ti sɔŋ Alikauli Adaka maa tooni, ka di nyɛ shihirili duŋ taariba maa sani, ka a chɛ ka bɛ chɛ bɛ kparima ni ŋumdi niŋdi ma, di yi pa lala, bɛ ni kpi.”

11Ka Musa daa niŋ kaman Yawɛ ni zal’ o ni o niŋ shɛm maa.

12Di saha ka Izraɛlnim’ daa yɛli Musa, “Ti kpe yɔɣu, ti zaa ni kpi.

13Ŋunkam miri Yawɛ o biɛhigu shee ŋɔ yi ni kpi, dindina ti zaa kul kpimi maa.”

← Chapter 16 Jump to: Chapter 18 →