Numbers 13

Dagbani Bible (Naawuni Kundi Kasi)

← Chapter 12 Jump to: Chapter 14 →

1Ka Yawɛ daa yɛli Musa, “Timmi niriba ka bɛ chaŋ ti puɣisi nya Keenan tiŋgbɔn

2shɛli n ni zaŋ ti Izraɛlnim’ maa. Timmi bɛ zuliya kam puuni ninvuɣ’ yino ŋun nyɛ bɛ zuɣulana.”

3Ka Musa daa tim ba kaman Yawɛ ni daa zal’ o shɛm maa, ka bɛ daa yi Paran mɔɣu ni chaŋ. Bɛ zaa daa nyɛla Izraɛlnim’ zuɣulaannima.

4Bɛ yuya m-bɔŋɔ: Zakur bia Shammua, o daa yila Rubin zuliya ni na;

5ka Hɔri bia Shafat daa yi Simiɔn zuliya ni na;

6ka Jɛfune bia Kalɛb daa yi Juda zuliya ni na;

7ka Josɛf bia Igal daa yi Isaka zuliya ni na;

8ka Nan bia Hɔshia daa yi Ifriim zuliya ni na;

9ka Rafu bia Paliti daa yi Bɛnjamin zuliya ni na;

10ka Sɔdi bia Gaddiɛl daa yi Zɛbulɔn zuliya ni na;

11ka Susi bia Gaddi daa yi Josɛf zuliya ni na, (Manaasa zuliya ni n-daa bala);

12ka Gɛmalli bia Ammiɛl daa yi Dan zuliya ni na;

13ka Maikil bia Sɛtur daa yi Asha zuliya ni na;

14ka Vɔfisi bia Nabi daa yi Naftali zuliya ni na;

15ka Machi bia Gɛuɛl daa yi Gaad zuliya ni na.

16Musa ni daa tim ninvuɣ’ shɛb’ ni bɛ chaŋ ti puɣisi nya tiŋgbɔŋ maa yuya m-bala. Ka Musa daa taɣi Nan bia Hɔshia yuli Jɔshua.

17Ka Musa daa tim ba ni bɛ cham’ ti puɣisi nya Keenan tiŋgbɔŋ maa, ka yɛli ba, “Chamiya Nɛgɛb tooni ha n-gari chaŋ zoya ni tinsi ni

18nti nya tiŋgbɔŋ maa ni be shɛm, ka nya ninvuɣ’ shɛb’ bɛn be di ni lee nyɛla bɛn mali kpiɔŋ bee bɛ nyɛla ninvuɣ’ gbarima ka nya bɛ nyɛla bɛn galisi bee bɛn pɔra.

19Lihimiya nya bɛ ni be tiŋgbɔn shɛl’ ni maa nyɛla din viɛl’ bee din bie, ka nya bɛ ni be fɔntin’ shɛŋa ni lee nyɛla tin’ yari bee di nyɛla bɛ ni me goma gili shɛŋa.

20Ka lan lihi nya tiŋgbani maa vuhiri bee di nyɛla tiŋgban’ kpiŋ, ka nya tihi be di ni bee di kani. Niŋmiya suhukpeeni n-ʒi tiŋgbɔŋ maa ni tiwal’ shɛŋa na.” Wain tihi wal’ daŋda moobu saha n-daa bala.

21Ka bɛ daa chaŋ ti puɣisi nya tiŋgbɔŋ maa Zin mɔɣu ni zaŋ hal ti paai Rɛhɔb din daa miri Lɛbohamat la.

22Bɛ daa chaŋ Nɛgɛb n-zaŋ ti paai Hiburɔn, ka Ahiman mini Shɛshai ni Talimai bɛn daa nyɛ Anaki zuliya niriba la daa be nimaani. (Bɛ daa me Hiburɔn zali ka di niŋla yuma ayopɔin pɔi ka bɛ daa naanyi ti me Zɔan din be Ijipti la).

23Ka bɛ daa mali ti paai Ɛshikol vinvamli ni ŋ-ŋmaai nimaani wain tia wala yilli, ka niriba ayi zaŋ li pa dapua zuɣu buɣira; ka bɛ daa lan ʒi pumpɔrinchihi mini fiig tia wala gba na.

24Ka bɛ daa boli nimaani yuli Ɛshikol vinvamli, Izraɛlnim’ ni daa ŋmaai tiwala yilli nimaani maa zuɣu.

25Biɛɣ’ pihinahi ka bɛ daa zaŋ chaŋ ti puɣisi nya tiŋgbɔŋ maa ka labina.

26Ka bɛ daa ka Musa mini Aduna ni Izraɛlnim’ zaa sanna Kadɛshi Paran mɔɣu ni. Bɛ daa zaŋ bɛ chandi yɛtɔɣa n-yɛli bɛ mini niriba maa zaa, ka zaŋ tiŋgbɔŋ maa ni tiwala wuhi ba.

27Ka bɛ daa yɛli Musa, “Ti chaŋ a ni daa tim ti tiŋgbɔn shɛli maa ni, ka di tiŋgbani maa vuhira, di tiwala mi m-bɔŋɔ.

28Amaa ninvuɣ’ shɛb’ bɛn be tiŋgbɔŋ maa ni mali kpiɔŋ, ka bɛ fɔntinsi nyɛ tiŋ’ kara, ka bɛ me goma gil’ li, ka din pahi nyɛla, ti nya Anaki zuliya nimaani.

29Amalɛknima m-be Nɛgɛb tiŋgbɔŋ ni; ka Hitinim’ mini Jɛbusinim’ ni Amɔrinim’ be zoya ni tinsi ni; ka Keenannim’ mi ʒi m-baɣi teeku mini Jɔɔdɛn Mɔɣili.”

30Amaa ka Kalɛb daa chɛ ka niriba maa zaa fo baalim Musa tooni, ka o yɛli, “Chɛliya ka ti chaŋ yomyom ti deei tiŋgbɔŋ maa ʒini; dama ti ni tooi nyaŋ ba.”

31Di saha ka ninvuɣ’ shɛb’ bɛn min’ o daa chaŋ maa yɛli, “Ti ku tooi tuhi niriba maa, dama bɛ mali kpiɔŋ gari ti.”

32Lala ka bɛ daa ʒi lahiba’ biɛɣu na ti yɛli Izraɛlnima zaŋ chaŋ bɛ ni daa chaŋ ti puɣisi nya tiŋgbɔn shɛli maa polo n-yɛra, “Tiŋgbɔn shɛli ti ni chaŋ ti puɣisi nya maa nyɛla tiŋgbɔn shɛli din diri di niriba; ka ti ni nya ninvuɣ’ shɛb’ zaa nimaani nyɛla wɔɣiri jɛmpɔna.

33Ka ti daa lan nya Nɛfilimnima (bɛn nyɛ Anaki zuliya bɛn daa yi Nɛfilim na la); ka tinim’ ŋmanila sakɔri bɛ sani. Lala n-shiri nyɛ ti bɛ sani.”

← Chapter 12 Jump to: Chapter 14 →